Nte Ẹkekemede Ndifen Idiọkn̄kpọ Mbemiso Ẹkpede Ufak

Jesus akakpa ọduọk iyịp esie man ẹfak nnyịn. Iyịp oro edi n̄kukụre n̄kpọ emi ẹdade ẹfen idiọkn̄kpọ nnyịn. (Eph. 1:7) Edi Bible ọdọhọ ke “[Abasi] ama efen mme idiọkn̄kpọ emi ẹkenamde ke ini edem ke adan̄aemi [enye] ekemede ime,” oro edi, ke enye ama esifen mme idiọkn̄kpọ mbemiso Jesus ekekpede ufak. (Rome 3:25) Didie ke Jehovah ekekeme ndinam oro, edi osụk ededi Abasi unenikpe?

Ndondo emi Jehovah ekebierede ndinọ “mfri” emi edinyan̄ade mbon emi ẹbuọtde idem ye Enye ẹnyụn̄ ẹnịmde ke Enye ayanam se Enye ọn̄wọn̄ọde, ke enyịn Jehovah eketie nte ẹma ẹkpekpe ufak. (Gen. 3:15; 22:18) Abasi ama enen̄ede enịm ke ini ama ekem, ke idụhe se idikpande ikpọn̄-ikpọn̄ edibon Eyen imọ ndidikpe ufak. Edidi n̄kpọ emi enye enyịmede ndinam, owo ituaha-tua ikpe enye ubọk. (Gal. 4:4; Heb. 10:7-10) Ini Jesus okodude mi ke isọn̄, enye akada ke ibuot Abasi. Ntre Jehovah ama ọnọ enye odudu ndifen idiọkn̄kpọ mme owo mbemiso ẹkekpede ufak. Jesus ama ekeme ndifen idiọkn̄kpọ mbon emi ẹkenyenede mbuọtidem sia enye ama ọdiọn̄ọ ke n̄kpa emi imọ idikpade ifak mme owo eyekem se ẹdade ẹfụk idiọkn̄kpọ mmọ.​—Matt. 9:2-6.