Ibuot 34

Ntak Emi N̄kpodude Uwem nte Bible Etemede?

Afo odu ke itie unyamudia ke adia udia uwemeyo ye nditọiban iba ke ufọkn̄wed mbufo, etise akparawa kiet emi edide obufa eyen ufọkn̄wed mbufo odụk edi.

Akpa eyenan̄wan ọdọhọ fi ete: “Ọmọdiọn̄ọ ke Brett enen̄ede ama fi? Nte enye esisede fi anam ntịn̄ ntre. Kpukpru ini, enyịn akparawa emi esiwụhọ fi ke idem!”

Ọyọhọ eyenan̄wan iba esịn fi inua ke utọn̄ ete: “Ndi ọmọfiọk ke enye inyeneke ufan an̄wan kan̄a?”

Afo ama ekekere ntre, sia usen eken Brett ama okot fi usọrọ ke edem mmọ. Kpa ye oro mûkukaha, okosụk ekekere se ikpeketịbede edieke akpakakade.

Nte osụk ekerede n̄kpọ emi, akpa eyenan̄wan esịbe odụk, ete:

“Abiak mi sia mmenyenyene owo. N̄kpakam mma ndidi ufan Brett.”

Ekem enye ese fi ke n̄kpaidem. Ọmọfọfiọk se enye oyomde nditịn̄.

Enye obụp fi ete: “Yak kan̄a ise, ntak emi mûnyeneke ufan erenowo?”

Afo usumaha mbụme oro! Imọfiọk ke akpama ndinyene ufan erenowo. Edi ẹdọdọhọ fi ke ọfọn ebet tutu afo eben̄e idem ndidọ ndọ mbemiso ọtọn̄ọde uyomima. Mîkpedịghe-e . . .

Ọyọhọ eyenan̄wan iba esịbe odụk, onyụn̄ obụp ete: “Ndi ido ukpono mbufo edi ntak?”

Afo ekere ete: ‘Enye anam didie ọfiọk se n̄kerede?’

Enye asak fi ete: “Kpukpru n̄kpọ fo osụk edi Bible, Bible, Bible. Ebebet ndiwọrọ n̄kadia uwem ekpri?”

NDI akanam ẹsak fi ke ntak emi odomode ndidu uwem nte Bible etemede? Edieke edide ntre, anaedi emekere ke enyene se itakde fi. Se eyenan̄wan kiet emi ekerede Deborah ekekerede edi oro. Enye ọdọhọ ete: “Eketie mi nte ke ndidu uwem nte Bible etemede etie ukpan ukpan akaha. Ama esidọn̄ mi nditiene mme ufan mi ke ufọkn̄wed ndu uwem nnam-se-mmade.”

Se Ikemede Nditat Fi Enyịn

Idịghe tutu n̄kpọ etetịbe ọnọ fi ndien afo ada idem ifiọk. Ke nditịm ntịn̄, ọfọn ikpep n̄kpọ ito ndudue mbon en̄wen, Ikọ Abasi onyụn̄ eteme ete inam ntre, nte Asaph andiwet psalm akanamde. Enyene ini emi enye ekekerede ke ndidu uwem nte Abasi etemede etie ukpan ukpan akaha. Edi enye ndikụt se iketịbede inọ mbon oro ẹkekpọn̄de usụn̄ Abasi ama atat enye enyịn. Nte ini akade, Asaph ama edifiọk ke mmọ ẹkesan̄a ke “mfọfiọnọ ebiet.”—Psalm 73:18.

Mbak udunam ukem ndudue oro, kere ban̄a se mme uyen emi ẹketrede ndidu uwem nte Bible etemede ke ndusụk ini, ẹkenyụn̄ ẹnamde idan̄ mbemiso ndọ, ẹtịn̄de.

● Nso ikanam ekere onyụn̄ anam se akanamde oro?

Deborah: “Ke ini n̄kodude ke ufọkn̄wed, mma nsikụt mme owo ẹnyenede ufan irenowo m̀mê iban, ndien ekesitie nte mmọ ẹkop inemesịt. Ke ini n̄kodude ye mmọ n̄kụt nte mmọ ẹfatde ẹnyụn̄ ẹtịmde kiet eken inua, ama esidọn̄ mi nditiene nnam, edi n̄kenyeneke owo. Mma nsinen̄ede n̄kere mban̄a akparawa kiet oro n̄kamade. Ndien ama esinen̄ede ọdọn̄ mi ndidu ye enye.”

Mike: “Mma nsikot n̄wed nnyụn̄ nse mme edinam TV oro ẹsinamde idan̄ etie nte edi etịp-atua. Nneme oro n̄kesinyenede ye mme ufan mi mban̄a idan̄ ama esinam idan̄ enen̄ede ọdọn̄ mi. Ekem ke ini ndude ikpọn̄ ye n̄wan, mma nsikere ke imekeme ndifiọn̄ọ kiet eken, ekem itre ini ekededi, owo inamke idan̄.”

Andrew: “Mma nsima ndise ndise idan̄ ke Intanet nnyụn̄ ntọn̄ọ ndin̄wọn̄ n̄kpọsọn̄ mmịn. Ekem, nsisan̄a ye mme uyen emi mîdụhe uwem nte Bible etemede n̄ka usọrọ.”

Tracy: “Mma mfiọk ke ifọnke owo anam idan̄ mbemiso ọdọde ndọ, edi n̄kasuaha edinam oro. N̄kaduakke ndinam idan̄ mbemiso ndọde ndọ, edi se ikọdọn̄de mi ama akan mi ubọk. Esịt ikobiomke mi iban̄a se n̄kanamde ini oro.”

● Ndi utọ uwem oro ama anam okop inemesịt?

Deborah: “Ke nsonso oro, eketie nte n̄wọrọ ke ufụn, mma nnyụn̄ n̄kop inemesịt nte ke mmetiene ndụk otu. Edi inemesịt oro ikebịghike. Mma ntọn̄ọ ndikere ke ndi oburobụt owo, esịt ama amia mi ufen, uwem onyụn̄ odorode mi. Mma ntua n̄kpọfiọk etieti ke emi n̄kọfiọkde erenowo ke ini mmendọhọ ebe.”

Andrew: “Ikesisọn̄ke mi aba ndinam ndiọi n̄kpọ oro ẹkedọn̄de mi. Edi esịt ama esinen̄ede obiom mi n̄konyụn̄ n̄kopke inemesịt mban̄a se n̄kanamde.”

Tracy: “Mma nda oburobụt ido mbiat ini uyen mi. N̄kekere ke ami ye ufan erenowo oro n̄kenyenede iyokop inem uwem, edi nnyịn ikokopke. Utu ke oro, se nnyịn ikanamde ama anam ikop ubiak, ikayakke ikop inemesịt, ama esinyụn̄ anam esịt ọduọ nnyịn. Mma nsina ke bed ediwak okoneyo n̄wek eyet, ntua ubaha nte n̄kpakanamde se Jehovah amade.”

Mike: “Uwem ama odorode mi. Mma ndomo ndinam nte n̄kwe mfịna oro edinam mi akadade ọsọk mbon en̄wen, edi n̄kekemeke. Ama abiak mi ndifiọk ke inemesịt oro n̄koyomde ama ọnọ mbon en̄wen unan ke esịt.”

● Nso item ke ọkpọnọ mme uyen oro ẹkerede ke nte Bible etemede ete ẹdu uwem etie ukpan ukpan akaha?

Tracy: “Du uwem nte Jehovah etemede nyụn̄ dụk nsan̄a ye mbon oro ẹnamde ukem oro. Se idinamde okop inemesịt edi oro.”

Deborah: “Se afo anamde ibeheke fi kpọt. Ebehe mbon en̄wen. Ndien edieke esịnde item Abasi, ọyọnọ idemfo unan.”

Andrew: “Ke ini n̄kpọ mîtịbeke inọ fi, emekeme ndikere ke nte mme ufan fo ẹdude uwem anam mmọ ẹkop inem uwem. Emekeme ndikpebe usụn̄uwem mmọ. Ntre, da eti ibuot mek mme ufan fo. Buọt idemfo ye Jehovah, ndien udunamke n̄kpọ emi edituade n̄kpọfiọk.”

Mike: “Uku ye eti ubieresịt ẹsịne ke otu mme ọsọn̄urua n̄kpọ oro Jehovah ọnọde fi. Edieke ọduọkde mme enọ emi ke ntak emi mûkemeke ndimụm idem n̄kama, ọwọrọ ọmọsụhọde idemfo itie. Neme se ifịnade fi ye ete ye eka fo m̀mê ikpọ owo en̄wen. Edieke anamde n̄kpọ oro mîfọnke, sọsọp tịn̄ nyụn̄ nen̄ede se ikwan̄ade. Edieke odude uwem nte Jehovah etemede, afo eyenyene ata emem.”

Ndi Item Bible Ẹtie Ukpan Ukpan M̀mê Ẹkpekpeme Owo?

Jehovah edi “Abasi inemesịt,” ndien enye oyom fi okop inemesịt n̄ko. (1 Timothy 1:11; Ecclesiastes 11:9) Mme item oro ẹdude ke Bible ẹdi ke ufọn fo. Edi akpanikọ ke emekeme ndikere ke mmọ etie ukpan ukpan ẹkaha. Edi ke nditịm ntịn̄, item Bible ẹtie nte n̄kpaha emi afo esidade akpaha idemfo adian ke n̄kpọitie ubomisọn̄; enye ekpekpeme fi.

Ke akpanikọ, emekeme ndiberi edem ke Bible. Edieke emekde ndidu uwem nte Bible etemede, ayanam Jehovah okop inemesịt oyonyụn̄ ọbọ ufọn.—Isaiah 48:17.

AKPAN ITIE N̄WED ABASI

“Ami Jehovah, ndi Abasi fo, Enye emi ekpepde fi man afo ọbọ ufọn.”​—Isaiah 48:17.

ITEM

Kere nte akpanamde ekpri eyenuka okụt ke ọfọn owo odu uwem nte Bible etemede. Nditịn̄ se afo enịmde ke akpanikọ nnọ mbon en̄wen edi ata eti usụn̄ ndinam mmọ ẹsọn̄ọ ẹdu fi ke esịt.

NDI AMA ỌFIỌK . . . ?

Emekeme ndida ata esisịt ini mbiat itie ebuana fo ye Jehovah, edi ekeme ndida fi ediwak isua mbemiso afiakde edi ufan Jehovah.

SE NDINAMDE

Man mfiọk ntak emi ọfọnde ndidu uwem nte Bible etemede, se ndinamde edi ․․․․․

Edieke ọdọn̄de mi ndidu uwem nte mbon ererimbot emi, se ndinamde edi ․․․․․

Se ndibụpde ete m̀mê eka mi mban̄a n̄kpọ emi edi ․․․․․

AFO EKERE DIDIE?

● Ntak emi owo mîkpabiatke ibet Abasi ibọ utịp mbemiso adade idem ifiọk?

● Nso ke ekpep oto se Deborah, Mike, Andrew, ye Tracy ẹtịn̄de?

● Ntak emi ndusụk owo ẹkemede ndikere ke item Bible etie ukpan ukpan akaha, edi ntak emi ekikere mmọ mînenke?

[Se ẹwetde ke ikpọ abisi ke page 285]

“Ubiak oro afo okopde ke ini ẹtụnọde fi ke ntak idiọkn̄kpọ oro akanamde ikponke nte ubiak oro okopde ke ini odomode ndidịp idiọkn̄kpọ fo.”​—Donna

[Se ẹwetde ẹban̄a ndise ke page 288]

Mme item Bible ikpanke fi ndikop inemesịt; mmọ ẹkam ẹkpekpeme fi