Mmanie Ẹnen̄ede Ẹnyene Ikot Uka Heaven?
JEHOVAH amama orụk ubonowo. Kamse, ima emi omokpon etieti tutu enye ọkọnọ Eyen esie, Jesus Christ, nte ufak man afak se Adam eteete nnyịn ọkọduọkde! Ndien nso ikedi oro? Nsinsi, mfọnmma uwem eke owo ye kpukpru unen ye idotenyịn esie. (John 3:16) Ufak oro n̄ko ekedi uyarade ima oro Jesus amade ubonowo.—Matthew 20:28.
Ẹma ẹwụt ima Abasi ke ndiberede idotenyịn iba oro Abasi ọnọde ẹmi ẹkọn̄ọde ke utịp uwa ufak Jesus. (1 John 2:1, 2) Mbemiso Jesus akakpada nte owo, n̄kukụre idotenyịn oro ekeberede ọnọ mbon oro ẹkenyenede unyịme Abasi ekedi eke uwem ke paradise isọn̄. (Luke 23:43) Ke Pentecost eke 33 C.E. ebede, nte ededi, Jehovah ama ọnọ “ekpri otuerọn̄” idotenyịn uka heaven. (Luke 12:32) Edi nso ida itie ke mme ini ndondo emi? Tọn̄ọde ke 1931 etop Obio Ubọn̄ otịm owụk ntịn̄enyịn ke “mme erọn̄ en̄wen,” ndien ọtọn̄ọde ke 1935 kaiso Abasi ke odụri “akwa otuowo” eke utọ mbon mbieterọn̄ oro ọnọ idemesie ebe ke Christ. (John 10:16; Ediyarade 7:9) Ke esịt mmọ, Abasi emesịn idotenyịn uwem nsinsi ke paradise isọn̄. Mmọ ẹyom ndidia mfọnmma udia, ẹkara mme unam ima ima, ẹnyụn̄ ẹkop inem ebuana ye ekemmọ mfọnmma owo ke nsinsi.
Mme Okop Mbọm Oku ye Ndidem
Sia ima okonụkde Jesus ndinọ uwem esie nte ufak, ke akpanikọ enye edidi edidem eke heaven oro okopde mbọm. Edi, Jesus ididụhe ikpọn̄ ke ndimenede ubonowo n̄kosịm mfọnmma ke Ukara Tọsịn Isua esie. Jesus amanam ndutịm ndidem en̄wen ẹmi ẹkopde mbọm ndidu ke heaven. Ih, “mmọ ẹyedi mme oku Abasi ye Christ, mmọ ẹyenyụn̄ ẹda ubọn̄ ye enye ke tọsịn isua.”—Ediyarade 20:1-6.
Mme nsan̄a andikara ifan̄ ke Christ edinyene, ndien didie ke ẹmek mmọ ẹnọ utọ ndyọ ndyọ ifetutom oro? Ọfọn, apostle John ama okụt owo 144,000 ẹdade ke Obot Zion ke heaven ye Eyenerọn̄, kpa Jesus Christ. Koro “ẹkefak mmọ ẹsio ke otuowo,” mmọ ẹyefiọk se ọwọrọde ndisobo idomo, ndiyọ mme mfịghe unana mfọnmma, ukụt, nnyụn̄ n̄kpa nte mme owo. (Ediyarade 14:1-5; Job 14:1) Ke ntre, nso mme okop mbọm oku-ndidem ke mmọ ẹdidi ntem!
Spirit Etie Ntiense
Owo 144,000 ‘ẹnyene ediyet oro ẹyetde aran ẹto enyeemi edide edisana,’ kpa Jehovah. (1 John 2:20, NW) Emi edi ediyet oro ẹyetde aran ẹnọ idotenyịn uwem eke heaven. Abasi ‘emefịk mmọ idiọn̄ọ ke idem, onyụn̄ esịn spirit Esie ke esịt mmọ, nte akpa ubak udeme mmọ.’—2 Corinth 1:21, 22.
Ih, mmọ oro ẹnyenede ikot uka heaven ẹnyene spirit Abasi nte ntiense oro akamade ifiọk emi. Kaban̄a emi, Paul ekewet ke N̄wed Mbon Rome 8:15-17 ete: “Mbufo [ikọbọhọ] spirit ufụn eke esịnde mbufo ẹtọn̄ọ ntak ẹnyene ndịk; edi mbufo ẹkebọ spirit eke enyenede mmọemi ẹdade ẹsịn ke ubon Abasi, emi anamde nnyịn ikot Abasi, ite, Abba, Ete. Spirit ke idemesie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ imonyụn̄ inyene udeme ke se ẹnịmde ẹnọ nditọ; imenyene udeme ke se Abasi onịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyenyụn̄ ida ubọn̄ ye Enye.” Oto ke spirit Abasi, m̀mê anamutom odudu, ke mbon oro ẹyetde aran ẹfiori ẹte, “Abba, Ete.”
Akpan uyarade nte ke ẹma ẹyet owo aran ẹnọ ikot uka heaven edi edu, m̀mê ọkpọsọn̄ ekikere eke edidi eyen. (Galatia 4:6, 7) Utọ owo oro otịm onịm ke akpanikọ ete ke Abasi omobon imọ esịn ke itie eyen eke spirit nte kiet ke otu 144,000 ẹmi ẹdide nsan̄a mme ada udeme Obio Ubọn̄ eke heaven nnyene. Enye ekeme ndisọn̄ọ nte ke idotenyịn uka heaven imọ idịghe udọn̄ oro imọ ikọride ke idem imọ m̀mê ekikere imọ; utu ke oro, enye oto Jehovah nte utịp otode edinam eke spirit Abasi ke idem imọ.—1 Peter 1:3, 4.
Ke idak odudu spirit Abasi, edu, m̀mê ọkpọsọn̄ ekikere, eke mbon oro ẹyetde aran anam utom nte odudu oro onụkde-nụk. Enye onụk mmọ ndinam n̄kpọ in̄wan̄în̄wan̄ mban̄a se Ikọ Abasi etịn̄de Abasi idotenyịn uka heaven. Mmọ n̄ko ẹnam n̄kpọ ke in̄wan̄în̄wan̄ usụn̄ ẹban̄a nte Jehovah anamde n̄kpọ ye mmọ ebe ke edisana spirit. Ntem, mmọ ẹnịm ẹte ke mmimọ idi nditọ Abasi eke spirit ye mme ada udeme nnyene.
Ke ini mbon ẹmi ẹyetde aran ẹsikotde se Ikọ Abasi etịn̄de aban̄a nditọ eke spirit ye idotenyịn uka heaven, ntụhọ esịtidem mmọ edi ndidọhọ ke esịt esịt idemmọ ẹte, ‘Emi etịn̄ aban̄a mi!’ Ih, mmọ ẹsikop idatesịt ke ini Ikọ Ete mmọ ọn̄wọn̄ọde utịp eke heaven. Mmọ ẹsidọhọ ẹte, ‘Emi etịn̄ aban̄a mi!’ ke ini ẹkotde ẹte: “Ndima, nnyịn idi nditọ Abasi kemi.” (1 John 3:2) Ndien ke ini mbon oro ẹyetde aran ẹkotde nte ke Abasi ama ada mme owo ẹdi “[ndi]tie nte akpa mbun̄wụm ke otu mmọemi enye okobotde,” ekikere mmọ ẹdi ndibọrọ ẹte, ‘Ih, enye ama ada mi edi ke ntak uduak oro.’ (James 1:18) Mmọ ẹmefiọk ẹte ke mmimọ ‘ikana baptism idụk ke Christ Jesus’ ye ke n̄kpa esie. (Rome 6:3) Ntre mmọ ẹsọn̄ọ ẹnịm ke idi ubak ikpọkidem Christ eke spirit inyụn̄ inyene idotenyịn edikpa ukem n̄kpa esie nnyụn̄ ndi se ẹnamde ẹset ẹka uwem eke heaven.
Man ẹda Obio Ubọn̄ eke heaven ẹnyene, ana mbon oro ẹyetde aran ‘ẹdọdiọn̄ ẹsịn ifịk ẹnam ikot eke ẹkekotde mmọ ye edimek eke ẹmekde mmọ ọsọn̄ọ ada.’ (2 Peter 1:5-11) Mmọ ẹsan̄a ke mbuọtidem ẹnyụn̄ ẹkaiso ndikọri ke n̄kan̄ eke spirit, kpa nte mmọ oro ẹnyenede idotenyịn eke isọn̄ ẹnamde. Ntre, nso efen idu idiana ntiense oro spirit etiede?
Ntak Mmọ Ẹdiade
Mme Christian oro ẹyetde aran iyomke ndika heaven ke ntak unana uyụhọ uwem isọn̄ usen mfịn. (Men Jude 3, 4, 16 domo.) Utu ke oro, edisana spirit etie ntiense ye spirit mmọ nte ke mmọ ẹdi nditọ Abasi. Mmọ n̄ko ẹtịm ẹfiọk ẹte ke ẹmemen mmimọ ẹsịn ke obufa ediomi. Mbon oro ẹbuanade ke ediomi emi ẹdi Jehovah Abasi ye Israel eke spirit. (Jeremiah 31:31-34; Galatia 6:15, 16; Mme Hebrew 12:22-24) Ediomi ẹnamde odu ke edinam ebe ke iyịp Jesus oro ẹkeduọkde omosio mme owo ọnọ enyịn̄ Jehovah onyụn̄ anam mme Christian emi ẹyetde aran mi ubak “mfri” Abraham. (Galatia 3:26-29, NW; Utom 15:14) Obufa ediomi ododu ke edinam tutu ẹnam kpukpru nditọ Israel eke spirit ẹset ẹkenyene uwem unana n̄kpa ke heaven.
Adianade do, mbon oro ẹnen̄erede ẹnyene ikot uka heaven inyeneke eyịghe ndomokiet m̀mê mmimọ n̄ko idu ke ediomi Obio Ubọn̄ eke heaven. Jesus eketịn̄ aban̄a ediomi emi ke ufọt esie ye mme anditiene enye ke ini enye ọkọdọhọ ete: “Mbufo edi mmọemi ẹkesọn̄ọde ẹda ye Ami ke idomo Mi; kpa nte Ete Mi okonịmde Obio Ubọn̄ ọnọ Mi, kpasụk ntre ke Ami nnyụn̄ nnọ mbufo nte ẹdia n̄kpọ ẹnyụn̄ ẹn̄wọn̄ n̄kpọ ke okpokoro Mi ke Obio Ubọn̄ Mi; mbufo ẹyenyụn̄ ẹtie ke ebekpo ekpe ikpe mme esien Israel 12.” (Luke 22:28-30) Ẹketọn̄ọ ediomi emi ye mme mbet Jesus ke ẹyetde mmo aran ke edisana spirit ke usen Pentecost eke 33 C.E. Enye odu ke edinam ke ufọt Christ ye nsan̄a ndidem esie ke nsinsi.—Ediyarade 22:5.
Mbon oro ẹnyenede ikot uka heaven ẹdiọn̄ọ in̄wan̄în̄wan̄ nte ke mmimọ idu ke obufa ediomi ye ediomi Obio Ubọn̄. Ke ntre, mmọ nte odotde ẹsidia n̄kpọ idiọn̄ọ emi edide uyo ye wine ke editi Udia Mbubịteyo Ọbọn̄, m̀mê Editi n̄kpa Jesus Christ eke isua ke isua. Uyo eke owo mîsịnke leaven ada aban̄a anana idiọkn̄kpọ ikpọkidem Jesus eke owo, wine onyụn̄ ada aban̄a mfọnmma iyịp esie oro ẹkeduọkde ke n̄kpa onyụn̄ ọsọn̄ọde obufa ediomi.—1 Corinth 11:23-26.
Edieke Jehovah esịnde fi ke esịt idotenyịn uwem eke heaven oro mîkemeke ndikpu, afo odori enyịn ke oro, afo ọbọn̄ akam esịn idotenyịn oro. Enye adia fi idem, ndien afo ukemeke ndisio enye mfep ke idemfo. Afo enyene ọkpọsọn̄ udọn̄ eke spirit. Edi edieke afo abaharede mûnyụn̄ unyeneke iwụk, ndien ke akpanikọ afo ukpenyeneke ndidia n̄kpọ idiọn̄ọ Udia Mbubịteyo Ọbọn̄.
Ntak Ukwan̄ Ekikere-e?
Ndusụk owo ẹkeme ndidia n̄kpọ idiọn̄ọ Editi ke ukwan̄ usụn̄ koro mmọ mînen̄ekede ifiọk nte ke ediyet owo aran “itoho owo emi oyomde-yom, inyụn̄ itoho owo emi efehede itọk, edi oto Abasi.” (Rome 9:16) Inaha inọ owo ndibiere nte ke imọ ikpama ẹmen imọ ẹsịn ke obufa ediomi inyụn̄ ikabade idi ada udeme nnyene ye Christ ke Obio Ubọn̄ eke heaven. Edimek otode Abasi edi akpan n̄kpọ. Ke Israel eset, Abasi ekemek mbon oro ẹdinamde utom nte mme oku esie, ndien enye ama owot Korah ke ntak emi enye ke usọn̄enyịn okoyomde itie oku emi Abasi okonịmde ọnọ ubon Aaron. (Exodus 28:1; Numbers 16:4-11, 31-35; 2 Chronicles 26:18; Mme Hebrew 5:4, 5) Ukem ntre, ikpenemke Jehovah esịt edieke owo onịmde idemesie nte enyeoro ẹkotde ndidu ke otu ndidem ye mme oku eke heaven ke ini Abasi mînọhọ enye utọ ikot oro.—Men 1 Timothy 5:24, 25 domo.
Owo ekeme ndikere ke ndudue ete ke imọ imenyene ikot uka heaven ke ntak ọkpọsọn̄ ntụk ọtọn̄ọde oto n̄kpọsọn̄ mfịna. N̄kpa nsan̄andọ m̀mê afanikọn̄ efen ekeme ndinam owo anana udọn̄ ke uwem eke isọn̄. Mîdịghe ata n̄kpet n̄kpet ufan ekeme ndidọhọ ke imọ idi enyeoro ẹyetde aran, ndien owo ekeme ndinyene udọn̄ ndinyene ukem ikot oro. Utọ n̄kpọ ntre ekeme ndinam enye ekere ke uwem eke heaven ana ọnọ imọ. Edi emi idịghe usụn̄ emi Abasi ọnọde owo ekededi spirit eke edidi eyen. Ediwụt unana esịtekọm ke uduak Abasi aban̄ade isọn̄ edieke owo oyomde ndika heaven ke ntak mme idiọk idaha ke uwem eke isọn̄.
N̄kani ekikere ido ukpono ẹkeme n̄ko ndinam owo ẹbiere ukwan̄ ukwan̄ nte ke imọ imenyene ikot uka heaven. Eyedi enye ama abuana inikiet ye nsunsu ido ukpono oro ọnọde uwem eke heaven nte n̄kukụre idotenyịn oro anade ọnọ mbon mbuọtidem. Ntem, oyom Christian ekpeme ọbiọn̄ọ edidi se ntụk ye n̄kani ukwan̄ ekikere anamde oyok.
Ndụn̄ọde Ntịn̄enyịn Edi Akpan N̄kpọ
Apostle Paul ama anam akpan n̄kpọ ọworọ ada ke ini enye ekewetde ete: “Owo ekededi eke edidiade uyo Ọbọn̄ edinyụn̄ ọn̄wọn̄de cup Ọbọn̄ ke usụn̄ eke mîdotke eyenyene isop aban̄a ikpọkidem ye iyịp Ọbọn̄. Edi yak owo odomo idemesie ọfiọk, onyụn̄ adia uyo, onyụn̄ ọn̄wọn̄ cup ntre; koro owo eke adiade onyụn̄ ọn̄wọn̄de, ke enye mîdiọn̄ọke ikpọkidem, ke adia onyụn̄ ọn̄wọn̄ ubiomikpe odori idemesie.” (1 Corinth 11:27-29) Ke ntre, Christian oro ama akana baptism emi ke mme isua ndondo emi ọtọn̄ọde ndikere nte ke imọ imọbọ ikot uka heaven ekpenyene nditịm n̄kere mban̄a n̄kpọ emi ye akam.
Utọ owo emi ekpekeme n̄ko ndibụp idemesie ete: ‘Nte mbon en̄wen ẹnam mi nnyene ekikere uwem eke heaven?’ Emi ekpedi se mîdotke, koro Abasi mîmekke owo ndomokiet ndimek mbon en̄wen nsịn ke utọ ifet oro. Ntụhọ eke n̄kan̄ ekikere idịghe idiọn̄ọ ndomokiet ke Abasi eyet owo aran, inyụn̄ iyetde mme ada udeme Obio Ubọn̄ nnyene aran ebe ke ndinam mmọ ẹkop mme uyo ye mme etop oro akamade ifiọk emi.
Ndusụk owo ẹkeme ndibụp idemmọ ẹte: ‘Mbemiso n̄kakabade ndi Christian, ndi mma nsisịn idem ke edida n̄kpọsọn̄ ibọk ke idiọk usụn̄? Nte ami ke nda mme ibọk oro ẹfịnade ntụk mi? Ndi mma mbọ usọbọ ke ntak udọn̄ọ ibuot m̀mê ntụk?’ Ndusụk owo ẹkedọhọ ke mmimọ ima ibemiso in̄wana ibiọn̄ọ se mmimọ ikekerede ke edi idotenyịn uka heaven. Mbon efen ẹkedọhọ ẹte ke ekpri ibio ini Abasi ama emen idotenyịn eke isọn̄ mmimọ efep ndien ke akpatre ama ọnọ mmimọ idotenyịn uka heaven. Edi utọ usụn̄ edinam oro edi isio ye mme edinam Abasi. Akande oro, mbuọtidem inanake iwụk; enye edi akpanikọ.—Mme Hebrew 11:6.
Owo ekeme ndibụp idemesie n̄ko ete: ‘Nte ami nnyom uwọrọiso? Nte ami nnyene udọn̄ ndinyene itie odudu idahaemi mîdịghe nte kiet ke otu ndidem ye mme oku oro ẹbuanade ye Christ?’ Ke akpa isua ikie C.E., ke ini ẹkenọde kpukpru owo ikot ndibe ndụk Obio Ubọn̄ eke heaven, ikedịghe kpukpru Christian oro ẹyetde aran ẹkekama ifetutom nte mbon otu ukara m̀mê nte mbiowo m̀mê mme asan̄autom unamutom. Ediwak mmọ ẹkedi iban, mmọ ikonyụn̄ inyeneke san̄asan̄a odudu; m̀mê spirit oro ẹyetde aran ndida utịbe utịbe ifiọk Ikọ Abasi ndi, koro Paul ama okụt nte odotde ndikpep nnyụn̄ nnọ ndusụk owo item. (1 Corinth 3:1-3; Mme Hebrew 5:11-14) Mbon oro ẹnyenede ikot uka heaven idaha idemmọ nte mme ọwọrọ iso owo, mmọ inyụn̄ idụrike ntịn̄enyịn iwụt edidi oro ẹdide mbon ẹmi ẹyetde aran. Utu ke oro, mmọ ẹwụt nsụhọdeidem oro nte odotde ẹdoride enyịn ẹto mbon eke ẹnyenede “ekikere Christ.” (1 Corinth 2:16) Mmọ ẹdiọn̄ọ n̄ko ẹte ke ana kpukpru Christian ẹsịm ndinen n̄kpọ oro Abasi oyomde, edide idotenyịn mmọ ẹdi eke heaven m̀mê eke isọn̄.
Ndidọhọ ke imenyene ikot uka heaven inamke owo enyene san̄asan̄a ediyarade. Abasi enyene usụn̄ unyene nneme emi ebede ke enye enye ọnọ esop esie eke isọn̄ udia eke spirit. (Matthew 24:45-47) Ntre owo ndomokiet ikpekereke nte ke imọ ndidi Christian emi ẹyetde aran ọmọnọ imọ ifiọk oro akande eke mbon “akwa otuowo” ye idotenyịn eke isọn̄. (Ediyarade 7:9) Owo iwụtke ediyet oro ẹyetde owo aran ebe ke owo ndidi ata ke edinọ ikọ ntiense, edibọrọ mme mbụme n̄wed Abasi, m̀mê edinọ mme utịn̄ikọ Bible, koro mme Christian oro ẹnyenede idotenyịn eke isọn̄ ẹsinam ọfọn etieti n̄ko ke afan̄ emi. Ukem nte mbon oro ẹyetde aran, mmọ n̄ko ke edu uwem Christian oro odotde ẹkpebe. Ke ntak oro, Samson ye mbon eken mbemiso eyo mme Christian ẹma ẹnyene spirit Abasi ẹnyụn̄ ẹyọhọ ye ifịk ye asian. Kpa ye oro, ndomokiet ke “otu ntiense” oro ikenyeneke idotenyịn uka heaven.—Mme Hebrew 11:32-38; 12:1; Exodus 35:30, 31; Judges 14:6, 19; 15:14; 1 Samuel 16:13; Ezekiel 2:2.
Ti Owo Emi Anamde Edimek
Edieke ekemmọ andinịm ke akpanikọ obụpde mbụme aban̄a ikot uka heaven, ebiowo oro ẹmekde m̀mê Christian eken oro ọkọride osịm ọyọhọ idaha ekeme ndineme n̄kpọ emi ye enye. Edi owo kiet ikemeke ndinam ubiere nnọ owo efen, ndien edi Jehovah ọnọ idotenyịn eke heaven. Owo emi enyenede ikot uka heaven ke akpanikọ ikpedehe-dei iyom ndibụp ekemmọ Christian m̀mê enye enyene utọ idotenyịn oro. Mbon oro ẹyetde aran edi se ‘ẹkebonde obufa, idịghe ke ubon [“mfri,” NW] eke edikpade, edi ke ubon eke mîkemeke ndikpa, oto ke ikọ Abasi emi odude uwem onyụn̄ ebịghide ke nsinsi.’ (1 Peter 1:23) Ebede ke spirit ye ikọ esie, Abasi ọmọtọ “mfri” oro anamde owo oro edi “obufa edibotn̄kpọ,” ye idotenyịn uka heaven. (2 Corinth 5:17, NW) Ih, Jehovah anam edimek.
Ke ini ikpepde Bible ye mbufa owo, ke ntre, ifọnke ndinọ ekikere nte yak mmọ ẹdomo ndibiere m̀mê mmọ ẹnyene ikot uka heaven. Edi nso edieke Christian oro ẹyetde aran owụtde unana edinam akpanikọ ndien oyom ẹda owo ẹsịn ke itie. Adan̄aoro eyewụt eti ibuot ndibiere nte ke Abasi edinọ owo emi onịmde eti uwụtn̄kpọ ke ndinam n̄kpọ Ete nnyịn eke heaven ke edinam akpanikọ ke ediwak isua, ikot uka heaven.
Mfịn, akpan ibuotikọ etop Abasi idịghe mme owo ndikabade ndi andibuana ke n̄wanndọ Christ eke heaven. Utu ke oro, “spirit ye n̄wanndọ ẹdọhọ ẹte, Di.” Emi edi ikot ndinyene uwem ke paradise isọn̄. (Ediyarade 22:1, 2, 17) Nte mbon oro ẹyetde aran ẹdade iso ke utom emi, mmọ ẹwụt “nsụkidem ye ifụre ifụre ido” ẹnyụn̄ ẹnam utom ‘ndinam ikot eke ẹkekotde mmọ ye edimek eke ẹmekde mmọ ọsọn̄ọ ada.’—Ephesus 4:1-3; 2 Peter 1:5-11.