Ufak Owụt Edinen Ido Abasi
KE Adam ye Eve ẹma ẹkesọn̄ ibuot, Jehovah ama ọn̄wọn̄ọ ke iyọnọ Mfri, ndien ke ẹyenuak enye nditịn̄ikpat. (Genesis 3:15) Emi ama osu ke ini mme asua Abasi ẹkewotde Jesus Christ ke eto ndutụhọ. (Galatia 3:13, 16) Sia edisana spirit akanamde n̄wan oro mîfiọkke erenowo oyomo Jesus ke utịbe utịbe usụn̄, Jesus ikenyeneke idiọkn̄kpọ. Ntre, ẹkeme ndida iyịp oro enye ọkọduọkde mfak ubonowo, oro ẹkedade idiọkn̄kpọ ye n̄kpa ẹmana ẹto Adam.—Rome 5:12, 19.
Idụhe se ikemede nditre ata ọkpọsọn̄ Abasi, Jehovah, ndifak ubonowo. Ntem, ke owo ama akanam idiọkn̄kpọ, eketie Jehovah nte ke ẹma ẹkpekpe ufak oro ndien enye ama ekeme ndinam n̄kpọ ye mbon oro ẹkenyenede mbuọtidem ke mme un̄wọn̄ọ esie ẹyesu. Emi ama anam mme anamidiọk nditọ Adam, utọ nte Enoch, Noah, ye Abraham ẹkeme ndisan̄a ye Abasi onyụn̄ anam Abasi ekeme ndidi ufan mmọ ye unana edibiat edisana idaha Esie.—Genesis 5:24; 6:9; James 2:23.
Ndusụk mbon oro ẹkebuọtde idem ye Jehovah ẹma ẹnam ikpọ idiọkn̄kpọ. Owo kiet ke otu mmọ ekedi Edidem David. Afo emekeme ndibụp ete, ‘Ntak emi Jehovah akakade iso ọdiọn̄ Edidem David ke David ama ekesịn efịbe ye Bath-sheba onyụn̄ anam ẹwot Uriah ebe esie?’ Ata akpan ntak ekedi koro David ama enen̄ede akabade esịt onyụn̄ enyene mbuọtidem. (2 Samuel 11:1-17; 12:1-14) Sia Jesus Christ ekenyenede ndiwa uwem esie, Abasi ama enen ndida ndutịm emi mfen David sia enye ama akakabarede esịt. (Psalm 32:1, 2) Man ọsọn̄ọ emi, Bible anam an̄wan̄a ata utịbe utịbe n̄kpọ oro ufak Jesus anamde, oro edi “man ẹwụt edinen ido [Abasi], koro enye ama efen mme idiọkn̄kpọ emi ẹkenamde ke ini edem” ye “ke ini emi.”—Rome 3:25, 26.
Ih, iyịp Jesus ọnọ ubonowo akakan ufọn. Ufak ayanam mme anamidiọk oro ẹkabarede esịt ẹkeme ndinyene n̄kpet n̄kpet itie ebuana ye Abasi. Ke adianade do, ufak emi ayanam mme akpan̄kpa ẹset ẹdidu uwem ke obufa ererimbot Abasi. Mbon oro ẹdisetde ẹyesịne mme anam-akpanikọ asan̄autom Abasi oro ẹkekpan̄ade mbemiso Jesus ekekpede ufak oro. Idem mbon oro mîkenyeneke ifiọk Abasi mîkonyụn̄ ituakke ibuot inọ Enye mbemiso ẹkpan̄ade, ẹyeset. Bible ọdọhọ ete: “Ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Ini oro, Jehovah ayada ufak Christ ọnọ ofụri okopitem ubonowo nsinsi uwem. (John 3:36) Jesus ke idemesie ama anam an̄wan̄a ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Uwa ufak oro Abasi ọnọde edinam ubonowo ọbọ kpukpru ufọn emi.
Nte ededi, ata n̄wọrọnda n̄kpọ aban̄ade ufak oro ikam idịghe ufọn oro nnyịn ibọde ito enye. Se inen̄erede idi akpan n̄kpọ ikan akam edi se ufak oro Christ ọnọde anamde ọnọ enyịn̄ Jehovah. Ufak oro owụt ke Jehovah edi Abasi oro enende ke ikpe—kpa enye emi ekemede ndinam n̄kpọ ye mme anamidiọk edi ibiatke edisana idaha esie. Ke Abasi mîkpakanamke ndutịm ndinọ ufak oro, baba eyen Adam kiet, idem Enoch, Noah, ye Abraham, ikpekekemeke ndisan̄a ye Jehovah m̀mê ndidi ufan esie. Andiwet psalm ama ọfiọk emi onyụn̄ ewet ete: “O Jehovah, afo ekpese mme idiọk ido, O Ọbọn̄, anie ekpekeme ndida?” (Psalm 130:3) Nnyịn ikpenyene ndinen̄ede n̄kọm Jehovah ke ndikọnọ edima Eyen esie edi isọn̄, inyụn̄ ikọm Jesus n̄ko ke ndikenyịme ndida uwem esie mfak nnyịn.—Mark 10:45.