“Ẹsan̄a ẹkpere Abasi, ndien enye ayasan̄a ekpere mbufo.”—James 4:8
Ndi Abasi Esikop Akam Nnyịn?
Ndi akanam emekere m̀mê Abasi esikam akpan̄ utọn̄ ke ini ọbọn̄de akam? Edieke edide ntre, fiọk ete ke idịghe afo ikpọn̄ esikere utọ n̄kpọ oro. Ediwak owo ẹsibọn̄ akam ẹnọ Abasi ẹban̄a mfịna mmọ, kpa ye oro mfịna mmọ isụk ikụreke. Ndi oro ọwọrọ ke Abasi isikpan̄ke utọn̄ ke ini ibọn̄de akam? Iwọrọke ntre! Bible ọdọhọ ke Abasi esikpan̄ utọn̄ edieke ibọn̄de akam inọ enye ke nnennen usụn̄. Yak ineme se Bible etịn̄de.
ABASI ESIKPAN̄ UTỌN̄ KE INI IBỌN̄DE AKAM.
“O Andikop akam, kpukpru obụkidem ẹyedi ẹbịne fi.”—Psalm 65:2.
Kpa ye oro ndusụk owo mînịmke ke Abasi esikpan̄ utọn̄ ọnọ mmimọ, mmọ ẹsibọn̄ akam sia ẹnịm ke oro esinam afiak efere mmimọ ke idem man ikeme ndiyọ mfịna mmimọ. Edi idịghe ntak emi ikpesibọn̄de akam edi oro. Bible ọdọhọ ete: “Jehovaha emekpere kpukpru mbon oro ẹsemede ẹkot enye, emekpere kpukpru mbon oro ẹsemede ẹkot enye ke akpanikọ. . . . Enye oyokop eseme emi mmọ ẹsemede ẹyom un̄wam.”—Psalm 145:18, 19.
Ntem, imenịm ke Jehovah Abasi esikop akam ikọt esie. Enye ọdọhọ ete: “Mbufo ẹyekot mi ẹnyụn̄ ẹdi ẹdibọn̄ akam ẹnọ mi, ami nyonyụn̄ n̄kpan̄ utọn̄ nnọ mbufo.”—Jeremiah 29:12.
ABASI OYOM ISIBỌN̄ AKAM INỌ IMỌ.
“Ẹkọbọ ke akam.”—Rome 12:12.
Bible ọdọhọ ‘ika iso ndibọn̄ akam,’ afiak ọdọhọ ‘ibọn̄ akam kpukpru ini.’ Emi owụt ke Jehovah Abasi oyom isibọn̄ akam inọ imọ.—Matthew 26:41; Ephesus 6:18.
Ntak emi Abasi oyomde nnyịn isibọn̄ akam inọ imọ? Kere ise: Ndi isinemke ete ndikop eyen esie ọdọhọde enye an̄wam imọ? Esinem. Ete eyen ekeme ndidiọn̄ọ nte etiede eyen esie ke idem ye se eyen esie oyomde, edi ke ini enye okopde eyen esie ọdọhọde enye an̄wam imọ, oro esinam enye ọdiọn̄ọ ke eyen oro enịm ke imọ imekeme ndin̄wam enye, ke eyen oro onyụn̄ ama imọ. Kpasụk ntre, ke ini ibọn̄de akam inọ Jehovah Abasi, nnyịn iwụt enye ke imenịm ke enye ekeme ndin̄wam nnyịn, ke imonyụn̄ ima enye.—Mme N̄ke 15:8; James 4:8.
ABASI EKERE ABAN̄A FI.
“[Ẹtop] kpukpru editịmede esịt mbufo ẹdori enye ke idem, koro enye ekerede aban̄a mbufo.”—1 Peter 5:7.
Abasi oyom nnyịn ibọn̄ akam inọ imọ sia enye ama nnyịn onyụn̄ ekere aban̄a nnyịn. Enye ọdiọn̄ọ kpukpru se ifịnade nnyịn ye se inamde esịt etịmede nnyịn, onyụn̄ oyom ndin̄wam nnyịn.
Toto ke ini emi Edidem David ekedide eyenọwọn̄, enye ama esibọn̄ akam ọnọ Jehovah Abasi onyụn̄ etịn̄ se enye ekerede ye nte etiede enye ke idem ọnọ Jehovah. (Psalm 23:1-6) Abasi akada David didie? Abasi ama enen̄ede ama David onyụn̄ okop ediwak akam emi David ọkọbọn̄de ọnọ enye. (Utom 13:22) Kpasụk ntre, Abasi esikpan̄ utọn̄ ke ini ibọn̄de akam sia enye ama nnyịn.
‘JEHOVAH OKOP ESEME MI’
Owo kiet emi eketienede ewet Psalm ke Bible eketịn̄ ikọ oro. Enye ama enịm ke Abasi esikop akam imọ, ndien oro ama anam enye enen̄ede ekpere Abasi. Abasi ama onyụn̄ an̄wam enye ekeme ndiyọ se ikọwọrọde enye.—Psalm 116:1-9.
Edieke inịmde ke Abasi esikop akam nnyịn, iyaka iso ndibọn̄ akam nnọ enye. Da se iketịbede inọ Pedro, emi odụn̄de ke Spain, ke uwụtn̄kpọ. Eyen esie emi ekedide isua 19 ama akpa ke aksiden. Pedro ama etịn̄ nte eketiede enye ke idem ọnọ Abasi onyụn̄ eben̄e enye ediwak ini ete ọdọn̄ imọ esịt onyụn̄ an̄wam imọ. Nso iketịbe? Pedro ọdọhọ ete, “Jehovah ama ọbọrọ akam mi. Enye akada nditọete ke esop esie ọdọn̄ mi ye n̄wan mi esịt.”
Abasi esibọrọ akam nnyịn ke ini enye anamde mme ufan nnyịn ẹn̄wam nnyịn ẹnyụn̄ ẹdọn̄ nnyịn esịt
Kpa ye oro akam mîkanamke eyen Pedro eset, akam ama enen̄ede an̄wam enye ye ubon esie. N̄wan esie emi ekerede María Carmen ọdọhọ ete: “Akam ama enen̄ede an̄wam mi ke ini n̄kofụhọde n̄kpa eyen mi. Mma mfiọk ke Jehovah Abasi ọdiọn̄ọ nte etiede mi ke idem. Ke ini n̄kọbọn̄de akam nnọ enye, esịt iketịmekede mi aba.”
Bible ọdọhọ ke Abasi esikop akam nnyịn. Mme owo ẹnyịme n̄ko ke enye esikop akam mmimọ. Edi idịghe kpukpru akam ke Abasi esibọrọ. Ntak emi Abasi esibọrọde ndusụk akam, edi ibọrọke ndusụk?
a Bible ọdọhọ ke Abasi ekere Jehovah.—Psalm 83:18.