Nti Item Emi Ẹdinamde Ubon Ẹkop Inemesịt

Ebe, Ma N̄wan Fo

“Mme ebe ẹkpema iban mmọ nte idem mmọ. Owo eke amade n̄wan esie ama idemesie, koro akananam baba owo kiet isuaha obụkidem esie; edi ọbọbọk onyụn̄ ama enye.”—EPHESUS 5:28, 29.

Ebe edi ibuot ufọk. (Ephesus 5:23) Eti ebe isisọn̄ke ido ye n̄wan esie isinyụn̄ ikarake-kara enye. Enye esinen̄ede ama n̄wan esie, ọnọ enye se enye oyomde, inyụn̄ inamke n̄kpọ emi edinamde esịt etịmede enye. Enye esidomo n̄ko ndinem n̄wan esie esịt, utu ke ndiyom n̄wan esie anam n̄kpọ esịn ke inemesịt esie kpukpru ini. (Philippi 2:4) Enye esineme nneme kpukpru ini ye n̄wan esie onyụn̄ akpan̄ utọn̄ ke ini n̄wan esie etịn̄de ikọ. Enye ‘isinen̄ekede iyat esịt’ ye n̄wan esie, imiaha enye, inyụn̄ ikohokoi itịn̄ ikọ emi ayatde enye m̀mê anamde enye ofụhọ.—Colossae 3:19.

N̄wan, Kpono Ebe Fo

“Yak n̄wan enen̄ede okpono ebe esie.”—EPHESUS 5:33.

Edieke n̄wan okponode ebe esie onyụn̄ etienede anam se ebe esie ebierede enyene ibuot, emem oyodu ke ubon. Ke ini ebe esie anamde ndudue, enye isitịn̄ke ikọ isụhọde enye itie. Utu ke oro, enye esimụm idem akama onyụn̄ aka iso okpono ebe esie. (1 Peter 3:4) Edieke n̄kpọ afịnade enye, enye esidiọn̄ọ nnennen ini emi enye ekpenemede mfịna oro ye ebe esie, onyụn̄ etịn̄ enye ukpono ukpono.—Ecclesiastes 3:7.

Kûsịn Efịbe

‘Erenowo ayaka akadiana ye n̄wan esie ndien mmọ ẹyekabade ẹdi obụk kiet.’—GENESIS 2:24.

Erenowo ye n̄wan emi ẹdọde ndọ ẹdi obụk kiet. Ntre ana ebe ye n̄wan ẹsitịn̄ se isịnede mmọ ke esịt ẹnọ kiet eken, ẹsinyụn̄ ẹnam n̄kpọ ẹnọ kiet eken. Oro ayanam ndọ mmọ enem. Inaha mmọ ẹkpọn̄ kiet eken ẹkenyene ebuana ye owo en̄wen, sia esibiak owo tutu ke ini n̄wan m̀mê ebe esie esịnde efịbe. Efịbe isiyakke enyene mbuọtidem ke idem owo aba, esinyụn̄ asuan ubon.—Mme Hebrew 13:4.

Mme Ete ye Eka, Ẹkpep Nditọ Mbufo N̄kpọ

“Teme eyenọwọn̄ ke usụn̄ emi odotde ye enye; ke ini enye akabarede akani owo, enye idiwọn̄ọkede ikpọn̄ enye.”—MME N̄KE 22:6.

Abasi ọdọhọ mme ete ye eka ẹkpep nditọ mmọ n̄kpọ. Emi esịne ndikpep mmọ nte ẹkpedude uwem nnyụn̄ nnịm eti uwụtn̄kpọ nnọ mmọ. (Deuteronomy 6:6, 7) Ke ini eyen anamde se mîfọnke, ete m̀mê eka emi enyenede ifiọk esimụm idem akama. Enye ‘esisọp ndikop ikọ, isọpke itịn̄ ikọ, inyụn̄ isọpke iyat esịt.’ (James 1:19) Edieke enye okụtde ke oyom itụnọ eyen imọ, enye esinam oro ke ima, idịghe ke iyatesịt.

Nditọ, Ẹkop Uyo Ete ye Eka Mbufo

“Nditọ, ẹkop uyo ẹnọ mme ete ye eka mbufo . . . ‘Kpono usọ ye uka.’ ”—EPHESUS 6:1, 2.

Nditọ ẹkpenyene ndikop uyo ete ye eka mmọ ẹnyụn̄ ẹnen̄ede ẹkpono mmọ. Edieke nditọ ẹkponode ete ye eka mmọ, inemesịt oyodu ke ubon, emem oyonyụn̄ odu. Usụn̄ kiet emi ikpọ nditọ ẹwụtde ke imokpono ete ye eka mmọ edi nditịm nse mmọ enyịn. Emi ekeme ndisịne ndidiọn̄ ufọk mmọ m̀mê ndinọ mmọ okụk ẹda ẹdep se mmọ ẹyomde.—1 Timothy 5:3, 4.