Ọsọn̄urua N̄kpọ Nnyịn, kpa Ubọn̄ Ubọn̄ Utom Eyomfịn
“Nnyịn ikama ọsọn̄urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.”—2 CORINTH 4:7.
1. (a) Ewe ubọn̄ ubọn̄ ọsọn̄urua n̄kpọ ke nnyịn inyene, ndien ntak-a? (b) Didie ke Bible anam edinọ Ibet Moses an̄wan̄a?
UTOM edikwọrọ ‘eti mbụk obio ubọn̄ emi’ ke utịt editịm n̄kpọ emi ke akpanikọ edi ọsọn̄urua n̄kpọ, kpa inyene oro enyenede ufọn akan. Sia Jehovah edide ubọn̄ ubọn̄ Abasi, utom ẹnamde ẹnọ Abasi edi ubọn̄ ubọn̄ utom, ke ntre ọsọn̄urua n̄kpọ. (Matthew 24:14; 2 Corinth 3:18-4:1) Kaban̄a ubọn̄ ubọn̄ edinọ Ibet Moses, ẹwet ke Exodus 34:29, 30 ẹte: “Edikem, ke adan̄aemi Moses otode ke Obot Sinai osụhọde, ye itiatn̄wed ntiense mbiba ke ubọk Moses, ke ini enye otode ke obot osụhọde, Moses ifiọkke ite ke ikpa iso imọ esem, ke enemede nneme ye [Jehovah]. Ndien adan̄aemi Aaron ye kpukpru nditọ Israel ẹkụtde Moses, sese, ikpa iso esie esem: ndien mmọ ẹdịghe ndisan̄a n̄kpere enye.”
2. Nso ke utom Ibet Moses akada aban̄a, ndien ntak emi ekperedem utom edide ubọn̄ ubọn̄ akan-a?
2 Ufan̄ikọ 32 osịm 34 adian do ete: “Ekem, usụk usụk, kpukpru nditọ Israel ẹsan̄a ẹkpere: ndien enye eteme mmọ kpukpru se Jehovah ọkọdọhọde enye ke obot Sinai. Ndien adan̄aemi Moses etịn̄de ọnọ mmọ ama, enye ada ufụkiso ofụk iso esiemọ. Edi adan̄aemi Moses odụkde ke iso Jehovah ndidọhọ ye enye, enye ofụhọde ufụkiso efep, tutu enye ọwọrọ.” Utom Ibet Moses akada aban̄a utom obufa ediomi ebe ke Esịne-ufọt oro, Jesus Christ. Ntre, edieke akpa utom ekedide ubọn̄ ubọn̄, n̄wan̄waedinso ke ana eke ekperedem, kpa “ediomi spirit,” okpon akan enye ke ubọn̄! (2 Corinth 3:7-11) Enye edi ubọn̄ ubọn̄ akan sia enye edide ubọn̄ oro mîdibehe ifep, ndien mme anditiene Jesus Christ ẹbuana ke enye.—Rome 12:11.
3. (a) Nso idi akpanikọ kaban̄a utom Mme Ntiense Jehovah, edi ntak emi enye mîn̄wan̄ake ediwak owo-o? (b) Nso isọn̄ọ ite ke Moses ama odụk ke ubọn̄ ubọn̄ iso Jehovah?
3 Emi, ke ntre, ọwọrọ nte ke utom Mme Ntiense Jehovah edi ubọn̄ ubọn̄ utom. Emi, nte ededi, in̄wan̄ake ediwak owo oro nsunsu ido ukpono okịmde mmọ enyịn. Okposụkedi ediwak owo ẹnyenede Bible ẹnyụn̄ ẹkemede ndikot enye, mmọ inyeneke ‘enyịn ukụt n̄kpọ.’ (2 Peter 1:5-9) Man ẹfụhọde ufụkiso oro ẹfep ke enyịn mmọ, ana mmọ ẹwọn̄ọde ẹtiene Jehovah Abasi ke mbuọtidem, koro ke ini Moses okodụkde ke iso Jehovah, enye ama ofụhọde ufụkiso oro enye akadade odịp mme Jew iso esie. (2 Corinth 3:16) Nditọ Israel ẹma ẹkop ndịk ndikụt ubọn̄ Abasi ke iso esịne-ufọt mmọ ẹnyụn̄ ẹdọhọ yak enye ofụk iso esie ke enyịn mmimọ. Kpa nte se ẹkotde phosphorescent, oro ẹkenịmde ke un̄wana esinọde n̄kaiso uyama ke ekịm, kpasụk ntre ke Moses, esịne-ufọt mmọ okowụt ubọn̄ Jehovah, ọsọn̄ọ nte ke enye okodu ke iso Jehovah.
4. Didie ke mbon oro mînịmke ke akpanikọ mfịn ẹkpebe mme Jew eset, edi nso ke mme anditiene Akamba Moses mîfeheke ndịk iban̄a?
4 Moses akada aban̄a akwa Prọfet Abasi, Jesus Christ. Ukem nte akpa mbiet esie, Akamba Moses emi ikopke ndịk ndikụt ubọn̄ Jehovah nnennen nnennen. Tutu osịm usen mfịn, nte ededi, mbon oro mînịmke ke akpanikọ ẹmi Devil ye ido ukpono Babylon esie ẹkịmde mmọ enyịn, ẹkpebe mme Jew eset oro ẹnyụn̄ ẹsịn ndikụt, m̀mê ndifiọk ubọn̄ Akamba Moses, Jesus Christ. (2 Corinth 3:12-15) Edi, mme ata anditiene enye ikopke ndịk ndise uyama ubọn̄ Jehovah nte ayamade oto iso Jesus Christ. Sia ẹma ẹkenyan̄a ẹsio ke odudu Babylon, mmọ ẹnyene uko ke ndiwụt ubọn̄ Abasi. Paul ekewet ete, “Sia nnyịn inyenede orụk idotenyịn emi, itetịn̄ ikọ ye akwa uko.”—2 Corinth 3:12.
Mme Andiwụt Ubọn̄ Abasi
5. Didie ke nnyịn ikeme ndiwụt mbiet ubọn̄ Abasi inyụn̄ itie nte Moses ke enyọn̄ obot oro ke iso Jehovah?
5 Jesus Christ emen ufụkiso oro efep ke ndiyarade nnyụn̄ n̄kwọrọ Jehovah Abasi nnọ nnyịn. (John 1:14, 17, 18) Ntre ana nnyịn iyama, ndien ke ntre ubọn̄ Abasi ayama oto ke “gospel ubọn̄ Christ, emi edide mbiet Abasi,” emi anade nnyịn ikwọrọ. Uyama esie edi ‘ubọn̄ ubọn̄ ifiọk Abasi ke iso Christ.’ Ana nnyịn iwụt ubọn̄ emi ke nditịn̄ mban̄a ubọn̄ Jehovah ye ubọn̄ Obio Ubọn̄ esie ke ubọk Eyen esie. (2 Corinth 4:4-6) Ukem nte Moses ke enyọn̄ obot oro ke iso Jehovah, Mme Ntiense esie ke isọn̄ ifụkke esịt mmọ ibaha ubọn̄ Jehovah. Mmọ ẹdara ubọn̄ oro ayamade ke iso Eyen ye Edidem Jehovah, Jesus Christ. Ntre, ana mmọ ẹsion̄o un̄wana emi aban̄ade ubọn̄ Abasi mi ẹnọ mbon en̄wen.
6. Didie ke Paul etịn̄ aban̄a ubọn̄ ubọn̄ utom nnyịn ke 2 Corinth 3:18, ndien ke mme ewe usụn̄ ke nnyịn “ikpụhọde”?
6 Apostle Paul ama anam emi an̄wan̄a kpukpru ekemmọ ntiense ubọn̄ Jehovah ke ikọ ẹmi ete: “Edi kpukpru nnyịn imada iso mîkuihi, imụm ubọn̄ [Jehovah] ikama, nte ukụtiso omụmde n̄kpọ; ntre ke nnyịn ikpụhọde ibe ikabade inyene mbiet Esie, ikọrọ ubọn̄ ke ubọn̄, kpa nte [Jehovah] emi edide Spirit anamde.” (2 Corinth 3:18) Adan̄a nte nnyịn ibọde ubọn̄ un̄wana emi, ntre ke ana nnyịn inam enye ayama, ndien ke ntre nnyịn ikpụhọrede ikan. Ẹdiọn̄ ẹnyụn̄ ẹnam esịt akabade edi obufa, okposụkedi owo mîdikwe ukpụhọde ndomokiet ke ikpọkidem m̀mê ke iso. Edi un̄wana ubọn̄ ubọn̄ etop oro nnyịn ision̄ode anam ukpụhọde emi ke idem nnyịn. Ẹkpụhọde uwem nnyịn ndibiet eke Christ, nte nnyịn inọde idem nnyịn ndidu ke ifetutom edisuan ubọn̄ ubọn̄ un̄wana emi ntatara ntatara nnọ mbon en̄wen.—Mme Hebrew 13:15.
7. Ata ubọn̄ oto anie, ndien didie ke nnyịn ikeme ndiwụt utọ ubọn̄ oro?
7 Kpukpru utọ ukpụhọde oro oto spirit, m̀mê anamutom odudu Abasi. Mme ọkwọrọ ederi Christendom inọhọ uyama ubọn̄ Jehovah Abasi edi ẹn̄wana ndiwụt idem enyọn̄ enyọn̄ man mme owo ẹkụt. Ubọn̄ emi idịghe ubọn̄ nnyịn, inyụn̄ iyomke nnyịn ibana idem ke ikpọ n̄kisi, gold, ye nsem nsem n̄kpọ mbana ido ukpono. Ẹnyene ata ubọn̄ ẹto spirit Abasi ẹnyụn̄ ẹwụt enye ke ndinọ ubọn̄ ubọn̄ ikọ ntiense aban̄ade Jehovah emi edide Spirit.
Mme Akama Un̄wana oro Ẹnọde Kpukpru Ifet
8, 9. Nso nsịnudọn̄ ke Paul ọnọ nnyịn ke 2 Corinth 4:1, 2, ndien emi oyom nso ubiere ke n̄kan̄ nnyịn?
8 Ke 2 Corinth 4:1, 2, nnyịn ikot ite: “Mmọdo sia nnyịn inyenede utom emi ite inam, kpa nte Abasi akatuade nnyịn mbọm, esịt iduọhọ nnyịn: edi imakpan̄a nsa ye ndịbe ndịbe ido eke enyenede bụt, isan̄ake ke n̄kari, inyụn̄ idaha nsu ibuak ye ikọ Abasi; edi ke edisian se idide akpanikọ an̄wan̄wa, ke inam kpukpru owo ẹfiọk ke esịt mmọ, ẹte nnyịn inanam se inende ke iso Abasi.” Abasi ama atua nnyịn mbọm ke ndidọn̄ nnyịn utom emi. Emi edi item ndisịn udọn̄ nnọ nnyịn ndikaiso uko uko, ndien nnyịn iyenam emi! Sia ẹma ẹkefọn nnyịn mfọn ye un̄wana otode Ikọ Abasi, obiomo nnyịn ndinam enye ayama ọnọ mbon en̄wen.—Men Matthew 5:14-16 domo.
9 Mme owo ke abian̄a ye n̄kari ẹsidịp mme n̄kpọ oro mmọ ẹkopde bụt ẹban̄a, utọ nte udia inọ. Edi nnyịn inyeneke ntak ndikop bụt sia etop ye utom nnyịn mîdịghe utom abian̄a edi edide edinen ye akpanikọ. Ntre, nnyịn imekeme ndinam ofụri ofụri ubọn̄ un̄wana oro ayama. Nnyịn ikamake Ikọ Abasi ke abian̄a. Ndinam ntre ọkpọwọrọ ndikama enye ke ibụk nyom ọkpọ ọkpọ udori., ubọn̄, ufọn, ye odudu ererimbot nnyụn̄ mfehe mbọhọ ubiọn̄ọ ye ukọbọ ẹtode ererimbot. Mbon oro mîkopke ndịk ndidi mbịne Jehovah ye iso oro mîfụkke n̄kpọ nnyụn̄ n̄wụk enyịn nse ubọn̄ ubọn̄ un̄wana akpanikọ, idikopke ndịk n̄ko ndisak iso nse mbiomo mmọ. Mmọ ẹyeyak un̄wana oto mmọ asiaha ọwọrọ.
10. Ntak mîdịghe ndudue Mme Ntiense Jehovah edieke eti mbụk Obio Ubọn̄ odịbede ndusụk owo ke enyịn?
10 Edieke owo ekededi ayakde eti mbụk Obio Ubọn̄ odịbe enye ke enyịn, emi idịghe ndudue Mme Ntiense Jehovah edi edi ndudue mmọ. Owo idịpke-dịp eti mbụk Obio Ubọn̄. Ẹtịm ẹdiọn̄ọ utom ukwọrọikọ ofụri ererimbot eke Mme Ntiense Jehovah. Ntem, mmọ ukem nte apostle Paul ẹkeme ndidọhọ ẹte: “N̄kpọ emi ikotịbeke ke ndịbe.” Ke akpanikọ, nte enye ekewetde, ‘ẹma ẹkwọrọ eti mbụk emi ẹnọ kpukpru owo ke idak ikpaenyọn̄.’—Utom 26:26; Colossae 1:23.
11. Ntak emi ubọn̄ ubọn̄ eti mbụk odịbede ediwak owo?
11 Mbon oro eti mbụk Obio Ubọn̄ odịbede ẹdi mme andibiọn̄ọ, kpa mbon oro Devil okịmde enyịn. (Men Matthew 12:30 domo.) Ibọhọke mmọ ẹkịbe ẹbọhọ nsunsu ido ukpono ye afia Devil, mmọ ẹtie ẹbet nsobo. Ke idak odudu demon, mme utọ owo oro ẹda ufụkn̄kpọ ẹfụk enyịn mmọ, koro apostle Paul ke 2 Corinth 4:3-5 ọdọhọde ete: “Edi edieke Gospel nnyịn odịbede owo ndien, odịbe mmọemi ẹtatak; ẹmi abasi eyo emi akanamde ikike mmọ eke mînịmke ke akpanikọ okịm, mbak un̄wana Gospel ubọn̄ Christ, emi edide mbiet Abasi, edisem ọnọ mmọ. Koro idịghe idem nnyịn ke nnyịn ikwọrọ, edi Jesus Christ, ite, Enye edi Ọbọn̄, inyụn̄ ikwọrọ iban̄a idem nnyịn, ite, idi ifụn mbufo kaban̄a Jesus.”
12. Ke edide isio ye mbon oro enyịn esịt mmọ okịmde, didie ke ikọt Jehovah ẹnam n̄kpọ ẹban̄a ikọ oro ke 2 Corinth 4:6?
12 Mbon oro enyịn esịt mmọ okịmde iyomke ndinịm ke akpanikọ. Unana mmọ ndinịm ke akpanikọ eberede esịt mmọ onịm ọnọ mme demon ndidụk. (1 Timothy 4:1) Mmọ ikemeke ndikụt ubọn̄ Jehovah m̀mê uyama esie emi ayamade oto iso Jesus, Akamba Moses. Ikọt Jehovah ẹmụm ubọn̄ ubọn̄ un̄wana otode Bible ẹnyụn̄ ẹnam enye ayama osịm mbon en̄wen. Ntre kpukpru asan̄autom Abasi ẹdi mme akama un̄wana, ndien edi Abasi owụk ete un̄wana oro ayama. Ana un̄wana oro asiaha oto ikọt Abasi onyụn̄ ayama ọnọ mbon en̄wen oro ẹdude ke ekịm ye ke itiendịk nsobo. Emi edi kpa nte 2 Corinth 4:6 esịnde enye ete: “Sia edide Abasi, emi ọkọnọde uyo ete, Yak un̄wana ayama ke ekịm, akayama nnyịn ke esịt, man Enye an̄wan̄ade owo enyịn ndifiọk ubọn̄ Abasi ke iso Jesus Christ.” Ke ntak emi, Mme Ntiense Jehovah ẹnịm ewụhọ Abasi oro ẹnyụn̄ ẹyak un̄wana mmọ ayama ọnọ mbon en̄wen, man ẹnọ Abasi ubọn̄.
Ubọn̄ Ubọn̄ Ọsọn̄urua N̄kpọ ke Aban̄ Mbat
13. Ndiyak idara idara utom edidi mme akama-un̄wana nnọ mme edibotn̄kpọ ẹdide obụk osụn̄ọ ke nso?
13 Ke akwa ifetutom oro inua mîkemeke nditịn̄ mi, edi ata akpan n̄kpọ ete mme akama-un̄wana ẹwụt nte idotde ndikama un̄wana ke ndimụm nsọn̄ọnda mmọ n̄kama ke Abasi. Man anam utịbe utịbe utom emi, Abasi ikadaha ndisana angel, ẹmi ọdọn̄de mmọ ndinyụn̄ọ mme n̄kpọ ẹmi mfiọk, edi enye akayak idara idara utom emi ọnọ mme edibotn̄kpọ ẹdide obụk. (1 Peter 1:12) Enye akanam emi man ọnọ odudu esie ubọn̄ ke otu mmemmem owo. Nte 2 Corinth 4:7 ọdọhọde ete: “Edi nnyịn ikama ọsọn̄urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.”
14. (a) Nso idi “ọsọn̄urua n̄kpọ emi ke aban̄ mbat”? (b) Ntak Moses ye Jesus Christ ẹdide nti uwụtn̄kpọ ẹnọ nnyịn ke se iban̄ade ọsọn̄urua n̄kpọ?
14 Ẹkesiwak ndida aban̄ ke ini eset ndọn̄ mme n̄kpọuto. Nso idi ubọn̄ ubọn̄ ọsọn̄urua n̄kpọ oro Mme Ntiense Jehovah ẹkamade ke aban̄ mbat—kpa idemmọ, nte mmemmem edibotn̄kpọ ẹtode ntan isọn̄? Ọsọn̄urua n̄kpọ ẹmi idịghe sụk un̄wana oro ayamade ke esịt mmọ. Enye edi utom un̄wana oro, kpa utom emi anade ẹnam ke idem mmọ eke isọn̄. Utom emi edi edision̄o un̄wana oro Abasi anamde asiaha ke esịt mmọ. Utom emi edi eti n̄kpọuto adan̄a nte enye edide ọsọn̄urua ifetutom oro mîdịghe nsụhọ “ekpri otuerọn̄” oro ẹyetde aran ikpọn̄îkpọn̄ ẹnam enye mfịn edi n̄ko “akwa otuowo” eke “mme erọn̄ en̄wen” eke Eti Ekpemerọn̄, Jesus Christ, ẹbuanade. (Luke 12:32; John 10:14-16; Ediyarade 7:9) Moses ye mbiet esie, Jesus Christ, edi nti uwụtn̄kpọ ẹnọ nnyịn, ndiwụk esịt nnyịn ke ọsọn̄urua utom Abasi emi, “koro ọtọ nte n̄kpọuto fo odude, do ke esịt fo edinyụn̄ odu.”—Matthew 6:19-21; Mme Hebrew 11:26.
15, 16. (a) Didie ke ẹwụt nte ke akwa ubom odudu oto Abasi itoho nnyịn? (b) Ntak emi ubiọn̄ọ otode ererimbot edikpude ndinuak mme aban̄ mbai Abasi?
15 Didie, ndien, ke ẹwụt nte ke akwa ubom odudu emi oto Abasi itoho nnyịn? Ke usụn̄ emi: Utọ mmemmem, aban̄ mbat oro nte nnyịn, ẹmi ikamade ọsọn̄urua utom ye etop ẹmi idotke ikponyụn̄ ikemeke tutu amama ndinyene uto ukpono oro ke idem nnyịn. Akande oro, nnyịn Mme Ntiense Jehovah idu ke idak kpukpru orụk mfịghe oro asua odomode ndibom nnyịn nnyụn̄ nnam nnyịn inuaha man ikûdot ndikama etop otode Abasi. Ntre, anaedi odudu Akwa Eseutom an̄wam nnyịn ndiyọ akwa ndutụhọ oro otode ererimbot emi nnyụn̄ nsọn̄ọ mmụm etop oro n̄kama nnyụn̄ n̄wụt nte idotde ndidi se ẹyakde idu ke utom esie. Ntre, kpukpru ubiọn̄ọ ẹtode ererimbot ẹyekpu ndibom aban̄ mbat Abasi nnyụn̄ mbọ mmọ eti ọsọn̄urua n̄kpọ mmọ, koro ẹwet ke 2 Corinth 4:8-12 ẹte:
16 “Nnyịn ikop mfịghe ke kpukpru edem, edi idụhe ke mbaba; ẹfịna nnyịn ekikere, edi itiehe ke n̄kịmenyịn; ẹsịn nnyịn enyịn, edi Abasi ikpọn̄ke nnyịn; ẹyịbi nnyịn ẹduọk ke isọn̄, edi ibiatke nnyịn uwem, kpukpru ini ke ibiom ediwot eke ẹwotde Jesus ke ikpọkidem isan̄a, man uwem Jesus nde ọwọrọ owụt idem ke ikpọkidem nnyịn. Koro kpukpru ini ke ẹdada nnyịn ye uwem ẹyak ẹnọ n̄kpa kaban̄a Jesus, man uwem Jesus onyụn̄ ọwọrọ owụt idem ke obụkidem nnyịn ẹmi ẹdikpade. Ntem ndien ke n̄kpa ananam nnyịn utom ke idem, edi uwem [ebe ke edikwọrọ eti mbụk Obio Ubọn̄] ananam mbufo utom ke idem.”
Akwa Otuowo Ẹnen̄ede Ẹkpono “Ọsọn̄urua N̄kpọ Emi”
17. Didie ke akwa otuowo ese “ọsọn̄urua” ubọn̄ ubọn̄ utom emi?
17 “N̄kpa ananam nnyịn utom ke idem, edi uwem ananam mbufo utom ke idem.” Ikọ emi aban̄a mme Christian oro ẹyetde aran ke spirit. Edi, enye n̄ko ekeme ndinam nnyịn ikere iban̄a ebuana oro nsụhọ ẹmi Abasi ẹyetde aran ẹnyenede ye akwa otuowo eke mme erọn̄ en̄wen. Mbon oro ẹyetde aran ẹfiọk ẹte ke ana mmimọ ke akpatre ikụre utom mmimọ ke isọn̄ ke n̄kpa nte Jesus akanamde, edi mmọ ẹnyene mme nsan̄a ndibuana ye mmọ ke ubọn̄ ubọn̄ ọsọn̄urua utom emi, ndin̄wam mmọ ẹnam akwa utom edikwọrọ etop eti mbụk Obio Ubọn̄. Ukem nte nsụhọ oro ẹyetde aran, mfịn akwa otuowo eke mme erọn̄ en̄wen ẹfiọk ẹte ke n̄kukụre ọsọn̄urua n̄kpọ oro edibọhọde ikan̄ ikan̄ ekọn̄ Armageddon onyụn̄ akaiso ye unana edifọbọ ye edita ikan̄ ebe odụk obufa ererimbot edi ọsọn̄urua idara idara utom emi, kpa utom oro ẹnamde ẹnọ Jehovah Abasi ye ubọn̄ ubọn̄ Edidem esie, Jesus Christ. Akwa otuowo ẹyesọn̄ọ ẹmụm enye ẹkama, ‘ẹnamde edisana utom ẹnọ Abasi uwemeyo ye okoneyo ke temple esie.’—Ediyarade 7:15.
18. (a) Ke mîbịghike, nso iditịbe inọ nsunsu ubọn̄ ererimbot emi? (b) Ewe “ubọn̄” ke Jesus ekesịn, ndien ke ndinam nso ke enye ọkọbọ ubọn̄ oro okponde akan?
18 Ibịghike, Abasi eyeda utịt ọsọk nsunsu ubọn̄ idiọk akani editịm n̄kpọ emi—kpa “ubọn̄” oro akade iso ndidu tọn̄ọ nte Satan kpa Devil ekemen Jesus ọdọk enyọn̄ edikọn̄ obot onyụn̄ owụt enye kpukpru obio ekondo ye ‘ubọn̄ mmọ.’ (Luke 4:5, 6) Jesus ama esịn enọ ubọn̄ oro otode ebiet ntre onyụn̄ akaiso ndibịne usụn̄ edinam oro Abasi onyịmede ke isọn̄. Ke ndinam ntre, ẹma ẹnọ enye ubọn̄ oro okponde akan idem enyeoro enye, nte ikpọn̄îkpọn̄ edibon Eyen Abasi, ekenyenede ke heaven mbemiso ọtọn̄ọde utom esie ke isọn̄ nte Jehovah okodiomide.—John 5:36; 17:5; Philippi 2:9-11.
19. Ewe ukpono ukpono ifetutom ikpere ata utịt esie, ndien nso idi ubiere nnyịn kaban̄a emi?
19 Utịt idiọk editịm n̄kpọ emi ẹkebemde iso ẹtịn̄ ididịghe ibọhọke mme anditiene Jesus Christ, kpa Mme Ntiense Jehovah ẹnọ ikọ ntiense Obio Ubọn̄ ke ofụri isọn̄ nte akpatre akwa utom. (Matthew 24:14) Idahaemi ẹnọ ikọ ntiense Obio Ubọn̄ ke isua ata-ye-efụt, ndien nte mme n̄kpọntịbe ererimbot eke ini nnyịn ẹwụtde, utịt oro ẹkebemde iso ẹtịn̄ asan̄a ekpere. Mmọdo, eyedi ukpono ukpono ifet edibuana ke utom ubọn̄ ubọn̄, edisana ukara emi ekpere ata utịt esie. (Matthew, ibuot 24, 25; Mark, ibuot 13; Luke, ibuot 21) Ifet nnyịn ndibuana ke ndinọ ikọ ntiense ofụri ererimbot mban̄a Obio Ubọn̄ oro ẹma ẹkewụk ke akpanikọ edi ubọn̄ ubọn̄ ọsọn̄urua n̄kpọ oro Mme Ntiense Jehovah, nte mme anditiene Eyen esie, Jesus Christ, emi ẹma ẹkedori ke ebekpo, ẹnen̄erede ẹkpono. Mmọ ke ofụri esịt ẹduak ndisọn̄ọ mmụm enye n̄kama tutu ẹkụre unọ ikọ ntiense Obio Ubọn̄ ẹmi, Ata Ọkpọsọn̄ Abasi, Jehovah, onyụn̄ anam idaha ofụri ekondo emi osịm utịt ye ọkpọ ọkpọ ikọ ntiense esie kaban̄a ukara ofụri ekondo esie.—Zephaniah 3:8.
Nso Idi Mme Ibọrọ Fo?
◻ Ntak emi utom Mme Ntiense Jehovah edide ubọn̄ ubọn̄ utom?
◻ Ntak emi eti mbụk odịbede ediwak owo mfịn-e?
◻ Nso idi “ọsọn̄urua n̄kpọ emi ke aban̄ mbat”?
◻ Ntak emi Abasi adade mmemmem, aban̄ mbat ndinam ọsọn̄urua utom esie?
◻ Didie ke ikọt Jehovah ese “ọsọn̄urua n̄kpọ emi,” ndien ntak-a?
[Ndise ke page 17]
Ubọn̄ Abasi ọwọrọ ke iso Jesus Christ, kpa Akamba Moses. Ẹnọ Mme Ntiense Jehovah ifet ndimụm uyama ubọn̄ Abasi otode Bible nnyụn̄ nnam enye ayama ọnọ mbon en̄wen