Ukara Emi Edidade Paradise Edi

Ke ini Jesus okodude ke isọn̄, enye ama ọdọhọ mme mbet esie ete ẹbọn̄ akam ẹyom Obio Ubọn̄ Abasi: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:9, 10) Enye n̄ko ama esitịn̄ kpukpru ini aban̄a “eti mbụk obio ubọn̄ oro.” (Matthew 4:23, New World Translation) Ke akpanikọ, enye ama esitịn̄ ekese aban̄a Obio Ubọn̄ oro akan nte enye eketịn̄de aban̄a n̄kpọ efen ekededi. Ntak-a? Koro Obio Ubọn̄ oro edide n̄kpọutom emi Abasi edidade ndibiere mme mfịna ẹmi ẹnamde uwem ọsọn̄ etieti mfịn. Ebede ke Obio Ubọn̄ oro, Abasi eyewara ndida ekọn̄, biọn̄, udọn̄ọ, ye ubiatibet nsịm utịt, ndien enye eyeda edidianakiet ye emem edi.

Nte afo akpama ndidụn̄ ke utọ ererimbot oro? Ke edide ntre, do afo ekpenyene ndikot ekpri n̄wed emi. Ke esịt esie, afo eyefiọk nte ke Obio Ubọn̄ emi edi ukara, edi, enye ọfọn akan ukara ekededi oro akanam akarade ubonowo. Afo n̄ko eyekụt edinem usụn̄ oro Abasi ọkọtọn̄ọde sụn̄sụn̄ nditịn̄ mme uduak esie kaban̄a Obio Ubọn̄ oro nnọ mme asan̄autom esie. Adianade do, afo eyekụt nte Obio Ubọn̄ oro ekemede ndin̄wam fi mfịn.

Ke akpanikọ, afo emekeme ndidi andidu ke idak Obio Ubọn̄ Abasi idahaemi. Edi mbemiso emekde ndinam emi, oyoyom afo ọfiọk ekese aban̄a enye. Mmọdo imesịn udọn̄ inọ fi ndidụn̄ọde ekpri n̄wed emi. Ẹsio kpukpru se enye edisiande fi iban̄ṅa Obio Ubọn̄ emi ẹto Bible.

Akpa kan̄a, ẹyak ise ntak itịmde iyom Obio Ubọn̄ Abasi.

Ke editọn̄ọ mbụk owo, Abasi ama anam owo ọfọn ama onyụn̄ onịm enye ke paradise. Ini oro, owo ikoyomke Obio Ubọn̄.

Nte ededi, Adam ye Eve, akpa ete ye eka nnyịn, ẹma ẹkpan̄ utọn̄ ẹnọ Satan, kpa ọsọn̄ibuot angel. Enye ama osu nsu ọnọ mmọ aban̄a Abasi onyụn̄ anam mmọ n̄ko ẹsọn̄ ibuot ye Abasi. Ntre mmọ ẹma ẹdot n̄kpa, koro “n̄kpọ eyenutom idiọkn̄kpọ edi n̄kpa.”—N̄wed Mbom Rome 6:23.

Anana mfọnmma, anamidiọk owo ikemeke ndinyene mfọnmma nditọ. Ntre kpukpru nditọ Adam ẹkemana ye unana mfọnmma, idiọkn̄kpọ, ye n̄kpa.—N̄wed Mbon Rome 5:12.

Ọtọn̄ọde ke ini oro akaiso, mme owo ẹma ẹyom Obio Ubọn̄ Abasi ndin̄wam mmọ ẹbọhọ isụn̄i idiọkn̄kpọ ye n̄kpa. Obio Ubọn̄ oro n̄ko eyenam enyịn̄ Abasi asana ọbọhọ nsu oro Satan okosude odori enye.

Jehovah Abasi ama ọn̄wọn̄ọ nte ke akpan “mfri” (m̀mê eyen) eyemana man afak ubonowo osio ke idiọkn̄kpọ. (Genesis 3:15, New World Translation) “Mfri” emi edidi Edidem Obio Ubọn̄ Abasi.

Anie edidi oro?

N̄kpọ nte isua 2,000 ke Adam ama akanam idiọkn̄kpọ, ata eren mbuọtidem kiet ama odu emi ekekerede Abraham. Jehovah ama ọdọhọ Abraham ọkpọn̄ obio emana esie onyụn̄ okodụn̄ ke mme tent ke isọn̄ Palestine.

Abraham ama anam kpukpru se Jehovah eketemede enye, ọkọrọ ye ata ọkpọsọn̄ n̄kpọ kiet. Jehovah ọkọdọhọ enye awa eyen esie Isaac ke itieuwa.

Jehovah ikenen̄ekede iyom ẹwa owo. Edi enye okoyom ndifiọk adan̄a nte Abraham amade enye. Akayak esisịt Abraham ndiwot Isaac ke ini Jehovah akakpande enye.

Ke ntak akwa mbuọtidem Abraham, Jehovah ama ọn̄wọn̄ọ ndinọ nditọ esie isọn̄ Palestine onyụn̄ ọdọhọ nte ke Mfri un̄wọn̄ọ oro edito ke udịm ubon esie, ye eke eyen esie Isaac.—Genesis 22:​17, 18; 26:​4, 5.

Isaac ekenyene amanaiba nditọ irenowo, Esau ye Jacob. Jehovah ọkọdọhọ ete ke Mfri un̄wọn̄ọ oro edidi ebe ke Jacob.—Genesis 28:​13-15.

Jacob, emi Jehovah n̄ko okokotde Israel, ekenyene nditọ 12, ndien nte ini akade, kpukpru mmọ ẹma ẹtọn̄ọ ndiwak.—Genesis 46:8-27.

Ke ini idiọk akan̄ okodude ke obio oro, Jacob ye ubon esie ẹma ẹwọrọ ẹka Egypt ke ikot Pharaoh, kpa andikara Egypt.—Genesis 45:16-20.

Ke Egypt, ẹma ẹyarade nte ke Mfri un̄wọn̄ọ oro edidi andito ubon Judah, eyen Jacob.—Genesis 49:10.

Edikem Jacob akpa, ndien nditọ esie ẹdọdiọn̄ ẹtọt ke ibat tutu mmọ ẹkabade ẹtie nte idụt. Mmọdo nditọ Egypt ẹma ẹkabade ẹkop ndịk ẹban̄a mmọ ẹnyụn̄ ẹnam mmọ ẹdi ifụn.—Exodus 1:7-14.

Ke akpatre Jehovah ama ọdọn̄ Moses, ata eren mbuọtidem, ete ọkọdọhọ Pharaoh emi okodude inioro ayak nditọ Israel ẹnyọn̄ọ ke ifụre.—Exodus 6:10, 11.

Pharaoh ama esịn, anamde Jehovah ada ufen duop etiene nditọ Egypt. Nte akpatre ufen, enye ama ọdọn̄ angel nsobo ete okowot kpukpru akpan mbio Egypt.—Exodus, ibuot 7 osịm 12.

Abasi ama ọdọhọ nditọ Israel ete ke edieke mmọ ẹdiwotde eyenerọn̄ ke usia mbubịteyo mmọ ẹnyụn̄ ẹda ndusụk iyịp esie ẹyet ke obubọk usụn̄ mmọ, angel nsobo oro eyebe ọkpọn̄ ufọk mmọ. Ntre ẹma ẹnyan̄a mme akpan nditọ Israel.—Exodus 12: 1-35.

Nte utịp, Pharaoh ama ebịn nditọ Israel osio ke Egypt. Edi ekem enye ama okpụhọde ekikere esie onyụn̄ ebịne mmọ man akada mmọ afiak ọnyọn̄.

Jehovah ama eberede usụn̄ ọnọ nditọ Israel ndibọhọ ebe ke Ididuot Inyan̄. Ndien ke ini Pharaoh ye udịmekọn̄ esie ẹken̄wanade nditiene mmọ, mmọ ẹma ẹkpan̄a ke mmọn̄.—Exodus 15:5-21.

Jehovah ama ada nditọ Israel usụn̄ osịm obot kiet ẹkekotde Sinai ke desert. Do, enye ama ọnọ mmọ Ibet esieonyụn̄ ọdọhọ ete ke edieke mmọ ẹdinịmde enye, mmọ ẹyekabade ẹdi obio oku ye edisana idụt. Ntre, nte ini akakade, nditọ Israel ẹma ẹnyene ifet ndidi akpan ubak Obio Ubọn̄ Abasi. —Exodus 19:6; 24:3-8.

Ke nditọ Israel ẹma ẹkedu n̄kpọ nte isua kiet ke Obot Sinai, Jehovah ama ada mmọ aka Palestine, kpa isọn̄ emi enye ọkọn̄wọn̄ọde ndinọ Abraham, eteete mmọ.

Ke Palestine, Abasi ke ukperedem ama ayak ndidem ẹkara nditọ Israel. Ekem, Abasi ama enyene obio ubọn̄ ke isọn̄.

Udiana edidem Israel ekedi David, andito esien Judah. David ama akan kpukpru mme asua Israel, onyụn̄ anam Jerusalem edi ibuot obio idụt oro.

Mme n̄kpọntịbe ini ukara David ẹwụt nte ke ini Jehovah ọnọde edidem ibetedem, baba andikara ke isọn̄ ikemeke ndikan enye.

Jehovah ọkọdọhọ nte ke Mfri un̄wọn̄ọ oro edidi andito ubon David.—1 Chronicles 17:​7, 11, 14.

Solomon, eyen David, ama akara ke enye akpade. Enye ekedi enyene-ọniọn̄ edidem, ndien Israel ẹma ẹforo ke idak ukara esie.

Solomon ama ọbọp n̄ko ediye temple ọnọ Jehovah ke Jerusalem. Nte mme n̄kpọ ẹketiede ke idak ukara Solomon ẹwụt nnyịn ndusụk edidiọn̄ oro Obio Ubọn̄ Abasi emi edide edidade ọsọk ubonowo.—1 Ndidem 4:​24, 25.

Nte ededi, uwak ndidem ẹmi ẹkedude ke Solomon ama akakpa, ikanamke akpanikọ ndomokiet.

Edi ke adan̄aemi mme andito ubon David ẹkesụk ẹkarade ke Jerusalem, Jehovah ama ada prọfet esie, Isaiah nditịn̄ mban̄a Eyen David eke ini iso emi edikarade ofụri isọn̄ ke edinam akpanikọ. Enyeemi ekenyene ndidi Mfri un̄wọn̄ọ oro.—Isaiah 9:​6, 7.

Prọfet Isaiah ama ebemiso etịn̄ nte ke ukara Esie eyekon̄ akan eke Solomon.—Isaiah, ibuot 11 and 65.

Mme asan̄autom Abasi ẹma ẹdiyịk, idahaemi, ẹkan nte akanam edide, m̀mê Mfri emi edidi anie.

Edi, mbemiso Mfri oro ekedide, ndidem Israel ẹma ẹkabade ẹdiọk etieti tutu ke 607 B.C.E. Jehovah ama ayak mbon Babylon ẹkan idụ oro, ndien ẹma ẹtan̄ ata ekese owo ẹka ntan̄mfep ke Babylon. Edi Abasi ikefreke un̄wọn̄ọ esie. Mfri oro ekenyene ndisụk nto udịm ubon David.—Ezekiel 21:​25-27.

Se ikotịbede inọ Israel okowụt nte ke okposụkedi edidem eke owo emi enyenede ọniọn̄ onyụn̄ anamde akpanikọ ekemede ndida ufọn nsọk mme owo, mme ufọn ẹmi ẹma ẹnyene adan̄a. Mme anam-akpanikọ esikpa ndien mme andida itie mmọ ẹkeme nditre ndinam akpanikọ. Nso ekedi usọbọ? Mfri un̄wọn̄ọ.

Ke akpatre, ke ediwak tọsịn isua ẹbede, Mfri oro ama ọwọrọ owụt idem. Enye ekedi anie?

Angel otode Abasi ama etịn̄ ibọrọ ọnọ n̄kaiferi Israel emi mîkọdọhọ ndọ, ẹkekotde Mary. Enye ama asian n̄kaiferi emi nte ke enye eyenyene eyen erenowo emi enyịn̄ esie edidide Jesus. Sese se angel oro eketịn̄de mi:

“Enye eyekpon, eyenyụn̄ ekere Eyen Andikon̄ N̄kan; Jehovah Abasi eyenyụn̄ ọnọ Enye ebekpo ete Esie David: Enye eyeda ubọn̄.”—Luke 1:​32, 33.

Ntre Jesus ekenyene ndidi Mfri un̄wọn̄ọ oro ndien ke akpatre akabade edi Edidem Obio Ubọn̄ Abasi. Edi ntak emi Jesus ekenyenede ukpụhọde ye iren mbuọtidem ẹmi ẹkebemde iso ẹdu?

Jesus akamana ke utịbe usụn̄. Eka esie ekedi eyenan̄wan mîfiọkke erenowo, ndien enye ikenyeneke ete eke owo. Jesus ama ebebemiso odu ke heaven ndien edisana spirit, m̀mê anamutom odudu Abasi, ama okpụhọde uwem Jesus ke heaven edisịn ke idịbi Mary. Ntre, enye ikadaha idiọkn̄kpọ Adam imana. Ke ofụri eyouwem esie, Jesus ikanamke idiọkn̄kpọ.—1 Peter 2:22.

Ke ini ekedide isua 30 ke emana, Jesus ama ana baptism.

Enye ama etịn̄ ọnọ mme owo aban̄a Obio Ubọn̄ Abasi ndien ke akpatre ama owụt idemesie nte Edidem Obio Ubọn̄ oro.—Matthew 4:23; 21:​4-11.

Enye n̄ko ama anam ediwak utịben̄kpọ.

Enye ama anam idem ọsọn̄ mbon udọn̄ọ.—Matthew 9:35.

Enye ama ọnọ mbon ọbiọn̄ udia ke utịbe usụn̄.—Matthew 14:​14-22.

Enye ama anam mme akpan̄kpa ẹset.—John 11:​38-44.

Mme utịben̄kpọ ẹmi ẹwụt mme orụk n̄kpọ oro Jesus edinamde ọnọ ubonowo nte Edidem Obio Ubọn̄ Abasi.

Nte afo emeti nte Edidem David akanamde Jerusalem edi ibuot obio ọnọ obio ubọn̄ esie? Jesus ama anam an̄wan̄a nte ke Obio Ubọn̄ Abasi ididụhe ke isọn̄, edi ke heaven. (John 18:36) Oro edi ntak ẹkotde Obio Ubọn̄ oro “Jerusalem enyọn̄.”—Mme Hebrew 12:​22, 28.

Jesus ama etịn̄ mme ibet oro mbon ẹmi ẹdidude ke idak Obio Ubọn̄ oro ẹdidụkde ibuot ẹnọ. Mme ibet ẹmi ẹdu idahaemi ke Bible. Ata akpan ibet oro ẹkedi nte ke mme owo ẹnyene ndima Abasi nnyụn̄ mma kiet eken.—Matthew 22:​37-39.

Jesus ama ayarade n̄ko nte ke imọ ididụhe ikpọn̄ ke ndikara Obio Ubọn̄ imọ. Mme owo ẹyedu oro ẹmekde ndika heaven n̄kakara ye enye do. (Luke 12:32; John 14:3) Mmọ ẹdidi owo ifan̄? N̄wed Eriyarare 14:1 ọbọrọ ete:144,000.

Edieke owo 144,000 kpọt ẹkade heaven ndikara ye Jesus, nso ke ubonowo eken ẹkeme ndidori enyịn mban̄a?

Bible ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

Mbon oro ẹdidụn̄de ke isọn̄ ke nsinsi ke ẹkot “mme erọn̄ en̄wen.”—John 10:16.

Mmọdo idotenyịn iba ẹdu. Owo 144,000 ẹdu oro Jehovah Abasi okotde aka heaven ndikara ye Jesus Christ. Edi ediwak million mbon en̄wen ẹnyene ata idotenyịn ndidu uwem ke isọn̄ ke nsinsi nte mme andidu ke idak Obio Ubọn̄ esie.—Eriyarare 5:10.

Satan ama asua Jesus onyụn̄ ọbiọn̄ọ enye. Ke Jesus ama ọkọwọrọ ikọ ke isua ita ye ubak, Satan ama anam ẹmụm enye ẹnyụn̄ ẹkọn̄ enye ke eto ẹwot. Ntak oro Abasi okonyịmede emi?

Ti ete, sia ikamanade ito Adam, kpukpru nnyịn imanam idiọkn̄kpọ inyụn̄ idot n̄kpa.—N̄wed Mbon Rome 6:23.

Ti n̄ko, ete ke sia Jesus akamanade ke utịbe usụn̄, enye ekedi mfọnmma owo ndien ikodotke n̄kpa. Nte ededi, Abasi ama ayak Satan ‘anuak Jesus nditịn̄ ikpat,’ owot enye. Edi Abasi ama anam enye afiak odu uwem nte spirit emi mîkemeke ndikpa ke nsinsi. Sia enye okosụk enyenede unen mfọnmma uwem eke owo, enye ekeme kemi ndida emi mfak nnyịn mme owo nsio ke idiọkn̄kpọ.—Genesis 3:15; N̄wed Mbon Rome 5:12, 21; Matthew 20:28.

Man an̄wam nnyịn ndifiọk ọyọhọ ọyọhọ se uwa Jesus ọwọrọde, Bible etịn̄ aban̄a enye ebe ke mme ntịn̄nịm uwụtn̄kpọ.

Ke uwụtn̄kpọ, nte emeti nte Jehovah ọkọdọhọde Abraham awa eyen esie, nte n̄kpọ ndidomo ima esie nse?

Emi ekedi ntịn̄nịm uwụtn̄kpọ kaban̄a uwa Jesus. Enye okowụt nte ima Jehovah kaban̄a ubonowo otịmde okpon tutu enye ayak Eyen esie, Jesus, ete akpa ke ibuot nnyịn man nnyịn ikpenyene uwem.—John 3:16.

Nte afo emeti usụn̄ emi Jehovah akanyan̄ade nditọ Israel osio ke Egypt onyụn̄ anyan̄ade mme akpan mmọ oto ke ndinam angel nsobo oro ebe ọkpọn̄ mmọ?—Exdodus 12:12, 13.

Emi ekedi ntịn̄nịm uwụtn̄kpọ. Kpa nte iyịp eyenerọn̄ oro ọkọwọrọde uwem ọnọ mme akpan Israel, iyịp oro Jesus ọkọduọkde ọwọrọ uwem ọnọ mbon oro ẹnịmde enye ke akpanikọ. Ndien nte mme n̄kpọntịbe okoneyo oro ẹkewọrọde ubọhọ ẹnọ nditọ Israel, n̄kpa Jesus anam ubonowo ẹbọhọ idiọkn̄kpọ ye n̄kpa.

Oro edi ntak ẹkotde Jesus “Eyenerọn̄ Abasi emi emende mme idiọkn̄kpọ ererimbot efep.”—John 1:29.

Nte ededi, ke adan̄emi Jesus okodude ke isọn̄, enye n̄ko ama atan̄ mme mbet obok onyụn̄ ekpep mmọ ndikwọrọ eti mbụk Obio Ubọn̄ oro, idem ke enye akpade.—Matthew 10:5; Luke 10:1.

Mmọemi ẹkedi akpa mme owo oro Abasi ekemekde ndikara ye Jesus ke Obio Ubọn̄ esie.—Luke 12:32.

Nte afo emeti nte ke Abasi ama ọn̄wọn̄ọ ọnọ mme Jew nte ke edieke mmọ ẹdinịmde Ibet oro, mmọ ẹyedi “obio oku”? Kemi mmọ ẹma ẹnyene ifet ndidi ubak Obio Ubọn̄ Abasi nnyụn̄ nnam n̄kpọ nte mme oku eke heaven edieke mmọ ẹkpenyịmede Jesus. Edi ekese mmọ ẹma ẹsịn Jesus.

Mmọdo ọtọn̄ọde ke ini oro akaiso, mme Jew ikedịghe aba idụt emi Abasi emekde; Palestine ikedịghe aba Isọn̄ Un̄wọn̄ọ.—Matthew 21:43; 23:37, 38.

Ọtọn̄ọde ke eyo Jesus tutu osịm eke nnyịn, Jehovah ke akatan̄ mbon ẹmi ẹdikarade ye Jesus ke heaven obok. Ekpri tọsịn ibatowo ke otu mmọ ke esụk ẹdu uwem ke isọn̄ mfịn. Nnyịn ikot mmọ mme nsụhọ ẹmi ẹyetde aran.—Eriyarare 12:17.

Idahaemi, afo ọmọtọn̄ọ ndikụt se Obio Ubọn̄ Abasi edide. Enye edi ukara eke heaven, Edidem esie edi Jesus Christ, ndien owo 144,000 ẹto isọn̄ ẹkedu ye enye. Enye eyekara anam-akpanikọ ubonowo ke isọn̄ onyụn̄ enyene odudu ndida emem nsọk isọn̄.

Ke n̄kpa esie ebede, ẹma ẹnam Jesus eset ke n̄kpa onyụn̄ ọdọk ke heaven. Do, enye ama ebet Abasi etịn̄ ini emi edidide ekemini ọnọ enye nditọn̄ọ ukara nte Edidem Obio Ubọn̄ Abasi. (Psalm 110:1) Ini ewe edidi oro?

Ndusụk ini Jehovah ama esinam mme owo ẹdaba ndap man asian mmọ mme n̄kpọ aban̄a Obio Ubọn̄ esie.

Ke eyo Daniel, Jehovah ama anam Nebuchadnezzar, edidem Babylon adaba utọ ndap oro. Enye akaban̄a akwa eto kiet.—Daniel 4:10-37.

Ẹma ẹsịbe eto oro ẹduọk ẹnyụn̄ ẹbọp etak esie ke isua itiaba.

Eto oro akada aban̄a Nebuchadnezzar. Kpa nte ẹkebọpde etak eto oro ke isua itiaba, ibuot ama ebe Nebuchadnezzar ke isua itiaba. Ekem ibuot ama afiak ọfọn enye.

Kpukpru ẹmi ẹkedi ntịn̄nịm uwụtn̄kpọ. Nebuchadnezzar akada aban̄a itie edikara ofụri ererimbot eke Jehova. Ke akpa ini, ekedi mme andito ubon Edidem David ẹkesikama itie ukara emi ke Jerusalem. Ke ini Babylon akakande Jerusalem ke 607 B.C.E., udịm ndidem oro ama etre. Edidem efen ikenyeneke ndidu ke udịm ubon David “tutu enyeemi edikpede ikpe edi.” (Ezekiel 21:27) Owo oro ekedi Jesus Christ.

Edibịghi adan̄a didie ọtọn̄ọde ke 607 B.C.E. tutu osịm ini emi Jesus editọn̄ọde ndikara? Ntịn̄nịm isua itiaba. Oro edi, isua 2,520. (Eriyarare 12:6, 14) Ndien isua 2,520 ọtọn̄ọde 607 B.C.E. ada nnyịn osịm 1914 C.E.

Ntre Jesus ọkọtọn̄ọ ndikara ke heaven ke 1914. Nso ke oro ọkọwọrọ?

Bible asian nnyịn ebe ke n̄kukụt oro apostle John okokụtde.

Enye ama okụt n̄wan kiet ke heaven amande eyen erenowo.—Eriyarare 12:1-12.

N̄wan oro akada aban̄a esop Abasi eke heaven, emi esịnede kpukpru mme angel oro ẹsan̄ade utom ẹnọ Abasi ke heaven. Eyen erenowo oro ada aban̄a Obio Ubọn̄ Abasi. Emi “akamana” ke 1914.

Nso n̄kpọ efen ikotịbe? Akpa n̄kpọ emi Jesus akanamde nte Edidem ekedi ndisio Satan, ye mme angel oro ẹketienede ẹsọn̄ ibuot ke heaven nduọk ke isọn̄.—Eriyarare 12:9.

Bible etịn̄ utịp oro ọnọ nnyịn ete: “Ẹdara, O mme heaven, ye mbufo ẹmi ẹdụn̄ọde ke esịt. Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”—Eriyarare 12:12.

Ntre ke ini Jesus ọkọtọn̄ọde ndikara ke heaven, mme asua esie ẹma ẹnen̄ede ẹsọn̄ idem ke isọn̄. Nte Bible ekebemde iso etịn̄, enye ama ọtọn̄ọ ndikara ke ufọt mme asua esie.—Psalm 110:1, 2.

Nso ke emi ekenyene ndiwọrọ nnọ ubonowo?

Jesus ama etịn̄ ọnọ nnyịn: mme ekọn̄, akan̄, udọn̄ọ, ye unyekisọn̄.—Matthew 24:7, 8; Luke 21:10, 11.

Nnyịn imokụt mme n̄kpọ ẹmi ẹtịbede toto ke 1914, emi edide ntak efen oro anamde nnyịn idiọn̄ọ nte ke Obio Ubọn̄ oro ama ọtọn̄ọ ndikara inioro.

N̄ko ‘editịmede esịt ekenyene ndimụm mme idụt isọn̄, oto ke nnanenyịn . . . idem onyụn̄ eyemede mme owo oto ke ndịk.’ (Luke 21:25, 26) Nnyịn imokụt oro, n̄ko, tọn̄ọde ke 1914.

Apostle Paul ama adian do ete ke mme owo ẹyedi “mme ama idem, ye mme ama inyene; . . . ẹsọn̄ ibuot ye ete ye eka, . . . ẹnyụn̄ ẹbiat un̄wọn̄ọ; ẹma ebiari, ẹyak idiọkitọn̄ akan mmọ ubọk.”—2 Timothy 3:1-5.

Kemi afo ọmọfiọk ntak emi uwem enen̄erede ọsọn̄ mfịn. Satan ke anam utom ọkpọsọn̄. Edi Obio Ubọn̄ Abasi ke anam utom ọkpọsọn̄ n̄ko.

Ekpri ini ke 1914 ebede, nsụhọ mbon oro ẹdoride enyịn ndikara ke heaven ye Jesus ẹma ẹtọn̄ọ nditịn̄ eti mbụk oro nte ke ẹma ẹwụk Obio Ubọn̄ oro. Utom emi amatata idahaemi osịm ofụri ererimbot, kpa nte Jesus ọkọdọhọde ke enye eyetara.—Matthew 24:14.

Nso idi uduak utom ukwọrọikọ emi?

Akpa, edi nditịn̄ nnọ mme owo mban̄a Obio Ubọn̄ Abasi.

Udiana, edi ndin̄wam mme owo ndibiere m̀mê mmimọ imoyom ndidu ke idak Obio Ubọn̄ oro.

Jesus ọkọdọhọ ete ke ẹyebahade kpukpru ubonowo ke eyo nnyịn ẹsịn ke otu mbon mbieterọn̄ ye mbon mbietebot.—Matthew 25:31-46.

‘Mme erọn̄’ ẹdidi mbon oro ẹmade enye ye nditọete esie. ‘Mme ebot’ ẹdidi mbon oro mîmaha.

‘Mme erọn̄’ ẹyenyene nsinsi uwem ndien ‘mme ebot’ idinyeneke.

Ẹnam utom edibahade emi oto ke edikwọrọ eti mbụk Obio Ubọn̄ emi.

Sese ntịn̄nịmikọ oro prọfet Isaiah eketịn̄de mi.

“Ndien ama ekem ke utịt eyo, obot ufọk Jehovah eyewụhọ ke enyọn̄ ikpọ obot, onyụn̄ okon̄ akan n̄kpri obot; ndien kpukpru mme idụt ẹyebụn̄ọ ẹdụk ke esịt.”—Isaiah 2:2.

Ubonowo ke asak iso idahaemi ese “utịt eyo” oro.

‘Ẹmemenede’ “ufọk” utuakibuot Jehovah okon̄ akan nsunsu ido ukpono.

“Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemọ, nnyịn iyenyụn̄ isan̄a ke usụn̄ esie.”—Isaiah 2:3.

Ntem, ediwak owo ẹmeto ke kpukpru idụt ẹdi ndituak ibuot nnọ Jehovah ẹnyụn̄ ẹnọ mmọ efen ikot ndibuana ye mmọ. Mmọ ẹmekpep nte ẹnamde n̄kpọ ke usụn̄ oro Jehovah oyomde.

“Ndien mmọ ẹyeda ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.”—Isaiah 2:4.

Mbon oro ẹtuakde ibuot ẹnọ Jehovah ẹdiana kiet ẹnyụn̄ ẹtie ke emem.

Utịp utom emi otode Obio Ubọn̄ Abasi mi edi nte ke idahaemi mme owo ẹwakde ẹbe million ita ke ofụri ererimbot ẹdi mme andidu ke idak Obio Ubọn̄ emi.

Mmọ ẹboho ẹkanade mme nsụhọ, kpa nsụhọ mbon ẹmi ẹdoride enyịn ndika heaven n̄kakara ye Christ.

Mmọ ẹbọ udia eke spirit ebe ke esop Abasi.—Matthew 24:45-47.

Mmọ ẹdi mme Christian ẹmi ẹdude ke ebuana nditọete eke ofụri ererimbot oro ẹnen̄erede ẹma kiet eken.—John 13:35.

Mmọ ẹnyene ifụre ekikere, ye idotenyịn ini iso.—Philippi 4:7.

Ibịghike, eyedi ẹma ẹkwọrọ eti mbụk oro ẹkụre. Ẹyedi ẹma ẹtan̄ ‘mme erọn̄’ oro ẹbok ọtọkiet. Adan̄aoro, nso ke Obio Ubọn̄ oro edinam?

Nte afo emeti nte ke Edidem David, anam-akpanikọ oro, ama akan kpukpru mme asua ikọt Abasi? Ih, Edidem Jesus eyenam ukem oro.

Ini kiet, Edidem Nebuchadnezzar ama adaba ndap okụt akamba mbiet owo oro akadade aban̄a kpukpru ukara ererimbot ọtọn̄ọde ke eyo esie tutu osịm eke nnyịn.

Ekem enye ama okụt itiat emi ẹsiakde ẹsio ke akamba obot, ndien enye anuak mbiet owo oro. Itiat oro akada aban̄a Obio Ubọn̄ Abasi.

Emi ọwọrọ edisobo idiọk editịm n̄kpọ oro odude kemi.—Daniel 2:44.

Ẹmi ẹdi ndusụk n̄kpọ oro Obio Ubọn̄ edisobode.

Nsunsu ido ukpono eyebe efep, nte itiat ukọk ibokpot oro ẹduọkde ke inyan̄.—Eriyarare 18:21.

Oro edi ntak ẹsịnde udọn̄ ẹnọ kpukpru mme andima Abasi ẹte ẹwọrọ ke nsunsu ido ukpono IDAHAEMI.—Eriyarare 18:4.

Udiana, Edidem Jesus ‘eyekpen̄e mme idụt . . . onyụn̄ ada esan̄ ukwak akara mmọ.’—Eriyarare 19:15.

Mmọdo, okposụkedi Mme Ntiense Jehovah ẹkpede tax mmọ ẹnyụn̄ ẹnịmde mme ibet obio, mmọ ibuanake ke ndutịm ukaraidem.

Ke akpatre, ẹtop Satan ke idemesie, kpa akwa “dragon,” ẹsịn ke editụn̄ọ ukpe.—Eriyarare 20:2, 3.

Sụk ‘mme erọn̄’ oro, kpa mmọemi ẹsụkde ibuot ẹnọ Jesus nte Edidem, ẹdibọhọ ukụt emi.—Matthew 25:31-34, 41, 46.

Apostle John ama okụt n̄kukụt aban̄ade ‘mme erọn̄’ ẹmi ẹbọhọde ukụt oro.

“N̄kụt, ndien sese, akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem ẹda ke iso ebekpo ye ke iso Eyenerọn̄, ẹsịne mfia ọfọn̄idem, ẹnỵụn̄ ẹkama ndakeyop ke ubọk.”—Eriyarare 7:9.

Edi kpukpru mbon oro ẹnyịmede eti mbụk oro ẹkwọrọde ẹnam “akwa otuowo” emi.

Mmọ ‘ẹto ke akwa ukụt ẹwọn̄ọ.’—Eriyarare 7:14.

“Ndakeyop” oro owụt nte ke mmọ ẹnyịme Jesus nte Edidem mmọ.

Mmọ ndisịne “mfia ọfọn̄idem” owụt nte ke mmọ ẹnyene mbuọtidem ke uwa Jesus.

“Eyenerọn̄” oro edi Jesus Christ.

Nso edidiọn̄ ke mmọ ẹdidara inioro? Nte emeti idatesịt oro okodude ke Israel ke ini Edidem Solomon, anam-akpanikọ, akakarade? Emi ọkọnọ esisịt uwụtn̄kpọ aban̄a idatesịt oro edidude ke isọn̄ ke idak Edidem Jesus.

Ata emem eyedu ke otu ubonowo ye ke ufọt owo ye unam, kpa nte Isaiah ekebemde iso etịn̄.—Psalm 46:9; Isaiah 11:6-9.

Kpa nte Jesus akanamde idem ọsọn̄ mbon udọn̄ọ ke adan̄aemi okodude ke isọn̄, kpasụk ntre ke enye edisio udọn̄ọ efep ke otu ofụri ubonowo.—Isaiah 33:24.

Kpa nte enye ọkọbọkde mme otuowo, kpasụk ntre ke enye edisio akan̄ efep ke otu ofụri ubonowo.—Psalm 72:16.

Kpa nte enye akanamde mme akpan̄kpa ẹset, kpasụk ntre ke enye edinam mme akpan̄kpa oro mîkenyeneke ọyọhọ ifet ndisụk idemmọ nnọ Obio Ubọn̄ Abasi ẹset.—John 5:28, 29.

Sụn̄sụn̄, enye eyeda ubonowo afiak osịm mfọnmma oro Adam ọkọduọkde.

Nte oro idịghe utịbe ini iso? Nte afo eyema ndikụt enye? Ke edide ntre, nam n̄kpọ man ekeme ndisụk idemfo idahaemi nnọ Obio Ubọn̄ Abasi nnyụn̄ n̄kabade ndi kiet ke otu ‘mme erọn̄’ oro.

Kpep Bible nyụn̄ di difiọk Jehovah Abasi ye Jesus Christ.—John 17:3.

Buana ye mbon eken ẹmi n̄ko ẹdide mme andidu ke idak Obio Ubọn̄ oro.—Mme Hebrew 10:25.

Kpep mme ibet Obio Ubọn̄ oro nyụn̄ nịm mmọ.—Isaiah 2:3, 4.

Yak uwem fo nọ ndinam n̄kpọ Jehovah, nyụn̄ na baptism.—Matthew 28:19, 20.

Tre ndinam se idiọkde, utọ nte uyịp inọ, usu nsu, use, ye ukpa mmịn, ẹmi Jehovah Abasi mîmaha.—1 Corinth 6:9-11.

Buana ke edikwọrọ eti mbụk Obio Ubọn̄ oro.—Matthew 24:14.

Ndien, ke un̄wam Abasi, afo eyekụt nte ẹfiakde ẹwụk Paradise oro Adam akanamde mme andito ubon esie ẹtaba, n̄ko afo eyekụt un̄wọn̄ọ emi osude: “N̄kop ọkpọsọn̄ uyo nte otode ke ebekpo ọwọrọ ete, Sese, ebiet idụn̄ Abasi omodu ye owo. Enye eyenyụn̄ odụn̄ ye mmo; ndien mmọ ẹyedi ikọt Esie, Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Eriyarare 21:3, 4.

[Chart ke page 20]

(Ama oyom ndikụt nte enye enen̄erede etie, se n̄wed)

607 B.C.E. 1914 C.E.

B.C.E. | C.E.

500 1,000 1,500 2,000 2,520

[Mme Ndise ke page 11]

Abraham

Isaac

Jacob

Judah

David

[Ndise ke page 14]

144,000

[Mme Ndise ke page 16]

Adam

Jesus