Ntak Emi Akpadade Item Bible Odu Uwem?

NDI se Bible etịn̄de aban̄a idan̄ edi ikọ eset? Baba-o, koro se Bible etịn̄de aban̄a emi akam ananam ibọhọ mme n̄kpọ nte:

▪ Udọn̄ọ emi ẹmende ẹto idan̄

▪ Idịbi unana ebe

▪ Ndọ ndibiara

▪ Esịt ndimia owo ufen

▪ Bụt ye esuene

Jehovah Abasi,a kpa Andibot nnyịn, oyom nnyịn ikop inem n̄kpọ oro enye ọnọde owo. Enye ‘ekpep fi n̄kpọ man afo ọbọ ufọn.’ (Isaiah 48:17) Owo emi adade se Bible etịn̄de aban̄a idan̄ odu uwem adia mme ufọn emi:

▪ Enem Abasi esịt

▪ Esịt ana enye sụn̄-n̄

▪ Enyene eti ubon

▪ Ọwọrọ eti etop

▪ Enyene ukpono

Nso ke akpanam edieke mûdaha kan̄a mme edumbet Bible udu uwem? Ndi emekeme ndikpụhọde? Ndi Abasi ayada kpukpru se ekesinamde ke edem ekpe ikpe ọnọ fi?

Kere ban̄a emi: Mbemiso ndusụk owo ke eyo mme apostle ẹkekabarede ẹdi Christian, mmọ ẹma ẹsinam use, ẹsịn efịbe, irenowo ẹdan̄ ye irenowo, iban ẹnyụn̄ ẹdan̄ ye iban. Edi mmọ ẹma ẹkpụhọde ndien emi ama enen̄ede ọfọn ye mmọ. (1 Corinth 6:9-11) Ntre n̄ko ke ata ediwak owo ẹnam mfịn. Mmọ idụhe aba oburobụt uwem emi mmọ ẹkesidude, edi ẹkabade ẹda mme edumbet Bible ẹdu uwem ẹnyụn̄ ẹdia uwak ufọn. Da Sarah emi iketịn̄de iban̄a ke akpa ibuotikọ ke uwụtn̄kpọ.

“Mma Mbọ Emem Ndien”

Sarah ama edikụt ke oburobụt uwem oro imọ ikodude ikọnọhọ imọ inemesịt ye ifụre oro imọ ikoyomde. Enye ọdọhọ ete: “Esịt ama odoro mi ufiọn, bụt anam mi, nnyụn̄ n̄kere ke mmekeme ndimen idịbi m̀mê ata idiọk udọn̄ọ. N̄kosụk nnenịm ke Abasi do, mma nnyụn̄ mfiọk ke nte ndude uwem inemke enye esịt. Ndedehe uwem mi ama edienede mi, ndien idem ama ọdiọk mi etieti.”

Nte ini akakade, Sarah ama esịn ukeme ndikpụhọde. Enye ama ọdọhọ ete ye eka esie emi ẹdide Mme Ntiense Jehovah ye mbiowo esop Christian ẹn̄wam imọ. Sarah ọdọhọ ete: “Idem ama akpa mi ndikụt utọ ima emi ete ye eka mi ye mbiowo ẹkemade mi. Mma mbọ emem ndien.”

Sarah enyene nditọ iba idahaemi. Enye ọdọhọ ete: “Mmesitịn̄ utọ uwem emi n̄kodude nnọ nditọ mi. Nyom mmọ ẹkụt nte n̄kọbọde ufen ke ntak emi mmen̄kadaha mme edumbet Abasi ndu uwem. Se nyomde edi ndin̄wam mmọ ẹfiọk ke edieke mmọ ẹsede idan̄ nte Abasi esede, ke emi ọyọfọn ye mmọ ke kpukpru usụn̄. Mmenen̄ede n̄kụt ke kpukpru se Abasi etịn̄de ọnọ nnyịn aban̄a idan̄ edi ke ufọn nnyịn, koro enye iyomke ndikụt nnyịn idụkde afanikọn̄.

Afo n̄ko emekeme ndidia ediwak ufọn edieke etienede ima ima ndausụn̄ Abasi. Bible ọn̄wọn̄ọ ọnọ nnyịn ete: “Mme ewụhọ Jehovah ẹnen, ẹdat owo esịt; ibet Jehovah asana, an̄wan̄a owo enyịn. . . . Akwa udori odu ke ndinịm mmọ.”—Psalm 19:8, 11.b

[Mme Ikọ Idakisọn̄]

[Se ẹwetde ke ikpọ abisi ke page 8]

Mbon oro mîdaha mme edumbet Bible idu uwem ẹsibọ ufen

[Se ẹwetde ke ikpọ abisi ke page 9]

Mbon emi ẹdade mme edumbet Bible ẹdu uwem ẹnyene esịt emi mîmiaha mmọ ufen, ẹnyụn̄ ẹnyene eti ubon