Ibuot 15

Akpa Utịben̄kpọ Jesus

EDI n̄kpasịp usen kiet m̀mê iba tọn̄ọ nte Andrew, Peter, John, Philip, Nathanael, ye iso-ọfọn James ẹkekabarede ẹdi mme akpa mbet Jesus. Kemi mmọemi ke ẹfiak ẹnyọn̄ ufọk mmọ ke obio Galilee, emi kpukpru mmọ ẹtode. Ebiet emi mmọ ẹkade edi Cana, kpa obio emana Nathanael, emi odude ke obot oro mîyomke usụn̄ ikpọn̄ Nazareth, emi Jesus ke idemesie ọkọkọride okpon. Ẹnọ mmọ ikot ndidụk usọrọndọ ke Cana.

Eka Jesus nde etiene edi usọrọndọ emi. Nte ufan ubon mme ọdọ ndọ ẹmi, etie nte Mary etiene abuana ke ndikama uwak isenowo oro. Ntre enye ọsọsọp ọfiọk ini oro n̄kpọ okụrede, onyụn̄ asian Jesus ete: “Mmọ inyeneke wine.”

Ntem, ke ini Mary, ke akpanikọ ọnọde ekikere ete Jesus anam n̄kpọ aban̄a wine oro okụrede mi, Jesus emen̄e ke akpa ifet. Enye obụp ete: “Ami nsan̄a [nso] ye afo?” Nte Edidem emi Abasi emekde, mme ufan ye ubon esie inyeneke nditeteme enye utom esie. Ntre Mary, ke ọniọn̄, ayak n̄kpọ emi esịn eyen esie ke ubọk, n̄kukụre ọdọhọde mme asan̄autom oro ete: “Ẹnam se Enye edidọdọhọ mbufo.”

Ọfọn, aban̄ mmọn̄ itiokiet eke ẹbotde ke itiat ẹdiọhọ do, emi kiet kiet ekemede ndidụk se ibede galọn mmọn̄ duop. Jesus ọdọhọ mme asan̄autom oro ete: “Ẹsịn mmọn̄ ke mme aban̄ ẹmi ọyọhọ.” Ndien mme asan̄autom oro ẹsịn mmọn̄ ọyọhọ osịm inua. Ekem Jesus ọdọhọ ete: “Ẹkoi nan̄a, ẹda ẹsọk etubom udia.”

Eti uduot wine emi anam etubom udia odu ke n̄kpaidem, ifiọkke ite ke ẹnam enye ke utịbe utịbe usụn̄. Ke okotde ebendọ, enye ọdọhọ ete: “Kpukpru owo ẹbemiso ẹnọ owo eti wine; ndien ke ini mme owo ẹma ẹken̄wọn̄ ediwak, ọnọ mmọ se mîfọnke ikan; afo omomụm eti wine onịm tutu osịm emi.”

Emi edi akpa utịben̄kpọ Jesus, ndien ke mmọ ẹkụtde emi, mbuọtidem mbufa mbet esie ọdọdiọn̄ ọsọn̄. Ke oro ebede, mmọ ye eka esie ye nditọeka esie ẹnam isan̄ ẹka obio Capernaum emi ekperede Inyan̄ Galilee. John 2:1-12.

▪ Ini ewe ke ini utom ukwọrọikọ Jesus ke usọrọndọ ke Cana ada itie?

▪ Ntak emi Jesus mînyịmeke ekikere eka esie?

▪ Nso utịben̄kpọ ke Jesus anam, ndien nso utịp ke enye enyene ke idem mbon en̄wen?