Ibuot 17

Ndikpep Nicodemus N̄kpọ

KE ADAN̄AEMI Jesus odụkde usọrọ Passover eke 30 C.E., enye anam mme n̄wọrọnda idiọn̄ọ, m̀mê mme utịben̄kpọ. Nte utịp, ediwak owo ẹbuọt idem ke enye. Nicodemus, andibuana ke esop Sanhedrin, kpa akwa esop mme Jew okop inemesịt onyụn̄ oyom ndikpep ekese n̄kpọ. Ntre enye aka ebịne Jesus ke ekịm okoneyo, iso-ọfọn efehede ndịk nte ke uwọrọetop imọ ye mme adaiso mme Jew eken eyetre edieke ẹkụtde imọ.

Enye ọdọhọ ete, “Rabbi, nnyịn imọfiọk ite Afo edi Andikpep emi Abasi osiode ọdọn̄; koro baba owo kiet ikemeke ndinam mme idiọn̄ọ ẹmi Afo ananam, ibọhọke Abasi odu ye enye.” Ke ibọrọ, Jesus ọdọhọ Nicodemus ete man owo odụk Obio Ubọn̄ Abasi, ana owo oro ‘ọtọn̄ọ ntak amana.’

Edi, didie ke owo ekeme nditọn̄ọ ntak mmana? Nicodemus obụp ete, “Nte enye ekeme nditọn̄ọ ntak ndụk ke idịbi eka esie nnyụn̄ mmana?”

Baba, oro idịghe se editọn̄ọ ntak mmana ọwọrọde. Jesus anam an̄wan̄a ete, “Edieke owo mîmanake oto ke mmọn̄ ye spirit, enye ikemeke ndidụk ke Obio Ubọn̄ Abasi.” Ke ini Jesus akanade baptism ndien edisana spirit osụhọrede edidoro enye ke idem, enye ke ntre akamana “oto ke mmọn̄ ye spirit.” Ebede ke uyo emi otode ke heaven ọdọnọ ete, “Emi edi edima Eyen Mi, emi esịt enemde Mi etieti ye Enye,” Abasi ama ọtọt ete ke imọ imọnọ eyen eke spirit emi enyenede idotenyịn edidu ke Obio Ubọn̄ heaven edi. Ke ukperedem, ke Pentecost eke 33 C.E., mbon efen ẹmi ẹnade baptism ẹyebọ edisana spirit, ntre n̄ko ẹtọn̄ọde ntak ẹmana nte nditọ Abasi eke spirit.

Edi udeme oro san̄asan̄a Eyen Abasi emi edide owo enyenede edi akpan n̄kpọ. Jesus ọdọhọ Nicodemus ete, “Ndien kpa nte Moses ekemende urụkikọt ke enyọn̄ ke desert, kpa ntre ke ana nte ẹdimen Eyen Owo ke enyọn̄: man owo ekededi eke ọbuọtde idem ye Enye enyene nsinsi uwem.” Ih, kpa nte nditọ Israel oro urụkikọt ẹkedomde ẹkenyenede ndise urụkikọt okpoho man ẹdu uwem, kpasụk ntre oyom kpukpru owo ẹnyene mbuọtidem ke Eyen Abasi man ẹnyan̄a mmọ ẹsio ke n̄kpakpa idaha mmọ.

Ke owụtde ima ima udeme oro Jehovah enyenede kaban̄a emi, Jesus afiak ọdọhọ Nicodemus ete: “Koro Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” Ntre, mi ke Jerusalem, n̄kpọ nte ọfiọn̄ itiokiet kpọt ke ama ọkọtọn̄ọ utom esie, Jesus anam an̄wan̄a ete ke imọ idi usụn̄ oro Jehovah Abasi adade ndiyan̄a ubonowo.

Jesus akaiso ndinam an̄wan̄a Nicodemus ete: “Koro Abasi ikọdọn̄ke Eyen Esie ke ererimbot ete ekpe ikpe ererimbot,” oro edi, idịghe ndibiere ikpe nnọ enye idiọk idiọk, m̀mê ndibiom enye ikpe, ebierede ikpe nsobo ọnọ ekpụk ubonowo. Utu ke oro, nte Jesus ọdọhọde, ẹkedọn̄ enye “man ẹnyan̄a ererimbot oto ke Enye.”

Nicodemus edi ebịne Jesus ke okoneyo ye ọkpọsọn̄ ndịk. Ke ntre edi n̄kpọ owụtde udọn̄ Jesus nditre nneme esie ye enye ke ndidọhọ: “Ndien emi edi ikpe oro, ete, un̄wana [emi Jesus owụtde ke uwen ye ukpepn̄kpọ esie] ama edi ke ererimbot, edi owo ẹmama ekịm ẹkan un̄wana; koro utom mmọ ọdiọkde. Koro kpukpru owo eke ẹnamde idiọk ẹsasua un̄wana, inyụn̄ iwọrọke idi ke un̄wana, mbak ẹdibiom se mmọ ẹnamde. Edi owo eke anamde se idide akpanikọ ọwọrọ edi ke un̄wana, man ẹyarade utom esie, ẹte, enye etie ke Abasi ananam mmọ.” John 2:​23–3:21; Matthew 3:​16, 17; Utom 2:​1-4; Numbers 21:⁠9.

▪ Nso idi ntak uka esen Nicodemus, ndien ntak emi enye edide ke okoneyo?

▪ ‘Nditọn̄ọ ntak mmana’ ọwọrọ nso?

▪ Didie ke Jesus anam udeme oro enye enyenede ke edinyan̄a nnyịn an̄wan̄a?

▪ Nso ke ikọ oro ọwọrọ nte ke Jesus ikedịghe ndikpe ikpe nnọ ererimbot?