Diọn̄ọ Se Christ Edide ke Esop Abasi

“KE EDITỌN̄Ọ Abasi okobot enyọn̄ ye isọn̄.” Kpukpru se enye akanamde ama ‘ọfọn etieti.’ (Gen. 1:1, 31) Jehovah okoyom mme owo ẹkop inem uwem ke nsinsi nsinsi. Edi nsọn̄ibuot emi ẹkesọn̄de ye Abasi ke In̄wan̄ Eden iyakke mme owo ẹkop inem uwem nte Abasi okoyomde. Kpa ye oro, Jehovah ifreke se enye akaduakde ndinam ke isọn̄ emi ye se enye akaduakde ndinam nnọ mme owo. Abasi ama etịn̄ ke ẹyenyan̄a nditọ Adam emi ẹdikopde item imọ. Ini ke edi emi kpukpru owo ẹdifiakde ikpono Jehovah Abasi. Abasi oyosobo Satan onyụn̄ abiat kpukpru utom esie. (Gen. 3:15) N̄kpọ ayafiak ‘ọfọn etieti’ nte ọkọfọnde ke editọn̄ọ. Jesus Christ ke Jehovah edida inam kpukpru emi. (1 John 3:8) Ntre, ọfọn idiọn̄ọ se Christ edide ke esop Abasi.—Utom 4:12; Phil. 2:9, 11.

SE CHRIST EDIDE

² Ke ini ikerede iban̄a se Christ edinamde man ererimbot emi etie nte Abasi okoyomde, iyokụt ke utom esie okpon etieti. Jesus edi Andifak ubonowo, Akwa Oku, Ibuot esop Christian, ndien idahaemi, enye edi Edidem Obio Ubọn̄ Abasi. Nditie n̄kere kpukpru se Christ Jesus edide anam inen̄ede ima ndutịm emi Abasi anamde, inyụn̄ ima Christ Jesus. Bible etịn̄ ndusụk utom emi Jesus anamde.

³ Ke ini Jesus okodude ke isọn̄, se enye akanamde ama owụt ke enye edinam mbon oro ẹkopde item Abasi ẹfiak ẹketie ke emem ye Abasi. (John 14:6) Jesus ama enyịme ndikpa man afak ediwak owo. (Matt. 20:28) Ntre, Jesus edi owo emi ekpepde nnyịn nte Abasi oyomde idu uwem. Enye n̄ko edi akpan owo emi Jehovah adade anam se enye akaduakde ọnọ ubonowo. Enye edi n̄kukụre owo emi ekemede ndinam nnyịn ifiak itie ke emem ye Abasi. (Utom 5:31; 2 Cor. 5:18, 19) Jesus ndikakpa nnyụn̄ nset ayanam mbon emi ẹkopde item Abasi ẹkeme ndidu uwem ke nsinsi ke ini Obio Ubọn̄ Abasi ke heaven edikarade isọn̄ emi.

⁴ Sia Jesus edide Akwa Oku, enye ‘ayatua nnyịn mbọm’ onyụn̄ osio isop idiọkn̄kpọ mme anditiene enye mi ke isọn̄. Apostle Paul ọkọdọhọ ete: “Akwa oku oro nnyịn inyenede idịghe enye emi mîkemeke nditua nnyịn mbọm ke mmemidem nnyịn, edi, edi enye emi ẹma ẹkedomo ẹse ke kpukpru usụn̄ kpa nte nnyịn, edi inyeneke idiọkn̄kpọ.” Ekem, Paul ama ọdọhọ mbon oro ẹbuọtde idem ye Jesus Christ ete ẹnam n̄kpọ man mmọ ẹfiak ẹketie ke emem ye Abasi. Enye ọkọdọhọ ete: “Ẹyak nnyịn ida ifụre utịn̄ikọ oro inyenede isan̄a ikpere ebekpo mfọnido oro owo mîdotke, man ẹkpetua nnyịn mbọm nnyịn ikponyụn̄ ikụt mfọnido oro owo mîdotke ke nnennen ini oro nnyịn iyomde un̄wam.”—Heb. 4:14-16; 1 John 2:2.

⁵ Jesus edi Ibuot esop Christian n̄ko. Nnyịn itieneke owo, kpa nte mme Christian eyo mme apostle mîketieneke. Nnyịn itiene Jesus, emi adade edisana spirit ye mbiowo esop ada nnyịn usụn̄. Jesus ye Ete esie ke heaven ẹyebụp mbiowo emi nte mmọ ẹkamade otuerọn̄ Abasi oro ẹnọde mmọ ẹte ẹse enyịn. (Heb. 13:17; 1 Pet. 5:2, 3) Kop se Jehovah eketịn̄de aban̄a Jesus mi: “Sese! Mmayak enye nnọ nte ntiense mme idụt, nte adausụn̄ ye nte etubom mme idụt.” (Isa. 55:4) Jesus ama owụt ke prọfesi emi osu imọ ke idem ke ini enye ọkọdọhọde mbet esie ete: “Ẹkûyak ẹkot mbufo ‘mme adausụn̄,’ koro Adausụn̄ mbufo edi kiet, kpa Christ.”—Matt. 23:10.

⁶ Jesus ama owụt utọ owo emi imọ idide ye nte imọ inen̄erede iyom ndin̄wam nnyịn ini enye ọkọdọhọde ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.” (Matt. 11:28-30) Jesus Christ edi “eti ekpemerọn̄” ukem nte Ete esie ke heaven, Jehovah Abasi. Se nte enye anamde n̄kpọ ye esop Christian ke ifụre ifụre ido ye ke usụn̄ oro enemde owo ke idem.—John 10:11; Isa. 40:11.

⁷ Ke akpa Corinth, Paul ama etịn̄ n̄kpọ en̄wen emi Jesus Christ edinamde. Paul ọkọdọhọ ete: “Ana enye akara nte edidem tutu Abasi ada kpukpru mme asua esie esịn enye ke idak ikpat. Edi ke ẹma ẹkeyak kpukpru n̄kpọ ẹsịn enye ke idak, adan̄aoro Eyen n̄ko oyosụk idem ọnọ Enye emi akadade kpukpru n̄kpọ esịn enye ke idak, man Abasi ekpedi kpukpru n̄kpọ ọnọ kpukpru owo.” (1 Cor. 15:25, 28) Abasi ekebem iso obot Jesus ndien edibot kpukpru n̄kpọ eken. Mbemiso Jesus ekedide isọn̄, enye okodu Abasi ke n̄kan̄ nte “ata anamutom.” (N̄ke 8:22-31) Ke ini Abasi ọkọnọde enye edi isọn̄, enye akanam uduak Abasi kpukpru ini. Enye ama ọyọ akakan idomo onyụn̄ aka iso anam uduak Ete esie tutu esịm n̄kpa. (John 4:34; 15:10) Ke ntak emi, Abasi ama anam enye eset aka heaven onyụn̄ ọnọ enye odudu ndidi Edidem Obio Ubọn̄ heaven. (Utom 2:32-36) Abasi ọnọ Christ Jesus akwa utom en̄wen ete asan̄a ye akwa udịm n̄kpọsọn̄ angel ke heaven edisobo ukara owo efep ke isọn̄ emi onyụn̄ osobo mme idiọkowo man idiọkn̄kpọ etre ke ofụri ererimbot. (N̄ke 2:21, 22; 2 Thess. 1:6-9; Edi. 19:11-21; 20:1-3) Ke oro ebede, Obio Ubọn̄ Abasi ke heaven ayakara ofụri isọn̄. Christ edi Edidem Obio Ubọn̄ oro.—Edi. 11:15.

NDIDIỌN̄Ọ SE CHRIST EDIDE ỌWỌRỌ NSO?

⁸ Jesus Christ emi nnyịn itienede ọfọn ama onyụn̄ anana ndo. Abasi ọdọhọ enye ese nnyịn enyịn. Man Jesus ese nnyịn enyịn, ana ika iso isọn̄ọ ida ye Jehovah, inyụn̄ isan̄a ikpat kiet ye esop esie emi akade iso iso.

⁹ Mme Christian eyo mme apostle ẹma ẹnen̄ede ẹfiọk se Christ edide ke esop Abasi. Nso ke mmọ ẹkenam ndiwụt ke imọfiọk se Christ edide? Mmọ ẹma ẹdiana kiet ẹnam utom Abasi ẹnyụn̄ ẹtiene ndausụn̄ oro Christ akadade edisana spirit ọnọ. (Utom 15:12-21) Apostle Paul ama etịn̄ nte mme Christian oro ẹyetde aran ẹdianade kiet ete: “Ẹyak nnyịn itịn̄ akpanikọ inyụn̄ ida ima ikọri ke kpukpru n̄kpọ ke idak enye emi edide ibuot, kpa Christ. Oto ke enye ofụri idem, emi ẹnamde akpaha adiana kiet onyụn̄ anam utom ọtọkiet ebe ke kpukpru ikek oro ẹnọde se ẹyomde, nte ekemde ye utom ndido kiet kiet ke nnennen udomo, ọbọp idem ọkọri man anam enye ọsọn̄ọ owụhọ ke ima.”—Eph. 4:15, 16.

¹⁰ Esop ọyọsọn̄ idem kpukpru owo ẹma ẹdiana kiet ẹnam n̄kpọ Abasi ẹnyụn̄ ẹsụk ibuot ẹnọ Christ, ima emi esinamde mme owo ẹdiana kiet oyonyụn̄ odu.—John 10:16; Col. 3:14; 1 Cor. 12:14-26.

¹¹ Nsio nsio n̄kpọ emi ẹtịbede ke ererimbot ẹsu se Bible eketịn̄de. Ndien emi enen̄ede owụt ke Abasi ama ọnọ Jesus Christ ubọn̄ ke heaven toto ke 1914. Enye ke akara idahaemi ke otu mme asua esie. (Ps. 2:1-12; 110:1, 2) Didie ke emi ebehe nnyịn mi ke isọn̄? Jesus ọyọsọp owụt ke imọ idi Edidem ndidem ye Ọbọn̄ mbọn̄ ke ini enye edisobode mme asua esie. (Edi. 11:15; 12:10; 19:16) Ekem, Jehovah ayanyan̄a mbon oro ẹdude ke ubọk nnasia Christ—utọ mbon emi ke Jehovah ọkọn̄wọn̄ọ ke iyanyan̄a ke ini Adam ye Eve ẹkesọn̄de ibuot ye Enye. (Matt. 25:34) Esịt enen̄ede enem nnyịn sia imọdiọn̄ọ se Christ edide ke esop Abasi! Ẹyak nnyịn ika iso idiana kiet ikwọrọ ikọ ke ofụri ererimbot inyụn̄ itiene ndausụn̄ Christ ke mme akpatre usen emi!