Mme Mbụme Oro Mme Andikot Ẹbụpde
Nso ke ikọ Jesus ọkọwọrọ ini enye ọkọdọhọde ete: “Ẹkûkere ẹte n̄kedi ndisịn emem”?
Jesus ekekpep mme owo ndidu ke emem ye mbon efen. Edi enyene ini emi enye ọkọdọhọde mme apostle esie ete: “Ẹkûkere ẹte n̄kedi ndisịn emem ke isọn̄; n̄kedịghe ndisịn emem, edi n̄kedi ndisịn akan̄kan̄. Koro n̄kedi nditọ ubahade, nnam owo an̄wana ye ete esie, nnyụn̄ nnam eyenan̄wan an̄wana ye eka esie, nnyụn̄ nnam n̄wan eyen an̄wana ye eka ebe esie.” (Matt. 10:34, 35) Nso ke ikọ Jesus oro ọkọwọrọ?
Idịghe nte Jesus ikoyomke mme ubon ẹdiana kiet, edi enye ama ọdiọn̄ọ ke se imọ ikpepde ayanam ndusụk ubon idianake kiet. Ntre ana mbon oro ẹyomde ndidi mbet Christ ẹnyụn̄ ẹyomde ndina baptism ẹdiọn̄ọ ke ekeme ndinam mbonubon mmimọ idinemke esịt ke se mmimọ imekde ndinam oro. N̄ko edieke ebe, n̄wan, m̀mê mbonubon eken oro mîdịghe Mme Ntiense Jehovah ẹkọbọde mmọ, ekeme ndisọn̄ mmọ ndika iso nnam se Christ ekekpepde.
Bible ọdọhọ mme Christian “ẹtie ke emem ye kpukpru owo.” (Rome 12:18) Edi se Jesus ekekpepde ekeme nditie nte “akan̄kan̄” ke ndusụk ubon. Emi esitịbe ke ini owo ke ubon enyịmede ukpepn̄kpọ Jesus ndien mbon eken ke ubon inyịmeke. Ama etịbe ntre, mbonubon ẹdikabade “mme asua” owo oro ekpepde akpanikọ do.—Matt. 10:36.
Ndusụk ini, mme mbet Christ oro ẹdụn̄de ke ubon emi ẹkade nsio nsio ido ukpono ana ẹbiere m̀mê idinem Jehovah ye Jesus esịt m̀mê idinem mbonubon mmimọ. Ke uwụtn̄kpọ, mbonubon mmọ oro mîdịghe Mme Ntiense Jehovah ẹkeme ndidọhọ mmọ ẹtiene ẹdia utọ usọrọ nte Christmas m̀mê Easter. Ama etịbe ntre, anie ke mmọ ẹdinem esịt? Jesus ọkọdọhọ: “Owo eke amade ete m̀mê eka akan mi idotke ye ami.” (Matt. 10:37) Edi ikọ Jesus ikọwọrọke yak mme mbet imọ ẹkûnen̄ede ẹma ete ye eka mmọ. Enye ekekpep mmọ ndibiere se idide akpan n̄kpọ ikan ke uwem mmọ. Edieke mbonubon nnyịn oro mîdighe Mme Ntiense Jehovah ẹkọbọde nnyịn, iyaka iso ima mmọ. Edi ana idiọn̄ọ ke Abasi ke idima ikan.
Imọdiọn̄ọ ke mbonubon nnyịn ndikọbọ nnyịn ekeme ndinam inen̄ede ifụhọ. Edi ana mme mbet Jesus ẹti ke Jesus ọkọdọhọ: “Owo ekededi eke mîbiomke eto ndutụhọ esie itiene mi idotke ye ami.” (Matt. 10:38) Ikọ ọwọrọ ke mme Christian ẹda ke mbonubon mmimọ ndikọbọ mmimọ esịne ke otu mme n̄kpọ emi anade mme mbet Christ ẹyọ. Kpa ye oro, mmọ ẹdori enyịn ke eti uwem mmimọ ekeme ndinam mbonubon mmimọ emi mîdịghe Mme Ntiense Jehovah ẹtre ndikọbọ mmimọ ẹnyụn̄ ẹyom ndikpep Bible.—1 Pet. 3:1, 2.