Mme Angel

Mmanie ẹdi mme angel?

SE BIBLE ỌDỌHỌDE

Mbemiso Abasi okobotde isọn̄ ye Adam ye Eve, enye ama obobot mme angel. Mmọ ẹnyene odudu ẹkan mme owo ẹnyụn̄ ẹdụn̄ ke heaven ye Abasi. Mme owo ikemeke ndidụn̄ ke heaven inyụn̄ ikemeke ndikụt se ikade iso do. (Job 38:​4, 7) Bible ọdọhọ ke mme angel ẹdi “spirit.”​—Psalm 104:4.a

Angel ifan̄ idu? Mmọ ẹwak etieti. Mme angel emi ẹdude ẹkan ebekpo Abasi ẹkụk ẹdi “tọsịn duop ke itie tọsịn duop.” (Ediyarade 5:11) Edieke edide ibat emi idaha iban̄a n̄kpọ, ọwọrọ mme angel ẹnen̄ede ẹwak!

“Ndien n̄kụt . . . ediwak angel emi ẹkande ebekpo ẹkụk . . . ibat mmọ ekedi tọsịn duop ke itie tọsịn duop ye mme tọsịn ke mme itie tọsịn.”​—Ediyarade 5:11.

Nso ke mme angel ẹkenam ke eset?

SE BIBLE ỌDỌHỌDE

Mme angel ẹdi isụn̄utomb Abasi; mmọ ẹma ẹsitịn̄ se Abasi oyomde mme owo ẹnam. Mmọ ẹkesinam ndusụk utịben̄kpọ oro Bible ọdọhọde ke Abasi akanam. Abasi ama ọdọn̄ angel ọkọdiọn̄ Abraham onyụn̄ ọdọhọ enye okûwa Isaac eyen esie. (Genesis 22:​11-18) Angel ama owụt Moses idem ke ufọt eto oro akasakde ikan̄ onyụn̄ otobo enye etop emi okokpụhọrede uwem esie. (Exodus 3:​1, 2) Ke ini ẹketopde prọfet Daniel ẹsịn ke obube ekpe, ‘Abasi ama ọdọn̄ angel esie ekekịbi mme ekpe inua.’​—Daniel 6:22.

“Ndien angel Jehovah owụt enye idem ke edemeikan̄ ke eto n̄kukịm.” ​—Exodus 3:2.

Nso ke mme angel ẹnam mfịn?

SE BIBLE ỌDỌHỌDE

Nnyịn ikemeke ndifiọk kpukpru se mme angel ẹnamde mfịn. Edi Bible ọdọhọ ke mme angel ẹsin̄wam mbon oro ẹnyenede eti esịt ẹdi ẹdifiọk Abasi.​—Utom 8:​26-35; 10:​1-22; Ediyarade 14:​6, 7.

Jehovah ama anam Jacob adaba ndap. Ke ndap oro, enye ama okụt nte mme angel ẹdide ẹdọdọk ẹka heaven ẹsosụhọde ẹdi isọn̄. (Genesis 28:​10-12) Ndap emi owụt ke Jehovah Abasi ẹsidọn̄ mme angel esie utom mi ke isọn̄ ete ẹdin̄wam ikọt imọ.​—Genesis 24:40; Exodus 14:19; Psalm 34:7.

“Eberi emi etịn̄e esie esịmde ikpaenyọn̄ owụhọ ke isọn̄; ndien, sese! mme angel Abasi ẹdọdọk, ẹsosụhọde.”​—Genesis 28:12.