Mme Mbụme Oro Mme Andikot Ẹbụpde
Ndi ikọ emi, “Afo eyekpeme mmọ” ke Psalm 12:7 ada aban̄a “mbon ukụt” (ke ufan̄ikọ 5) m̀mê “ikọ Jehovah” (ke ufan̄ikọ 6)?
Mme n̄kpọ emi ẹtịn̄de mbemiso ikọ oro ye ke ẹma ẹketịn̄ ẹma ẹwụt ke aban̄a mme owo.
Psalm 12:1-4 ọdọhọ ke “mbon oro ẹnamde akpanikọ ẹmekụre ke otu nditọ owo.” Ekem ufan̄ikọ 5 esịm 7 kpa ke Psalm 12 oro, emi anamde ẹbụp mbụme oro ọdọhọ ntem:
“‘Ke ntak emi ẹbụmede mbon ukụt, ke ntak eseme mme ubuene,
Ami nyadaha nda ke emi,’ ntem ke Jehovah ọdọhọ.
‘Ami nyekpeme enye nsio ke ubọk owo ekededi oro asakde enye nsahi.’
Ikọ Jehovah edi edisana ikọ,
Nte silver emi ẹtarade ẹnam asana ke ikan̄ utịm emi ẹbarade ke isọn̄, emi ẹdụhọrede utịm ikatiaba.
O Jehovah, afo eyekpeme mmọ;
Afo oyomụm mmọ kiet kiet akama ọtọn̄ọde ke emana emi tutu ke nsinsi.”
Ufan̄ikọ 5 aban̄a se Abasi ọdọhọde ke imọ iyanam inọ “mbon ukụt.” Enye ayanyan̄a mmọ.
Ufan̄ikọ 6 adian do ete ke “ikọ Jehovah edi edisana ikọ,” ke ebiet “silver emi ẹtarade ẹnam asana.” Kpukpru mme Christian emi ẹnamde n̄kpọ Abasi ke ofụri esịt ẹda ikọ Jehovah ntre.—Ps. 18:30; 119:140.
Se idude ke Psalm 12:7 ọdọhọ: “Afo eyekpeme mmọ; afo oyomụm mmọ kiet kiet akama ọtọn̄ọde ke emana emi tutu ke nsinsi.” “Mmọ” ke ufan̄ikọ oro ada aban̄a nso?
Sia edide ẹketịn̄ ẹban̄a “ikọ Jehovah” ke ufan̄ikọ 6 mbemiso se idude ke ufan̄ikọ 7, ndusụk owo ẹkeme ndikere ke “mmọ” oro ada aban̄a ikọ Abasi. Imonyụn̄ idiọn̄ọ ke kpa ye ofụri se mme asua Abasi ẹtịmede ndikpan mme owo ndinyene m̀mê ndikot Bible, ẹnyụn̄ ẹdomode ndikụt ẹte ke ukpọk ikọn̄ Bible kiet idụhe ke iso isọn̄ emi, Jehovah ekpeme Bible.—Isa. 40:8; 1 Pet. 1:25.
Edi se idude ke ufan̄ikọ 5 edi akpanikọ n̄ko. Jehovah an̄wan̄wam onyụn̄ anyan̄a “mbon ukụt” ye mbon emi “ẹbụmede.” Enye oyonyụn̄ aka iso anam ntre.—Job 36:15; Ps. 6:4; 31:1, 2; 54:7; 145:20.
Ntre, “mmọ” ke ufan̄ikọ 7 oro ada aban̄a nso?
Mme n̄kpọ efen emi ẹtịn̄de ke ofụri Psalm oro ẹwụt ke “mmọ” oro aban̄a mme owo.
Psalm 12:1, 2 etịn̄ aban̄a “mbon oro ẹnamde akpanikọ,” emi ndiọi owo ẹbian̄ade. Ekem imokụt se Jehovah edinamde mbon emi ẹkamade inua mmọ ẹnam se mîkpanaha ẹnam. Psalm oro ọsọn̄ọ ọnọ nnyịn ke imekeme ndinịm ke Abasi ayanyan̄a ikọt esie sia ikọ esie edi edisana.
Ntre, se ufan̄ikọ 7 etịn̄de edi ke Jehovah eyekpeme onyụn̄ omụm “mmọ” akama. “Mmọ” oro ẹdi mbon ukụt emi ndiọi owo ẹkamade ẹnọ ufen.
Ke ikpan̄wed usem Hebrew oro mme Masorete ẹkesion̄ode ẹwet, “mmọ” esịne ke ufan̄ikọ oro. Ke Septuagint usem Greek, ẹsịn ikọ oro “nnyịn” ikaba ke ufan̄ikọ 7. “Nnyịn” oro ada aban̄a mbon oro ẹnamde akpanikọ, emi ẹdide mbon ukụt ye mbon emi ẹbụmede. Akpatre n̄kpọ emi anamde inịm ke “mmọ” oro ada aban̄a mme owo edi ke ufan̄ikọ 7 ọdọhọ ke ẹyekpeme mbon oro ẹnamde akpanikọ, ẹyekpeme “mmọ kiet kiet” ẹsio ke ubọk mbon “emana emi,” oro edi ke ubọk mbon emi “ẹtorode oburobụt ido.” (Ps. 12:7, 8) Ke N̄wed Abasi Usem Hebrew emi ẹkabarede ẹsịn ke usem Aramaic, ufan̄ikọ 7 ọdọhọ ete: “Afo, O ỌBỌN̄, eyekpeme ndinen owo, eyekpeme mmọ osio ke ubọk idiọk emana emi ke nsinsi. Ndiọi owo ẹyoyo ẹkanade kpukpru ebiet, mmọ ẹbiet etuet emi ẹfịpde nditọ owo iyịp ẹsion̄o ẹma ke idem.” Nte ẹkabarede ufan̄ikọ oro edi n̄kpọ en̄wen emi ọsọn̄ọde ke Psalm 12:7 iban̄ake ikọ Abasi.
Ke ntak oro, ufan̄ikọ oro anam “mbon oro ẹnamde akpanikọ” ẹnyene idotenyịn ke Abasi ayan̄wam mmimọ.