Ibuot Duop
Obio Ubọn̄ “Eke Mîdisoboke ke Nsinsi”
1. Nso ke mme n̄kpọntịbe ererimbot ke ofụri mbụk ubonowo ẹsọn̄ọ?
MME n̄kpọntịbe ererimbot ke usen kiet kiet ẹsọn̄ọ nte ke mme owo inyeneke inemesịt ke ndisịn itie edikara Jehovah nnyụn̄ ndomo ndikara idemmọ. Idụhe ndutịm ukara owo oro adade mme ufọn ọsọk ubonowo ye unana asari. Okposụkedi mme owo ẹkọride ifiọk ntaifiọk mmọ ẹkesịm udomo oro mînyeneke mbiet, mmọ ikemeke ndikan udọn̄ọ m̀mê nditre n̄kpa, ikemeke ndikam nnam emi nnọ owo kiet. Ukara owo itreke ekọn̄, afai, ubiatibet, idiọkido, m̀mê unana. Mme ukara ufịk ke ẹsụk ẹkekara mme owo ke ediwak idụt. (Ecclesiastes 8:9) Ifiọk ubotn̄kpọ, idiọkitọn̄, ye unana ifiọk ẹdiana kiet ẹsabade isọn̄, mmọn̄, ye ofụm. Ikpọ owo ukara ndida ndutịm uforo nnam n̄kpọ ke idiọk usụn̄ anam edi ọkpọsọn̄ n̄kpọ ọnọ ediwak owo ndinyene mme n̄kpọ udu uwem. Ediwak tọsịn isua ukara owo amanam edi in̄wan̄-in̄wan̄ nte ke: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.”—Jeremiah 10:23.
2. Nso idi n̄kukụre usọbọ mme mfịna ubonowo?
2 Nso idi usọbọ? Obio Ubọn̄ Abasi emi Jesus ekekpepde mme mbet esie ndibọn̄ akam mben̄e ẹte: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:9, 10) Ẹtịn̄ ẹban̄a Obio Ubọn̄ Abasi eke heaven ke 2 Peter 3:13 nte “obufa enyọn̄,” emi edikarade ofụri “obufa isọn̄,” oro edi, edinen n̄kaowo. Obio Ubọn̄ Abasi eke heaven oro enen̄ede edi akpan n̄kpọ tutu Jesus anam enye edi iwụk ntịn̄enyịn ke ukwọrọikọ esie. (Matthew 4:17) Enye ama owụt itie oro enye ekpenyenede ke uwem nnyịn, akpakde ete: “Ẹkam ẹbem iso ẹyom Obio Ubọn̄ Esie ye edinen ido Esie.”—Matthew 6:33.
3. Ntak emi edikpep n̄kpọ mban̄a Obio Ubọn̄ Abasi edide ata usọp usọp n̄kpọ idahaemi?
3 Ndikpep n̄kpọ mban̄a Obio Ubọn̄ Abasi edi ata usọp usọp n̄kpọ idahaemi, koro ibịghike Obio Ubọn̄ oro ayanam n̄kpọ ndikpụhọde itie ukara isọn̄ emi ke nsinsi. Daniel 2:44 ebem iso etịn̄ ete: “Ke eyo ndidem oro [mme ukara oro ẹkarade idahaemi] Abasi enyọn̄ ayanam ubọn̄ [ke heaven] eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen [mme owo tutu amama idikarake isọn̄ aba]: enye ayanuak onyụn̄ ama kpukpru mme idụt emi [ẹdude ke emi], ndien enye ayada ke nsinsi.” Ntem, Obio Ubọn̄ oro ayada ukperedem ini emi esịm utịt ebe ke ndisobo ofụri idiọk editịm n̄kpọ emi. Adan̄aoro owo idifan̄ake iban̄a itie Obio Ubọn̄ eke heaven oro ndikara isọn̄. Nnyịn ikpowụt esịtekọm didie ntem nte ke ubọhọ oro emi edidade edi enen̄ede ekpere idahaemi!
4. Ke ebuana ye Obio Ubọn̄, nso ikada itie ke heaven ke 1914, ndien ntak oro edide akpan n̄kpọ ọnọ nnyịn?
4 Toto ke 1914, ẹma ẹdori Christ Jesus nte Edidem ke ebekpo ẹma ẹnyụn̄ ẹnọ enye odudu ‘ndida ubọn̄ ke otu mme asua’ esie. (Psalm 110:1, 2) N̄ko ke isua oro, “ukperedem ini” eke idiọk editịm n̄kpọ emi odude ke emi ama ọtọn̄ọ. (2 Timothy 3:1-5, 13) Ke ukem ini oro, mme n̄kpọntịbe oro Daniel okokụtde ke ntịn̄nnịm n̄kukụt ẹma ẹnen̄ede ẹtịbe ke heaven. “Andisọn̄ọ Usen,” kpa Jehovah Abasi, ama ọnọ Eyen owo, kpa Jesus Christ, “ubọn̄, ye ukpono, ye itie-edidem, ete kpukpru mme idụt ye obio ye usem ẹnam n̄kpọ ẹnọ enye.” Ke obụkde aban̄a n̄kukụt oro, Daniel ekewet ete: “Ubọn̄ esie edi nsinsi ubọn̄ eke mîdikụreke, itie-edidem esie idinyụn̄ ibiarake.” (Daniel 7:13, 14) Ebede ke Obio Ubọn̄ eke heaven emi ke ubọk Christ Jesus ke Abasi edinam mme andima edinen ido ẹdara anana-ibat nti n̄kpọ oro enye akaduakde ke ini enye ekesịnde akpa ete ye eka nnyịn ke Paradise.
5. Nso ọyọhọ ntọt aban̄ade Obio Ubọn̄ ke nnyịn inen̄ede inyene udọn̄ iban̄a, ndien ntak-a?
5 Nte edi udọn̄ fo ndidi anam-akpanikọ andidu ke idak Obio Ubọn̄ oro? Ke edide ntre, afo eyenen̄ede enyene udọn̄ ke ndutịm ye edinam ukara eke heaven emi. Afo oyoyom ndifiọk se enye anamde idahaemi, se enye edinamde ke ini iso, ye se enye oyomde oto fi. Nte afo odụn̄ọrede Obio Ubọn̄ oro ketket, esịtekọm oro afo enyenede ọnọ enye ekpenyene ndikọri. Edieke afo anamde n̄kpọ aban̄a itie ukara esie, afo eyetịm idem ọfọn akan ndisian mbon efen mban̄a mme utịbe utịbe n̄kpọ oro Obio Ubọn̄ Abasi edinamde ọnọ okopitem ubonowo.—Psalm 48:12, 13.
Mme Andikara Obio Ubọn̄ Abasi
6. (a) Didie ke N̄wed Abasi owụt m̀mê itie edikara anie ke ẹwụt ebe ke Obio Ubọn̄ Messiah? (b) Didie ke se nnyịn ikpepde iban̄a Obio Ubọn̄ okpotụk nnyịn?
6 Kiet ke otu akpa n̄kpọ oro utọ ndụn̄ọde oro ayararede edi nte ke Obio Ubọn̄ Messiah emi edi ediwụt itie edikara Jehovah. Jehovah ọkọnọ Eyen esie “ubọn̄, ye ukpono, ye itie-edidem.” Ke ẹma ẹkenọ Eyen Abasi odudu nditọn̄ọ n̄kara nte Edidem, mme uyo ẹtode heaven ẹma ẹtan̄a nte odotde ẹte: “Obio ubọn̄ ererimbot emi amakabade edi Obio Ubọn̄ Ọbọn̄ nnyịn [Jehovah Abasi] ye Christ Esie. Enye [Jehovah] oyonyụn̄ ada ubọn̄ ke nsinsi-nsinsi.” (Ediyarade 11:15) Ntre kpukpru n̄kpọ oro nnyịn ikụtde iban̄a Obio Ubọn̄ emi ye se enye anamde ẹkeme ndinam nnyịn isịk ikpere Jehovah ke idemesie. Se nnyịn ikpepde ekpenyene ndinam nnyịn inyene udọn̄ ndisụk ibuot nnọ itie edikara esie ke nsinsi.
7. Ntak edide akpan n̄kpọ udọn̄ ọnọ nnyịn nte ke Jesus Christ edi Udiana Andikara ọnọ Jehovah?
7 Kere n̄ko ban̄a akpanikọ oro nte ke Jehovah omodori Jesus Christ ke ebekpo nte Udiana Andikara esie. Nte Etubom Anamutom emi Abasi akadade ndibot isọn̄ ye mme owo, Jesus ọfiọk mme udọn̄ nnyịn ọfọn akan nte owo nnyịn ekededi ọfiọkde. N̄ko-n̄ko, ọtọn̄ọde ke editọn̄ọ mbụk owo, enye ama owụt ‘idatesịt oro enye enyenede ọnọ otu nditọ owo.’ (Mme N̄ke 8:30, 31; Colossae 1:15-17) Ima oro enye enyenede ọnọ mme owo enen̄ede okpon tutu enye ke idemesie edi isọn̄ onyụn̄ ọnọ uwem esie nte ufak ke ibuot nnyịn. (John 3:16) Ntem enye ama anam usụn̄ odu ọnọ nnyịn ndibọhọ idiọkn̄kpọ ye n̄kpa ye ifet edinyene nsinsi uwem.—Matthew 20:28.
8. (a) Ke edide isio ye mme ukara owo, ntak emi ukara Abasi edibịghide? (b) Nso ebuana ke “asan̄autom emi anamde akpanikọ, onyụn̄ enyenede ọniọn̄” enyene ye ukara eke heaven?
8 Obio Ubọn̄ Abasi edi ukara oro enyenede iwụk onyụn̄ ebịghide. Enye ndibịghi enyene nsọn̄ọ sia Jehovah ke idemesie ikemeke ndikpa. (Habakkuk 1:12) Ke edide isio ye ndidem ẹdide owo, Jesus Christ, kpa enye emi Abasi ọkọnọde itie edidem, ikemeke ndikpa n̄ko. (Rome 6:9; 1 Timothy 6:15, 16) Owo 144,000 efen, kpa mme anam-akpanikọ asan̄autom Abasi ẹtode “kpukpru esien, ye usem, ye obio, ye idụt” ẹyebuana ye Christ ke mme ebekpo eke heaven. Ẹnọ mmọ emi n̄ko uwem unana n̄kpa. (Ediyarade 5:9, 10; 14:1-4; 1 Corinth 15:42-44, 53) N̄wakn̄kan ibat ke otu mmọ ẹmedodu ke heaven, ndien nsụhọ mmọ emi ẹsụk ẹdude ke isọn̄ ẹnam “asan̄autom emi anamde akpanikọ, onyụn̄ enyenede ọniọn̄” eke eyomfịn, emi ke edinam akpanikọ anamde mme ufọn n̄kpọ Obio Ubọn̄ aka iso idahaemi.—Matthew 24:45-47.
9, 10. (a) Nso mbiara odudu emi ọtọde ubahade ke Obio Ubọn̄ oro edisio efep? (b) Edieke nnyịn mîyomke ndidi mme asua Obio Ubọn̄ Abasi, nso n̄kukọmọ ke ana nnyịn ifep?
9 Ke mîbịghike, ke edimek ini esie, Jehovah ọyọdọn̄ udịmekọn̄ nsobo edinam n̄kpọ man ẹnam isọn̄ asana. Mmọ ẹyesobo mme owo oro ẹkoide-koi ẹsịn ndinyịme itie edikara esie ẹnyụn̄ ẹsịnde mme ima ima ndutịm oro enye anamde ebe ke Jesus Christ ke ndek, ẹfep ke nsinsi. (2 Thessalonica 1:6-9) Oro edidi usen Jehovah, kpa ini emi ẹkebetde ke anyan ini enye ndiwụt unen esie nte Andikara Ekondo. “Sese, usen Jehovah ọmọn̄ edi . . . , enye akpahaesịt, iyatesịt asak nte ikan̄, . . . enye oyosobo mme idiọk owo mmọ efep ke esịt.” (Isaiah 13:9) “Usen ifụtesịt edi usen oro: usen ukụt ye nnanenyịn, usen n̄wụre ye nsobo, usen ekịm ye okoneyo, usen obubịt enyọn̄ ye ata ekịm.”—Zephaniah 1:15.
10 Ẹyesobo kpukpru nsunsu ido ukpono ye kpukpru mme ukara owo ye mme udịmekọn̄ mmọ, emi idiọk andikara ererimbot emi enyịn mîkwe adade anam n̄kpọ, ẹfep ke nsinsi. Ẹyesịbe kpukpru mbon oro ẹdianade ye ererimbot emi ebe ke ndibịne ibụk ibụk, oburobụt uwem unana edinam akpanikọ ẹfep ke n̄kpa. Ẹyetre Satan ye mme demon esie ndinyene ebuana ye mme andidụn̄ isọn̄, ẹnen̄ede ẹkọbi mmọ ke tọsịn isua. Obio Ubọn̄ Abasi adan̄aoro eyese aban̄a kpukpru mme edinam isọn̄ ọyọhọ ọyọhọ. Nso ubọhọ ke emi edidi ntem ọnọ kpukpru mbon oro ẹmade edinen ido!—Ediyarade 18:21, 24; 19:11-16, 19-21; 20:1, 2.
Mme Uduak Obio Ubọn̄—Nte Ẹsịmde
11. (a) Didie ke Obio Ubọn̄ Messiah edinam uduak Jehovah kaban̄a isọn̄? (b) Nso ke ukara Obio Ubọn̄ ediwọrọ ọnọ mme owo oro ẹdụn̄de ke isọn̄ adan̄aoro?
11 Obio Ubọn̄ Messiah ayanam akpa uduak Abasi kaban̄a isọn̄ ọyọhọ ọyọhọ. (Genesis 1:28; 2:8, 9, 15) Tutu esịm mfịn emi, ubonowo omokpu ndinọ uduak oro ibetedem. Nte ededi, ẹyenam “ererimbot eke edidide” odu ke idak Eyen owo, kpa Jesus Christ. Kpukpru mbon oro ẹbọhọde nsobo ubiereikpe Jehovah ke akani editịm n̄kpọ emi ẹyenam utom ke edidianakiet ke ndausụn̄ Christ, kpa Edidem, ẹnamde se ededi oro enye etemede ke idatesịt, man isọn̄ akabade edi paradise ofụri ekondo. (Mme Hebrew 2:5-9) Ofụri ubonowo ẹyedara utom ubọk mmọ ẹnyụn̄ ẹbọ ufọn ọyọhọ ọyọhọ ẹto akpakịp mbun̄wụm isọn̄.—Psalm 72:1, 7, 8, 16-19; Isaiah 65:21, 22.
12. Didie ke ẹdinam mme andidu ke idak Obio Ubọn̄ oro ẹnyene mfọnmma ekikere ye ikpọkidem?
12 Ke ini ẹkebotde Adam ye Eve, mmọ ẹkedi mfọnmma, ndien ekedi uduak Abasi isọn̄ ndiyọhọ ye nditọ mmọ, kpukpru ẹnyenede mfọnmma ekikere ye ikpọkidem. Uduak oro ayakabade edi ubọn̄ ubọn̄ ata idem n̄kpọ ke idak ukara Obio Ubọn̄ oro. Emi oyom ẹsio kpukpru utịp idiọkn̄kpọ ẹfep, ndien ke ntak oro, Christ inamke utom nte Edidem kpọt edi n̄ko nte Akwa Oku. Ke ime, enye ayan̄wam mme okopitem andidu ke idak esie ndibọ ufọn nto uwa esie emi enyenede ekọmurua usio-isop idiọkn̄kpọ oro enye akawade ke ini ekedide owo.
13. Mme ufọn ikpọkidem ewe ke ẹdinyene ke idak ukara Obio Ubọn̄?
13 Ke idak ukara Obio Ubọn̄, mme andidụn̄ isọn̄ ẹyenyene mme utịbe utịbe ufọn eke ikpọkidem. “Ndien enyịn ẹyen̄wan̄a mme nnan, utọn̄ oyonyụn̄ esịrede mbon inan. Ndien mbụn̄ọ eyenek nte edop, edeme imụm oyonyụn̄ ọkwọ.” (Isaiah 35:5, 6) Ikpọkidem oro usọn̄ m̀mê udọn̄ọ obiomode ndo ayakabade esehe akan eke eyenọwọn̄, ndien eti nsọn̄idem ayada itie uyịre uyịre mmemidem. “Obụkidem esie akabade nsek akan eke eyenọwọn̄: enye ayafiak ke mme usen uyen esie.” (Job 33:25) Ini eyedi emi owo ndomokiet mîdinyeneke ntak ndidọhọ, “Ndọdọn̄ọ.” Ntak-a? Koro ẹyenam mme owo oro ẹbakde Abasi ẹbọhọ mfịghe idiọkn̄kpọ ye mme mfụhọ mfụhọ utịp esie. (Isaiah 33:24; Luke 13:11-13) Ih, Abasi “ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:4.
14. Nso isịne ke owo ndisịm mfọnmma idaha?
14 Nte ededi, ndisịm mfọnmma idaha abuana se ikande edinyene eti ikpọkidem ye eti ekikere. Enye esịne ediwụt mme edu Jehovah nte enende, sia ẹkenamde nnyịn ‘ke mbiet Abasi, itie nte enye.’ (Genesis 1:26) Ke ntak oro, oyoyom ekese ukpep. “Edinen ido edidụn̄” ke obufa ererimbot. Ntre, nte Isaiah ekebemde iso etịn̄, ‘mme andidụn̄ ererimbot ẹyekpep se inende.’ (2 Peter 3:13; Isaiah 26:9) Edu emi ada esịm emem—ke ufọt mme owo eke kpukpru orụk, ke otu n̄kpet n̄kpet nsan̄a, ke ubon ndien, ke akande kpukpru, ye Abasi ke idemesie. (Psalm 85:10-13; Isaiah 32:17) Ẹyeka iso ndikpep mbon oro ẹkpepde edinen ido ẹban̄a se uduak Abasi edide ọnọ mmọ. Nte ima oro ẹnyenede ẹnọ mme usụn̄ Jehovah etịmde okpon ke esịt mmọ, mmọ ẹyetiene mme usụn̄ esie ke kpukpru ikpehe uwem mmọ. Mmọ ẹyekeme ndidọhọ nte Jesus ọkọdọhọde ete, ‘Ami nnanam se inemde Ete esịt kpukpru ini.’ (John 8:29) Uwem edinem didie ntem ke ini oro edidide ntre ọnọ ofụri ubonowo!
Mme N̄kpọ Oro Ẹdinamde Ẹwowụt Idem
15. Ke adade mme mbụme oro ẹdude ke ikpehe ekikere emi, wụt mme n̄kpọ oro Obio Ubọn̄ anamde nyụn̄ wụt se nnyịn ikpanamde idahaemi.
15 Ndiye n̄kpọ oro Obio Ubọn̄ Abasi anamde ye mme andidu ke idak esie ẹwụt idem. Mme mbụme ye mme itie N̄wed Abasi oro ẹtienede ẹyeti fi ndusụk mmọ emi, ọkọrọ ye mme n̄kpọ oro kpukpru mme andidu ke idak Obio Ubọn̄ ẹkemede ndinam, ẹkpenyụn̄ ẹnamde idahaemi.
Mmanie ke Obio Ubọn̄ oro ekebem iso anam n̄kpọ aban̄a, ndien ye nso utịp? (Ediyarade 12:7-10, 12)
Ewe otu oro ẹtan̄de nsụhọ mme andibuana esie ẹbok ke ẹnọ ntịn̄enyịn tọn̄ọ nte ẹkedori Christ ke ebekpo? (Ediyarade 14:1-3)
Nso utom ke Jesus ekebem iso etịn̄ ete ke imọ iyanam ke akwa ukụt ọtọn̄ọde, nte ẹwetde ke Matthew 25:31-33?
Nso ntọn̄ọ ntọn̄ọ utom ke ẹnam mfịn? Mmanie ẹbuana ke enye? (Psalm 110:3; Matthew 24:14; Ediyarade 14:6, 7)
Ntak emi mme andibiọn̄ọ ẹdide mbon ukaraidem ye mbon ido ukpono mîkemeke nditre utom ukwọrọikọ? (Zechariah 4:6; Utom 5:38, 39)
Nso ukpụhọde ida itie ke uwem mbon oro ẹsụkde ibuot ẹnọ ukara Obio Ubọn̄? (Isaiah 2:4; 1 Corinth 6:9-11)
Obio Ubọn̄ eke Tọsịn Isua
16. (a) Christ edikara ebịghi adan̄a didie? (b) Nso utịbe utịbe n̄kpọ ke ẹdinam adan̄aoro ye ke oro ebede?
16 Ke ẹma ẹkesịn Satan ye mme demon esie ke editụn̄ọ ukpe, Jesus Christ ye owo 144,000 nsan̄a mme ada udeme nnyene ye enye ẹyekara nte ndidem ye mme oku ke tọsịn isua. (Ediyarade 20:6) Ke ini oro, ẹyeda ubonowo ẹkesịm mfọnmma idaha, ẹsiode idiọkn̄kpọ ye n̄kpa Adam ẹfep ke nsinsi. Ke utịt Tọsịn Isua Ukara oro, ke ama okokụt unen ke ndinam utom esie nte Edidem-Oku Messiah, Jesus ‘ayayak itie-ubọn̄’ ọnọ Ete esie, “man ke usụn̄ ekededi Abasi ekpedi kpukpru n̄kpọ.” (1 Corinth 15:24-28) Ke idaha oro, ẹyekpọhọde Satan ẹyak ke ekpri ibio ini man odomo ubonowo emi ẹfakde kaban̄a ibetedem oro mmọ ẹnọde itie edikara ofụri ekondo Jehovah. Ke akpatre udomo oro ama okụre, Jehovah oyosobo Satan ye mbon nsọn̄ibuot emi ẹkedade ye enye. (Ediyarade 20:7-10) Mbon oro ẹkedade ẹnọ itie edikara Jehovah—kpa unen esie ndikara—ẹyenen̄ede ẹwụt edinam akpanikọ mmọ eke mîsehekede. Ndien ẹyeda mmọ ẹdisịn ke nnennen itie ebuana mmọ ye Jehovah, ndidi se enye enyịmede nte nditọiren ye nditọiban esie, ẹnyenede unyịme Abasi ndinyene nsinsi uwem.—Rome 8:21.
17. (a) Nso iditịbe inọ Obio Ubọn̄ oro ke utịt tọsịn isua? (b) Ke nso usụn̄ifiọk ke edi akpanikọ nte ke ‘owo idisoboke’ Obio Ubọn̄ oro tutu amama?
17 Ke ntre, utom Jesus ye eke 144,000 ẹyekpụhọde ke ebuana ye isọn̄. Nso ididi utom ini iso mmọ? Bible itịn̄ke. Edi edieke nnyịn isọn̄ọde ida inọ itie edikara Jehovah, nnyịn iyodu uwem ke utịt Tọsịn Isua Ukara ndifiọk se Jehovah aduakde ọnọ mmọ ọkọrọ ye enyene-uten̄e ekondo esie. Nte ededi, ukara tọsịn isua Christ edidi “nsinsi” ndien itie edidem esie “idinyụn̄ ibiarake.” (Daniel 7:14) Ke nso usụn̄ifiọk? Ke akpa itie, odudu ukara idibehe idụk ubọk mbon efen emi ẹnyenede nsio nsio uduak, sia Jehovah edidide Andikara. N̄ko, ‘owo idisoboke’ Obio Ubọn̄ oro tutu amama koro se enye edinamde eyebịghi ke nsinsi. (Daniel 2:44) Ndien ẹyekpono Edidem-Oku Messiah ye nsan̄a ndidem-oku esie ke nsinsi ke ntak utom mbuọtidem oro mmọ ẹnamde ẹnọ Jehovah.
Nneme Ndụn̄ọde
• Ntak emi Obio Ubọn̄ Abasi edide n̄kukụre usọbọ ọnọ mme mfịna ubonowo? Ini ewe ke Edidem Obio Ubọn̄ Abasi ọkọtọn̄ọ ndikara?
• Nso inen̄erede idemede fi udọn̄ iban̄a Obio Ubọn̄ Abasi ye se enye edinamde?
• Mme n̄kpọ ewe oro Obio Ubọn̄ emi anamde ke nnyịn ikeme ndikụt idahaemi, ndien nso udeme ke nnyịn inyene ke emi?
[Ndise ke page 92, 93]
Ke idak Obio Ubọn̄ Abasi, kpukpru owo ẹyekpep edinen ido