Tetịm Ma Jehovah ye Mbon En̄wen

1. Nso ye nso ke ekekpep ini ọtọn̄ọde-tọn̄ọ ndikpep Bible?

NDI emeti kpukpru se ekekpepde ini ọtọn̄ọde-tọn̄ọ ndikpep Bible? Anaedi idem ama akpa fi ndidiọn̄ọ ke Abasi enyene enyịn̄. Ekeme ndidi ke ama okokop ke Abasi idọn̄ke mme owo ke hell itụhọde, ama en̄wek ọduọk. Anaedi ama enem fi n̄ko ndidiọn̄ọ ke ayafiak okụt mbon mbufo emi ẹma ẹkekpa, ke mbufo ẹyedụn̄ kiet ke Paradise ke isọn̄ emi.

2. Ke ama ọkọdiọn̄ọ mme n̄kpọ emi Bible ekpepde, nso efen ke ekesịn idem anam ọfọn akan akpa? (Ephesus 5:1, 2)

² Nte ekesịnde idem ekpep Ikọ Abasi, ntre ke eketetịm ama Jehovah. Ima oro akanam anam mme n̄kpọ emi ekekpepde. Ama ada mme item emi ẹdude ke Bible ebiere se akpanamde, se ekebierede ama onyụn̄ ọfọn akan nte ekesidide. Ama ọtọn̄ọ ndikere nnyụn̄ nnam nnennen n̄kpọ sia okoyom ndinem Abasi esịt. Ukem nte eyenọwọn̄ esikpebede ete m̀mê eka esie emi amade enye, ama ekpebe Ete fo emi odude ke heaven.​—Kot Ephesus 5:1, 2.

3. Mme mbụme ewe ke ikeme ndibụp idem nnyịn?

³ Imekeme ndibụp idem nnyịn ite: ‘Ndi mmama Jehovah idahaemi n̄kan ini n̄kedide Christian obufa? Tọn̄ọ n̄kana baptism, ndi nte n̄kerede n̄kpọ ye nte nnamde n̄kpọ ẹnen̄ede ẹbiet nte Jehovah ekpekerede onyụn̄ anamde, akpan akpan ke usụn̄ emi n̄wụtde ke mmama nditọete?’ Ekpedi “akpa ima emi afo ekenyenede” ifiopke aba nte ekesifiopde, kûyak idem emem fi. Mbiet n̄kpọ oro ama etịbe ọnọ mme Christian eyo mme apostle. Jesus ikeyetke ubọk ikpọn̄ mmọ ke ntak oro, enye idinyụn̄ iyetke ubọk ikpọn̄ nnyịn. (Edi. 2:4, 7) Enye ọdiọn̄ọ ke ima nnyịn ekeme ndifiak mfiop nte ekedide nsonso oro ikedide Christian.

4. Idineme nso ke ibuotikọ emi?

⁴ Ke ibuotikọ emi, imọn̄ ineme se ikpanamde man itetịm ima Jehovah ye mbon en̄wen. Ekem iyeneme ndusụk nti n̄kpọ emi ẹditịbede ima inam ntre.

TETỊM MA JEHOVAH

5-6. (a) Mme mfịna ewe ke apostle Paul ekenyene ini enye osụk anamde n̄kpọ Abasi? (b) Nso ikan̄wam enye okûtre?

⁵ Apostle Paul ama okop inem utom Abasi etieti, edi ikesimemke inọ enye ndusụk ini. Ediwak itie emi Paul ekesikade akanam n̄kpọ Abasi ama oyom usụn̄ etieti, ndien ndika isan̄ ini oro ikedịghe ekpri n̄kpọ. Ke usụn̄ isan̄ oro, ndusụk ini apostle Paul ama esisobo “n̄kpọndịk ke akpa” ye “ke ubọk mbon n̄wo.” Ndusụk ini mbon emi ẹkesuade se enye akanamde ọnọ Abasi ẹma ẹsitịm enye. (2 Cor. 11:23-27) N̄kpọ efen edi ke idịghe kpukpru ini ke nditọete ẹkesikọm Paul ke se enye ekesisiode ofụri esịt anam ọnọ mmọ.​—2 Cor. 10:10; Phil. 4:15.

⁶ Nso ikan̄wam Paul okûtre ndinam n̄kpọ Abasi? Se idude ke N̄wed Abasi ye se iketịbede inọ enye Paul ke idemesie ẹma ẹkpep enye ediwak n̄kpọ ẹban̄a Jehovah. Paul ama enịm ke Jehovah Abasi ama imọ. (Rome 8:38, 39; Eph. 2:4, 5) Enye ama onyụn̄ ama Jehovah etieti. Paul okowụt oro ke enye ‘ndinam n̄kpọ nnọ ndisana owo nnyụn̄ nsụk n̄ka iso nnam.’​—Heb. 6:10.

7. Nso idi n̄kpọ kiet emi ekemede ndinam itetịm ima Jehovah?

⁷ Nnyịn nditịn̄ enyịn n̄kpep Ikọ Abasi ekeme ndin̄wam nnyịn itetịm ima Abasi. Nte osụk okotde Bible, domo ndikụt se itie emi okotde ekpepde fi aban̄a Jehovah. Bụp idemfo: ‘Didie ke mbụk emi anam n̄kụt ke Jehovah ama mi? Nso ye nso ke n̄kụt do emi akpanamde mma Jehovah?’

8. Didie ke akam ekeme ndin̄wam nnyịn itetịm ima Abasi?

⁸ N̄kpọ efen emi ekemede ndinam itetịm ima Jehovah edi nnyịn ndisibọn̄ akam nnọ enye kpukpru usen, inyụn̄ itịn̄ nte etiede nnyịn ke idem inọ enye. (Ps. 25:4, 5) Jehovah ọyọbọrọ utọ akam oro. (1 John 3:21, 22) Sista Khanh emi odụn̄de ke Asia ọdọhọ ete: “Akpa akpa, se n̄kọdiọn̄ọde mban̄a Jehovah akanam mma enye. Edi ke ini n̄kụtde nte enye ọbọrọde mme akam mi, mma ntetịm mma enye. Oro akanam ọdọn̄ mi ndisinam se inemde enye esịt.”b

TETỊM MA MBON EN̄WEN

9. Nso iwụt ke Timothy ama ama nditọete etieti?

⁹ Ke isua ifan̄ ama ekebe tọn̄ọ Paul akakabade Christian, enye ama osobo akparawa kiet emi ekenyenede ido. Akparawa oro ekekere Timothy. Timothy ama ama Jehovah onyụn̄ ama mme owo. Paul ọkọdọhọ nditọete ke Philippi ete: “Nnyeneke owo en̄wen eke enyenede edu emi ebietde [eke Timothy], emi editịmde ese aban̄a mme n̄kpọ oro ẹban̄ade mbufo.” (Phil. 2:20) Idịghe nte Timothy ekesitịmde n̄kpọ ke nde ke nde m̀mê nte enye ekekemede ndinọ utịn̄ikọ akanam Paul etịn̄ ikọ oro. Se ikụtde ke ikọ Paul oro owụt ke Paul ama okụt ke Timothy ama nditọete etieti. Imenịm ke ekesidi mme esop ẹma ẹkop ke Timothy ke edi, enye ọdọn̄ mmọ ndikụt enye.​—1 Cor. 4:17.

10. Didie ke Anna ye ebe esie ẹkewụt ke imama nditọete?

¹⁰ Nnyịn n̄ko imesiyom nsio nsio usụn̄ ndin̄wam nditọete nnyịn. (Heb. 13:16) Yak inọ mbufo mbụk Anna emi ima iketetịn̄ iban̄a ke ibuotikọ emi ekebede. Ke oyobio kiet emi akabiatde n̄kpọ ama eketre, enye ye ebe esie ẹma ẹkese ubon kiet emi ẹkedide Mme Ntiense Jehovah ẹnyụn̄ ẹkụt ke oyobio oro ama abiat ọkọm ufọk mmọ, mmọn̄ onyụn̄ oto do ọdọn̄ọ ufọk oro. Ke ntak oro, ubon oro ikenyeneke nsasana ọfọn̄ ndomokiet se ẹsịnede. Anna ọdọhọ ete: “Ima itan̄ mme ọfọn̄ mmọ ikeyet, ikwọhọde, ikpan̄, ifiak itan̄ isọk mmọ. Ke enyịn nnyịn ekpri n̄kpọ ke ikanam oro, edi n̄kpọ oro anam nnyịn ye ubon oro idi itai ye aban̄ tutu emi.” Nte Anna ye ebe esie ẹkemade nditọete akanam mmọ ẹn̄wam ubon oro.​—1 John 3:17, 18.

11. (a) Esitie mbon en̄wen didie ima iwụt ke imama mmọ? (b) Mme N̄ke 19:17 ọdọhọ ke nso ke Jehovah edinam ima iwụt ke imama mbon en̄wen?

¹¹ Ima ima mbon en̄wen inyụn̄ ifọn ido ye mmọ, mmọ ẹsikụt ke nnyịn ke idomo ndikpebe Jehovah. Se inamde inọ mmọ ekeme ndinem mmọ n̄kan nte ikekerede. Khanh emi ima iketetịn̄ iban̄a eti mbon emi ẹken̄wamde enye. Enye ọdọhọ ete: “Mmọkọm Abasi etieti ke kpukpru ndima nditọete iban emi ẹkesimende mi ẹka ukwọrọikọ. Mmọ ẹkesidedi ufọk ẹdimen mi. Mmọ ẹkpeyom ndikoyom ekpri n̄kpọ mbịt itọn̄ m̀mê ndidia udia uwemeyo, mmọ ẹma ẹsitiene ẹkot mi. Ẹma ẹsinyụn̄ ẹmen mi ẹkeyak ke ufọk. Idahaemi ke ndidiọn̄ọ ke kpukpru se mmọ ẹkenamde oro ikedịghe ekpri utom. Mmọ ẹkenam ye idatesịt.” Imọdiọn̄ọ ke idịghe kpukpru owo ẹdikọm nnyịn ke se inamde inọ mmọ. Khanh etịn̄ ntem aban̄a mbon emi ẹken̄wamde enye: “Ọdọn̄ mi nte n̄kpọfọnde mmọ usiene mfọn emi mmọ ẹkefọnde mi, edi ndiọn̄ọke aba ebiet emi kpukpru mmọ ẹdụn̄de. Jehovah ọdiọn̄ọ, akam mi onyụn̄ edi yak enye ọdiọn̄ mmọ ọnọ mi.” Khanh etịn̄ akpanikọ. Jehovah okụt kpukpru se inamde inọ mbon en̄wen ọkpọkọm edi ata ekpri ntem. Enye idaha n̄kpọ oro ke ekpri n̄kpọ, oyonyụn̄ ọnọ nnyịn usiene.​—Kot Mme N̄ke 19:17.

12. Didie ke nditọete irenowo ẹkpewụt ke imama mbon en̄wen ke esop? (Se mme ndise n̄ko.)

¹² Ekpedi edi eyenete erenowo, didie ke okpowụt nditọete ke amama mmọ? Didie ke okponyụn̄ an̄wam mmọ? Akparawa kiet emi ekerede Jordan ama obụp ebiowo m̀mê nso efen ke imọ ikpanam in̄wam nditọete ke esop. Ebiowo oro ama ọkọm enye ke mme n̄kpọ emi enye ama akananam, onyụn̄ eteme enye mme n̄kpọ efen emi enye akpanamde. Ke uwụtn̄kpọ, enye ama ọdọhọ Jordan esibak edi mbono esop edikọm nditọete, esibọrọ mbụme, esiwak nditiene mbon otu an̄wautom mmọ n̄ka ukwọrọikọ, onyụn̄ oyom mme n̄kpọ emi enye ekemede ndinam n̄n̄wam nditọete. Ini Jordan akanamde item oro, enye ama ekpep mbufa n̄kpọ, onyụn̄ etetịm ama nditọete. N̄kpọ efen emi Jordan ekekpepde edi ke eyenete erenowo ama akabade asan̄autom unamutom, ke idịghe ini oro ke enye esitọn̄ọ ndin̄wam nditọete, utu ke oro ke enye esikam akaka iso anam se enye ama ekesinanam.​—1 Tim. 3:8-10, 13.

13. Didie ke ima akan̄wam Brọda Christian afiak odot ndidi ebiowo?

¹³ Ndusụk nditọete irenowo ẹkesidi mme asan̄autom unamutom m̀mê mbiowo, edi idịghe aba. Ndi esịne ke otu oro? Jehovah eti kpukpru se akanamde ọnọ enye ini oro, ye ima emi akanamde fi anam mme n̄kpọ oro. (1 Cor. 15:58) Enye okụt n̄ko nte osụk akade iso owụt ke amama enye ye nditọete. Esịt ikenemke Brọda Christian ini ẹkebọde enye ebiowo. Edi enye ọdọhọ ete: “Mma mbiere ndinam se n̄kekeme nnọ Jehovah ke ntak emi mmade enye, m̀mê ndi ebiowo m̀mê ndịghe.” Aka ko, ẹma ẹfiak ẹmek enye ebiowo. Christian ọdọhọ ete: “Nsonso oro, idem ama enyek mi ndifiak ndi ebiowo. Edi mma ndọhọ idemmi ke edieke Jehovah atuade mi mbọm afiak ayak ndi ebiowo, ke nyedi ke ntak emi mmade enye ye ke ntak emi mmade nditọete mi.”

14. Nso ke ekpep oto se sista kiet ke Georgia etịn̄de?

¹⁴ Ikọt Jehovah ẹsima mbọhọidụn̄ mmọ n̄ko. (Matt. 22:37-39) Kop se Sista Elena ke Georgia etịn̄de. Enye ọdọhọ ete: “Akpa akpa, ima emi mmade Jehovah ekesidi n̄kukụre ntak emi ekesinamde n̄kwọrọ ikọ. Edi nte n̄ketịmde mma Ete mi emi odude ke heaven, ntre ke n̄ketetịm mma mbon en̄wen. Mma nsidomo ndikere mban̄a mfịna emi mmọ ẹnyenede ye se n̄kpọkwọrọde yak odụk mmọ esịt. Nte n̄kesiwakde ndikere n̄kpọ ntem, ntre ke eketetịm ọdọn̄ mi ndin̄wam mmọ.”​—Rome 10:13-15.

NTI N̄KPỌ EMI ẸDITỊBEDE IMA IMA MBON EN̄WEN

15-16. Nso ke ikụt ke ndise emi owụtde nti n̄kpọ emi ẹsitịbede ima iwụt ke imama mbon en̄wen?

¹⁵ Ima iwụt nditọete nnyịn ke imama mmọ, idịghe mmọ kpọt ẹsidia ufọn. Ini udọn̄ọ COVID-19 emi ekesịmde ofụri ererimbot ọkọtọn̄ọde, Brọda Paolo ye n̄wan esie ẹma ẹn̄wam ediwak nditọete iban emi ẹma ẹkekpon owo ẹdiọn̄ọ nte ẹkpekamade fon, tablet, m̀mê kọmputa mmọ ẹkwọrọ ikọ. Enyene sista kiet emi n̄kpọ oro ọkọsọn̄de enye ntem nsonso oro, edi aka ko, enye ama edidiọn̄ọ. Enye ama ekeme ndida eke esie n̄kot iman esie Editi. Iman esie 60 ẹma ẹda Intanet ẹdụk Editi! Se Paolo ye n̄wan esie ẹkenamde ikan̄wamke sista oro kpọt-o, ama an̄wam iman esie n̄ko. Aka ko, sista oro ama ewet leta ọnọ Paolo ete: “Sọsọn̄ọ etieti nte ekpepde nnyịn emi ima ikokpon owo se ikpanamde. Ndifreke nte Jehovah ekerede aban̄a nnyịn, ndinyụn̄ mfreke kpukpru se afo akanamde an̄wam nnyịn.”

¹⁶ Mme n̄kpọ ntre ẹma ẹkpep Paolo ata akpan n̄kpọ. Enye ama eti ke ndima mbon en̄wen edi akpan n̄kpọ akan ifiọk emi inyenede m̀mê se ikemede ndinam. Enye ọdọhọ ete: “N̄kesidi esenyịn circuit. Edi mfịn, se n̄kụtde edi ke nditọete ẹkeme ndifre mme utịn̄ikọ emi n̄kesinọde edi mmọ idifreke nte n̄kan̄wamde mmọ.”

17. Anie editiene adia ufọn ima iwụt ke imama mbon en̄wen?

¹⁷ Ima iwụt mbon en̄wen ke imama mmọ, nnyịn ke idem nnyịn imesidia ufọn ke usụn̄ emi nnyịn mîkekereke. Jonathan emi odụn̄de ke New Zealand ọdọhọ ke ikọ oro edi akpanikọ. Uwemeyo Saturday usen kiet, enye ama okụt asiakusụn̄ asan̄ade ikpọn̄ ọkwọrọ ikọ ke nainai eyo usen oro. Jonathan ama ebiere ke imọ iyesisan̄a ye enye uwemeyo Saturday. Ini oro enye ikọdiọn̄ọke ufọn emi imọ ididiade ke un̄wam emi imọ in̄wamde asiakusụn̄ oro. Jonathan ọdọhọ ete: “Ini oro n̄kesimaha ukwọrọikọ. Edi nte n̄kakpan̄de utọn̄ n̄kop nte asiakusụn̄ oro ekpepde mme owo Ikọ Abasi nnyụn̄ n̄kụt nte enye okụtde ibuot ke se enye anamde, mma ntọn̄ọ ndima ukwọrọikọ. Brọda oro ama akabade edi ata ufan mi, onyụn̄ an̄wam mi mma ukwọrọikọ nnyụn̄ ntetịm n̄kpere Jehovah.”

18. Nso ke Jehovah oyom inam?

¹⁸ Jehovah oyom kpukpru nnyịn itetịm ima enye ye mbon en̄wen. Imekpekpep ke edieke isikotde Ikọ Abasi, itie ikere se ikotde, inyụn̄ ibọn̄ akam kpukpru ini inọ Jehovah ke iyetetịm ima enye. Edieke isin̄wamde nditọete nnyịn, iyetetịm ima mmọ. Ndien nte itịmde ima Jehovah ye nditọete nnyịn, iyetetịm ikpere mmọ, iyonyụn̄ idi ufan mmọ ke nsinsi nsinsi!