Ibuot 13
Akwa Otuowo ke Iso Ebekpo Jehovah
1. (a) Mbemiso mme asan̄autom Abasi oro ẹkedude mbemiso eyo Christian m̀mê 144,000 ẹbọde utịp mmọ, nso ke ana mmọ ẹkụt? (b) Edi nso idikeme nditịbe nnọ akwa otuowo oro ẹdude uwem ke ini “akwa ukụt” ọtọn̄ọde?
OKPOSỤKEDI mme anam-akpanikọ asan̄autom Abasi ọtọn̄ọde ke Abel tutu osịm John Andinịm owo baptism ẹkenịmde edinam uduak Abasi akpa ke uwem mmọ, kpukpru mmọ ẹkenyene ndikpa nnyụn̄ mbet ediset ke n̄kpa. Owo 144,000 oro ẹdidude ye Christ ke Obio Ubọn̄ esie eke heaven ẹnyene ndikpa n̄ko mbemiso mmọ ẹkemede ndibọ utịp mmọ. Ke okpụhọrede ye oro, ẹma ẹwụt apostle John ke n̄kukụt ẹte ke akwa otuowo ẹyedu oro ke akpanikọ ẹdibọhọde “akwa ukụt” ndien, ye unana edikpa, ẹnyene idotenyịn edidu uwem ke nsinsi.—Edi. 7:9-17.
NDIDIỌN̄Ọ “AKWA OTUOWO”
2. Nso ikada ikosịm edinyene in̄wan̄în̄wan̄ ifiọk mban̄a se ẹdade ẹdiọn̄ọ “akwa otuowo” eke Ediyarade 7:9?
2 Ke ediwak isua ikie owo ikọdiọn̄ọke “akwa otuowo” ẹmi. Edi n̄kaiso edifiọk mme prọfesi oro ẹnyenede ebuana ama ọdiọn̄ usụn̄. Ke 1923 ẹma ẹfiọk ẹte ke “erọn̄” eke n̄ke Jesus ke Matthew 25:31-46 ye “mme erọn̄ en̄wen” oro enye eketịn̄de aban̄a ke John 10:16 ẹkedi mme owo oro ẹdude uwem idahaemi ẹmi ẹdinyenede ifet ndidụn̄ ke nsinsi mi ke isọn̄. Ke 1931 ẹma ẹdiọn̄ọ ẹte ke mbon oro ẹketịn̄de ẹban̄a ke Ezekiel 9:1-11 nte ẹdide mmọemi owo oro ọkọn̄ọde ekpeme ewetn̄wed onịmde idiọn̄ọ ke ọkpọiso mmọ ẹdi ukem ye “erọn̄” eke Matthew ibuot 25. Ekem, ke 1935, ẹma ẹkụt ẹte ke “akwa udịmowo,” m̀mê “akwa otuowo,” eke Ediyarade 7:9-17 edi ukem ye “erọn̄” eke n̄ke Jesus oro aban̄ade erọn̄ ye ebot. Okposụkedi ko ke edem ke 1923 ẹkefiọkde ẹte ke ndusụk utọ owo mbieterọn̄ oro ẹma ẹtọtọn̄ọ ndiwụt idemmọ, ekedi tutu ke 1935 ke ibat mmọ ọkọtọn̄ọ ndikọri usọp usọp. Mfịn ke ataata usụn̄ ediwak miliọn owo ẹdu oro ẹyomde ẹdiọn̄ọ mmimọ nte ubak “akwa otuowo” eke “mme erọn̄ en̄wen” oro Abasi ọfọnde mfọn.
3. Ntak emi mmọ ‘ndida ke iso ebekpo’ mîwọrọke ite ke mmọ ẹdi otu eke heaven?
3 Ẹwụt ukpụhọde ke otu mbon “akwa otuowo” ye mbon Israel eke spirit oro ẹdide 144,000, oro ẹketịn̄de ẹban̄a ke mbemiso ke ukem ibuot Ediyarade oro. Ke n̄kukụt esie John ikekwe “akwa otuowo” emi nte ẹdude ke heaven. Mmọ ‘ndida ke iso ebekpo’ (Greek: e·noʹpi·on tou throʹnou, “ke ebiet ẹtiede ke ebekpo ẹkụt”) Abasi iyomke ite mmọ ẹdu ke heaven. Idaha mmọ akam edi ke ebiet oro Abasi, oro asiande nnyịn ete ke imọ itie ke heaven ise nditọ owo, “etiede okụt.” (Edi. 7:9; Ps. 11:4; men Psalm 100:1, 2 domo, n̄ko Luke 1:74, 75 ye Utom Mme Apostle 10:33, Kingdom Interlinear.) Kpasụk ntre, iyomke “kpukpru obio” ẹdu ke heaven man mmọ ẹdu ke iso ebekpo Christ (ke ataata usụn̄, “ke iso esie”), nte ẹtịn̄de ẹban̄a ke Matthew 25:31, 32. Akpanikọ oro nte ke “akwa otuowo, eke baba owo kiet mîkemeke ndibat,” idịghe otu eke heaven edi se ẹwụtde ke ndimen Ediyarade 7:4-8 ndomo ye Edi 14:1-4, ke ebiet emi ẹyararede akpan ibat mbon oro ẹsiode ẹto isọn̄ ndika n̄kodu ke heaven.
4. (a) Nso idi “akwa ukụt” oro mmọ ẹbọhọde? (b) Nte ẹwetde ke Ediyarade 7:11, 12, mmanie ẹse “akwa otuowo” ẹnyụn̄ ẹbuana ye mmọ ke utuakibuot?
4 Ke ndiwụt mbon ẹmi “akwa otuowo” ẹdide, John ewet ete: “Mmọ oro ẹdi mmọemi ẹketode ke akwa ukụt ẹwọn̄ọ.” Se mmọ ẹbọhọde, ke akpanikọ, edidi n̄kponn̄kan ukụt oro akanam odude ke isọn̄. (Edi. 7:13, 14; Matt. 24:21) Mme andibọhọ enyene-ndịk usen Jehovah oro idinyeneke eyịghe ndomokiet iban̄a enyeemi edide ntak edinyan̄a mmimọ. Ke ini mmọ ke esịtekọm ẹtorode Abasi ye Eyenerọn̄ kaban̄a edinyan̄a mmọ, do, nte John okokụtde ke n̄kukụt, kpukpru edibotn̄kpọ oro ẹnamde akpanikọ ke heaven ẹyedian uyo mmọ ọtọkiet ye mmọ ke utuakibuot ata Abasi kierakiet, ẹdọhọde ẹte: “Amen; yak edidiọn̄, ye ubọn̄, ye ifiọk, ye ekọm, ye ukpono ye odudu, ye ukeme, ẹnyene Abasi nnyịn ke nsinsi nsinsi. Amen.”—Edi. 7:11, 12.
ẸDOMO ẸSE M̀MÊ ẸDOT NDIBỌHỌ
5. (a) Didie ke nnyịn ikeme ndibiere se ẹyomde man otodo owo edi ubak “akwa otuowo” oro ẹdinịmde uwem? (b) Ke ndibọrọ mme mbụme ẹmi ẹdude ke utịt ikpehe ekikere emi, nam an̄wan̄a se ẹyomde man ẹbọhọ “akwa ukụt.”
5 Edinịm oro ẹnịmde “akwa otuowo” uwem ada itie ke n̄kemuyo ye ndinen edumbet Jehovah. Mme in̄wan̄în̄wan̄ n̄kpọ ẹmi ẹwụtde se ẹdade ẹdiọn̄ọ mme ido mbon oro ẹdinyan̄ade ẹdọn̄ọ ke mme ntịn̄nnịm editịn̄ ntụk oro ẹtịn̄de ẹtụk mmọ ke Bible. Ntem mme andima edinen ido ẹkeme ndinam n̄kpọ idahaemi ye ekikere ndibọhọ. Nnyịn ima itetịn̄ itụk mme itien̄wed Abasi oro ẹtienede. Edi idahaemi dụn̄ọde mmọ ye ntịn̄enyịn, ye un̄wam mme udiana itien̄wed Abasi oro ẹsiakde ẹsịn, nyụn̄ kere ban̄a se anade afo anam man odot ye mme ntịn̄nnịm editịn̄ mban̄a ẹmi.
“Mme erọn̄ en̄wen” oro ẹtịn̄de ẹban̄a ke John 10:16
Nso ke owo ndinen̄ede n̄kop uyo Jesus ọwọrọ? (John 10:27; Matt. 9:9; Eph. 4:17-24)
Didie ke nnyịn ikeme ndiwụt nte ke nnyịn imọdiọn̄ọ Christ nte “ekpemerọn̄ kiet” emi nnyịn inyenede? (Matt. 23:10, 11)
“Erọn̄” ke n̄ke Jesus oro aban̄ade erọn̄ ye ebot (Matt. 25:31-46)
Mmanie ẹdi “nditọete” Christ ẹmi mmọemi ẹnamde nti n̄kpọ ẹnọ? (Heb. 2:10, 11; 3:1)
Ke idak n̄kpọsọn̄ idaha ewe ke ẹkot mmọ ẹte ẹdidiana ye nditọete Christ ke isọn̄? Ndien ewe utom ke mmọ ke edinam akpanikọ ẹnọ un̄wam? (Edi. 12:12, 17; Matt. 24:14; 28:19, 20)
Mbon ẹmi owo oro ọkọn̄ọde ekpeme ewetn̄wed onịmde idiọn̄ọ kaban̄a edinyan̄a (Ezek. 9:1-11)
Didie ke mmọ ẹwụt ẹte ke mmimọ idụhe ke n̄kemuyo ye mbubiam n̄kpọ ẹmi ẹnamde ke ndamban̄a Jerusalem, m̀mê Christendom? (Edi. 18:4, 5)
Nso isịne ke “idiọn̄ọ” oro abaharede mmọ ọkpọn̄ mme abian̄a abian̄a Christian onyụn̄ onịmde mmọ ke udịm ọnọ edinịm ke uwem? (1 Pet. 3:21; Matt. 7:21-27; John 13:35)
6. Didie ke editịn̄ oro John etịn̄de aban̄a “akwa ukụt” an̄wam nnyịn ndidiọn̄ọ ntak oro ẹkenịmde mmọ uwem?
6 Editịn̄ oro ẹtịn̄de ẹban̄a “akwa otuowo” nte ẹkụtde ke Ediyarade 7:9-15 adian mme akpan ntọt efen efen. Ke nditịn̄ nnọ nnyịn nte mbon “akwa otuowo” ẹtiede ke “akwa ukụt” ebede, N̄wed Abasi n̄ko odụri ntịn̄enyịn owụt mme n̄kpọ oro akadade okosịm edinịm oro ẹnịmde mmọ uwem.
7. Nso ke mmọ ẹkenam mbemiso “akwa ukụt,” ndien didie ke ẹnọ ekikere ẹban̄a emi?
7 Okposụkedi mmọ ẹtode kpukpru obio, esien, idụt ye usem, ẹwụt mmọ ke edidianakiet nte “ẹda[de] ke iso ebekpo,” ẹdiọn̄ọde Jehovah, kpa Enyeemi etiede ke ebekpo, nte Andikara Ekondo. Mmọ ẹmewụt ebe ke usụn̄uwem mmọ nte ke mmimọ idi mme anam-akpanikọ andisọn̄ọ mmụm itie edikara esie n̄kama. Akpanikọ oro nte ke mmọ “[ẹyet] ọfọn̄idem mmọ ẹnam afia ke iyịp Eyenerọn̄” owụt ke mmọ ẹdiọn̄ọ ke mmimọ imoyom ufọn usio-isop idiọkn̄kpọ eke uwa Jesus nte Eyenerọn̄ Abasi. (John 1:29; 1 John 2:2) Ke mbuọtidem mmọ ẹmeyak idemmọ ẹnọ Abasi ke isọn̄ uwa oro, ẹmeyarade emi ẹwụt ke ndibụhọ ke mmọn̄ ndien idahaemi ẹdara edisana idaha ke iso Abasi, nte mfia ọfọn̄idem mmọ ẹdade ẹban̄a. Mmọ itreke ndinam ẹfiọk an̄wan̄wa mbuọtidem mmọ ke Eyen Abasi. (Matt. 10:32, 33) Ke ndikem ye kpukpru emi, ẹwụt ke mmọ ẹdu ke temple Abasi, m̀mê ufọk utuakibuot ofụri ekondo, nte mme andituak ibuot oro ẹnamde edisana utom ẹnọ Abasi “uwemeyo ye okoneyo.” Ntem mmọ ẹmenịm mbụk nte mme anam-akpanikọ mme andida nnọ utuakibuot akpanikọ ye mme anditan̄a Obio Ubọn̄ esie.—Isa. 2:2, 3.
8. Man ntọt emi enyene ufọn ọnọ nnyịn, nso ke ana nnyịn inam?
8 Nte ọyọhọ ntọt eke mme ntịn̄nnịm ndise ẹmi ẹkem ye afo? Nte odu mme usụn̄ oro oyomde afo ada uwem fo ọyọhọ ọyọhọ ekesịn ke nde ye se ẹtịn̄de ẹban̄a mi? Ke edide ntre, idahaemi edi ini ndinam oro!
NDIDỤN̄ KE PARADISE EKE SPIRIT
9. Didie ke John etịn̄ aban̄a mme edidiọn̄ eke spirit oro “akwa otuowo” ẹdarade idem idahaemi?
9 Nte afo edi kiet oro odoride enyịn ndibọhọ nte ubak “akwa otuowo”? Edieke afo odude ke n̄kemuyo ye ndinen usụn̄ Jehovah, do afo ye unana eyịghe ama ọtọtọn̄ọ ndidara mme idaha oro ẹken̄wọn̄ọde oro nte odotde ẹkotde paradise eke spirit. Ẹkesian apostle John ẹte: “Mmọ idikopke aba biọn̄, idinyụn̄ ikopke aba nsatitọn̄; eyo m̀mê ufiop ekededi idinyụn̄ imiaha mmọ: koro Eyenerọn̄ emi etiede ke ufọt ebekpo eyedi Andikpeme mmọ, eyenyụn̄ ada mmọ aka ke idịm mmọn̄ uwem: ndien Abasi eyekwọhọde kpukpru mmọn̄eyet ke enyịn mmọ efep.” (Edi. 7:16, 17) Didie ke emi edi akpanikọ ke n̄kan̄ fo?
10. (a) Ke usụn̄ifiọk eke spirit didie ke edi akpanikọ nte ke “akwa otuowo” ‘ikopke aba biọn̄ m̀mê nsatitọn̄’? (b) Nte afo omokụt emi?
10 Mbemiso ekedide edidu ke idak ima ima ukpeme eke Eti Ekpemerọn̄, kpa Jesus Christ, nte afo ama okop biọn̄ ye nsatitọn̄ edinen ido? (Men Matthew 5:6 domo.) Ke edide ntre, se afo okoyomde ekedi n̄kpọ oro Jehovah ikpọn̄îkpọn̄ ekpekemede ndinọ ebe ke Eyen esie. Ke ini afo ekekpepde aban̄a ndinen usụn̄ Jehovah—uduak esie ndisobo ndiọi owo mfep, kpa ye oro mfọnido esie oro owo mîdotke ke ndinam edinyan̄a odu ọnọ nditọ Adam—do, ye unana eyịghe, nte akpa ini ke uwem fo afo ama okop ata uyụhọ. Udia ye edin̄wọn̄ n̄kpọ eke spirit oro otode Ikọ Abasi, nte ẹnọde ebe ke esop esie, amakaiso ndinọ fi uyụhọ. (Isa. 65:13, 14) Ndien edieke edide afo ama ayak idemfo ọnọ Abasi ebe ke Christ afo idahaemi emenyene ata uduak ke uwem. (Men John 4:32-34 domo.) Idara idara idotenyịn nsinsi uwem ke Paradise isọn̄ odu fi ke iso, koro Eyenerọn̄ ‘eyeda [“akwa otuowo”] aka ke idịm mmọn̄ uwem.’
11. (a) Ke nso usụn̄ ke edi akpanikọ nte ke ‘eyo m̀mê ufiop ekededi imiaha mmọ’? (b) Didie ke oro edi akpan n̄kpọ ọnọ fi?
11 Nte mme “erọn̄” oro ẹberide edem, Eti Ekpemerọn̄ n̄ko ekpeme onyụn̄ ọnọ mbon “akwa otuowo” ndausụn̄. Ntak edi oro, ke nditịn̄ ke ndamban̄a usụn̄, ‘eyo m̀mê ufiop ekededi mîmiaha mmọ.’ Emi iwọrọke ite, nte kiet ke otu “akwa otuowo,” ke afo udusoboke ukọbọ ndomokiet oro otode ererimbot. Utu ke oro, enye ọwọrọ ete ke ẹkpeme fi ẹsio ke ikan̄îkan̄ iyatesịt Abasi. Ndien ke ini enye anamde nsobo Abasi edep ke idem mme anamidiọk, enye idisoboke fi. Eti itie ebuana emi ekeme ndikaiso ke nsinsi.—Ezek. 38:22, 23; men Psalm 11:6; 85:3, 4 domo.
12. Didie ke ẹkwọhọde mmọn̄eyet ke enyịn fo ẹfep idem idahaemi?
12 Nso utịbe utịbe ntak ndidat esịt ẹdi okwo ntem edieke afo ke akpanikọ edide kiet ke otu “akwa otuowo” oro! Afo emenyene utịbe utịbe idotenyịn ndikụt ẹsiode ndiọi owo ẹfep ofụri ofụri ndien ekem ẹnamde ekikere ye ikpọkidem fo ẹbọhọ kpukpru odudu idiọkn̄kpọ. Edi idem idahaemi mfụhọ oro osịmde mme owo koro mmọ mîfiọkke Abasi isịmke fi. Afo ọmọtọn̄ọ ndifiọk idatesịt oro enyenede sụk mbon oro Jehovah edide Abasi mmọ. (Ps. 144:15b) Ke usụn̄ emi afo ọmọtọtọn̄ọ ndikụt edisu en̄wọn̄ọ emi: “Abasi eyekwọhọde kpukpru mmọn̄eyet ke enyịn mmọ efep.”
13. Nso ididian n̄kpọ ke idatesịt paradise eke spirit nte ukara tọsịn isua Christ akade iso?
13 Kpa nte “akwa otuowo” ẹdibọhọde utịt editịm n̄kpọ emi, ntre ke paradise eke spirit edibọhọ. Edieke afo edide kiet ke otu mmọ, do afo eyekaiso ndidara usọrọ eke spirit eke nti n̄kpọ nte ukara tọsịn isua Christ akade iso. Ifiọk emi afo enyenede aban̄a Abasi ke idemesie eyetụn̄ọ nte afo okụtde uduak esie oro mîkpụho enyenede ubọn̄ ubọn̄ edisu. Idatesịt fo eyekọri nte afo abuanade ke ndidara akwa udịmowo oro ẹkọride-kọri ẹmi ẹsetde ke n̄kpa ẹdi man ẹdidiana ye afo ke utuakibuot akpanikọ. Ndien mme edidiọn̄ obụkidem oro ẹdinọde adan̄aoro ẹdidi ata ọsọn̄urua n̄kpọ ọnọ kpukpru mme anam-akpanikọ asan̄autom Abasi sia ẹdade mmọ nte ima oro Jehovah ke idemesie owụtde.—Isa. 25:6-9; Jas. 1:17.
Nneme Ndụn̄ọde
● Ye nso utịbe utịbe n̄kpọntịbe ke Bible abuan “akwa otuowo,” ndien ntak-a?
● Edieke nnyịn ke akpanikọ iyomde ẹbat nnyịn ẹsịn ke otu “akwa otuowo” oro Abasi owụtde mfọn, nso ke ana nnyịn inam idahaemi?
● Didie ke mme edidiọn̄ paradise eke spirit ẹdi akpan n̄kpọ ẹnọ fi?