Ẹtie Kiet Ẹkpono Jehovah

Nte mbufo ẹkụtde ke n̄wed emi, Bible ọdọn̄ọ ediwak item emi ẹkemede ndin̄wam mbufo. Jehovah oyom mbufo ẹkop inemesịt. Enye ọn̄wọn̄ọ ke edieke mbufo ẹbemde iso ẹnam n̄kpọ imọ, ke imọ ‘iyadian kpukpru n̄kpọ emi inọ mbufo.’ (Matthew 6:33) Enye enen̄ede oyom mbufo ẹdi ufan imọ. Ntre, ẹda kpukpru ifet oro ẹnyenede ẹnam ufan ye Abasi. Idụhe se ifọnde ikan emi!—Matthew 22:37, 38.

1 ẸNEN̄EDE ẸKPERE JEHOVAH

BIBLE ỌDỌHỌ ETE: “‘Ami nyedi ete mbufo, mbufo ẹyenyụn̄ ẹdi nditọ mi iren ye nditọ mi iban,’ Jehovah . . . ọdọhọ.” (2 Corinth 6:18) Abasi oyom mbufo ẹdi akpan ufan imọ. Ndisibọn̄ akam ayanam mbufo ẹnen̄ede ẹkpere Abasi. Jehovah ọdọhọ mbufo ẹsibọn̄ akam kpukpru ini. (1 Thessalonica 5:17) Enye enen̄ede oyom ndikop se ifịnade mbufo. (Philippi 4:6) Ke ini ẹtiede ye nditọ mbufo ẹbọn̄ akam, mmọ ẹyekụt ke mbufo ẹda Abasi nte ata ufan.

Ke ẹma ẹkọbọn̄ akam ẹnọ Abasi, mbufo n̄ko ẹnyene ndikpan̄ utọn̄ nnọ Abasi. Didie ke ẹkeme ndinam emi? Akpa, ẹkpep Bible ye mme n̄wed Ikọ Abasi. (Psalm 1:1, 2) Ẹtie ẹkere se ẹkpepde. (Psalm 77:11, 12) Ẹsinyụn̄ ẹdụk mme mbono esop kpukpru ini man ẹkop Ikọ Abasi.—Psalm 122:1-4.

Akpan n̄kpọ en̄wen emi ekemede ndinam mbufo ẹnen̄ede ẹkpere Jehovah edi ndineme Ikọ Abasi ye mme owo. Adan̄a nte ẹnemede Ikọ Abasi ye mme owo, ntre ke mbufo ẹditetịm ikpere Abasi.—Matthew 28:19, 20.

SE AKPANAMDE:

• Ẹsio ini kpukpru usen ẹnịm ẹda ẹkot Bible ẹnyụn̄ ẹbọn̄ akam

• Ẹyak n̄kpọ Abasi edi ebeiso n̄kpọ ke ufọk mbufo, utu ke unọ idem inemesịt ye nduọkodudu

2 ẸNAM UTUAKIBUOT UBON MBUFO ENEMa

BIBLE ỌDỌHỌ ETE: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Ana mbufo ẹnyene ini emi ẹsinịmde utuakibuot ubon, ẹsinyụn̄ ẹnịm enye kpukpru ini. (Genesis 18:19) Ẹsịn Abasi ke se ededi oro ẹnamde ke usen ke usen. Tịn̄ n̄kpọ ban̄a Abasi ye mbonufọk fo “ke ini afo etiede ke ufọk fo ye ke ini afo asan̄ade ke usụn̄ ye ke ini afo anade-na ye ke ini afo adahade ada” man mmọ ẹnen̄ede ẹkpere Abasi. (Deuteronomy 6:6, 7) Kpebe Joshua emi ọkọdọhọde ete: “Amaedi ami ye mbonufọk mi, nnyịn iyanam n̄kpọ Jehovah.”—Joshua 24:15.

SE AKPANAMDE:

• Nam ndutịm ndisikpep Bible ye mbonufọk fo kpukpru ini nyụn̄ kpep n̄kpọ emi ẹdifọnde ye owo kiet kiet