Ibuot 10
Obio Ubọn̄ Abasi Akara
1, 2. Didie ke ukara owo mîkwe unen?
NDUSỤK afo ama enyene ifiọk n̄kpọntịbe aban̄ade edidep ukwakutom, ekem edi edifiọk ete ke enye ikọfọnke. Yak idọhọ ke afo ama okot ọdiọn̄ ukwakutom. Ibịghike ke enye ama “ọkọdiọn̄” ukwakutom oro, nte ededi, enye afiak abiara. Nso edikpu ke oro ekedi ntem!
2 Edi ukem ntre ye mme ukara owo. Ubonowo kpukpru ini esiyom ukara oro edidade emem ye inemesịt edi. Edi, ọkpọsọn̄ ukeme oro ẹsịnde man ẹdiọn̄ se ikabiarade ke n̄kaowo itịmke ikụt unen. Ẹsinam ata ediwak ediomi emem—ndien ekem ẹbiat ẹfep. Akan oro, ewe ukara ekeme ndisio unana, asari, ubiatibet, udọn̄ọ, ye edisobo n̄kann̄kụk mfep? Owo ikemeke ndidiọn̄ ukara owo. Idem enyene-ọniọn̄ Edidem Solomon eke Israel okobụp ete: “Owo anam didie, ndien, ọfiọk usụn̄ esiemmọ?”—Mme N̄ke 20:24.
3. (a) Nso ikedi ibuotikọ ukwọrọikọ Jesus? (b) Didie ke ndusụk owo ẹnam Obio Ubọn̄ Abasi an̄wan̄a?
3 Kûduọk idotenyịn! Ukara ererimbot oro ebịghide idịghe ikpîkpu ndap. Enye ekedi ibuotikọ ukwọrọikọ Jesus. Jesus okokot enye “Ubọn̄ Abasi,” ndien enye ama ekpep mme anditiene enye ndibọn̄ akam nyom enye. (Luke 11:2; 21:31) Nte ededi, ẹsitịn̄ ẹban̄a Obio Ubọn̄ Abasi ndusụk ini ke mme otu ido ukpono. Ke akpanikọ, ediwak miliọn owo ẹsibọn̄ akam ẹyom enye ke usen ke usen ke ini mmọ ẹtịn̄de ẹfiak ẹtịn̄ Akam Ọbọn̄ (emi n̄ko ẹkotde Ete Nnyịn m̀mê akam uwụtn̄kpọ). Edi mme owo ẹsibọrọ ke nsio nsio usụn̄ ke ini ẹbụpde mmọ, “Nso idi Obio Ubọn̄ Abasi?” Ndusụk owo ẹsidọhọ ẹte, “Enye odu fi ke esịt.” Mbon eken ẹkot enye heaven. Bible ọnọ in̄wan̄în̄wan̄ ibọrọ, nte nnyịn idikụtde.
OBIO UBỌN̄ ORO ENYENEDE UDUAK
4, 5. Ntak emi Jehovah ekemekde ndida obufa uyarade itie edikara esie ndi, ndien nso ke emi ediyọhọ?
4 Kpukpru ini Jehovah Abasi edi Edidem, m̀mê Akakan Andikara, ekondo. Akpanikọ oro nte ke edi enye okobot kpukpru n̄kpọ anam enye enyene n̄kokon̄ idaha oro. (1 Chronicles 29:11; Psalm 103:19; Utom 4:24) Edi Obio Ubọn̄ oro Jesus ọkọkwọrọde aban̄a edi udiana n̄kpọ ọnọ itie edikara ofụri ekondo Abasi. Obio Ubọn̄ Messiah oro enyene akpan uduak, edi nso ke enye edi?
5 Nte ẹkenamde an̄wan̄a ke Ibuot 6, akpa owo iba oro ẹma ẹsọn̄ ibuot ye odudu ukara Abasi. Ke ntak mme eneni oro ẹkedemerede, Jehovah ama emek ndida obufa uyarade itie edikara esie ndi. Abasi ama ọtọt uduak esie ndisio “mfri” ndi emi edinuakde Urụkikọt, Satan, nnyụn̄ nsio mme utịp ndammana idiọkn̄kpọ ubonowo mfep. Akpan “mfri” oro edi Jesus Christ, ndien “obio ubọn̄ Abasi” edi se ẹdidade ẹsobo Satan ẹfep ofụri ofụri. Ebede ke Obio Ubọn̄ emi, Jesus Christ eyefiak owụk itie ukara ke isọn̄ ke enyịn̄ Jehovah eyenyụn̄ owụt unen itie edikara Abasi ke nsinsi.—Genesis 3:15, NW; Psalm 2:2-9.
6, 7. (a) Obio Ubọn̄ odu ke m̀mọ̀n̄, ndien anie edi Edidem mmanie ẹnyụn̄ ẹdi nsan̄a mme andikara ye enye? (b) Mmanie ẹdi mme andidu ke idak Obio Ubọn̄?
6 Nte ekemde ye edikabade kiet oro ẹkabarede ikọ ẹmi Jesus eketịn̄de ye ubi ubi mme Pharisee, enye ọkọdọhọ ete: “Obio ubọn̄ Abasi odu ke esịt mbufo.” (Luke 17:21, King James Version) Ndi ikọ Jesus ọkọwọrọ ete ke Obio Ubọn̄ okodu ke ibak ibak esịt mme oburobụt owo oro? Baba. Edikabade akpasarade ikọ Greek oro otịmde ọfọn akan okot ete: “Obio ubọn̄ Abasi odu ke ufọt mbufo.” (New World Translation) Ntem, Jesus, emi okodude ke ufọt mmọ, eketịn̄ aban̄a idemesie nte Edidem ini iso. Utu ke ndidi n̄kpọ oro owo enyenede ke esịt esie, Obio Ubọn̄ Abasi edi ata ukara oro odude ke edinam enyenede andikara ye mme andidu ke idak. Enye edi ukara eke heaven, koro ẹkot enye “Obio Ubọn̄ Heaven” ye “Obio Ubọn̄ Abasi.” (Matthew 13:11; Luke 8:10) Ke n̄kukụt, prọfet Daniel ama okụt nte ẹdade Andikara esie nte “owo eke ebietde eyen owo” ẹdi ke iso Ata Ọkpọsọn̄ Abasi ẹnyụn̄ ẹnọ “ubọn̄, ye ukpono, ye itie edidem, ẹte kpukpru mme idụt ye obio ye usem ẹnam n̄kpọ ẹnọ enye.” (Daniel 7:13, 14) Anie edi Edidem emi? Ọfọn, Bible okot Jesus Christ “Eyen Owo.” (Matthew 12:40; Luke 17:26) Ih, Jehovah ekemek Eyen esie, Jesus Christ, ete edi Edidem.
7 Jesus ikarake ikpọn̄. Owo 144,000 ẹmi “ẹkefakde ẹsio ẹfep ke isọn̄” ẹdu ye enye man ẹdi nsan̄a ndidem ye mme oku. (Ediyarade 5:9, 10; 14:1, 3; Luke 22:28-30) Mme andidu ke idak Obio Ubọn̄ Abasi ẹdidi ubon ofụri ekondo ẹdide mme owo ẹmi ẹsụkde ibuot ẹnọ itie edikara Christ. (Psalm 72:7, 8) Nte ededi, didie ke nnyịn ikeme ndinịm ke akpanikọ nte ke Obio Ubọn̄ oro eyenen̄ede owụt unen itie edikara Abasi onyụn̄ ọtọn̄ọ ntak owụk mme idaha paradise ke isọn̄ nnyịn?
ATA IDEM N̄KPỌ OBIO UBỌN̄ ABASI
8, 9. (a) Didie ke nnyịn ikeme ndinam edidi oro mme un̄wọn̄ọ Obio Ubọn̄ Abasi ẹdide akpanikọ an̄wan̄a? (b) Ntak nnyịn ikemede ndinịm ata idem n̄kpọ Obio Ubọn̄ ke akpanikọ?
8 Yak idọhọ ke ikan̄ ama ata ufọk fo. Ekem ufan fo emi enyenede ukeme ndibọp ufọk ọn̄wọn̄ọ ndin̄wam ndifiak mbọp ufọk fo nnyụn̄ nnọ ubon fo udia. Edieke edide ufan oro esitịn̄ akpanikọ ọnọ fi kpukpru ini, nte afo ukponịmke ikọ esie ke akpanikọ? Yak idọhọ ke ọkọnyọn̄ utom edi edem usen onyụn̄ edikụt ete ke mbonutom ẹma ẹtọtọn̄ọ ndikpọri se ikan̄ akatade osụhọ mfep ye nte ke ẹma ẹda udia ẹsọk ubon fo. Nte eyịghe mîdụhe afo ekpenyene ọyọhọ mbuọtidem ete ke nte ini akade, ke mme n̄kpọ idifiakke ikada ke itie kpọt edi nte ke eyekam ọfọn akan nte ekedide ke mbemiso.
9 Ukem ntre, Jehovah ọmọnọ nnyịn nsọn̄ọ aban̄a ata idem n̄kpọ Obio Ubọn̄. Nte ẹwụtde ke n̄wed Mme Hebrew eke Bible, ediwak ikpehe ke Ibet ẹkeda ẹban̄a ndutịm Obio Ubọn̄. (Mme Hebrew 10:1) Ẹma ẹkụt nte Obio Ubọn̄ oro editiede n̄ko ke obio ubọn̄ Israel eke isọn̄. Oro ikedịghe ikpîkpu ukara, koro mme andikara ẹketiede ke “ebekpo Jehovah.” (1 Chronicles 29:23) Akan oro, ẹma ẹbemiso ẹtịn̄ ẹte: “Mmọnyọ idikpọn̄ke Judah, eto ọbọn̄ idinyụn̄ ikpọn̄ke n̄kpatian̄ukot esie, tutu Shiloh edi; mme idụt ẹyenyụn̄ ẹkop ẹnọ enye.” (Genesis 49:10)a Ih, ekedi ke udịm ubon ndidem mbon Judah emi ke Jesus, nsinsi Edidem ukara Abasi, ekenyene ndimana ndụk.—Luke 1:32, 33.
10. (a) Ini ewe ke ẹkesịn itiat idakisọn̄ Obio Ubọn̄ Messiah Abasi? (b) Nso akpan utom ke mbon oro ẹdoride enyịn ndidi ekemmọ mme andikara ye Jesus ẹda iso ndinam ke isọn̄?
10 Ẹma ẹsịn itiat idakisọn̄ Obio Ubọn̄ Messiah Abasi ebe ke edimek oro ẹkemekde mme apostle Jesus. (Ephesus 2:19, 20; Ediyarade 21:14) Mmọemi ẹkedi akpa ke otu owo 144,000 ẹmi ẹdikarade ke heaven ye Jesus Christ nte nsan̄a ndidem. Ke adan̄aemi ẹdude ke isọn̄, mbon oro ẹdidide ekemmọ mme andikara mi ẹbe iso ke ubịnikọt unọ ikọ ntiense, ke n̄kemuyo ye ewụhọ Jesus: “Ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit.”—Matthew 28:19.
11. Didie ke ẹnam utom ukwọrọ Obio Ubọn̄ mfịn, ndien nso ke enye ọyọhọ?
11 Ke ẹnam ewụhọ edinam mme mbet idahaemi ke udomo oro mînyeneke mbiet. Mme Ntiense Jehovah ke ẹkwọrọ eti mbụk Obio Ubọn̄ ke ofụri ekondo, ke n̄kemuyo ye mme ikọ prọfesi Jesus: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Nte ikpehe utom ukwọrọ Obio Ubọn̄ emi kiet, ke ẹnam akwa ndutịm unọ ukpep. Mbon oro ẹsụkde ibuot ẹnọ mbet ye mme edumbet Obio Ubọn̄ Abasi ẹtọtọn̄ọ ndinyene emem ye edidianakiet ẹmi ukara owo mîkemeke ndinyene. Ofụri emi ọmọnọ uyarade nte ke Obio Ubọn̄ Abasi edi ata idem n̄kpọ!
12. (a) Ntak odotde ndikot mme anditan̄a Obio Ubọn̄ Mme Ntiense Jehovah? (b) Didie ke Obio Ubọn̄ Abasi okpụhọde ye mme ukara owo?
12 Jehovah ọkọdọhọ nditọ Israel ete: “Mbufo ẹdi mme ntiense mi, ye owo ẹmi n̄kemekde.” (Isaiah 43:10-12) Jesus, kpa “ntiense emi anamde akpanikọ,” ama ọkwọrọ eti mbụk Obio Ubọn̄ ifịk ifịk. (Ediyarade 1:5; Matthew 4:17) Ntre odot mme anditan̄a Obio Ubọn̄ eke eyomfịn ndikere enyịn̄ oro Abasi osiode mmọ Mme Ntiense Jehovah. Edi ntak emi Mme Ntiense ẹsibiatde ata ekese ini ye ukeme nditịn̄ ikọ nnọ mbon en̄wen mban̄a Obio Ubọn̄ Abasi? Mmọ ẹsinam emi koro Obio Ubọn̄ edide n̄kukụre idotenyịn ubonowo. Ebebịghi m̀mê awawara ukara owo ẹyesịm utịt, edi Obio Ubọn̄ Abasi idisịmke utịt tutu amama. Isaiah 9:6, 7 okot Andikara esie, Jesus, “Ọbọn̄ Emem” onyụn̄ adian ete: “Ubọn̄ ye emem ididopke ndikọri.” Obio Ubọn̄ Abasi itiehe nte mme ukara owo—ẹmi ẹdude mi mfịn n̄kpọn̄ ẹbe ẹfep. Ke akpanikọ, Daniel 2:44 ọdọhọ ete: “Abasi enyọn̄ eyenam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: . . . ndien enye eyeda ke nsinsi.”
13. (a) Nso idi ndusụk mfịna oro Obio Ubọn̄ Abasi edisede aban̄a uforo uforo? (b) Ntak emi nnyịn ikemede ndinịm ke akpanikọ nte ke mme un̄wọn̄ọ Abasi ẹyesu?
13 Ewe edidem edide owo ekeme nditre ekọn̄, ubiatibet, udọn̄ọ, biọn̄, ye unana ufọkidụn̄? N̄ko-n̄ko, ewe andikara ke isọn̄ ekeme ndinam mbon oro ẹkpan̄ade ẹset? Obio Ubọn̄ Abasi ye Edidem esie ẹyese ẹban̄a n̄kpọ ẹmi. Obio Ubọn̄ oro idibiarake, nte mbiara ukwakutom emi akade-kaiso oyom ẹdiọn̄. Utu ke oro, Obio Ubọn̄ Abasi eyekụt unen, koro Jehovah ọn̄wọn̄ọ ete: “Ikọ mi emi ọwọrọde mi ke inua . . . idifiakke itiene mi ubọk ubọk, tutu enye anam se mmade, onyụn̄ okụt unen ke utom emi ndọn̄de enye.” (Isaiah 55:11) Uduak Abasi idikpụhu, edi ini ewe ke ukara Obio Ubọn̄ ekenyene nditọn̄ọ?
UKARA OBIO UBỌN̄—INI EWE?
14. Nso ukwan̄ ifiọk ke mme mbet Jesus ẹkenyene ẹban̄a Obio Ubọn̄, edi nso ke Jesus ọkọfiọk aban̄a itie ukara esie?
14 “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel kemi?” Mbụme emi mme mbet Jesus ẹkebụpde mi owụt ete ke tutu osịm ini mmọ ẹkebụpde mbụme oro mmọ ikọfiọkke uduak Obio Ubọn̄ Abasi ye edimek ini oro akanade ukara esie ọtọn̄ọ. Ke odụride mmọ utọn̄ ete ẹkûtie ẹkere ẹban̄a n̄kpọ oro, Jesus ama ọdọhọ ete: “Inaha inọ mbufo ndifiọk ini m̀mê eyo, eke Ete okonịmde akama ke ubọk Esiemmọ.” Jesus ama ọfiọk ete ke ẹkenịm itie edikara oro imọ idikarade isọn̄ ẹnọ ini iso, anyanini ke enye ama ekeset ke n̄kpa onyụn̄ ọdọk aka heaven. (Utom 1:6-11; Luke 19:11, 12, 15) N̄wed Abasi ama ebemiso etịn̄ aban̄a emi. Didie ke edi ntre?
15. Didie ke Psalm 110:1 esịn un̄wana ke ubatini aban̄ade ukara Jesus?
15 Ke etịn̄de prọfesi aban̄a Jesus nte “Ọbọn̄,” Edidem David ọkọdọhọ ete: “Jehovah ọdọhọ ye Ọbọn̄ mi, ete, ‘Tie mi ke ubọk nnasia, tutu nda mme asua fo nnịm fi ke udoriukot.’” (Psalm 110:1; men Utom 2:34-36 domo.) Prọfesi emi owụt ete ke ukara Jesus iditọn̄ọke ke ndondo oro enye ama ọkọdọk ke heaven. Utu ke oro, enye ekenyene ndibet ke ubọk nnasia Abasi. (Mme Hebrew 10:12, 13) Edibet emi edibịghi adan̄a didie? Ini ewe ke ukara esie editọn̄ọ? Bible an̄wam nnyịn ndinyene ibọrọ.
16. Nso ikotịbe ke 607 M.E.N., ndien didie ke emi ekenyene ebuana ye Obio Ubọn̄ Abasi?
16 N̄kukụre obio ke ofụri isọn̄ emi Jehovah ekesịnde enyịn̄ esie ekedi Jerusalem. (1 Ndidem 11:36) Enye n̄ko ekedi ibuot obio ubọn̄ eke isọn̄ oro Abasi okonyịmede emi adade aban̄a Obio Ubọn̄ Abasi eke heaven. Ke ntre, nsobo oro mbon Babylon ẹkesobode Jerusalem ke 607 M.E.N. ekedi ata n̄wọrọnda n̄kpọ. N̄kpọntịbe emi ekedi ntọn̄ọ anyan editre oro nnennen edikara emi Abasi akakarade ikọt esie ke isọn̄ eketrede. Ke n̄kpọ nte isua ikie itiokiet ẹma ẹkebe, Jesus ama owụt ete ke ikpehe ini oro ẹketrede ukara mi okosụk ododu ke edinam, koro enye ọkọdọhọ ete: “Mme Gentile ẹyedịghi Jerusalem ke ikpat, tutu ini mme Gentile ọyọhọ.”—Luke 21:24.
17. (a) Nso idi “ini mme Gentile,” ndien mmọ ẹdibịghi adan̄a didie? (b) Ini ewe ke “ini mme Gentile” ọkọtọn̄ọ onyụn̄ etre?
17 Ke “ini mme Gentile,” ẹma ẹyak mme ukara ererimbot ẹsịbe ẹdụk itie edikara emi Abasi okonyịmede. Iduọk ini oro ọkọtọn̄ọ ye nsobo Jerusalem ke 607 M.E.N., ndien Daniel ama owụt ete ke enye eyekaiso ke “ini itiaba.” (Daniel 4:23-25, NW) Oro ebịghi adan̄a didie? Bible owụt ete ke “ini” ita ye ubak ẹnam usen 1,260. (Ediyarade 12:6, 14) Ikpehe ini oro ke itie iba, m̀mê ini itiaba, edidi usen 2,520. Edi akpan n̄kpọ ndomokiet ikadaha itie ke utịt ibio iduọk ini oro. Ke ndida “usen kiet ke isua kiet” mbuan ke prọfesi Daniel nnyụn̄ ntọn̄ọ ke 607 M.E.N. mbat isua 2,520, nte ededi, nnyịn imedi idisịm isua 1914 E.N.—Numbers 14:34; Ezekiel 4:6.
18. Nso ke Jesus akanam esisịt ini ke ama ọkọbọ ukara Obio Ubọn̄, ndien didie ke emi okotụk isọn̄?
18 Ndi Jesus ama ọtọn̄ọ ndikara ke heaven ke ini oro? Ẹyeneme mme ntak N̄wed Abasi ndidọhọ ke enye ama ọtọn̄ọ ke ibuotikọ efen. Nte ededi, ntọn̄ọ ntọn̄ọ ukara Jesus ididaha usọp usọp emem isọk isọn̄. Ediyarade 12:7-12 owụt ete ke ndondo oro ama ọkọbọ Obio Ubọn̄, Jesus ama osion̄o Satan ye mme angel ẹdide demon efep ke heaven. Emi ediwọrọ afanikọn̄ ọnọ isọn̄, edi edi n̄kpọ inemesịt ndikot nte ke ‘ibio ini’ osụhọ ọnọ Devil. Ibịghike, nnyịn iyekeme ndidara idịghe n̄kukụre koro Obio Ubọn̄ Abasi amakara edi n̄ko koro enye eyeda mme edidiọn̄ ọsọk isọn̄ ye okopitem ubonowo. (Psalm 72:7, 8) Nnyịn isan̄a didie ifiọk ke emi eyesọp nditịbe?
[Mme Ikọ idakisọn̄]
a Enyịn̄ oro Shiloh ọwọrọ “Enyeemi Edide Esie; Enyeemi N̄kpọ Enyenede.” Nte ini akakade, ama ana in̄wan̄în̄wan̄ nte ke “Shiloh” ekedi Jesus Christ, “Lion emi otode ke esien Judah.” (Ediyarade 5:5) Ndusụk Targum mme Jew n̄kukụre ẹkemen “Messiah” m̀mê “edidem Messiah” ẹkpụhọ ke itie ikọ oro “Shiloh.”
DOMO IFIỌK FO SE
Nso idi Obio Ubọn̄ Abasi, ndien m̀mọ̀n̄ ke enye odu akara?
Anie akara ke Obio Ubọn̄ oro, ndien mmanie ẹdi mme andidu ke idak esie?
Didie ke Jehovah ọsọn̄ọ ọnọ nnyịn ete ke Obio Ubọn̄ esie edi ata idem n̄kpọ?
Ini ewe ke “ini mme Gentile” ọkọtọn̄ọ onyụn̄ etre?
[Ekebe ke page 94]
NDUSỤK AKPAN N̄KPỌNTỊBE EMI ENYENEDE EBUANA YE OBIO UBỌN̄ ABASI
• Jehovah ọtọt uduak esie ndinọ “mfri” oro edinuakde ibuot Urụkikọt, Satan kpa Devil.—Genesis 3:15, NW.
• Ke 1943 M.E.N., Jehovah owụt ete ke “mfri” emi edidi owo emi otode ubon Abraham.—Genesis 12:1-3, 7, NW; 22:18, NW.
• Ibet ediomi oro ẹkenọde Israel ke 1513 M.E.N. ọnọ “ukpọn̄ ukpọn̄ mbiet nti n̄kpọ eke ẹdidide.”—Exodus 24:6-8; Mme Hebrew 10:1.
• Obio ubọn̄ Israel eke isọn̄ ọtọn̄ọ ke 1117 M.E.N., onyụn̄ akaiso ke ukperedem ke udịm David.—1 Samuel 11:15; 2 Samuel 7:8, 16.
• Ẹsobo Jerusalem ke 607 M.E.N., ndien “ini mme Gentile” ọtọn̄ọ.—2 Ndidem 25:8-10, 25, 26; Luke 21:24.
• Ke 29 E.N., ẹyet Jesus aran nte Edidem Oro Ẹmekde onyụn̄ ọtọn̄ọ utom ukwọrọikọ esie ke isọn̄.—Matthew 3:16, 17; 4:17; 21:9-11.
• Ke 33 E.N., Jesus ọdọk ke heaven, man ekebet do ke ubọk nnasia Abasi tutu ukara esie ọtọn̄ọ.—Utom 5:30, 31; Mme Hebrew 10:12, 13.
• Ẹdori Jesus ke ebekpo ke Obio Ubọn̄ eke heaven ke 1914 E.N. nte “ini mme Gentile” osịmde utịt.—Ediyarade 11:15.
• Ẹsion̄o Satan ye mme demon esie ẹduọn̄ọ ke isọn̄ onyụn̄ ada afanikọn̄ oro ọkọride-kọri ọsọk ubonowo.—Ediyarade 12:9-12.
• Jesus ese enyịn aban̄a edikwọrọ eti mbụk Obio Ubọn̄ Abasi ke ofụri ererimbot.—Matthew 24:14; 28:19, 20.