“Ẹbọn̄ Akam Ẹban̄a Kiet Eken”

JEHOVAH edi ‘Andikop akam.’ (Psalm 65:2) Enye kpukpru ini esikop akam mbon oro ẹyakde idem ke ofụri esịt ẹnọ enye ndien nnyịn imekeme ndinịm nte ke enye esikpan̄ utọn̄ ke ini mmọ ẹbọn̄de akam ẹban̄a kiet eken.

Edi ntak ẹbọn̄de akam ẹban̄a kiet eken-e? Ẹkpebọn̄ uto akam emi ẹban̄a nso? Ndien mme edu Abasi ewe ke ẹnam ọkọri ke ini nnyịn ibọn̄de akam iban̄a kiet eken?

Ntak Ẹbọn̄de Akam Ẹban̄a Kiet Eken-e?

N̄wed Abasi esịn udọn̄ ọnọ ikọt Jehovah ndibọn̄ akam mban̄a kiet eken. Akam ke ibuot mmọ en̄wen ekedi kiet ke otu n̄kpeubọk oro Paul akanamde ọnọ Abasi. (Colossae 1:3; 2 Thessalonica 1:11) Akande oro, mbet oro, James, ekewet ete: “Ẹbọn̄ akam ẹban̄a kiet eken.”​—James 5:16.

Akam ẹbọn̄de ẹban̄a mme asan̄autom Abasi eken enyene odudu. Ẹwụt emi ke James 5:13-18, ke ebiet emi ẹkpakde Christian oro ọdọn̄ọde ke n̄kan̄ eke spirit ndiyak mbiowo esop “ẹnụhọ ẹfụk enye ẹnyụn̄ ẹbọn̄ akam, ẹda aran ẹyet enye ke enyịn̄ Ọbọn̄ [“Jehovah,” NW].” Ndikop akam mmọ ekeme ndisọn̄ọ owo oro okopde mfụhọ mi idem onyụn̄ anam enye onịm ke Abasi eyebọrọ akam imọ n̄ko. (Psalm 23:5; 34:18) Ke ẹsiode edibọn̄ akam ye owo oro ẹfep, mbiowo ẹdomo ndinam enye afiak okop nsọn̄idem ke n̄kan̄ eke spirit ebe ke nditịn̄ ekikere N̄wed Abasi oro ebietde aran oro osụkde ubiak.

James adian do ete: “Akam mbuọtidem eyenyan̄a enyeemi ọdọn̄ọde, Ọbọn̄ [“Jehovah,” NW] eyenyụn̄ anam enye adaha ada.” Ih, owo oro ọdọn̄ọde ke n̄kan̄ eke spirit mi eyedi se “akam mbuọtidem” mbiowo an̄wamde. Akande oro, Abasi “[eye)nam enye adaha ada” okosịm nsọn̄idem eke spirit edieke enye onyịmede ẹda N̄wed Abasi ẹn̄wam imọ. Edi nso edieke udọn̄ọ eke spirit emi osụn̄ọde oto akwa idiọkn̄kpọ? Ọfọn, edieke owo oro akabarede esịt, Jehovah eyefen ọnọ enye.

“Mmọdo,” James ọdọhọ ete, “ẹyarade idiọkn̄kpọ mbufo ẹnọ kiet eken, ẹnyụn̄ ẹbọn̄ akam ẹban̄a kiet eken, man ẹkọk udọn̄ọ mbufo, n̄kpeubọk edinen owo enyene odudu ndinam n̄kpọ. Elijah . . . [ama] ọbọn̄ akam etieti ete edịm okûdep; ndien edịm idepke ke isọn̄ ke isua ita ye ọfiọn̄ itiokiet. Enye onyụn̄ ọtọn̄ọ ntak ọbọn̄ akam: ndien enyọn̄ edidep edịm, isọn̄ onyụn̄ osion̄o mbun̄wụm.” (1 Ndidem 17:1-7; 18:1, 42-45) Akam edinen owo oro odude ke n̄kemuyo ye uduak Abasi enyene odudu.​—1 John 5:14, 15.

Ẹbọn̄ Akam Ẹban̄a Nso?

N̄kpọ ekededi ekeme ndidi ibuotikọ akam oro nnyịn ibọn̄de iban̄a ekemmọ andinịm ke akpanikọ. Ke uwụtn̄kpọ, Paul ama ọdọhọ mbon en̄wen ẹbọn̄ akam man imọ ikpenyene ukeme nditịn̄ eti mbụk. (Ephesus 6:17-20) Nso edieke nnyịn ifiọkde ite ke owo ke osobo idomo? Nnyịn imekeme ndibọn̄ akam ite enye ‘okûdue ke baba n̄kpọ kiet,’ Abasi okûnyụn̄ ayak enye esịn ke idomo edi osio enye ke ubọk andidiọk, Satan kpa Devil. (2 Corinth 13:7; Matthew 6:13) Ndien edieke owo ọdọn̄ọde ke n̄kan̄ obụkidem, nnyịn imekeme ndiben̄e Jehovah ndinọ enye uko oro enye oyomde man ọyọ udọn̄ọ esie.​—Psalm 41:1-3.

Odot ẹbọn̄ akam kpukpru ini ẹban̄a ekemmọ mme andituak ibuot nnọ Jehovah oro ẹkọbọde. Paul ye mme nsan̄a esie ẹma ẹsobo ọkpọsọn̄ ukọbọ ndien enye ọkọdọhọ mme Christian ke Corinth ete: “Ke mbufo ẹnyụn̄ ẹtienede ẹnyan̄a ke n̄kpeubọk mbufo; man ediwak owo ẹkpenọ Abasi ekọm ẹban̄a nnyịn, ke mfọn eke Enye ọfọnde ye nnyịn oto ke n̄kpeubọk ediwak owo.” (2 Corinth 1:8-11; 11:23-27) Idem edieke ẹsịnde nnyịn ke ufọk-n̄kpọkọbi, nnyịn imekeme ndibọn̄ akam mban̄a nditọete eken oro ẹkọbọde, itide kpukpru ini nte ke Jehovah esikop “akam nti owo.”​—Mme N̄ke 15:29.

Akpana nnyịn akpan akpan isibọn̄ akam iban̄a nditọete nnyịn oro ẹkamade ikpọ mbiomo ke esop Jehovah. Emi esịne mbon oro ẹnọde esop ndausụn̄ ẹnyụn̄ ẹtịmde udia eke spirit oro “asan̄autom oro anamde akpanikọ, onyụn̄ enyenede ọniọn̄” edemede. (Matthew 24:45-47) Ke uwụtn̄kpọ, mbon Otu Ukara eke Mme Ntiense Jehovah ẹdot akam nnyịn, ndien nnyịn imekeme ndibọn̄ akam nte yak Abasi ọnọ mmọ “spirit ọniọn̄.”​—Ephesus 1:16, 17.

Ọkọri Mme Edu Christian

Ke ndibọn̄ akam mbaha ekemmọ mme andinịm ke akpanikọ, nnyịn iwụt ke nnyịn imekere iban̄a, idịghe ibụk, imonyụn̄ inyene ima. Anana ibụk, ima ima edikere mban̄a nditọete eke spirit nnyịn iren ye iban odu ke n̄kemuyo ye ikọ Paul oro nte ke “ima iyomke ufọn esiemọ.” (1 Corinth 13:4, 5) Ndibọn̄ akam mban̄a mmọ en̄wen edi usụn̄ kiet oro ‘mbufo mîsehe n̄kpọ eke mbufo edi ẹkam ẹsede n̄kpọ owo en̄wen.’ (Philippi 2:4) Ke ini nnyịn inamde mfọnọn̄kpọ eke spirit mmọ en̄wen edi ibuot nneme akam nnyịn, nnyịn n̄ko ikụt idem nnyịn nte itịmde isan̄a ikpere mmọ ke ima nditọete oro anamde ẹdiọn̄ọ mbet Christ.​—John 13:34, 35.

Edu ukop kiet eken mbọm esikọri ye mbon oro nnyịn ibọn̄de akam iban̄a. (1 Peter 3:8) Nnyịn imesikop mmọ mbọm, ibuanade ke udọn̄ ye mfụhọ mmọ. Ke ikpọkidem owo, edieke ubọk kiet adade unan, enye eken eyese enye enyịn onyụn̄ odomo ndinam ubiak unan oro osụhọde. (Men 1 Corinth 12:12, 26 domo.) Ukem ntre, ndibọn̄ akam mban̄a nditọete nnyịn iren ye iban oro ẹsobode afanikọn̄ eyekọri mbọm oro inyenede inọ mmọ, eyenyụn̄ an̄wam nnyịn ndinyene mmọ ke ekikere. Edi n̄kpọ ntakurua ọnọ nnyịn edieke ifụmide ekemmọ mme anam-akpanikọ Christian ke akam nnyịn, koro Abasi ye Christ mîkpọn̄ke mmọ.​—1 Peter 5:6, 7.

Imesikọri nsio nsio edu Abasi ke ini ibọn̄de akam iban̄a mmọ en̄wen. Nnyịn imotịm ifiọk mmọ inyụn̄ inyene ime ye mmọ. Emen ndot ndot ekikere oro ekemede ndidu ẹfep, ẹyakde ufan̄ ẹnọ ekikere oro ọbọpde-bọp oro anamde nnyịn itie ima ima ye idara idara. Edibọn̄ akam mban̄a mmọ en̄wen n̄ko ọkọri emem ye edidianakiet ke otu ikọt Jehovah.​—2 Corinth 9:13, 14.

Ẹkaiso Ndibọn̄ Akam Mban̄a Kiet Eken

Ukem nte Paul, nnyịn imekeme ndidọhọ mmọ en̄wen ẹbọn̄ akam ẹban̄a nnyịn. Ke ẹsiode edibọn̄ akam ye nnyịn efep, mme ufan nnyịn ke ndịbe ẹkeme ndibọn̄ akam nnọ Abasi mban̄a nnyịn, ẹsiakde nnyịn enyịn̄, ẹsiakde mfịna nnyịn, ẹnyụn̄ ẹben̄ede ẹte enye an̄wam nnyịn. Ndien un̄wam eyedi, koro “Ọbọn̄ [“Jehovah,” NW] ọmọfiọk ndinyan̄a mmọemi eten̄ede enye nsio ke idomo.”​—2 Peter 2:9.

Mme Ntiense Jehovah oro ẹsisiakde nnyịn ke akam mmọ ẹsisobo ediwak idomo n̄ko​—ndusụk otịmde akama mfụhọ akan eke nnyịn. Kpa ye oro, mmọ ẹsimen mme mfịna nnyịn ẹnịm Nsinsi Edidem ke iso, ndusụk ẹkam ẹtuade eyet ẹban̄a nnyịn. (Men 2 Corinth 2:4; 2 Timothy 1:3, 4 domo.) Nnyịn ikpowụt esịtekọm iban̄a emi didie ntem! Ntre, ke ndiwụt esịtekọm ye kaban̄a mme ntak eken oro ẹsụk ẹnemede ẹkụre mi, ẹyak nnyịn isibọn̄ akam iban̄a kiet eken.