Ukpepn̄kpọ 15
Ndin̄wam Mbon En̄wen Ẹnam Uduak Abasi
Ntak etịn̄de ọnọ mbon en̄wen aban̄a se afo ekpepde? (1)
Afo ekeme ndibuana eti mbụk ye mmanie? (2)
Nso odudu ke eduuwem fo ekeme ndinyene ke idem mbon en̄wen? (2)
Ini ewe ke afo ekeme ndisan̄a ye esop n̄kwọrọ ikọ? (3)
1. Etisịm idahaemi afo ama ekpekpep ediwak nti n̄kpọ oto Bible. Ifiọk emi ekpenyene ndida nsịm afo ndikọri edu Christian. (Ephesus 4:22-24) Utọ ifiọk oro edi akpan n̄kpọ man afo enyene nsinsi uwem. (John 17:3) Nte ededi, mbon en̄wen n̄ko ẹnyene ndikop eti mbụk man ẹkeme ndinyan̄a mmọ n̄ko. Ana kpukpru mme ata Christian ẹnọ mbon en̄wen ikọ ntiense. Enye edi ewụhọ Abasi.—Rome 10:10; 1 Corinth 9:16; 1 Timothy 4:16.
2. Afo emekeme nditọn̄ọ ebe ke ndibuana nti n̄kpọ ẹmi afo ekpepde ye mbon oro ẹdude ẹkpere fi. Tịn̄ mmọ nọ ubon fo, mme ufan, mme nsan̄a ufọkn̄wed, ye mme nsan̄autom. Wụt mfọnido nyụn̄ nyene ime nte afo anamde ntre. (2 Timothy 2:24, 25) Ti ete ke mme owo ẹsiwak ndise eduuwem owo akan nte mmọ ẹkpan̄de utọn̄ ke se enye etịn̄de. Ntre eti eduuwem fo ekeme ndidụri mbon en̄wen ndikpan̄ utọn̄ nnọ etop oro afo etịn̄de ọnọ mmọ.—Matthew 5:16; 1 Peter 3:1, 2, 16.
3. Nte ini akade, ekeme ndidi afo eyedot nditọn̄ọ ukwọrọikọ ye esop n̄kann̄kụk eke Mme Ntiense Jehovah. Emi edi akpan usio-ukot ke n̄kọri fo. (Matthew 24:14) Nso idatesịt ke ekpedi ntem ke ekpedide afo emekeme ndin̄wam owo efen akabade edi asan̄autom Jehovah onyụn̄ enyene nsinsi uwem!—1 Thessalonica 2:19, 20.