Akpatre “N̄wed Mme Ekọn̄ Jehovah” Oro Edide
“Mmodo ẹdọhọde ke n̄wed mme ekọn̄ Jehovah.”—NUMBERS 21.14.
1, 2. Ke ewe n̄kpọntịbe eset ke Jehovah okowụt nditọ Egypt ete ke imọ idi Abasi an̄wanaekọn̄, ndien didie ke enye akanam emi?
MME owo mfịn ifiọkke ite ke Abasi a-Bible, Jehovah, edi an̄wanaekọn̄, kpa owo uko ke ekọn̄. Ẹma ẹnam akpanikọ emi ẹwụt ke ini enye aka nyan̄ade ikọt esie eke ini eset osio ke ufịk ke Egypt. Asua mmọ oro enyịn mîkwe, Satan kpa Devil, ama onụk Pharoah ndidomo ndinam mmọ ẹnam utom ẹkpan̄a. Idahaemi, ke edide edifiọk se ikatakde enye ke ndiyak nditọ Israel ẹnyọn̄ọ ke ifụre, Pharoah ye udịmekọn̄ esie ẹma ẹbịne mmọ.
2 Pharaoh, nte ededi, ikọfiọkke nte ke Abasi nditọ Israel akpakabade edi Abasi an̄wanaekọn̄ man anyan̄a ikọt Esie. Nte udịmekọn̄ nditọ Egypt oro ẹkesanade ke edisat isọn̄ Ididuot Inyan̄ ẹka en̄wan, Abasi nditọ Israel ẹmi ẹkedude ke afanikọn̄ ama anam n̄kpọ ke ndinam mmọn̄ ọtọ emen mme andiwat chariot ye enan̄-mbakara, ayakde mmọn̄ oro okobohode ọtọ ofụk usụn̄ ubọhọ oro ẹkebererede ke utịbe utịbe usụn̄ ẹnọ nditọ Israel.—Exodus 14:14, 24-28.
3. Ke ikwọ edikan mmọ, nditọ Israel ẹkeda Jehovah nte nso orụk Abasi, edi ewe akpanikọ ke mme idụt mfịn ẹfụmi?
3 Ke ẹbọhọde ẹda ke mben akpa n̄kan̄ edem usiahautịn Ididuot Inyan̄, mme okop idatesịt nditọ Israel ẹma ẹkwọ ikwọ edikan, ẹtorode Andinyan̄a mmọ eke heaven ete: “Nyekwọ nnọ Jehovah, koro enye okon̄de; enye ekemen horse ye andidoro-horse, ọduọk ke inyan̄. Jehovah edi odudu mi ye ikwọ, omonyụn̄ edi edinyan̄a mi: enye edi Abasi mi, ndien nyekpono enye; Abasi ete mi, ndien nyetoro enye. Jehovah edi owoekọn̄, Jehovah edi enyịn̄ esie. Enye ekemen mme chariot Pharoah ye mme udịm esie ọduọk ke inyan̄: akpan mbonekọn̄ esie ẹnyụn̄ ẹden̄ ke Ididuot Inyan̄.” (Exodus 15:1-4) Do ke Ididuot Inyan̄, Jehovah ama owụt idemesie nte an̄wanaekọn̄ oro ekemede ndinam ikpọ n̄kpọ. Mme idụt ererimbot ẹmefụmi akpanikọ emi.
4, 5. Mme okop idatesịt esien Israel 12 oro ẹkewọrọ ẹto ewe ete-ekpụk, ndien ufan anie ke enye akakabade edi ke ntak nso edu?
4 Prọfet Moses, oro akadade usụn̄ ke edikwọ ikwọ eke odudu spirit oro, ama etịn̄ aban̄a Jehovah nte “Abasi ete mi.” Abraham kpa owo Hebrew ekedi n̄wọrọnda eteete idụt Israel. Esien Israel 12 ẹwọrọ ẹto enye, ebe ke Isaac ye Jacob ye nditọiren Jacob 12. Abraham ke idemesie ekedi andituak ibuot nnọ Jehovah oro odotde ẹkpebe. Enye ekedi eren oro enyenede ata ọkpọsọn̄ mbuọtidem, anam ke ini Jehovah ọkọdọhọde enye ọwọrọ ọkpọn̄ ebietidụn̄ esie ke Ur mme Chaldea, enye ikemen̄eke ndiwọrọ n̄ka isọn̄ oro Jehovah ediwụtde enye, enyenede mbuọtidem nte ke Jehovah eyesu un̄wọn̄ọ Esie ndinọ imọ ye nditọ imọ isọn̄ oro.
5 Ke ntak akwa mbuọtidem Abraham, Jehovah ama ọn̄wọn̄ọ ndinọ Abraham “ubon” [“mfri,” NW] m̀mê eyen, emi edibede ke enye kpukpru ubon ke isọn̄, esịnede mme ubon mfịn, ẹkụt mfọn. (Genesis 12: 2, 3; 22:17, 18) Ẹma ẹda Abraham ẹdisịn ke utọ n̄kpet n̄kpet ebuana ntre ye Abasi esie tutu ẹkedidiọn̄ọ enye nte “ufan Abasi,” Abasi ke idemesie okotde anam-akpanikọ ete-ekpụk oro “ufan mi.”—James 2:23; Isaiah 41:8.
6. Okposụkedi ekedide emem emem owo emi okoyode ke Isọn̄ Un̄wọn̄ọ, didie ke Abraham okowụt idemesie nte an̄wanaekọn̄ oro ọbuọtde idem ke Jehovah?
6 Okposụkedi akasan̄ade nte esenowo ke Isọn̄ Un̄wọn̄ọ, Abraham ama owụt nte ke imọ imekeme ndinam n̄kpọ nte an̄wanaekọn̄. Ke ini kiet, ndidem inan̄ ẹtode nsannsan ebiet ẹma ẹda ekọn̄ ẹdụk Isọn̄ Un̄wọn̄ọ ẹnyụn̄ ẹmụm eyen eyeneka Abraham, Lot ye ubon Lot ẹnyọn̄ọ. Abraham, ke ntak ọkpọsọn̄ mbọbọ ubon, ama otịm nditọufọk esie, irenowo 318 idem, ndien ke adianade ye un̄wam otode mme ufan esie ita, Aner, Eshcol, ye Mamre, enye ama ebịne mbon mbụme ẹmi. Ke ẹmende mmọ ke ndueidem ke okoneyo, Abraham ye otu esie ẹma ẹkan mbonekọn̄ oro, idem okposụkedi mmọ ẹkedide ata ọkpọsọn̄ udịmekọn̄. Ẹma ‘ẹwot ndidem.’ (Mme Hebrew 7:1; Genesis 14:13-17) Abraham ama anyan̄a Lot ye ubon esie onyụn̄ afiak ọbọ kpukpru se ẹkeyịpde.
7-9. (a) Ewe oku ke Abraham akaka ebịne, ndien nso edidiọn̄ ke enye ọkọbọ? (b) Didie ke Abraham okowụt ke imọ iyom Abasi Ibom ofori imọ? (c) Nte Melchizedek ọkọsọn̄ọde, anie ọkọnọ Abraham edikan ke ekọn̄?
7 Abraham ama ọdiọn̄ọ ke imọ ikụt unen ke ndifiak mbọ n̄kpọ mbụme ekọn̄ ẹmi n̄kukụre ye un̄wam Jehovah Abasi, ndien ke anamde isan̄ edikan esie ọnyọn̄ ufọk, enye ama ekeme ndinam akpanikọ oro ọwọrọ ada an̄wan̄wa. Enye ama ọdiọn̄ọ ete ke iyekụt oku Abasi imọ oro ẹnyịmede ke obio Salem. Ntre enye ama anam isan̄ aka obio oro. Utịt utịt ikpehe Genesis ibuot 14 asian nnyịn se ikadade itie do ete:
8 “Ndien Melchizedek edidem Salem osio uyo ye wine edi: enye onyụn̄ edi oku Abasi Ibom. Ndien enye ọdiọn̄ enye, ete, Abasi Ibom, andinyene enyọn̄ ye isọn̄, osụk ọdiọn̄ Abram: ẹnyụn̄ ẹtoro Abasi Ibom, emi adade mme asua fo, esịn fi ke ubọk. Ndien enye osio ubak kpukpru n̄kpọ kiet kiet ke itie duop ọnọ enye. Ndien edidem Sodom ọdọhọ Abram, ete, Nọ mi owo-owo, ndien bọ inyene ke idemfo. Ndien Abram ọdọhọ edidem Sodom, ete, Mma mmen ubọk nnọ Jehovah, Abasi Ibom, andinyene enyọn̄ ye isọn̄, nte ke mbọhọ baba ndidi ye idem urụk ikpaukot ke kpukpru se inyenede fi, mbak afo edidọhọ ete, Edi ami mfori Abram: ke mîbọhọke se n̄kparawa ẹkediade, ye udeme mbọn̄ ẹmi ẹsan̄ade ye ami, Aner, ye Eshcol, ye Mamre: yak mmọ ẹbọ udeme mmọ.”—Genesis 14:18-24.
9 Nte ufan̄ikọ ẹmi ẹwụtde, Melchizedek, edidem oku obio Salem, ama ọsọn̄ọ edinịm oro Abraham okonịmde ke akpanikọ nte ke Abasi Ibom akan̄wana ekọn̄ ọnọ enye ye udịmekọn̄ esie onyụn̄ ọnọ enye edikan. Edidem-Oku Melchizedek ikosioho ubọk Jehovah ke n̄kpọ oro ifep.
N̄wed Mme Ekọn̄ Jehovah
10. Ewe ekọn̄ ke ẹbemiso ẹsiak ke Bible, ndien ntak emi enye ekedide sụk ntọn̄ọ ke mme edikan oro Jehovah akande ke ekọn̄?
10 Mbụk oro ke Genesis 14 oro aban̄ade edida ekọn̄ ndụk Isọn̄ Un̄wọn̄ọ ye Abraham ndikan mbonekọn̄ oro edi akpa ekọn̄ oro ẹsiakde ke Edisana N̄wed Abasi. Ntre, ke se iwakde ibe isua ikie inan̄ mbemiso edikan oro enye akakande ke Ididuot Inyan̄, Jehovah ama owụt idemesie nte an̄wanaekọn̄, kpa “owoekọn̄.” Edi, oro ekedi ntọn̄ọ kpọt. Ata ikpọ ye mme ọwọrọetop edikan ẹyetiene, esịnede akpatre edikan ke “akpatre ini eyo emi.”—Matthew 24:3.
11. Nso idi “n̄wed mme ekọn̄ Jehovah,” edi ke ebiet en̄wen ewe ke akpakịp mbụk edikan ke ekọn̄ esie odu?
11 Nte ekemde ye se ẹtịn̄de ke Numbers 21:14, ẹma ẹwet “n̄wed mme ekọn̄ Jehovah.” N̄wetnnịm n̄kpọ emi, m̀mê mbụk oro ẹkemede ndibuọt idem ke esịt emi aban̄ade mme ekọn̄ oro Abasi akan̄wanade ke ibuot ikọt esie, iso-ọfọn ekenyene ntọn̄ọ esie ye ekọn̄ emi ẹken̄wanade ke ibuot anam-akpanikọ Abraham. Moses ama ọdiọn̄ọ aban̄a n̄wed emi edi inọhọ nnyịn n̄kaiso mbụk ke nde ke nde iban̄a enye. Ntem, owo isianke nnyịn kpukpru usụn̄ oro Jehovah okowụtde idemesie nte idide an̄wanaekọn̄ ke ikpehe ini oro n̄wed Mme Ekọn̄ Jehovah enemede aban̄a. Nte ededi, ọtọn̄ọde ke ini oro ẹketịn̄de ẹban̄a n̄wed oro, ẹma ẹwet akamba ubak Edisana Bible, ndien emi ọnọ nnyịn ekese mbụk aban̄ade mme edikan Jehovah ke ekọn̄.
Akamba Melchizedek—An̄wanaekọn̄
12. Melchizedek ada aban̄a ewe akamba Anamutom Abasi Ibom, ndien ewe psalm oro David ekewetde ke ẹtịn̄ ẹban̄a owo emi nte oku ye an̄wanaekọn̄?
12 Ke Abraham ama akakan Chedorlaomer ye nsan̄a ndidem esie, Melchizedek ama ọdiọn̄ enye. Edidem-Oku Melchizedek ke ntịn̄nịm prọfesi akada aban̄a Owo oro edide Akwa Oku Abasi Ibom emi n̄ko onyụn̄ edide akwa an̄wanaekọn̄ oro Akakan Abasi ọnọde ibetedem. Psalm 110, emi David kpa edidem-an̄wanaekọn̄ ekewetde ke idak odudu spirit, etịn̄ aban̄a Owo emi okponde akan Melchizedek eke Salem ke ini enye ọdọhọde ete: “Jehovah eyetie ke Zion ọnọ esan̄ odudu fo ẹsọk fi: da ubọn̄ ke otu mme asua fo. Jehovah ọmọn̄wọn̄ọ, idinyụn̄ ituaha n̄kpọfiọk, afo edi nsinsi oku, nte utọ Melchizedek asan̄ade. Ọbọn̄ emi odude fi ke ubọk nnasia, asuan ndidem ke usen iyatesịt esie.”—Psalm 110:2, 4, 5.
13. Ke Mme Hebrew ibuot 7 ye 8, ẹnam ẹdiọn̄ọ Owo emi okponde akan Melchizedek eset nte anie, ndien ewe ubọn̄ ubọn̄ ebiet ke Owo emi ekebe odụk ndien ye nso orụk uwa?
13 Andiwet n̄wed Mme Hebrew ke ndausụn̄ odudu spirit anam ẹdiọn̄ọ Owo emi ẹkenen̄erede ẹtịn̄ ikọ ẹmi ẹban̄a ke ini enye ọkọdọhọ ete: “Jesus ama ebe odụk ke esịt nte Ebeiso ọnọ nnyịn, ke Enye ama akabade edi Akwa Oku ke nsinsi, nte utọ Melchizedek asan̄ade.” (Mme Hebrew 6:20) Ke ibuotn̄wed Mme Hebrew oro ẹtienede, ẹnam akwa idaha Melchizedek eset an̄wan̄a. Edi Owo emi enye akadade aban̄a, kpa Jesus Christ oro ẹkenamde ẹset ẹnyụn̄ ẹnọde ubọn̄, oro ẹkebede odụk edisana itie oro Jehovah Abasi ke idemesie odude ye ufọn uwa oro otịmde okpon akan n̄kpọ ekededi oro akanam Edidem-Oku Melchizedek eke Salem akawade, nte ededi, okpon akan akwa idaha Melchizedek nte oku.—Mme Hebrew 7:1-8:2.
14. Nte Akamba Melchizedek ama ọnọ mme ọkwọrọ ederi Christendom odudu ndibuana ke mme mbubehe ekọn̄ eke mme idụt oro ẹkotde idem Christian?
14 Edidem oku Melchizedek ama ọdiọn̄ an̄wanaekọn̄ oro, kpa Abraham oro akakande. Edi nso kaban̄a Akamba Melchizedek, kpa Anditọn̄ọ ata Idọ Ukpono Christ? Mme ọkwọrọ ederi Christendom ẹdọhọ ke mmimọ ida iban̄a Jesus Christ ke ndidiọn̄ udịmekọn̄ mme idụt oro ẹkotde idem Christian nnyụn̄ mbọn̄ akam nnọ mmọ. Edi nte Akwa Oku Jehovah ke heaven ada ye mme ọkwọrọ ederi Christendom ke edinam emi? Nte enye ke emi omonyịme nduduọhọ ke kpukpru uduọkiyịp oro akade iso ke ini emi ẹkotde Eyo Christian, esịnede iyịp oro ẹkeduọkde ke mme Ekọn̄ Ererimbot I ye II? Inyịmeke ke baba usụn̄ kiet! Idụhe ndomo ini kiet oro enye ọkọnọde mme ata mbet esie odudu ndinam idemmọ ubak ererimbot emi nnyụn̄ ndiana ke ekọn̄ uduọkiyịp esie.
Abasi An̄wanaekọn̄ Anam Eti Enyịn̄ Ọnọ Idemesie
15, 16. Nso ke Jehovah akanam ọnọ idemesie ke mi enye akan̄wanade ekọn̄ ọnọ ikọt esie ndinyan̄a mmọ nsio ke Egypt?
15 Nehemiah 9:10 etịn̄ otụk edinyan̄a oro Jehovah akanyan̄ade esien Israel 12 osio ke Egypt, ọdọhọde ete: “Afo okonyụn̄ owụt idiọn̄ọ ye utịben̄kpọ ke idem Pharoah, ye ke idem kpukpru ikọt esie, ye ke eke kpukpru mbio obio esie: koro afo ọfiọkde ete ke mmọ ẹkeseri iseri ye mmọ [nditọ Israel]. Ntre ke afo akanam enyịn̄ ọnọ idemfo, kpa nte edide mfịn emi.”—Men Exodus 14:18 domo.
16 Prọfet Isaiah etịn̄ otụk n̄kokon̄ idaha enyịn̄ emi ke ini enye etịn̄de aban̄a Jehovah nte “[Enye]emi akadade nnasia Moses, ye ubọk ubọn̄ esiemọ, eteme mmọ usụn̄, asiak mmọn̄ ke iso mmọ, man anam nsinsi enyịn̄ ọnọ idemesie.” Ndien ke etịn̄de ikọ ọnọ Jehovah, enye ọdọhọ ete: “Ntem ke afo akada ikọt fo usụn̄, man anam enyịn̄ ubom ọnọ idemfo.” (Isaiah 63:12-14) Ke ekpede Jehovah ubọk ete ọtọn̄ọ ntak anam n̄kpọ ke ufọn ikọt esie, Daniel ama etịn̄ aban̄a enye nte “[afo] emi akadade ọkpọsọn̄ ubọk osio ikọt fo ke isọn̄ Egypt efep, okonyụn̄ ọwọrọde etop, kpa nte mfịn emi.”—Daniel 9:15; Jeremiah 32:20.
17. Anie ke Jehovah edisio ọdọn̄ man an̄wana ke enyịn̄ esie, ndien nso ke enye ke ntre ediwụt kpukpru idụt mfịn?
17 Ke edikem ini, Jehovah Abasi eyesio Jesus Christ, kpa Akamba Melchizedek ọdọn̄, nte akwa an̄wanaekọn̄. Ebede ke enye, Jehovah eyenam enyịn̄ oro okponde akan enyịn̄ ekededi ke ini edem nte ẹtịn̄de ẹban̄a ke n̄wed Mme Ekọn̄ Jehovah m̀mê ke N̄wed Abasi usem Hebrew eke Edisana Bible, ọnọ idemesie. Ke akpatre ibuotn̄wed ke udiana-akpatre n̄wed eke N̄wed Abasi eke usem Hebrew, ẹma ẹbemiso ẹtịn̄ ẹban̄a en̄wan ofụri ererimbot oro ẹdin̄wanade ye Jerusalem. Adan̄aoro, nte ekemde ye Zechariah 14:3, “Jehovah eyewọrọ aka akan̄wana ekọn̄ ye mme idụt oro, kpa nte ke usen oro enye an̄wanade, ke usen ekọn̄.” Ke usụn̄ emi Abasi a-Bible eyewụt kpukpru idụt eyomfịn ete ke imọ isụk idi Abasi an̄wanaekọn̄ oro imọ ikedide ke mme usen Israel eset.
18, 19. Ewe Jerusalem ke mme idụt edin̄wana ekọn̄ ye enye ke ofụri ukeme?
18 Emi edi idotenyịn oro anade ebet nnyịn ke iso. Edi ewe Jerusalem ke ẹdin̄wana ekọn̄ ye enye ke ofụri ukeme ntre? Prọfesi oro ikosuhe ke idem Jerusalem eke usen Zechariah. Udịmekọn̄ Rome ke 70 C.E. ama osobo obio oro. Nte ededi, ẹma ẹfiak ẹbọp Jerusalem, ndien mfịn Christendom ọkọrọ ye idụt Israel eke obụk ẹda enye ke edisana. Ke ekọn̄ usen-itiokiet eke 1967, Israel eke obụk ama ada ofụri Jerusalem eke isọn̄ oro ẹkefiakde ẹbọp enyene. Nte ededi, uyarade ndomokiet idụhe nte ke Jehovah Abasi ama enyene ubọk ke en̄wan ini oro. Edidem esie, Jesus Christ, oro ẹkedoride ke ebekpo ikarake ke Jerusalem eke isọn̄, enye inyụn̄ idịghe “obio akwa Edidem” aba, oro edi, obio Jehovah.—Matthew 5:35.
19 Baba, akpan ibuot obio ukara mme Jew emi abuanade ke Esop Edidiana M’idụt mi idịghe Jerusalem oro ẹsiakde ke prọfesi Zechariah. Utu ke oro, Zechariah etịn̄ otụk Jerusalem oro ikotde iban̄a ke n̄wed Mme Hebrew. Do, Paul etịn̄ ikọ ọnọ mme Christian oro ẹyetde aran onyụn̄ ọdọhọ ete: “Mbufo ẹkesan̄a ẹkpere Obot Zion, ye Obio Abasi uwem, kpa Jerusalem enyọn̄, ye ata ediwak angel.” (Mme Hebrew 12:22) Jerusalem enyọn̄ emi idịghe efen ikan Obio Ubọn̄ Messiah Abasi, oro ekpri otu mme Christian oro ẹyetde aran ẹmi ẹnyenede idotenyịn nte nsan̄a mme andikara ye Jesus Christ ke Obio Ubọn̄ oro adade ke ibuot esie ke isọn̄ mfịn. Mmọemi ẹyedi iso en̄wan oro ẹkebemde iso ẹtịn̄ ẹban̄a.
20. Ikọ ewe ke Edidem Hezekiah eketịn̄ ọnọ ikọt esie oro ẹkedịghede mmọ uwem man ọsọn̄ọ mmọ idem, ndien ikọ Edidem ewe oro okponde akan Hezekiah ke Mme Ntiense Jehovah mfịn ẹberi idemmọ?
20 Nte ededi, inaha mmọemi m̀mê akwa otuowo oro ẹdide mme Christian ẹmi ẹnyenede idotenyịn eke isọn̄ oro ẹwọrọde ẹto kpukpru idụt ẹdidiana ye mmọ ke edisana utuakibuot ẹkop ndịk ẹban̄a se en̄wan emi edidade idi. Ke ini enyene-ndịk udịmekọn̄ Sennacherib, edidem Assyria, akakade ndin̄wana ekọn̄ ye Jerusalem ke eyo ukara Edidem Hezekiah, ẹma ẹnọ nditọ Israel oro ẹkedude ke nnanenyịn ikọ ndọn̄esịt ẹban̄a n̄kpọ emi ke ini Edidem Hezekiah ọkọdọhọde mmọ ete: “Ubọk obụkidem odu ye enye; edi Jehovah Abasi nnyịn odu ye nnyịn ndinyan̄a nnyịn, ndinyụn̄ n̄n̄wana ekọn̄ nnyịn.” Utịp ekedi nte ke “mbio obio [ẹma] ẹberi idem ke ikọ Hezekiah edidem Judah.” (2 Chronicles 32:8) Mme Ntiense Jehovah mfịn, ke ini mbonekọn̄ eke editịm n̄kpọ emi ẹdịghede mmọ uwem, ẹkeme ndiberi idemmọ ke ukem ikọ ẹmi ẹtode edidem emi okponde akan Hezekiah, kpa Jesus Christ.
21. (a) Ntak emi ẹditide ikọ Jahaziel ke ini ẹdin̄wanade ekọn̄ ye Jerusalem enyọn̄? (b) Nso ididi utịp ekọn̄ oro ẹdin̄wanade do?
21 Ke ini oro, ẹyeti ọsọn̄ọ-mbuọtidem ikọ Jahaziel owo Levi oro: “Mbufo idikpaha ndin̄wana ekọn̄ emi. Eda itie mbufo, ẹdop ẹda ẹnyụn̄ ẹkụt edinyan̄a Jehovah ke ibuot mbufo. O Judah ye Jerusalem, ẹkûfehe ndịk ẹkûnyụn̄ ẹyomo nsia. N̄kpọn̄ ẹwọrọ ẹbịne mmọ, Jehovah eyenyụn̄ odu ye mbufo.” (2 Chronicles 20:17, NW) Ih, ke ofụri ini afanikọn̄ oro, Jehovah eyedu ye ikọt esie. Ubọhọ ye ukpeme mmọ ẹdikọn̄ọ ke enye ndin̄wana ekọn̄ nnọ mmọ. Ndien enye edin̄wana, ebe ke Edidem an̄wanaekọn̄ esie, kpa Jesus Christ! Utịp? Ẹyesobo esop Devil oro ẹkụtde ke enyịn ẹfep ofụri ofụri ke isọn̄.—Ediyarade 19:11-21.
22. (a) Nso ididi idara idara utịt n̄wed Mme Ekọn̄ Jehovah, ndien nso ke Jehovah ke ntre edinam ọnọ idemesie? (b) Nso ke edikan oro Jehovah akande edinụk mme andima enyịn̄ esie ndinam?
22 Abasi edinam eti enyịn̄ didie ntem ọnọ idemesie ke enyene-uten̄e edikan oro enye akande ke “ekọn̄ akwa usen Abasi, Andikara kpukpru n̄kpọ” emi ke Har-Magedon! (Ediyarade 16:14, 16) Ẹyedian, yak idọhọ, obufa ibuotn̄wed ke n̄wed Mme Ekọn̄ Jehovah oro. Enye edidi idara idara utịt, kpa ubọn̄ ubọn̄ akpatre kaban̄a editịm n̄kpọ emi. Ofụri n̄wed oro eyewụt ke Ata Ọkpọsọn̄ Abasi akananam ikpuhe ke baba ekọn̄ kiet. Mme andima enyịn̄ Jehovah ẹditoro enye didie ntem ke oro ebede! Edi akpanikọ, adan̄aoro ẹyenam akpatre ufan̄ikọ n̄wed Psalm emi osu ke akamba udomo: “Yak kpukpru n̄kpọ eke ẹduọkde ibifịk ẹtoro Jehovah. Mbufo ẹtoro Jehovah.”—Psalm 150:6.
Mme Mbụme Ndụn̄ọde
◻ Nso ke mme owo mfịn mîfiọkke iban̄a Abasi a-Bible, kpa Jehovah?
◻ Nso ekọn̄ ke Abraham akan̄wana, ndien anie ọkọnọ enye edikan?
◻ Nso idi “n̄wed mme ekọn̄ Jehovah”?
◻ Nso ididi akpatre “n̄wed mme ekọn̄ Jehovah,” ndien enye edisụn̄ọ ke nso?