Ntọt M’ọkwọrọ Obio Ubọn̄
Ke “Ẹnyene Ifiopesịt ke Spirit” ke Mexico
“ETIE nte ofụri idụt emi enyene ifiopesịt onyụn̄ ọkọri ke utom.” Ntre ke n̄kọk itieutom Watch Tower Society ke Mexico ewet, ndien ikọ oro edi akpanikọ didie ntem! Ẹkụt enyene-n̄kọri utom ke idụt oro sia edide tutu ke August, n̄wakn̄kan ibat eke ọfiọn̄ ke ọfiọn̄ ọyọhọ 70 ke adiana-ke-adiana ama odu, ọkọride okosịm mme asuanetop 277,436. Adianade do, ẹma ẹtọt ukpepn̄kpọ Bible awakde ebe 400,000, ndien ibat mbon oro ẹkedụkde Editi isua oko ama osịm 1,046,291. Nso eti itiat idakisọn̄ idu ntem inọ n̄kọri ini iso!
Akpan n̄kpọ kiet ke 1989 ekedi ukpụhọde ke idaha Mme Ntiense Jehovah ke Mexico. Nte utịp, ẹma ẹkeme ndikama Bible ke utom ukwọrọikọ eke ufọk-ke-ufọk nte akpa ini, ẹnyụn̄ ẹkeme ndiberede mme mbonoesop ye akam. Emi ama enyene usọp usọp odudu. Ke ọfiọn̄ iba, ibat mme asuanetop ama ọdọk ebe 17,000.
Ẹkụt idatesịt oro nditọete ẹnyenede ke n̄kọri emi ke se mmọ ẹtịn̄de. Owo kiet ekewet ete: “Ke ini ẹkekotde leta oro ke esop, ẹma ẹsịbe enye ikaba ke ntak ufiop ufiop ukwakubọk. Enye ekedi n̄kpọ nduaidem!” Owo efen ọkọdọhọ ete: “Nnyịn ikekemeke ndimụm mmọn̄eyet idara n̄kama. Utịp amayarade owụt idem ke edibak n̄ka n̄kpọ ke ini. Kpukpru owo ẹyom ndidu man ẹbuana ke akam ediberede.”
Ntiense efen ọkọdọhọ ete, “Ke efakutom nnyịn, n̄wan kiet oro ọsọn̄de idem ke ndutịm ukpepn̄kpọ Ufọkederi Catholic ọkọdọhọ ete: ‘Edieke mbemiso ekedide sụk utịn̄ikọ ye magazine mmọ, [Mme Ntiense] ẹkịbi nnyịn inua, idahaemi mi mmọ ẹkụbọrede Bible ke enyịnusụn̄, nnyịn imatak!’”
Mme Ntiense Jehovah ke Mexico n̄ko ẹsọn̄ọ ẹnọ ikọ ntiense ido nneme ye Bible. Eyenete an̄wan kiet ama osobo n̄wan kiet oro okobụpde mbụme aban̄a se enye ekerede aban̄a usion̄o idịbi. Ntiense oro ọkọbọrọ ete: “Se ami n̄kerede iwụtke akpan n̄kpọ nte se Bible etịn̄de.” Ke ama okokot ediwak itien̄wed Abasi, eyenete an̄wan oro ama ọkọk ibuot ye enye ete: “Ye Andibot, uwem edi ata akpan n̄kpọ, idem uwem mbon oro mîmanake kan̄a.”
N̄wan oro ndien ama etịn̄ ete ke imọ isan̄a ye idịbi akpa eyen imọ, edi ke use-idem ufọkibọk ọnọ ekikere ete ke nsekeyen oro eyebiomo ndo. Dọkta esie okoyom enye osion̄o eyen oro, ndien ebe esie ama onyịme, edi n̄wan emi ke idemesie ikonịmke ke akpanikọ. Asuanetop oro ama afiak ọkọk ibuot ye enye ke Bible, ọnọ enyịn̄ esie, ndien ekem mmọ ẹma ẹdian̄ade.
Isua ition ke ukperedem ke mbono district, n̄wan ye ebe ye eyen isua-inan̄ ẹma ẹyom ndikụt eyenete an̄wan emi ye ebe esie. Ekedi kpasụk n̄wan oro. Nso ikotịbe? Ke ama okokụre nneme esie ye Ntiense oro, n̄wan emi ama ebiere ndiman eyen esie. Dọkta esie ama esịn ndifiak nse enye enyịn, ndien ebe esie ama akam ọdọhọ ke iyekpọn̄ enye edieke nsekeyen oro edimanade ye ndo. Ke ini ekekemde enye ndiman eyen, enye ama aka okoyom un̄wam akpa dọkta oro enye edikemede ndikụt.
Ndondo oro eyen oro amanade, dọkta oro ama ọdọhọ ete: “Amanam, eka! Afo emenyene ediye ekpri eyenan̄wan.” Sia mîkonịmke se enye okokopde, n̄wan emi ama ọdọhọ eren oro otịm ese nsekeyen oro idem. Ekem enye ama ọnọ eren oro mbụk aban̄a idemesie. N̄kukụre se dọkta oro ọkọdọhọde ekedi: “Emi edi utịben̄kpọ.” N̄wan oro ama okop idatesịt kemi imọ ikenyenede uko ndikpono ekikere Jehovah ke nte uwem edide edisana n̄kpọ, ndien enye ama ada enyịn̄ eyenete an̄wan oro osio ediye, okop nsọn̄idem nsekeyen emi. Ndondo oro enye okokopde nsọn̄idem ekem, enye ama oyom Mme Ntiense onyụn̄ ọtọn̄ọ ndikpep Bible ye mmọ. Ke se isụhọrede ikan isua kiet, enye ye ebe esie ẹma ẹna baptism.
Apostle Paul akakpak ete: “Ẹnyene ifiopesịt ke spirit; ẹnam utom ẹnọ Ọbọn̄ [Jehovah].” (Rome 12:11) Mme Ntiense Jehovah ke Mexico ukem nte mme Christian akpanikọ ke kpukpru ebiet, ẹnam n̄kpọ ẹban̄a item emi ke ofụri esịt mmọ. Oro edi ntak ofụri idụt oro enyenede ifiopesịt onyụn̄ ọkọri ke utom eke spirit. Jehovah ọdiọn̄ mme anam-akpanikọ ikọt esie uwak uwak didie ntem!