Ibuot 14

‘Mmanam Ediomi ye Mbufo Kaban̄a Obio Ubọn̄’

1. Ke okoneyo oro mbemiso n̄kpa Jesus, nso idotenyịn ke enye okonịm mme apostle esie ke iso?

EKEDI ke okoneyo oro mbemiso ẹkewotde Jesus ke enye eketịn̄ ọnọ mme anam-akpanikọ apostle esie ete: ‘Ediwak ufọk ẹdu ke ebiet Ete Mi; mmọn̄ n̄ka n̄kotịm itie nnịm nnọ mbufo, man mbufo ẹnyụn̄ ẹdu ke ebiet eke Ami ndude.’ Enye ama afiak ọdọhọ mmọ ete: “Mmanam ediomi ye mbufo, kpasụk nte Ete mi akanamde ediomi ye ami, kaban̄a obio ubọn̄.” (John 14:​2, 3; Luke 22:29, NW) Nso utịbe utịbe idotenyịn ke enye onịm mmọ ntem ke iso!

2. Owo ifan̄ ẹdibuana ye Christ ke Obio Ubọn̄ esie eke heaven?

² Nte ededi, Jesus ikọdọhọke ite ke mme apostle oro ikpọn̄îkpọn̄ ẹdikara ye imọ ke Obio Ubọn̄ imọ eke heaven. Ke ukperedem ẹma ẹnam ẹfiọk ke owo 144,000 oro ẹfakde ẹsio ke isọn̄ ẹyenyene utọ akwa ifet oro. (Edi. 5:9, 10; 14:1, 4) Nte odu ndusụk owo mfịn oro ẹnyanarede ẹbịne ifet emi?

NDITAN̄ MME ENYENE-UDEME KE OBIO UBỌN̄ MBOK

3. Ke an̄wan̄wa utom ukwọrọikọ esie, nso ifet ke Jesus okodụri ntịn̄enyịn owụt?

³ Ke Herod Antipas ama ekesịn John Andinịm owo baptism ke ufọk-n̄kpọkọbi, Jesus ama ọtọn̄ọ ifịk ifịk ubịnikọt an̄wan̄wa ukwọrọikọ emi enye okowụkde ntịn̄enyịn ke “Ubọn̄ Heaven.” (Matt. 4:​12, 17) Enye ama anam mme owo ẹfiọk ẹte ke ifet eyedu ọnọ mmọ ndidụk Obio Ubọn̄ oro, ndien mme mbet esie ye nsịnifịk ẹma ẹnyanarede ẹbịne utịp oro.​—⁠Matt. 5:3, 10, 20; 7:21; 11:⁠12.

4. (a) Ini ewe ke ẹkeyet mme akpa mbet Jesus aran ke edisana spirit? (b) Nso iwụt ke ẹma ẹwọn̄ọde ntịn̄enyịn ọtọn̄ọde ke ini oro ẹwụt editan̄ mme enyene-udeme ke Obio Ubọn̄ mbok?

⁴ Ke Pentecost eke 33 E.N. ẹma ẹyet akpa ke otu mmọ aran ke edisana spirit. (Utom 2:1-⁠4; 2 Cor. 1:​21, 22) Ẹma ẹnam ẹdiọn̄ọ enọ Abasi kaban̄a edinyan̄a oro adade osịm uwem oro mîkemeke ndikụt n̄kpa ke heaven. Peter ama ada “mme ukpọhọde Obio Ubọn̄ Heaven” eberede ifiọk emi​—⁠akpa ọnọ mme Jew, ekem ọnọ mbon Samaria, ndien ekem ọnọ mme idụt Gentile. (Matt. 16:19) Ẹma ẹnọ akpan ntịn̄enyịn ke ndinam ukara oro edikarade ubonowo ke isua 1,000, ndien ekpere ndidi ẹkewet kpukpru n̄wed eke odudu spirit ke N̄wed Abasi eke Christian Usem Greek akpan akpan ẹnọ otu mme enyene-udeme ke Obio Ubọn̄ emi​—⁠kpa “ikọt Abasi,” “ẹmi ẹnyenede udeme ke ikot eke otode ke heaven.”a

5. Nte edikot oro ẹkekotde mmọ ẹnọ uwem eke heaven ekedi koro mmọ ẹkefọnde ẹkan mme asan̄autom Abasi oro ẹkedude ke mbemiso?

⁵ Edikot oro ẹkotde mmọ ẹnọ uwem eke heaven ikedịghe koro mmọ ke ndusụk usụn̄ ẹkefọnde ẹkan kpukpru asan̄autom Abasi oro ẹkekpade mbemiso Pentecost eke 33 E.N. (Matt. 11:11) Utu ke oro, Jehovah kemi ama ọtọn̄ọ ndimek mbon oro ẹdidide nsan̄a mme andikara ye Jesus Christ. Ke n̄kpọ nte isua ikie 19 ke emi ama ekebe ikot kiet kpọt okodu, kpa ikot uka heaven. Mfọnido oro owo mîdotke ke Abasi ọkọnọ ibat ibat owo ke ndimen mme ọniọn̄ ọniọn̄ ye ima ima uduak esie n̄kaiso.​—⁠Eph. 2:​8-⁠10.

6. (a) Ntak emi akanade ini edi eke ẹditrede ikot uka heaven? (b) Anie edida usụn̄ ke mme edinam man otodo prọfesi aban̄ade “akwa otuowo” okposu n̄ko, ndien nso ikotịbe ke akpanikọ?

⁶ Nte ini akade ibat oro ẹkenịmde oro enyenede-nyene adan̄a kpa 144,000 eyeyọhọ. Akpatre idiọn̄ọ oro ẹfịkde nditọ Israel eke spirit ẹmi nte mbon oro ẹnyịmede eyesan̄a ekpere. (Edi. 7:​1-⁠8) Do Jehovah, ebede ke spirit esie ye ifiọk Ikọ esie oro enye akanamde odu ọnọ esop esie oro ẹkụtde ke enyịn, eyenọ ndausụn̄ ke mme edinam man osu ubak uduak esie efen, nte ẹbụkde ke Ediyarade 7:​9-⁠17. Ẹma ẹtan̄ “akwa otuowo” ẹmi ẹtode kpukpru idụt ẹbok, ẹnyenede akama-nduaidem idotenyịn edibọhọ akwa ukụt nnyụn̄ ndu uwem ke nsinsi ke mfọnmma ke Paradise isọn̄. Ke ini nnyịn ikerede iban̄a ataata se ikotịbede, etie nte uyarade odu nte ke ikot uka heaven ke ofụri ofụri ama ọyọhọ ke n̄kpọ nte isua 1935 E.N., ke ini ẹkediọn̄ọde in̄wan̄în̄wan̄ ẹban̄a idotenyịn eke isọn̄ oro “akwa otuowo” ẹnyenede. Ọtọn̄ọde ke ini oro ẹmeda ediwak miliọn mme andituak ibuot nnọ Jehovah emi ke ofụri esịt ẹdoride enyịn ndidu uwem ke nsinsi mi ke isọn̄ ẹdisịn ke ebuana ye tọsịn owo ifan̄ oro ẹsụhọde ke otu eke heaven ke ndimen ndomo.

7. Nte ndusụk owo mfịn ẹkeme ndikam mbọ ikot uka heaven, ndien ntak emi afo ọbọrọde ntre-⁠e?

⁷ Nte emi ọwọrọ ete ke Abasi ikotde baba owo kiet kemi inọ uwem eke heaven? Tutu ẹnam akpatre ufịk idiọn̄ọ, ekeme ndidi nte ke n̄kpọ nte ibat ibat owo ẹmi ẹnyenede idotenyịn oro ẹkeme nditre ndinam akpanikọ, ndien ẹyenyene ndimek mmọ efen ndida itie mmọ. Edi etie nte owụt ifiọk nte ke emi edi n̄kpọ oro mîdiwakke nditịbe.

NDITỌ EKE SPIRIT​—⁠MMỌ ẸSAN̄A DIDIE ẸFIỌK?

8. Nso edinam an̄wan̄a ke Paul ọnọ owụtde nte mbon oro ẹbonde ke edisana spirit ẹsan̄ade ẹdiọn̄ọ akpanikọ oro?

⁸ Spirit Abasi esinọ mme Christian oro ẹnade baptism oro ẹbọde ikot uka heaven in̄wan̄în̄wan̄ nsọn̄ọ nte ke ẹbon mmọ nte nditọ eke spirit. Apostle Paul ama owụt emi ke ini enye ekewetde n̄wed ọnọ ẹsọk ‘ndisana ikọt Abasi’ ke Rome, etịn̄de aban̄a se ikedide idaha kpukpru mme ata Christian ke ini oro. Enye ọkọdọhọ ete: “Adan̄a owo nte spirit Abasi adade mmọ usụn̄, mmọ oro ẹdi nditọ Abasi. Koro mbufo mîkọbọhọ spirit ufụn eke esịnde mbufo ẹtọn̄ọ ntak ẹnyene ndịk; edi mbufo ẹkebọ spirit eke enyenede mmọemi ẹdade ẹsịn ke ubon Abasi, emi anamde nnyịn ikot Abasi, ite, Abba, Ete. Spirit ke idemesie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi onịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyenyụn̄ ida ubọn̄ ye Enye.”​—⁠Rome 1:⁠7; 8:14-⁠17.

9. Didie ke ‘spirit ke idemesie etie ntiense’ ye spirit mbon oro ẹdide nditọ Abasi ke akpanikọ?

⁹ Mi ẹdụri ntịn̄enyịn nnyịn ẹwụt edida oro ẹdade ikọ oro “spirit” ikaba: “spirit ke idemesie” ye “spirit nnyịn.” Akpa edi odudu anamutom Abasi oro enyịn mîkwe. Enye esịn ke esịt nditọ esie eke spirit edinịm ke akpanikọ oro nte ke ẹma ẹbon mmimọ nte amanaisọn̄ nditọ Abasi. Spirit oro n̄ko etie ntiense ebe ke Ikọ Abasi eke odudu spirit, kpa Bible, emi etiede nte ọkpọkpọ leta oro enye ewetde ọnọ ẹsọk nditọ esie eke spirit. (1 Pet. 1:​10-⁠12) Ke ini mbon oro ẹbonde ke edisana spirit ẹkotde se N̄wed Abasi etịn̄de ọnọ mbon oro ẹdide nditọ Abasi eke spirit, mmọ nte enende ẹbọrọ ẹte: ‘Oro aban̄a mi.’ Ntem odudu anamutom Abasi ke nsio nsio usụn̄ esitie ntiense ye spirit mmọ, kpa odudu oro anamde utom ke esịt ye ekikere mmọ, ete ke mmọ ẹdi nditọ Abasi. Ke ndikem ye se spirit Abasi ke ntem owụtde, ekikere ye esịt mmọ akabade owụhọ ke idotenyịn edidi mme andisan̄a ye Christ nnyene udeme, ndien mmọ ẹnyịme ndibọ mbiomo eke asan̄ade ye edidi nditọ Abasi eke spirit.​—⁠Phil. 3:​13, 14.

10. (a) Mme n̄kpọ ewe ke idemmọ mînamke ẹdiọn̄ọ owo nte Christian oro ẹyetde aran? (b) Nso ekikere ke “mme erọn̄ en̄wen” ẹnyene kaban̄a itie mmọ ke uduak Abasi?

¹⁰ Nte oro edi akpanikọ ye afo? Ke edide ntre, afo emenyene utịbe utịbe ifet. Nte ededi, ekpedi ndudue ọnọ owo ekededi ndibiere nte ke ntak oro owo enyenede ufiop ufiop esịtekọm aban̄a mme ntotụn̄ọ n̄kpọ eke spirit m̀mê esịnde ifịk ke utom ukwọrọikọ m̀mê enyenede ufiop ufiop ima ọnọ nditọete esie enye ke ntre anaedi Christian oro ẹyetde aran ke spirit. Kpa mme n̄kpọ oro anam ẹdiọn̄ọ ediwak ke otu “mme erọn̄ en̄wen.” Se mmọ ẹkotde ke N̄wed Abasi ẹban̄a mme andisan̄a ye Christ nnyene udeme, n̄ko, otụk mmọ esịt, edi mmọ idaha se Abasi mîkonịmke inọ mmọ inọ idemmọ. (Men Numbers 16:​1-⁠40 domo.) Mmọ ẹfiọk akpa uduak Abasi kaban̄a isọn̄ ẹnyụn̄ ẹnam n̄kpọ ye esịtekọm ẹbịne ndibuana ke enyeoro.

NDIDIA NTE ODOTDE

11. Mmanie ẹsidụk edinam editi n̄kpa Jesus eke isua ke isua, ndien ntak-⁠a?

¹¹ Ke isua kiet kiet, ke Nisan 14, ke utịn ama okosop, mme anditiene Jesus Christ oro ẹyetde aran ke ofụri ikpehe isọn̄ ẹsiti n̄kpa esie, ke n̄kemuyo ye item oro enye ọkọnọde mme apostle esie. (Luke 22:​19, 20) “Mme erọn̄ en̄wen” n̄ko ẹsidụk, idịghe nte mme andidia uyo nnyụn̄ n̄n̄wọn̄ wine, edi nte mme andida nse oro ẹwụtde ukpono.

12. Didie ke ndusụk akpa Christian ke Corinth ẹkekpu ndiwụt nnennen esịtekọm ke Udia Mbubịteyo Ọbọn̄?

¹² Emi idịghe ikpîkpu edinam ido ukpono edi ọyọhọ ye okopodudu ukabade. Ye mme Christian akpa isua ikie ke Corinth, Greece, oro ndusụk ẹketrede ndiwụt nnennen esịtekọm ke edinam emi, apostle Paul ama ewet ọkpọsọn̄ item ọnọ ẹsọk mmọ, ọdọhọde ete: “Owo ekededi eke edidiade uyo Ọbọn̄ edinyụn̄ ọn̄wọn̄de cup Ọbọn̄ ke usụn̄ eke mîdotke, eyenyene isop aban̄a ikpọkidem ye iyịp Ọbọn̄.” Nso ikanam mmọ ẹdi mme andidia oro “mîdotke”? Mmọ ikotịmke idemmọ nte ọfọnde ke esịt ye ekikere. Ubahade ẹma ẹdu ke esop. N̄ko ndusụk owo ẹma ẹdia udia ẹnyụn̄ ẹn̄wọn̄ n̄kpọ ẹbe ubọk mbemiso mbono oro. Mmọ ẹkese Udia Mbubịteyo Ọbọn̄ didie didie. Mmọ ikodụhe ke idaha ndifiọk akpan n̄kpọ oro uyo ye wine oro ẹkedade ẹban̄a.​—⁠1 Cor. 11:​17-⁠34.

13. Nso ke uyo ye wine oro ẹsinọde ke Editi ẹda ẹban̄a?

¹³ Nso idi akpan n̄kpọ oro? Enye ikọn̄ọke ke utịbe utịbe edikpụhọde uyo ye wine ekededi oro ẹkerede-kere. Owo itọn̄ọke ntak iwa Christ ke usụn̄ifiọk ekededi ke Editi kiet kiet. N̄wed Abasi etịn̄ ete ke “Christ, ke [ẹkewa] Enye inikiet ẹte obiom idiọkn̄kpọ ediwak owo.” (Heb. 9:27; 10:10; Rome 6:⁠9) Eboho uyo eke leaven mîdụhe ye ndatndat wine ẹdi sụk n̄kpọ idiọn̄ọ ẹmi ẹdade ẹban̄a ata ikpọkidem oro Jesus akawade ye ata iyịp oro enye ọkọduọkde. Edi mme ata idem n̄kpọ ẹmi ẹsọn̄ urua didie ntem! Ẹma ẹnọ anana-idiọkn̄kpọ ikpọkidem eke owo Jesus man ererimbot ubonowo ekpekeme ndinyene ifet ndidu uwem ke nsinsi. (John 6:51) Ndien iyịp esie oro ẹkeduọkde ọyọhọ adiana-iba uduak​—⁠edinam mbon oro ẹbuọtde idem ke enye ẹsana ẹbọhọ idiọkn̄kpọ, n̄ko anamde obufa ediomi ke ufọt Abasi ye esop nditọ Israel eke spirit, oro mme Christian oro ẹyetde aran ke spirit ẹnamde odu ke edinam. (1 John 1:7; 1 Cor. 11:25; Gal. 6:​14-⁠16) Edi mme ọsọn̄urua enọ ẹmi ẹnam Abasi ekeme ndibat mbon “ekpri otuerọn̄” ke ndinen owo, ke akpanikọ ẹnọde mmọ mfọnmma eke owo. (Luke 12:32) Ẹnam emi man ẹkeme ndibon mmọ ke edisana spirit nte nditọ Abasi, ye ekikere mmọ ndibuana ye Christ ke Obio Ubọn̄ esie eke heaven. Nte mmọ ẹdiade mme n̄kpọ idiọn̄ọ Editi ke isua kiet kiet, ntem ẹtiede ntiense ẹban̄a idotenyịn eke heaven mmọ, esịtekọm mmọ ke ndidu ke “obufa ediomi” oro Christ edide esịne-ufọt ọtọn̄ọ ntak edi obufa onyụn̄ otụn̄ọ.​—⁠Heb. 8:​6-⁠12.

“ẸYAK NNYỊN IKA YE MBUFO”

14. (a) Ntak emi “mme erọn̄ en̄wen” mîsidiaha mme n̄kpọ idiọn̄ọ Editi, edi nso ke mmọ ye ọkpọsọn̄ udọn̄ ẹdori enyịn ẹban̄a? (b) Didie ke mmọ ẹse ẹbuana mmọ ye nsụhọ mme enyene-udeme ke Obio Ubọn̄?

¹⁴ “Mme erọn̄ en̄wen” ẹkụt nte Jehovah anamde n̄kpọ ye ikọt esie oro ẹyetde aran, ndien mmọ ẹdiana ye mmọ, ẹdọhọde ẹte: “Ẹyak nnyịn ika ye mbufo: koro nnyịn imokop ite ke Abasi odu ye mbufo.” (Zech. 8:​20-⁠23) Mmọ isisopke idem ọtọkiet kpọt edi mmọ ẹsibuana ọtọkiet ke ndinam ẹdiọn̄ọ eti mbụk Obio Ubọn̄ ke ofụri isọn̄. Nte ededi, owo idaha “mme erọn̄ en̄wen” idisịn ke “obufa ediomi” ye Israel eke spirit m̀mê ndida mmọ nsịn ke “ediomi . . . kaban̄a obio ubọn̄” oro Jesus akanamde ye mbon oro ẹmekde ndibuana uwem eke heaven ye enye, ndien ke ntre, nte odotde, mmọ isidiaha mme n̄kpọ idiọn̄ọ Editi. (Luke 22:​20, 29, NW) Edi nte “obufa ediomi” ọyọhọde uduak esie, atan̄de akpatre mbon “ekpri otuerọn̄” aka Obio Ubọn̄ heaven, “mme erọn̄ en̄wen” ẹfiọk ke emi owụt ete ke mme edidiọn̄ oro mmọ ẹdibọde ke isọn̄ ebe ke Obio Ubọn̄ oro ke asan̄a ekpere. Mmọ ẹbat enye nte ifet, ke “ukperedem ini” ẹmi, ndinam utom ke edidianakiet ye mme anam-akpanikọ nsụhọ mme enyene-udeme ke Obio Ubọn̄.

[Mme Ikọ idakisọn̄]

Nneme Ndụn̄ọde

● Ntak emi akamba ubak N̄wed Abasi eke Christian Usem Greek odụride ntịn̄enyịn owụt idotenyịn uka heaven?

● Didie ke mbon oro ẹbonde nte nditọ Abasi ẹdiọn̄ọ oro? Nso ke mme n̄kpọ idiọn̄ọ Editi oro mmọ ẹsidiade ẹwọrọ?

● Didie ke “mme erọn̄ en̄wen” ẹwụt ẹte ke mmimọ ke akpanikọ imadiana kiet ye “ekpri otuerọn̄”?