Nte Ikpodude ke Emem Inyụn̄ Inam Esop Jehovah Asana

KPA nte Bible ama eketetịn̄, ediwak tọsịn owo ke ẹbụn̄ọ ẹdụk esop Jehovah kpukpru isua. (Mic. 4:1, 2) Esịt esinen̄ede enem nnyịn ndikụt mme owo ẹdide ẹdidụk “esop Abasi.” (Utom 20:28) Esinem mmọ n̄ko nditiene nnyịn nnam n̄kpọ Jehovah nnyụn̄ ndu ke emem ke edisana esop Abasi oro etiede nte paradise. Edisana spirit Abasi, emi Abasi ọnọde nnyịn, ye nti item emi ikotde ke Ikọ Abasi ẹsin̄wam nnyịn idu ke emem ye nditọete nnyịn inyụn̄ inam esop Abasi asana.—Ps. 119:105; Zech. 4:6.

² Nnyịn imemen “obufa owo” isịne sia imanam se Bible ọdọhọde. (Col. 3:10) Nnyịn isiyakke n̄kpri ndutan̄uyo m̀mê utọk esịn mfịna ke otu nnyịn. Sia nnyịn Mme Ntiense Jehovah isisede n̄kpọ nte Jehovah esede, mme n̄kpọ emi ẹsidade utọk ẹdi ke ererimbot isinamke nnyịn itọhọ; imonyụn̄ idiana kiet ye nditọete nnyịn ke ofụri ererimbot.—Utom 10:34, 35.

³ Edi ndusụk ini, mfịna esidu emi ekemede ndinam nditọete ke esop ẹkûdiana kiet aba ẹkûnyụn̄ ẹdu ke emem. Nso isida mfịna emi idi? Emi esiwak nditịbe ke ini owo mînamke se Bible ọdọhọde ẹnam. N̄kpọ en̄wen emi esinamde nnyịn ikûdiana kiet aba ye nditọete nnyịn unyụn̄ udu ke emem edi ke nnyịn ifọnke ima sia ikadada idiọkn̄kpọ imana. (1 John 1:10) Owo ekeme n̄ko ndinam n̄kpọ emi mîfọnke onyụn̄ anam mbon en̄wen ke esop ẹtiene enye ẹnam. Se nnyịn itịn̄de m̀mê inamde ekeme ndibiak owo, mîdịghe se owo en̄wen etịn̄de m̀mê anamde ekeme ndibiak nnyịn. (Rome 3:23) Didie ke ikpebiere utọ mfịna emi?

⁴ Jehovah ọdiọn̄ọ ke kpukpru emi eyesitịbe onyụn̄ etịn̄ se nnyịn ikpesinamde ke ini emi etịbede. Ikọ esie eteme nnyịn se ikpanamde ke ini mfịna odude. Mbiowo, oro edi, mme ekpemerọn̄ emi ẹmade nnyịn, ẹsin̄wam nnyịn n̄ko. Edieke inamde item Bible oro mbiowo ẹnọde nnyịn, imekeme ndidu ke emem ye nditọete nnyịn inyụn̄ ika iso idi ufan Jehovah. Edieke ẹtụnọde nnyịn m̀mê ẹsuade ẹnọ nnyịn ke se nnyịn mîkanamke ọfọn, ana iti ke ẹnam oro sia Ete nnyịn eke heaven ama nnyịn.—N̄ke 3:11, 12; Heb. 12:6.

NTE ẸKPEBIEREDE N̄KPRI NDUTAN̄UYO

⁵ N̄kpri ndutan̄uyo m̀mê utọk esidu ke esop ndusụk ini. Ẹkpenyene ndisọsọp nda ima nditọete mbiere utọ n̄kpọ emi. (Eph. 4:26; Phil. 2:2-4; Col. 3:12-14) Edieke inamde item emi apostle Peter ọkọnọde, iyekeme ndisọsọp nnam emem ye nditọete nnyịn. Enye ọkọdọhọ ete: “Ẹnyene ufiop ufiop ima ẹnọ kiet eken, koro ima ofụkde ekese idiọkn̄kpọ.” (1 Pet. 4:8) Kop n̄kpọ en̄wen oro Bible afiakde etịn̄ mi, enye ọdọhọ ete: “Kpukpru nnyịn idedue ediwak ini.” (Jas. 3:2) Edieke nnyịn inamde n̄kpọ ye mme owo nte iyomde mmọ ẹnam ye nnyịn, iyesifen inọ mmọ inyụn̄ ifre iban̄a n̄kpri n̄kpri ndudue emi mmọ ẹduede nnyịn.—Matt. 6:14, 15; 7:12.

⁶ Edieke ọdiọn̄ọde ke se afo eketịn̄de m̀mê ke se afo akanamde ama ayat owo esịt, mbọk sọsọp ka kekpe owo oro ubọk nyụn̄ nam emem ye enye. Ti ke emi ayanam Jehovah ama fi. Jesus ọkọdọhọ mbet esie ete: “Edieke afo adade enọ fo edi itieuwa ndien afo eti do ete ke eyenete fo enyene ikọ ye afo, kpọn̄ enọ fo nịm do ke iso itieuwa, nyụn̄ nyọn̄; kebem iso nam emem ye eyenete fo, ndien ekem, ke ama akafiak edi, wa enọ fo.” (Matt. 5:23, 24) Ekeme ndidi enyene se ikanamde n̄kpọ oro ayat owo oro. Edieke edide ntre, nam kpukpru n̄kpọ an̄wan̄a enye. Edieke kpukpru nnyịn idiọn̄ọde nte itịn̄de ikọ ye kiet eken, emi idiyakke nnyịn isọp itọhọ, idinyụn̄ iyakke inyene ndusụk mfịna emi mme owo ẹsinyenede ke ntak emi nnyịn mîfọnke ima.

KE INI OYOMDE ẸDA N̄WED ABASI ẸNỌ OWO ITEM

⁷ Ke ini ke ini, esiyom mbiowo ẹnọ owo item man ẹn̄wam enye enen̄ede ekere n̄kpọ ọfọn. Isimemke ndinọ owo item ndusụk ini. Apostle Paul ọkọdọhọ mme Christian oro ẹkedude ke Galatia ete: “Nditọete, okposụkedi owo odụkde idiọk afan̄ mbemiso enye ọfiọkde aban̄a emi, mbufo emi ẹdotde ke n̄kan̄ eke spirit, ẹdomo ndinen̄ede utọ owo oro ke ifụre ifụre ido.”—Gal. 6:1.

⁸ Edieke mme esenyịn ẹtịmde ẹkpeme erọn̄ Abasi, n̄kpọ ndomokiet ididian̄akede mme erọn̄ emi ikpọn̄ Abasi, mmọ idinyụn̄ inyeneke ikpọ mfịna ke esop. Mbiowo ẹsidomo ndinam utom mmọ ọfọn ke esop, ndien emi esinam nnyịn iti se Jehovah ọkọdọhọde prọfet Isaiah. Jehovah ọkọdọhọ ete: “Mmọ [mbiowo] kiet kiet ẹyekabade ẹtie nte ebiet eke ẹdịbede ẹbọhọ ofụm ye ọtọ udak edịm, ẹtie nte ediwak idịm ke edisat isọn̄, ẹtie nte mfụt akwa itiat ke isọn̄ oro akpade mba.”—Isa. 32:2.

NDINỊM MBON EMI ẸSAN̄ADE ETỊME ETỊME IDIỌN̄Ọ

⁹ Apostle Paul ama ewet leta aban̄a mbon emi ẹkemede ndinam nditọete ke esop ẹtiene ẹnam se mîfọnke. Enye ekewet ete: “Nnyịn ke emi inọ mbufo uyo . . . ite ẹdian̄ade ẹkpọn̄ eyenete ekededi oro asan̄ade etịme etịme mînyụn̄ isan̄ake ke item oro ẹkebọde ẹto nnyịn.” Enye ama etịn̄ se ikọ esie ọwọrọde ete: “Edieke owo ekededi mîkopke uyo emi nnyịn inọde ke leta emi, ẹnịm owo emi idiọn̄ọ, ẹtre ndidụk ndụk ye enye, man bụt akpanam enye. Edi ẹkûbat enye nte asua, edi ẹka iso ẹnọ enye item nte eyenete.”—2 Thess. 3:6, 14, 15.

¹⁰ Ndusụk ini, eyenete emi mînamke akwa idiọkn̄kpọ emi akpanamde ẹsio enye ẹfep ke esop ekeme ndinam n̄kpọ emi mîkpanaha nnyịn mme Christian inam. Emi esịne owo ndinen̄ede mfu ifu, ndibari idem, nditak ke ndikụt idiọk ke se ededi emi owo anamde, m̀mê ‘ndisịn idem ke se mîbeheke enye.’ (2 Thess. 3:11) Onyụn̄ ekeme ndidi enye esiyom ndida n̄kari ndia okụk nditọete mîdịghe edi ke enye esima ndida se mîfọnke nnem idem esịt. Edu uwem esie ọdiọk tutu anam mme owo ẹtịn̄ ikọ ẹbiat esop Abasi, mîdịghe anam ndusụk nditọete ke esop ẹyom ndikpebe utọ idiọk uwem oro.

¹¹ Mbiowo ẹyedomo kan̄a ndin̄wam utọ owo oro ẹnyụn̄ ẹda Bible ẹnọ enye item. Edi edieke enye akade iso ndinam n̄kpọ oro Bible akpande kpa ye oro mbiowo ẹnọde enye item ediwak ini, mbiowo ẹkeme ndinọ utịn̄ikọ ndụri nditọete utọn̄ ẹte ẹkpeme idem ye utọ n̄kpọ oro. Ana mbiowo ẹnen̄ede ẹse m̀mê se owo anamde ọdiọk ekem onyụn̄ enen̄ede afịna mme owo man ẹfiọk m̀mê edi se ẹnọde utịn̄ikọ ẹdụri nditọete utọn̄. Etịn̄ikọ ọyọnọ nditọete item onyụn̄ odụri mmọ utọn̄ aban̄a idiọk edinam oro, edi enye idisiakke enyịn̄ owo emi anamde n̄kpọ oro. Mbon emi ẹdiọn̄ọde owo emi esinamde se ẹtịn̄de ẹban̄a ke utịn̄ikọ oro ẹyesụk ẹsan̄a ye enye ẹnam n̄kpọ Abasi man “ẹnọ enye item nte eyenete,” edi ididianke idem ye enye nte ẹdiande ye mbon eken ke esop.

¹² Imenịm ke edieke nditọete emi ẹsụk ẹdude eti uwem ẹtrede ndụk ye owo oro asan̄ade etịme etịme do, ke emi ayanam enye okop bụt aban̄a idiọk edinam esie onyụn̄ anam enye akabade esịt. Ke ini ẹkụtde ke owo oro okpụhọde, nditọete ẹyefiak ẹtọn̄ọ ndidian idem ye enye nte ẹkesidiande.

NTE IKPEBIEREDE AKAMBA MFỊNA EMI INYENEDE YE EYENETE NNYỊN

¹³ Nnyịn ndinyịme ndifen nnọ owo nnyụn̄ mfre mban̄a se iketịbede iwọrọke ke se enye akanamde ibiakke nnyịn m̀mê ke imama idiọk edinam oro. Idịghe kpukpru se owo anamde ke ididọhọ ke enye anam ke ntak emi enye mîfọnke ima; ifọnke edi imokụt owo anamde idiọkn̄kpọ nnyịn isio enyịn ifep inyụn̄ isuaha inọ enye. (Lev. 19:17; Ps. 141:5) Ibet emi ẹkenọde nditọ Israel ama owụt ke ndusụk idiọkn̄kpọ okpon akan ndusụk; se nnyịn mme Christian inyụn̄ inịmde edi oro.—1 John 5:16, 17.

¹⁴ Jesus ama etịn̄ se ẹkpenamde ke ini owo enyenede akamba mfịna ye eyenete esie. Mbọk fiak se se enye ọkọdọhọde nnyịn inam mi: “Edieke eyenete fo ẹduede fi, [1] ka kemen ndudue esie wụt enye, sụk fi ye enye ikpọn̄. Edieke enye okopde uyo fo, afo amada eyenete fo enyene. Edi edieke enye mîkopke, [2] da owo kiet m̀mê iba en̄wen san̄a, man ke inua ntiense iba m̀mê ita kpukpru ikọ ẹkpesọn̄ọ ẹda. Edieke enye mîkopke uyo mmọ, [3] tịn̄ nọ esop. Edieke enye mîkam ikopke uyo esop, yak enye etie fi nte owo mme idụt ye nte ọbọ a-tax.”—Matt. 18:15-17.

¹⁵ Uwụtn̄kpọ oro Jesus ọkọnọde ke Matthew 18:23-35 anam idiọn̄ọ ke etie nte enye eketịn̄ aban̄a mfịna okụk m̀mê inyene ke Matthew 18:15-17. Ekeme ndidi ikọ Jesus ekenen̄ede aban̄a owo emi mîmaha ndikpe isọn m̀mê owo emi adiade n̄wo. Onyụn̄ ekeme ndidi idiọkn̄kpọ emi Jesus eketịn̄de aban̄a akaban̄a ikọedem emi abiatde owo enyịn̄.

¹⁶ Edieke owo ke esop anamde fi utọ n̄kpọ oro, kûsọsọp ufehe uka ubịne mbiowo ukûdọhọ mmọ ẹdin̄wam fi. Nam mme n̄kpọ emi Jesus eketemede nnyịn, bem iso kan̄a ka keneme n̄kpọ emi ye owo oro. Domo ndibiere n̄kpọ oro sụk mbufo mbiba ikpọn̄, kûkot owo en̄wen usịn. N̄kọ emeti ke Jesus ikọdọhọke ite, ‘ka ini kiet kpọt kowụt enye ndudue esie.’ Ntem edieke owo oro mînyịmeke ndudue esie inyụn̄ idọhọ fi efen ọnọ imọ, ọkpọfọn afiak aka ebịne enye ini en̄wen. Edieke mbufo ẹkemede ndibiere n̄kpọ oro ke ini anamde emi, eyenem owo oro ndifiọk ke ukûsan̄ake utịn̄ se imọ ikanamde unọ mbon en̄wen m̀mê ndisan̄a mbiat imọ enyịn̄ ke esop. Afo ‘ayada eyenete fo enyene.’

¹⁷ Edieke owo emi ekeduede fi enyịmede ke ima idue, ekpede ubọk, onyụn̄ anamde n̄kpọ mbak utọ n̄kpọ oro idifiak itịbe, ufọn ididụhe afo ndikot owo en̄wen nsịn. Kpa ye oro se enye akanamde ọdiọkde, mbufo mbiba ẹmekeme ndisụk mbiere n̄kpọ oro sụk afo ye enye ikpọn̄.

¹⁸ Edieke mûkemeke ndida eyenete fo nnyene ke ini enemede se enye akanamde ye enye, “sụk fi ye enye ikpọn̄,” emekeme ndinam ọyọhọ n̄kpọ iba oro Jesus eketịn̄de, ‘ada owo kiet m̀mê iba en̄wen asan̄a’ aka man akafiak eneme n̄kpọ oro ye enye. Mbon emi afo adade asan̄a aka ẹkpetiene fi ẹka ndinam emem, idịghe ndikanam ikọ akam okpokpon akan nte ekedide. Ọkpọfọn ada mbon emi ẹdiọn̄ọde se owo oro akanamde aka. Edi edieke mbon oro ẹdiọn̄ọde se owo oro akanamde mîdụhe, emekeme ndidọhọ owo kiet m̀mê iba ẹtiene fi ẹdise nte edinemede n̄kpọ emi ye enye. Ekeme ndidi mmọ ẹdiọn̄ọ se ẹsinamde edieke utọ n̄kpọ oro etịbede, ẹnyụn̄ ẹkeme ndifiọk m̀mê se iketịbede oro enen̄ede ọdiọk ntre. Edieke asan̄ade ye ebiowo aka, mbọk diọn̄ọ ete ke idịghe esop ẹdọn̄ enye utom, sia idịghe otu mbiowo ẹkedọhọ enye edisan̄a ye afo aka.

¹⁹ Edieke mûkemeke ndibiere n̄kpọ oro ke ama okodomo ndinam emi ediwak ini, oro edi, ke ama eketịn̄ ikọ ye owo oro ikpọn̄ ke nsio nsio ini, onyụn̄ asan̄a ye owo kiet m̀mê iba ebịne enye, edi afo osụk ekere ke ukemeke ndisana n̄kpọ oro nyak ntre, emekeme ndien ndimen n̄kpọ oro n̄ketịn̄ nnọ mbiowo. Ti ke se idinen̄erede ibehe mbiowo edidi ndinam emem odu ke esop nnyụn̄ nnam esop asana. Ke ama eketịn̄ n̄kpọ emi ọnọ mbiowo, sana yak nọ mmọ nyụn̄ buọt idem ye Jehovah. Kûdedei uyak se owo en̄wen anamde anam fi atuak ukot ọduọ m̀mê akpan fi ndikop inem utom oro anamde ọnọ Jehovah.—Ps. 119:165.

²⁰ Mbiowo ẹyedụn̄ọde n̄kpọ oro ẹse. Edieke mmọ ẹkụtde ke owo oro ama anam fi akwa idiọkn̄kpọ, edi isụk imaha ndikabade esịt nnam se akpanade enye anam man emem odu, mbiowo ẹyemek kọmiti ẹte ẹkpe ikpe owo oro, ndien kọmiti oro ẹkeme ndisio owo oro mfep ke esop. Emi ayanam esop asana inyụn̄ iyakke owo abiat esop.—Matt. 18:17.

SE ẸKPENAMDE ẸBAN̄A IKPỌ IDIỌKN̄KPỌ

²¹ Ke ini owo anamde akwa idiọkn̄kpọ, idịghe owo oro n̄kpọ emi afịnade kpọt enyene ndifen enye. Akwa idiọkn̄kpọ emi esịne utọ idiọkn̄kpọ nte use, efịbe, erenowo ndidan̄ ye erenowo m̀mê n̄wan ndidan̄ ye n̄wan, mfiakedem, ukpono ndem, ye ikpọ idiọkn̄kpọ eken. (1 Cor. 6:9, 10; Gal. 5:19-21) Sia utọ idiọkn̄kpọ emi ẹkemede ndibiat mme owo ke esop, ẹkpenyene ndimen n̄ketịn̄ nnọ mbiowo man mbiowo ẹse ẹban̄a. (1 Cor. 5:6; Jas. 5:14, 15) Ndusụk owo ẹkeme ndika mbịne mbiowo n̄kayarade idiọkn̄kpọ mmọ mîdịghe ẹketịn̄ se mmọ ẹdiọn̄ọde ẹban̄a idiọkn̄kpọ emi owo en̄wen akanamde. (Lev. 5:1; Jas. 5:16) Inamke n̄kpọ m̀mê mbiowo ẹnam didie ẹkop ke eyenete emi ama akana baptism anam idiọkn̄kpọ, mmọ ẹyedọhọ mbiowo iba ẹdụn̄ọde ẹse m̀mê enye ama enen̄ede anam se mmọ ẹkopde oro. Edieke mmọ ẹkụtde n̄kpọ emi anamde ẹnịm ke owo oro ama anam idiọkn̄kpọ, otu mbiowo ẹyemek kọmiti ukpeikpe. Ke nsụhọde n̄kaha, mbiowo ita ẹdidu ke kọmiti oro.

²² Mbiowo ẹsinen̄ede ẹse ẹban̄a otuerọn̄ Abasi ẹnyụn̄ ẹkpeme mmọ mbak owo m̀mê n̄kpọ ekededi idinam mmọ ẹkpọn̄ Abasi. Mmọ ẹsida Ikọ Abasi ẹsua ẹnọ anamidiọk ẹnyụn̄ ẹnen̄ede enye man ẹn̄wam enye afiak edi ufan Abasi. (Jude 21-23) Se apostle Paul ọkọdọhọde Timothy ete anam edi emi ke ini enye ekewetde ete: “Ke iso Abasi ye ke iso Christ Jesus, emi edikpede ikpe mme odu-uwem ye mme akpan̄kpa, . . . sua nọ owo, nen̄ede mmọ, teme mmọ, da anyanime ye usọ unọ ukpep nam emi.” (2 Tim. 4:1, 2) Se ẹtịn̄de emi ekeme ndida mbiowo ini, edi kpukpru oro osụk esịne ke otu ọkpọsọn̄ utom emi anade mbiowo ẹnam. Emi esinam nditọete ke esop ẹma mbiowo ẹnyụn̄ ‘ẹnen̄ede ẹkpono’ mmọ.—1 Tim. 5:17.

²³ Ini ekededi emi ẹdiọn̄ọde ke owo ke esop Abasi anam idiọkn̄kpọ, mbiowo ẹsinen̄ede ẹyom ndin̄wam owo oro afiak etie ke emem ye Abasi. Edieke owo oro enen̄erede akabade esịt onyụn̄ enyịmede mbiowo ẹn̄wam enye, ndisua nnọ enye ke ndịbe m̀mê ke iso mbon oro ẹkedide ntiense ke ini ẹkekpede ikpe esie ayan̄wam enye, oyonyụn̄ anam mbon oro ẹdude do ẹkûdedei unam utọ n̄kpọ oro. (2 Sam. 12:13; 1 Tim. 5:20) Ini ekededi emi mbiowo ẹnọde owo nsuannọ, ẹyekpan enye ndinam ndusụk n̄kpọ ke esop. Emi ayan̄wam anamidiọk oro asiak “afan̄ eke enende” ọnọ ikpat esie. (Heb. 12:13) Nte ini akade, edieke ẹkụtde ke owo oro ọtọn̄ọ ndidu uwem ọfọn, ẹyeyak enye afiak ọtọn̄ọ ndinam ndusụk n̄kpọ oro ẹkekpande enye.

NTE ẸKPETỌTDE NSUANNỌ

²⁴ Edieke kọmiti ukpeikpe ẹkụtde ke owo akabade esịt, edi ẹkere ke etie nte mme owo ke esop m̀mê ke obio ẹyediọn̄ọ se enye akanamde nte ini akade, mîdịghe ke edi se nditọete eken ke esop ẹkpemede idem ye enye, ẹyenọ ibio ibio ntọt ke Mbono Esop Uwem ye Utom Nnyịn ẹban̄a emi. Se ẹditịn̄de edi: “Ẹnọ [enyịn̄ owo] nsuannọ.”

EDIEKE ANADE ẸSIO OWO ẸFEP KE ESOP

²⁵ Ke ndusụk idaha, anamidiọk ekeme ndisọn̄ esịt ntre ndinyịme ke se imọ inamde ọdiọk, inyụn̄ imaha mbiowo ẹn̄wam enye man aka iso anam n̄kpọ Abasi. Ekeme ndidi mbiowo ikwe nte enye anamde mme n̄kpọ emi ẹwụtde ke enye akabade esịt ke ini ẹkpede ikpe esie. (Utom 26:20) Nso ke ẹkpenam? Ke utọ idaha oro, ọyọfọn ẹsio anamidiọk oro mîmaha ndikabade esịt do ẹfep ke esop mbak ndisana ikọt Jehovah ẹdidụk ndụk ye enye. Ke ini ẹsiode idiọkowo oro ẹfep ke esop, emi idiyakke idiọkn̄kpọ esie asabade esop onyụn̄ abiat enyịn̄ esop. (Deut. 21:20, 21; 22:23, 24) Ke ini apostle Paul okokopde ke enyene owo kiet emi esịnede ke esop Corinth anam oburobụt ido, enye ama ọdọhọ mbiowo do ete “ẹsana utọ owo oro ẹyak ẹnọ Satan . . . , man ẹkpenyan̄a spirit” esop oro. (1 Cor. 5:5, 11-13) Paul ama etịn̄ n̄ko aban̄a mbon en̄wen emi ẹkesọn̄de ibuot ke eyo mme apostle, emi ẹkenyụn̄ ẹsiode ẹfep ke esop.—1 Tim. 1:20.

²⁶ Ke ini kọmiti ukpeikpe ẹbierede ke ana ẹsio anamidiọk emi mîkabakede esịt ẹfep ke esop, ana mmọ ẹtịn̄ se mmọ ẹbierede ẹnọ anamidiọk oro ẹnyụn̄ ẹda N̄wed Abasi ẹwụt enye se inamde mmọ ẹsio enye ẹfep ke esop. Ke kọmiti ukpeikpe ẹma ẹketịn̄ emi ẹnọ enye, mmọ ẹyedọhọ enye ke edieke enye ekerede ke owo ikpehe ikpe oro ọfọn, ndien enye oyom ndision̄o ikpe oro, ke ana enye ewet leta etịn̄ ntak emi enye oyomde ndision̄o ikpe oro. Kọmiti ukpeikpe ẹdinọ enye usen itiaba ndiwet leta usion̄o ikpe oro, ọtọn̄ọde ke usen emi mmọ ẹtịn̄de se mmọ ẹbierede ẹnọ enye. Ke ini ẹbọde leta usion̄o ikpe esie, otu mbiowo ẹyenam esenyịn circuit ọdiọn̄ọ ndien esenyịn circuit eyemek mbiowo oro ẹdotde ndidu ke kọmiti usion̄o ikpe man mmọ ẹfiak ẹkpe ikpe oro. Mbiowo oro ẹyenen̄ede ẹsịn ukeme ndikpe ikpe oro ke ufan̄ urua kiet ọtọn̄ọde ke usen emi ẹkebọde leta usion̄o ikpe oro. Edieke owo osion̄ode ikpe, owo iditọtke esop ke ẹsio enye ke esop. Edi owo idiyakke enye ọbọrọ mbụme, ọbọn̄ akam ke mme mbono esop m̀mê akama ifetutom ekededi tutu ẹkụre ikpe oro.

²⁷ Mbọm esinam esop Abasi ẹyak owo osion̄o ikpe, ndien oro esinọ enye ifet nditịn̄ n̄kpọ en̄wen emi enye enyenede nditịn̄. Ntem edieke anamidiọk okoide-koi esịn ndika ikpe oro enye okosion̄ode, ẹyetọt esop ke ẹsio enye ẹfep; edi ẹditọt esop ke ẹma ẹkedomo ofụri ukeme ndinam enye edi ikpe oro edi enye isụk idịghe.

²⁸ Edieke anamidiọk ọdọhọde ke imọ idision̄oke ikpe, kọmiti ukpeikpe ẹyenam an̄wan̄a enye ntak emi ọfọnde enye akabade esịt ẹnyụn̄ ẹtịn̄ se enye akpanamde man ẹkpefiak ẹda enye ke esop nte ini akade. Ẹnam emi ke ntak mbọm ye ke ntak emi ẹyomde ndin̄wam enye sia ẹkerede ke enye ayakabade esịt ke ini iso onyụn̄ odot se ẹfiakde ẹda ke esop Jehovah.—2 Cor. 2:6, 7.

NTE ẸKPETỌTDE KE ẸSIO OWO KE ESOP

²⁹ Edieke ẹsiode anamidiọk emi mîkabakede esịt ẹfep ke esop, ẹyenọ ibio ibio ntọt ẹban̄a emi. Se ẹditịn̄de edi: “[Enyịn̄ owo] idịghe aba Ntiense Jehovah.” Emi ayanam nditọete eken ke esop ẹtre ndidụk ndụk ye enye.—1 Cor. 5:11.

OWO EMI ỌKPỌN̄DE ESOP KE IDEMESIE

³⁰ Edieke owo emi anade baptism okoide-koi ọdọhọ ke imọ idịghe aba Ntiense Jehovah, emi ọwọrọ ke enye ọkpọn̄ esop ke idemesie. N̄kpọ en̄wen emi owụtde ke owo ọkpọn̄ esop ke idemesie edi enye ndinam se Christian mîkpanamke, utọ nte ndidụk n̄ka emi ẹsinamde se Bible akpande, emi Jehovah Abasi edibierede ikpe inọ.—Isa. 2:4; Edi. 19:17-21.

³¹ Apostle John ama ewet n̄kpọ aban̄a mbon oro ẹkekpọn̄de esop ke idemmọ ke eyo esie. Enye ọkọdọhọ ete: “Mmọ ẹketo ke otu nnyịn ẹwọn̄ọ, edi mmọ ikedịghe eke nnyịn; koro edieke mmọ ẹkpekedide eke nnyịn, mmọ ẹkpekedu ye nnyịn.”—1 John 2:19.

³² Ke ini owo okoide-koi ọkpọn̄ esop Abasi ke idemesie, Jehovah isehe enye nte esede Christian emi mîkemeke ndiwọrọ an̄wautom aba. Owo ekeme nditre ndiwọrọ an̄wautom sia enye mîkpepke aba Ikọ Abasi kpukpru ini. Mîdịghe, ekeme ndidi mfịna emi enye enyenede m̀mê ukọbọ anam enye okûsịn idem aba anam n̄kpọ Abasi nte enye ekesinamde. Mbiowo ye mbon eken ke esop ẹyeka iso ndin̄wam owo emi mîwọrọke an̄wautom aba man enye ekeme ndifiak nsịn ifịk nnam n̄kpọ Abasi.—Rome 15:1; 1 Thess. 5:14; Heb. 12:12.

³³ Edi ke ini Christian ebierede ndikpọn̄ esop ke idemesie, ẹyenọ esop ibio ibio ntọt. Se ẹditịn̄de edi: “[Enyịn̄ owo] idịghe aba Ntiense Jehovah.” Ẹdinam n̄kpọ ye owo emi ọkpọn̄de esop ke idemesie nte ẹsinyụn̄ ẹnamde ye owo emi ẹsiode ẹfep ke esop.

EDIFIAK NDA OWO

³⁴ Ẹkeme ndifiak nda owo emi ẹkesiode ẹfep ke esop m̀mê owo emi ọkọkpọn̄de esop ke idemesie edieke enye enen̄erede owụt ke imakabade esịt, edieke nte enye onyụn̄ odude uwem ke anyan ini emi ebede owụtde ke enye etre idiọk uwem emi enye ekesidude. Ana enye owụt n̄ko ke ọdọn̄ imọ ndifiak ndi ufan Jehovah. Mbiowo ẹyeyak ini emi ekemde ebe—ekeme ndidi ediwak ọfiọn̄, isua kiet, m̀mê akande oro, etiene nte n̄kpọ etiede—man owo oro owụt ke imenen̄ede ikabade esịt. Ke ini otu mbiowo ẹbọde leta emi owo ewetde ete ẹfiak ẹda imọ ke esop, mbon kọmiti emi ẹfiakde ẹda owo ẹyenyene nneme ye enye. Mbon kọmiti oro ẹyese m̀mê anamidiọk oro anam mme n̄kpọ emi owụtde ke enye akabade esịt, ẹnyụn̄ ẹbiere m̀mê akpana ẹfiak ẹda enye m̀mê ẹkpebebet kan̄a.—Utom 26:20.

³⁵ Edieke edide esop en̄wen ẹkesio owo emi ewetde leta ọdọhọ ẹfiak ẹda imọ, mbiowo esop emi owo oro odude idahaemi ẹyemek kọmiti emi ẹfiakde ẹda owo ẹsobo ye owo oro ẹnyụn̄ ẹneme leta esie. Edieke kọmiti emi ẹkerede ke edi se ẹfiakde ẹda owo oro, mmọ ẹyewet otu mbiowo esop emi ẹkesiode owo oro ẹfep ẹnyụn̄ ẹtịn̄ se mmọ ẹkerede. Kọmiti esop mbiba emi ẹyediana kiet ẹneme kpukpru se idude man ẹbiere m̀mê edi se ẹfiakde ẹda owo oro m̀mê ẹkpebebet kan̄a. Edi, kọmiti emi ẹfiakde ẹda owo eke esop emi ẹkesiode owo oro ẹfep, ẹdibiere m̀mê edi se ẹfiakde ẹda enye.

NDITỌT KE ẸFIAK ẸDA OWO

³⁶ Ke ini kọmiti emi ẹfiakde ẹda owo ẹkụtde ke owo emi ẹkesiode ẹfep m̀mê owo emi ọkọkpọn̄de esop ke idemesie enen̄ede akabade esịt, ndien ke edi se ẹfiakde ẹda enye ke esop, ẹyenọ ntọt ke esop oro ẹkesiode enye ẹfep. Edieke edide owo oro odu ke esop en̄wen idahaemi, ẹyenọ ntọt emi n̄ko ke esop oro. Se ẹditịn̄de edi: “Ẹfiak ẹda [enyịn̄ owo] nte Ntiense Jehovah.”

KE INI EYENỌWỌN̄ ORO ANADE BAPTISM ANAMDE IDIỌKN̄KPỌ

³⁷ Edieke eyenọwọn̄ emi anade baptism anamde akwa idiọkn̄kpọ, ana ẹtịn̄ se enye anamde ẹnọ mbiowo. Ke ini mbiowo ẹkpede ikpe akwa idiọkn̄kpọ emi eyenọwọn̄ anamde, esifọn ete ye eka eyen oro ẹtiene ẹdu ke ini ẹkpede ikpe oro. Ọyọfọn mmọ ẹdiana ye kọmiti ukpeikpe oro utu ke ndidomo ndidịp se eyen mmọ akanamde mbak mbiowo idinọ enye ntụnọ emi ẹkpenọde. Kpa nte ẹsinamde ye ikpọ owo oro ẹnamde idiọkn̄kpọ, kọmiti ukpeikpe ẹyedomo ndisua nnọ eyen oro anamde idiọkn̄kpọ do nnyụn̄ n̄n̄wam enye afiak edi ufan Abasi. Edi edieke eyen oro mîkabakede esịt, ẹyesio enye ẹfep ke esop.

KE INI ASUANETOP ORO MÎNAHA BAPTISM ANAMDE IDIỌKN̄KPỌ

³⁸ Nso ke ẹkpenam ke ini asuanetop oro mînaha baptism anamde akwa idiọkn̄kpọ? Sia enye mînaha kan̄a baptism, owo ikemeke ndisio enye mfep ke esop.Ekeme ndidi se Bible ekpepde itịmke in̄wan̄a enye, ndien ọfọn ẹnọ enye item man enye “[asiak] afan̄ eke enende” ọnọ ikpat esiemmọ.—Heb. 12:13.

³⁹ Edieke asuanetop oro mînaha baptism anamde idiọkn̄kpọ mînyụn̄ ikabakede esịt ke mbiowo iba ẹma ẹkesobo ye enye ẹnyụn̄ ẹdomo ndin̄wam enye, ẹyenọ ibio ibio ntọt ke esop ẹban̄a emi. Se ẹditịn̄de edi: “[Enyịn̄ owo] idịghe aba asuanetop oro mînaha baptism.” Nditọete ke esop ẹdinyụn̄ ida enye nte owo ererimbot. Kpa ye oro owo mîsioho enye ifep ke esop, nditọete ẹyekpeme nte ẹdiande idem ye enye. (1 Cor. 15:33) Owo idibọhọ enye ibatutom an̄wautom aba.

⁴⁰ Nte ini akade, asuanetop oro mînaha baptism emi mbiowo ẹketọtde ke idịghe aba asuanetop ekeme ndiyom ndifiak ndi asuanetop. Edieke edide ntre, mbiowo iba ẹyesobo ye enye man ẹse m̀mê enye afiak ọtọn̄ọ ndidu eti uwem. Edieke enye odotde nte ini akade ndifiak n̄wọrọ an̄wautom, ẹyenọ ibio ibio ntọt ẹban̄a emi. Se ẹditịn̄de edi: “[Enyịn̄ owo] afiak edi asuanetop oro mînaha baptism.”

JEHOVAH ỌDIỌN̄ MBON ORO ẸDUDE EDISANA UWEM ẸNYỤN̄ ẸMADE EMEM

⁴¹ Kpukpru nti n̄kpọ emi inyenede ke esop Abasi mfịn anam nnyịn emi idide ikọt Abasi inen̄ede ikop inemesịt. Jehovah ekpep nnyịn ata ediwak n̄kpọ ke Bible, ndien se enye ekpepde nnyịn etie nte mmọn̄ ye edinem udia oro anamde idem eye owo. Jehovah ada esop esie ye Ọbọn̄ nnyịn Jesus emi edide Ibuot esop ekpeme nnyịn n̄ko. (Ps. 23; Isa. 32:1, 2) Imokop inemesịt inyụn̄ idu ke ifụre sia idude ke esop Abasi emi etiede nte paradise ke ndiọkeyo oro ọsọn̄de ndiyọ mi.

⁴² Edieke idude ke emem ye nditọete nnyịn inyụn̄ inamde esop Abasi aka iso asana, mme owo ẹyekụt ke nnyịn idi ikọt Abasi. (Matt. 5:16; Jas. 3:18) Ke un̄wam Abasi, iyokụt nte ata ediwak owo emi ẹnyịmede ndikpep n̄kpọ mban̄a Jehovah ẹdide ẹditiene nnyịn ẹnam n̄kpọ esie.