Ẹyọhọ ye Idatesịt
“Ndien mbet ẹyọhọ ye idatesịt ye edisana spirit.”—UTOM 13:52.
1. (a) Idatesịt edi nso orụk mbun̄wụm? (b) Ke idara idara ndutịm ewe ke ẹnyene ndinọ Abasi ubọn̄?
IDATESỊT! Edu Christian emi ikpọn̄îkpọn̄ ke ẹsiak ẹdian ima ke udịm enyịn̄ mbun̄wụm spirit oro Paul ekewetde. (Galatia 5:22-25) Ndien nso ida idatesịt emi idi? Edi eti mbụk oro angel Abasi eketịn̄de ọnọ mme ọsụhọdeidem ekpemerọn̄ ke se iwakde ikan isua 1,900 ẹmi ẹkebede ete: “Sese, mmada eti mbụk akwa idatesịt, eke edinyenede kpukpru owo, nsọk mbufo; koro Andinyan̄a, emi edide Christ Ọbọn̄, amana ọnọ mbufo mfịn ke obio David.” Ekem udịm mme angel ẹbiọn̄ọde ẹnyụn̄ ediana ye angel oro ke idara nditoro Abasi nnyụn̄ ndọhọ ete: “Ubọn̄ enyene Abasi ke ata enyọn̄. Emem onyụn̄ odu ke isọn̄ ke otu owo emi Enye enende iso ye mmọ [“Mbon nti uduak,” NW].”—Luke 2:10-14.
2, 3. (a) Ntak okodotde nte Abasi ọnọ akpa edibon Eyen esie ndidi Andifak ubonowo? (b) Ke mme ewe usụn̄ en̄wen ke Jesus akanam uduak Abasi ke adan̄aemi odude ke isọn̄?
2 Ẹwụt eti uduak oro Jehovah enyenede ọnọ mme owo ke ndinọ edinyan̄a ebe ke Christ Ọbọn̄. Akpa edibon Eyen Abasi emi edi uwụtn̄kpọ ata ọniọn̄ ẹnyụn̄ ẹtịn̄ ẹban̄a nte ọdọhọde aban̄a Ete esie ke ini ẹkebotde mme n̄kpọ ete: “Ndien ndu enye ke n̄kan̄ nte ọsọn̄-idem ata anamutom, nnyụn̄ nyọhọ ye idatesịt ke usen ke usen, ndara ke iso esie kpukpru ini; ndara mban̄a isọn̄ ererimbot esie oro on̄wụmde mbun̄wụm, ih ọyọhọ idatesịt mi ekedi ye nditọ owo.”—Mme N̄ke 8:30, 31, Rotherham.
3 Ama odot, ke ntre, nte Jehovah ọdọn̄ Eyen emi, emi ekenyenede utọ idatesịt oro aban̄a nditọ owo, ndidi Andinyan̄a ubonowo. Ndien didie ke emi akpada ubọn̄ ọsọk Abasi? Emi ekpeberede usụn̄ ọnọ enye ndisu akwa uduak esie ndinam isọn̄ ọyọhọ ye ndinen ye mme ama-emem owo. (Genesis 1:28) Akande oro, ke adan̄aemi okodude ke isọn̄, Eyen emi, Jesus, ama owụt ke idak ọkpọsọn̄ idomo ete ke mfọnmma owo ekeme ndisụk ibuot ke edinam akpanikọ ọnọ Jehovah nte Ọbọn̄ Andikara, ke ntre owụtde unen itie edikara oro ete esie enyenede ke idem edibotn̄kpọ Esie ọyọhọ ọyọhọ. (Mme Hebrew 4:15; 5:8, 9) Usụn̄ uwem nsọn̄ọnda Jesus n̄ko ama onịm uwụtn̄kpọ ọnọ kpukpru mme ata Christian nditiene nde ikpat esie ket-ket.—1 Peter 2:21.
4. Ediyọ oro Jesus ọkọyọde okosụn̄o ke ewe akwa idara, ndien didie ke emi ekpesịn udọn̄ onọ nnyịn?
4 Ntem Jesus ama enyene n̄kponn̄kan idatesịt ke ndinam uduak Ete esie, ye ke ndidot enyịn ke idatesịt oro akam okponde akan, nte apostle Paul owụtde ke Mm Hebrew 12:1, 2 ete: “Ẹyak ifehe mbuba eke anade nnyịn ke iso ye ime, iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama; emi okobiomde [eto ndutụhọ], onyụn̄ abatde bụt ke ekpri n̄kpọ, kaban̄a idatesịt eke anade Enye ke iso; okonyụn̄ osụhọrede etetie ke ubọk nnasia ebekpo Abasi.” Nso idara idi emi? Edi idara oro Jesus ekenyenede, idịghe n̄kukụre ke ndinam enyịn̄ Ete esie asana nnyụn̄ mfak ubonowo nsio ke n̄kpa edi n̄ko ke ndikara nte Edidem ye Akwa Oku nte enye afiakde ada mme okopitem owo osịm anana utịt uwem ke paradise isọn̄.—Matthew 6:9; 20:28; Mme Hebrew 7:23-26.
5. Mmanie ẹdi “nditọete” Jesus, ndien ke ewe anana-mbiet idara ke mmọ ẹbuana?
5 Ih, Eyen Abasi kpukpru ini adadara ndinam n̄kpọ nnọ ubonowo. N̄ko onyụn̄ edi idatesịt esie ndinam utom ye Ete esie ke ndimek otu mbon nsọnọnda emi enye okotde “nditọete” imọ ẹmi ke ẹkpade ẹnamde ẹset ẹka heaven. Mmọemi ẹdụk ke anana-mbiet idara ye Jesus. Ẹtịn̄ nte ke mmọ ‘ẹkop inemesịt ẹnyụn̄ ẹsana,’ ndien ke mmọ “ẹyedi mme oku Abasi ye Christ, mmọ ẹyenyụn̄ ẹda ubọn̄ ye Enye ke tọsịn isua.”—Mme Hebrew 2:11; Ediyarade 14:1, 4; 20:6.
6. (a) Nso idara idara ikot ke Edidem anam atara osịm “mme erọn̄ en̄wen” esie? (b) Mme ifetutom ewe ke ediwak owo eke erọn̄ emi ẹnyene mfịn?
6 Adianade do, akwa otuowo eke “mme erọn̄ en̄wen,” emi Edidem oro akarade abaharede onịm ke ubọk nnasia unyịme esie, ẹbọ ikot esie ete: “Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkonịmde ẹnọ mbufo toto ke editọn̄ọ ererimbot.” (John 10:16; Matthew 25:34) Nso idara idara ifet ke edi ntem! Ke otu mmọemi ẹdidade Obio Ubọn̄ eke n̄kan̄ isọn̄ inyene, ediwak mmọ kemi ẹkam enyenyịme ndibiom mbiomo ye mbon oro ẹyetde aran, kpa nte Jehovah ekebemde iso etịn̄ ete: “Isenowo ẹyeda ẹbọk n̄kpri ufene mbufo, nditọ idụt ẹyenyụn̄ ẹkabade ẹdi mme ofụn̄isọn̄ mbufo ye mme ọdiọn̄ vine mbufo. Ndien mbufo ẹyekere mme oku Jehovah; ẹyenyụn̄ ẹdọhọ ẹban̄a mbufo, ete, Mme anam n̄kpọ Abasi nnyịn.” Kpukpru mmọemi ẹdiana ye prọfet Abasi ke ndidọhọ ete: “Nyedat esịt etieti ke Jehovah, ukpọn̄ mi eyebre aban̄a Abasi mi: koro enye emesịne mi edisịnen̄kpọ edinyan̄a ke idem.”—Isaiah 61:5, 6, 10.
7. Ntak emi “usen” emi toto ke 1914 edide akpan usen?
7 Nnyịn idu uwem idahaemi ke ata akpan usen. Toto ke 1914 emi edi usen oro Christ akarade nte Edidem eke heaven, ẹtịn̄de ke Psalm 118:24, 25 ete: “Usen emi ke Jehovah akanam; nnyịn iyedara, inyụn̄ ibre ke eṣit. Mbọk, O Jehovah, mbọk, nyan̄a: mbọk, O Jehovah, mbọk, nnam nnyịn ikụt unen.” Emi edi usen oro edisịmde utịt ke ini Jehovah edisobode ido ukpono Babylon edinyụn̄ adiande n̄wanndọ Christ emi edide nditọete 144,000 ye Edidem mmọ eke heaven. Kpukpru ikọt Abasi ‘ẹyedara ẹnyụn̄ ẹdat esịt’ ẹban̄a emi. Mmọ n̄ko ẹyedara nte Edidem Messiah mmọ an̄wanade ke Armageddon ndinyan̄a anam-akpanikọ idụt esie nsịn ke edinen obufa ererimbot. (Ediyarade 19:1-7, 11-16) Ndi Jehovah anam ẹkụt unen nte ikọt esie ẹtan̄ade idara idara idotenyịn emi? Ibatutom emi etienede mi eyenam an̄wan̄a.
Utat Utom eke Ofụri Ererimbot
8. (a) Didie ke ẹwụt idara ye edisana spirit ke ibatutom oro odude ke page 18 osịm 21 eke magazine emi? (b) Nso idi ndusụk akpan n̄kpọ ke ibatutom oro?
8 Mme Ntiense Jehovah eyomfịn ‘ẹyọhọ ke idotenyịn ye odudu edisana spirit.’ (Rome 15:13) Ẹkụt emi ke chart ẹdụde ke page 18 osịm 21 eke magazine emi, ke ebiet ẹnọde ọyọhọ ọyọhọ ibatutom Obio Ubọn̄ ofụri ererimbot eke 1990. Nnyịn idat esịt didie ntem ndikụt obufa n̄wakn̄kan ibat ifịk ifịk mme asan̄autom 4,017,213 ke an̄wautom! Emi owụt n̄kọri ke mbahade 77 eke ikie ke ufan̄ isua duop ẹmi ẹkebede, nte ẹnamde utom editan̄ erọn̄ mbok usọp usọp ke idụt 212 ke ofụri ererimbot. Ke isua 15 ẹma ẹkebe, ibat mbon baptism ama afiak osịm n̄wakn̄kan ibat ofụr-ini—301,518! Ama odu ndusụk anana-mbiet uwak ibat mbon baptism ke ediwak mbono, akpan akpan ke enyeoro Mme Ntiense ẹtode Edem Usiahautịn Europe ẹkedụkde. Ke otu mmọemi ẹkedi ediwak n̄kparawa owo, ẹmi ẹkewụtde ke utịn̄ikọ mbon n̄ka ukara eke idụt oro nte ke ido ukpono eyetiene mbonusọn̄ ebe efep edi nsu.
9. (a) Ukpep otode ete ye eka ke mme isua uyen ada nso idara idara utịp edi? (b) Nso ifiọkutom eke n̄kann̄kụk m̀mê ke ebiet efen ẹwụt emi?
9 Akwa udịm n̄kparawa owo ke ẹyere ikot oro ke Psalm 32:11: “Mbufo nti owo, ẹdara [ke] Jehovah, enyụn̄ ẹbre: yak kpukpru mbon esịt kiet ẹnyụn̄ ẹsio n̄kpo idara.” Ẹtie nte ediwak mme ete ye eka ke ẹda item oro ẹnọde ndikpep n̄kpri owo mmọ “toto ke uyen” esịn ke edinam. (2 Timothy 3:15) Ke ẹda mme n̄wed ye mme kaset oro ẹnamde ẹnọ mbon oro ẹdude ke mme isua uyen mmọ ẹnam n̄kpọ ke eti usụn̄. Nte n̄kpri owo ẹmi ẹtọn̄ọde ufọkn̄wed, ibịghike mmọ ẹsinọ eti ikọ ntiense, nte ke uwụtn̄kpọ eyenan̄wan-isua-itiaita otode Japan emi ọkọtọtde ete: “Ke nduọkodudu ndaeyo okụrede, mma n̄ka mbịne andikpep mi nnyụn̄ mbụp enye nte: ‘Ndi afo ama aka ekese udi ete fo ke ini nduọkodudu?’ Enye ama ọbọrọ ete: ‘Ih, ete mi ama enyene ido etieti, ndien ami mmesika n̄kese udi esie kpukpru isua.’ Ami mma ndọhọ enye nte: ‘Edieke afo ekpepde Bible onyụn̄ etienede mme ukpepn̄kpọ Abasi, eyekeme ndikụt ima ima ete fo ke paradise isọn̄.’ Ekem, mma nnọ enye N̄wed Mi eke Mme Mbụk Bible. Idahaemi andikpep mi esikot ibuot kiet kiet ke n̄wed emi ọnọ kpukpru owo ke ubet ukpepn̄kpọ ke ini udia uwemeyo ke urua kiet kiet.”
10. N̄wed Young People Ask anam nso eti uduak, ndien nso idi ndusụk uwụtn̄kpọ?
10 N̄kparawa owo ẹmi ẹdude ke mme isua uyen mmọ ẹma ẹda n̄wed Questions Young People Ask—Answers That Work, ẹnam n̄kpọ ke eti usụn̄ ke san̄asan̄a ini ukpepn̄kpọ ye ke ndinọ mme uyen eken ikọ ntiense. Mme ete ye eka n̄ko ẹwụt esịtekọm ẹban̄a n̄wed emi. Eyenete an̄wan kiet ke Switzerland, emi ekesịnde enyịn̄ nte asiakusụn̄ unọ-un̄wam, ama ebiere ndikese ete ye eka eyenan̄wan oro edide nsan̄a ufọkn̄wed eyen esie. Emi ama eberede ifet ọnọ nti nneme ye ediwak mme ete ye eka, ndien ẹma ẹkpọn̄ n̄wed 20 (akpan akpan Young People Ask) ye magazine 27 ẹnọ mmọ. Ke ini eyen ufọkn̄wed edide ekpri eyenan̄wan ke Trinidad okonịmde n̄wed emi ọnọ andikpep esie ke ufọkn̄wed, eka esie ama etiene edinam oro, onịmde n̄wed 25 ke otu mme andikpep 36. Enye ama akaiso ntre ke ọfiọn̄ oro eketienede ke san̄asan̄a udọn̄ oro enye ekenyenede ọnọ mme ete ye eka oro enye ke idemesie ọkọdiọn̄ọde, onịmde n̄wed 92 efen efen onyụn̄ ọtọn̄ọde mbufa ukpepn̄kpọ Bible. Ke Korea andikpep ekpri ufọkn̄wed ama akama n̄wed Young People Ask ke ndinọ mbio mbio ukpep ke utọ ibuotikọ nte “Didie ke N̄keme Ndinam Idaha Ube N̄wed Mi Ọfọn?” ye “Didie ke N̄keme Ndinam N̄kpọ ye Andikpep Mi?” ndien ekem ọnọ n̄wed oro. Ke nditọ ufọkn̄wed ẹma ẹkebọ n̄wed 39, ndusụk mme ete ye eka ẹma ẹtọn̄ọ ndikụni. Edi ke ini akamba etubom ama ọkọdụn̄ọde n̄wed oro kiet, ama ọdọhọ ke enye edi “utịbe n̄wed,” onyụn̄ otobo kiet ọnọ eyenan̄wan esie.
Mfọnn̄kan Ukpepn̄kpọ
11, 12. Nso idi ndusụk uyarade aban̄ade akpanikọ oro nte ke mme n̄wed Watch Tower Society ẹnọ mfọnn̄kan ukpep?
11 Ediwak owo n̄ko ẹdiọn̄ọ ẹban̄a ufọn ukpepn̄kpọ oro mme magazine nnyịn ẹnọde, nte ke uwụtn̄kpọ ufọkn̄wed ke U.S. ama otobo Awake! eke July 22, 1990, idem 1,200 (ndiyarade mbumehe uda ọkpọsọn̄ ibọk ẹkotde crack) ndikama ke mme ini ukpepn̄kpọ esie. Akande oro, nti uwụtn̄kpọ ke eduuwem oro nditọ Mme Ntiense Jehovah ẹnịmde ke ufọkn̄wed akaiso ndinyene eti etop. Ke uyom uyom ubet ukpepn̄kpọ kiet ke Thailand, andikpep ama okot Racha emi edide isua-11 ke emana ke iso kpukpru owo ke ubet ukpepn̄kpọ oro onyụn̄ otoro enye ke eti edu esie, ọdọhọde ete: “Ntak kpukpru mbufo mîdaha enye nte uwụtn̄kpọ? Enye esịn ifịk ke ukpepn̄kpọ esie onyụn̄ odu eti uwem.” Ekem enye ama adian do ete: “Ọfọn, n̄kere ke mbufo ẹkpekabade edi Mme Ntiense Jehovah nte Racha man ẹnam edu mbufo ọfọn.”—Men Mme N̄ke 1:8; 23:22, 23 domo.
12 Ekpri eyenete an̄wan kiet ke Dominican Republic ewet ete: “Ke ini n̄kedide sụk isua inan̄ ke emana, mma n̄kpere ndikụre ukpep ke ufọkn̄wed nditọn̄wọn̄ oro ido ukpono ekenyenede, ke ebiet emi n̄kekpepde ndiwet nnyụn̄ n̄kot n̄wed. Nte enọ, mma nnọ andikpep mi emi ekedide n̄wan n̄ka ido ukpono n̄wed Afo Emekeme Ndidu Uwem ke Nsinsi ke Paradise ke Isọn̄ ye etop emi: ‘Ami mmenem esịt etieti afo ndikekpep mi nte ẹkotde ye nte ẹwetde n̄wed. Ọdọn̄ mi afo ndikpọfiọk ido ukpono mi ndinyụn̄ nnyene idotenyịn mi aban̄ade edidu uwem ke nsinsi ke isọn̄ emi ke ini edinamde enye edi paradise.’ Ke ntak emi ẹma ẹbịn mi ke ufọkn̄wed oro. Isua itiaita ke ukperedem ami mma mfiak nsobo ye andikpep emi. Enye ama etịn̄ nte, ikodomode ndikot n̄wed oro kpa ye ọkpọsọn̄ ubiọn̄ọ okotode oku. Enye ama ọwọrọ okodụn̄ ke ibuot obio, ke ebiet emi enye ekekemede ndikpep Bible ye owo Ntiense kiet. Ami ye n̄wan emi ima ina baptism ke Mbono District ‘Edisana Usem.’” Nte prọfesi eketịn̄de, eti ibuot ekeme idem ndito “inua nsek nditọ.”—Matthew 21:16; Psalm 8:1, 2.
13. Didie ke ediwak n̄kparawa owo ẹnam item Solomon, ndien didie ke ẹwụt emi ke ibatutom ofụri ererimbot?
13 Solomon ama ọnọ item nsịnudọn̄ ete: “O akparawa, dara ke uyen fo; yak esịt fo onyụn̄ enem fi ke usen emi afo edide akparawa, nnyụn̄ tiene usụn̄ esịt fo.” (Ecclesiastes 11:9) Edi n̄kpọ inemesịt mfịn ndikụt ata ediwak n̄kpri owo Mme Ntiense Jehovah ẹdade ikọ emi esịn ke edinam, ẹdade mme isua uyen mmọ nditịm idem nnọ uwem utom uyọhọ-ini nnọ Jehovah ndinyụn̄ ndụk n̄kponn̄kan kpukpru ubọkọkọ emi nte mmọ ẹkụrede ufọkn̄wed. Udịm mme asiakusụn̄ ke akaiso ndikọri usọp usọp, ye owo 821,108 ẹnọde ibatutom ke isua oro. Ọkọrọ ye nditọete iren ye iban 11,092 ẹmi ẹnamde utom ke Bethel, ẹmi edide mbahade 21 eke ikie ke ibat mme asuanetop.
14. Nso editịp nsịn ke nditọete nnyịn iban ẹnam, ndien nso itoro ke mmọ ẹdot ndibọ?
14 Edi n̄kpọ udọn̄ nte ke ediwak idụt, utọ nte United States, n̄kpọ nte mbahade 75 eke ikie ke kpukpru mme asuanetop asiakusụn̄ edi nditọete iban, ẹsịnde odudu ke ikọ eke Psalm 68:11: Ọbọn̄ [“Jehovah,” NW] ọnọ uyo: iban ẹmi ẹkwọrọde ẹdi akamba udịm.” Ẹnyene nditoro nditọete iban kemi mmọ ẹnamde akamba ubak ke utom an̄wautom. Usọ usọ usụn̄ ukpep mmọ ke mme ukpepn̄kpọ Bible ke ada ediwak owo edi akpanikọ, ndien nditọete iban oro ẹdọde ndọ oro ke edinam akpanikọ ẹnọde mme ebe mmọ ẹmi ẹbiomde ediwak mbiomo esop ibetedem ẹnyene n̄ko ndidi se ẹtorode ufiop ufiop.—Mme Nke 31:10-12; Ephesus 5:21-25, 33.
Ukpep a-Bible Emenyene Uforo
15. (a) Didie ke ndusụk idụt ẹsịnde ke ibatutom ofụri ererimbot ẹdọk ke utom ukpepn̄kpọ Bible? (b) Mme ifiọkutom ewe ke afo ekeme ndinọ, owụtde adan̄a nte mme ukpepn̄kpọ Bible ẹkemede ndin̄wụm mfri?
15 Utom ukpep Bible ke enyene uforo, ẹnịmde ukpepn̄kpọ 3,624,091 ke ofụri ererimbot ke ẹbaharede ukem ukem ke ọfiọn̄ kiet kiet. Akpanikọ Bible ekeme ndikpụhọde mme edu owo, nte ntọt otode idụt edem usụk mi owụtde. Ntọn̄ọ ntọn̄ọ ke January 1987, ẹma ẹbịn eren kiet ke Australia ọnyọn̄ New Zealand ke ama okodu ke ufọk-n̄kpọkọbi ke ofiọn̄ 25 ke ntak inọ ye ke ndikpụhọ mme n̄kpọ oro ẹkewetde ke n̄wed, enye ama enyene mbumehe uda n̄kpọsọn̄ ibọk onyụn̄ owo mmọ n̄ko ke se ikande isua 17. Ke isua oro eketienede n̄wan esie ama ọtọn̄ọ ndikpep Bible ye Mme Ntiense Jehovah, ndien nte ifiọk esie ọkọkọride, eren emi ama okụt n̄wọrọnda ukpụhọde ke edu an̄wan esie. Enye ama akabade edi eti an̄wan ye eka. Ke n̄wan esie akpakde enye, enye ama odụk mbono circuit kiet ke June 1989. Enye kemi ama onyịme ukpepn̄kpọ Bible, ndien ẹma ẹtọn̄ọ ndikụt akwa ukpụhọde ke nte enye akamade idem ye edu esie. Kpukpru mbon ubon ẹdide owo itiaba ẹma ẹtọn̄ọ ndidụk mbonoesop. Enye ama ana baptism ke January 1990 nte kiet oro eketienede mfọnn̄kan item Paul ke Ephesus 4:17-24.
16. (a) Didie ke ntọt ẹban̄ade Editi eke 1990 edi n̄kpọ idara? (b) Nso usọp usọp n̄kpọ ke ẹnyene ndifiọk, ndien nso ukeme ke nnyịn ikpenyene ndisịn man ẹn̄wam?
16 N̄wọrọnda ikpehe kiet ke ibatutom isua oro edi ibat owo 9,950,058 ẹmi ẹkedụkde usọrọ Editi, ẹkenịmde ke Tuesday, April 10, 1990. Se iwakde ikan idụt 70 ke otu idụt 212 ẹma ẹtọt ibat mme andidụk ẹmi ẹkawakde ẹkan n̄wakn̄kan ibat mme asuanetop mmọ ke se ibede utịm-ikata! Ke uwụtn̄kpọ, kpa ye ukpan, idụt Africa itiaba ye n̄wakn̄kan ibat mme asuanetop 62,712 ke ẹtọde ẹdian kiet ẹma ẹtọt ibat mme andidụk Editi 204,356. Ke Liberia oro en̄wan abaharede, mme asuanetop 1,914 ẹma ẹdara ndinyene owo 7,811 ke Editi. Haiti, ye n̄wakn̄kan ibat mme asuanetop 6,427, ama ọtọt owo 36,551. Mme asuanetop 886 ke mme isuo Micronesia, ẹmi ẹdude nsannsan ẹkpọn̄ kiet eken, ekenyene owo 3,958. Mme asuanetop 1,298 ke Sri Lanka ẹma ẹtọt ibat owo 4,521, ndien Zambia, ye mme asuanetop 73,729 ekenyene owo 326,991 ẹdụkde Editi, emi udeme owo kiet kiet edide owo 25 ke otu ibatowo ke Zambia. Ibatutom ofụri ererimbot ayarade n̄ko nte ke odu ediwak million mbon esịt akpanikọ oro ẹbetde ndidi se ẹtan̄de ẹbok ke otuerọn̄. Edi ndinyene esịt akpanikọ ikpọn̄îkpọn̄ ikemke. Nte nnyịn imekeme ndikọri nnyụn̄ mfori uduot utom ukpepn̄kpọ Bible nnyịn, in̄wamde ediwak owo oro ẹkedụkde Editi ndikọri mbuọtidem? Nnyịn iyom mmọ ẹkabade edi ifịk ifịk nsan̄a nnyịn, ẹtorode Jehovah. Emi ọwọrọ ata uwem ọnọ mmọ!—Psalm 148:12, 13; John 17:3; 1 John 2:15-17.
Uyọhọ Idatesịt
17. Mme ewe uwụtn̄kpọ akpa isua ikie ẹkpenyene ndisọn̄ọ ubiere nnyịn ndisọn̄ọ mmụm idara nnyịn n̄kama?
17 Sededi idomo oro osịmde nnyịn, ẹyak nnyịn ikere ndisọn̄ọ mmụm idara nnyịn n̄kama. Ekeme ndidi idiyomke nnyịn isobo ọkpọsọn̄ n̄kpọntịbe nte eke Stephen, edi uwụtn̄kpọ esie ekeme ndisọn̄ọ nnyịn idem. Ke idak edori ikọ, enye ama ekeme ndimụm edu idara esie n̄kama. Mme asua “[ẹma] ẹkụt iso esie ete ebiet iso angel.” Abasi ama odu ye enye ke ini ọkpọsọn̄ idomo esie oro. Enye ama etie ntiense uko uko, ‘ọyọhọ ye edisana spirit’ tutu osịm n̄kpa usụn̄ Abasi esie. Nte Paul ye Barnabas ẹkewọn̄ọrede ẹtiene mme idụt ke ukwọrọikọ mmọ, mmọemi n̄ko ‘ẹma ẹtọn̄ọ ndidara, ẹnyụn̄ ẹkpono ikọ Jehovah.’ Ukọbọ ama afiak edemede. Edi emi ikanamke idem emem mbon oro ẹkenịmde ke akpanikọ. “Mbet ẹyọhọ ye idatesịt ye edisana spirit.” (Utom 6:15; 7:55; 13:48-52) Sededi oro mme asua nnyịn ẹnamde nnyịn, sededi oro idomo nnyịn ke uwem eke usen ke usen edide, inaha nnyịn idedei iyak idara edisana spirit nnyịn ebịt. Paul ọnọ item ete: “Ẹdat esịt ke idotenyịn; ẹnyene ime ke ukụt; ẹkọbọ ke edibọn̄ akam.”—Rome 12:12.
18. (a) Nso idi Obufa Jerusalem, ndien ntak ikọt Abasi ẹkpedarade ye enye? (b) Didie ke “mbufa enyọn̄ ye obufa isọn̄” edidiọn̄ ubonowo?
18 idotenyịn oro edi utịbe n̄kpọ didie ntem! Ye kpukpru ikọt esie, Jehovah ọdọhọ ete: “Sese, mmọn̄ mbot mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt. Edi mbịufo ẹdat esịt, ẹnyụn̄ ẹbre nsinsi ke se ami mbotde.” Christ Ọbọn̄ adianade ye “Ọbufa Jerusalem” (idahaemi edide ibuot obio esop Abasi eke heaven, kpa “Jerusalem emi odude ke enyọn̄”) ye obufa ererimbot n̄kaowo ke isọn̄ ẹyeda ọyọhọ idara ẹsọk ubonowo. (Galatia 4:26) Edinam mme akpan̄kpa eset, edimenede kpukpru mbon n̄kopitem nsịm nsinsi uwem ke mfọnmma owo, nsinsi ini oro enyenede ufọn, inem inem uwem ke paradise isọn̄—nso nyanyama idotenyịn ye ntak ndidat esịt ke emi edi ntem! Nte Jehovah ke idemesie okopde ‘idatesịt ke Jerusalem onyụn̄ adarade aban̄a ikọt esie,’ ntre ke prọfet esie ọnọ ikọt Abasi n̄kaiso ikot ete: “Ẹbre ye Jerusalem ẹnyụn̄ ẹdara ye enye, kpukpru mbufo ẹmi ẹmade enye. Ẹdara ye enye.” (Isaiah 65:17-19; 66:10, NW; Ediyarade 14:1; 20:12, 13; 21:2-4) Nnyịn kpukpru ini ikpakam iyọhọ ye idara ye edisana spirit nte nnyịn inamde item apostle Paul oro: “Ẹdat esịt ke Ọbọn̄ kpukpru ini; nyetọn̄ọ ntak ndọhọ, Ẹdat esịt.”—Philippi 4:4.
Ke Nditịn̄ Idatesịt Nnyịn Ibio Ibio:
◻ Nso uwụtn̄kpọ idara idara ediyọ ke Jesus okonịm ọnọ nnyịn?
◻ Otu owo iba oro ẹkeyakde idem ẹnọ ẹnyene nso ntak ndidara?
◻ Didie ke mme uyen ye n̄kani owo mfịn edat esịt ẹban̄a akpanikọ?
◻ Ke ndidụn̄ọde ibatutom 1990, nso ibọrọ kemi ke ẹnọ akam oro, “O Jehovah, mbọk, nam nnyịn ikụt unen”?
◻ Ini ewe ndien didie ke ẹdinyene uyọhọ idatesịt?
[Chart ke page 18-21]
IBATUTOM ISUA UTOM 1990 EKE MME NTIENSE JEHOVAH KE OFỤRI ERERIMBOT
(Se magazine)
[Ndise ke page 16]
Angel Jehovah ama ọtọt emana Christ Ọbọn̄ nte “eti mbụk akwa idatesịt”