Jesus Anam Akpa Utịben̄kpọ Esie

Ọyọhọ usen ita edi emi tọn̄ọ Nathanael akakabade edi mbet Jesus. Jesus ye ndusụk ke otu akpa mbet esie emi ẹdọk ẹka Galilee, kpa n̄kan̄ emi kpukpru mmọ ẹtode, emi odude ke enyọn̄-enyọn̄ Jerusalem. Mmọ ẹka Cana, obio mme Nathanael. Cana odu ke enyọn̄ obot ke enyọn̄-enyọn̄ Nazareth. Jesus ke idemesie okokpon ke Nazareth. Ẹkot mmọ usọrọ ndọ ke Cana.

Eka Jesus etiene edi usọrọ emi. Sia enye edide ufan mme ọdọ ndọ emi, onyụn̄ etienede mmọ ese isenowo, enye ọsọsọp okụt ke wine ọmọn̄ okụre, ntre enye aka ọkọdọhọ Jesus ete: “Mmọ inyeneke wine.”—John 2:3.

Ikọ Mary ọwọrọ yak Jesus anam n̄kpọ aban̄a wine emi okụrede mi. Jesus etịn̄ ikọ emi owụtde ke imọ inyịmeke se enye etịn̄de onyụn̄ obụp enye ete: “Nsan̄a nso ye afo n̄wan owo?” emi ọwọrọde, ‘enye oro ebehe nnyịn didie?’ (John 2:4) Sia Jesus edide Edidem emi Abasi emekde, Ete esie ke heaven editeme enye se akpanamde, idịghe mbonubon m̀mê mme ufan esie. Mary okụt ke ọfọn iyak eyen imọ ebiere nte enye edisede iban̄a n̄kpọ oro, ntre enye ọdọhọ mbon oro ẹsan̄ade utom ete: “Se ededi oro enye ọdọhọde mbufo, ẹnam.”—John 2:5.

Aban̄ itiokiet emi ẹbotde ke itiat ẹdu do. Aban̄ kiet edi n̄kpọ nte lita 40. Jesus ọdọhọ mbon oro ẹsan̄ade utom ete: “Ẹdọn̄ mmọn̄ ẹyọhọ mme aban̄ mmọn̄ emi.” Ekem enye ọdọhọ mmọ ete: “Ẹkoi ndusụk idahaemi ẹda ẹsọk etubom usọrọ.”—John 2:7, 8.

Wine emi enen̄ede enem etubom usọrọ oro, edi enye ifiọkke nte wine emi asan̄ade. Ntre etubom usọrọ okot ebendọ, onyụn̄ ọdọhọ enye ete: “Ẹsibem iso ẹsio eti wine ẹdi, ndien ke ini mme owo ẹma ẹken̄wọn̄ ẹyụhọ, ẹsio enye oro mînemke ẹdi. Afo omomụm eti wine enịm tutu esịm emi.”—John 2:10.

Emi edi akpa utịben̄kpọ oro Jesus anamde. Ke ini mbufa mbet esie ẹkụtde emi, mmọ ẹtetịm ẹbuọt idem ye enye. Ke oro ebede, Jesus asan̄a ye eka esie ye nditọeka esie aka Capernaum emi ekperede Inyan̄ Galilee.