Jacob Aka Haran

NTE ỌMỌFIỌK mmọ emi Jacob etịn̄de ikọ ọnọ? Ke ama akasan̄a ediwak usen, Jacob okosịm mmọ ke obube mmọn̄. Mmọ ẹkekpeme mme erọn̄ mmọ. Jacob ama obụp: ‘Mbufo ẹto mmọn̄?’

Mmọ ẹbọrọ ete, ‘Haʹran.’

Jacob ama obụp, ‘Nte ẹmefiọk Laʹban?’

‘Ih,’ mmọ ẹma ẹbọrọ. ‘Sese eyen esie an̄wan Rachel ke edi ye otu erọn̄ esie.’ Nte afo omokụt Rachel do edide anyan usụn̄?

Ke Jacob okụtde Rachel ye mme erọn̄ eyeneka eka esie Laʹban, enye akakpat itiat efep ke obube mmọn̄ man erọn̄ ẹn̄wọn̄ mmọn̄. Ndien Jacob ama otịm Rachel inua onyụn̄ asian enye owo oro imọ idide. Esịt ama otịm enem enye, ndien enye ama ọnyọn̄ eketịn̄ ọnọ ete esie Laʹban.

Esịt ama enem Laʹban etieti ndiyak Jacob odụn̄ ye enye. N̄ko ke Jacob ekeben̄ede ndidọ Rachel, Laʹban ama enem esịt. Nte ededi, enye ọkọdọhọ Jacob anam utom ke in̄wan̄ esie isua itiaba aban̄a Rachel. Koro enye akamade Rachel akaha, Jacob ama anam emi. Edi ke osịmde ini ndọ, nte ọmọfiọk se iketịbede?

Laʹban emen adiaha esie Leʹah ọnọ Jacob utu ke Rachel. Ke Jacob ama okonyịme ndinam utom nnọ Laʹban isua itiaba efen, Laʹban ama ọnọ enye Rachel n̄ko nte n̄wan. Ke ini oro, Abasi ama ayak mme owo ẹnyene n̄wan ẹkan kiet. Edi idahaemi, nte Bible owụtde, ana owo enyene n̄wan kiet kpọt.