Mme Mbụme Ẹtode Mme Andikot
◼Nso ikedi “eti n̄kpọ” oro apostle Paul mîkekemeke ndinam, nte enye akasiakde ke N̄wed Mbon Rome 7:19?
Ke akpanikọ, Paul eketịn̄ aban̄a unana ukeme esie ndinam kpukpru nti n̄kpọ oro ẹsịnede ke Ibet Moses. Paul ye mbon en̄wen ikekemeke ndinam oro, esịnede nnyịn, ke ntak unana mfọnmma ye idiọkn̄kpọ. Edi ufọn idụhe nnyịn ndiduọk idotenyịn. Uwa Christ ama eberede usụn̄ ọnọ edifen nnọ otode Abasi ye eti idaha ye Enye.
N̄wed Mbon Rome 7:19 okot ete: “Koro nnamke eti n̄kpọ eke ọdọn̄de mi ndinam, edi idiọkn̄kpọ eke mîdọn̄ke mi ndinam, oro ke nnanam.” Udọn̄ikọ oro owụt ke Paul eketịn̄ akpan akpan aban̄a “eti n̄kpọ” ke usụn̄ifiọk aban̄ade se ẹkewetde ke Ibet. Ke Ro 7 ufan̄ikọ 7 enye ama ọdọhọ ete: “Nte ibet edi idiọkn̄kpọ? Idịghe ntre. Edi n̄kpọfiọkke idiọkn̄kpọ ke mîtoho ke ibet; koro n̄kpọdiọn̄ọke edisịn esịt ke n̄kpọ owo, ke ibet mîkpetịn̄ke ite, Kûsịn esịt ke n̄kpọ owo.” Ih, Ibet ama anam an̄wan̄a nte sia mmọ mîkekemeke ndinịm enye ofụri ofụri, kpukpru owo ẹma ẹnam idiọkn̄kpọ.
Paul ama akaiso nditịn̄ nte ke imọ ‘ima idu uwem tutuko ke ini inanade ibet.’ Ini ewe ke oro ekedi ntre? Ọfọn, ke ini enye okodude ke idem Abraham mbemiso Jehovah ọkọnọde Ibet. (Rome 7:9; men Mme Hebrew 7:9, 10 domo.) Okposụkedi Abraham ekedide anana mfọnmma owo, owo ikọnọhọ Ibet kan̄a, ntre owo iketịghi enye iban̄a idiọkn̄kpọ esie ke ndikpu ndinịm ediwak ewụhọ esie. Ndi oro ọwọrọ ke ndondo oro ẹkenọde Ibet ẹnyụn̄ ẹwụtde unana mfọnmma owo, enye ama osion̄o ndiọi utịp ẹdi? Baba. Paul ama akaiso ete: “Ntem ke ibet asana, item onyụn̄ asana, onyụn̄ enen, onyụn̄ ọfọn.”—Rome 7:12.
Fiọk ete ke Paul owụt nte ke Ibet “asana” onyụn̄ “ọfọn.” Ke mme ufan̄ikọ oro ẹtienede, enye ama anam an̄wan̄a nte ke “se ifọnde” oro—kpa Ibet—ama anam an̄wan̄a nte ke imọ ikedi anamidiọk, ndien idiọkn̄kpọ emi ama anam imọ idot n̄kpa. Paul ekewet ete: “Nnamke eti n̄kpọ eke ọdọn̄de mi ndinam, edi idiọkn̄kpọ eke mîdọn̄ke mi ndinam, oro ke nnanam. Edi edieke nnamde se mîdọn̄ke mi ndinam, idịghe aba ami nnam oro, edi idiọkn̄kpọ emi odụn̄de ke esịt mi.”—Rome 7:13-20.
Ke udọn̄ikọ emi, ndien, Paul iketịn̄ke iban̄a eti n̄kpọ ke ofụri ofụri, m̀mê ikpîkpu edinam mfọnido. (Men Utom 9:36; Rome 13:3 domo.) Enye eketịn̄ akpan akpan aban̄a edinam (m̀mê editre ndinam) mme n̄kpọ ẹkedude ke n̄kemuyo ye eti Ibet Abasi. Ke mbemiso enye ke ifiopesịt ama anam ido ukpono mme Jew ndien—ke ẹmende ẹdomo ye mbon en̄wen—owo ikenyeneke n̄kpọ “ndibiom” enye. Edi, idem okposụkedi ke ekikere esie enye ekedide ifịk ifịk ofụn ọnọ eti Ibet oro, enye ikosụk inịmke enye ọyọhọ ọyọhọ. (Philippi 3:4-6) Ibet okowụt mfọnmma edumbet Abasi, owụtde apostle oro nte ke enye okosụk edi ofụn ọnọ ibet idiọkn̄kpọ ke obụkidem ndien ke ntre ẹbiomde enye ikpe n̄kpa. Nte ededi, Paul ama ekeme ndiwụt esịtekọm nte ke ebede ke uwa Christ ẹma ẹda imọ ke edinen—ẹnyan̄a ẹsio ke ibet idiọkn̄kpọ ye utịp esie oro odotde, kpa ubiomikpe n̄kpa.—Rome 7:25.
Mme Christian mfịn idụhe ke idak Ibet Moses, koro ẹma ẹkọn̄ enye ẹdian ke eto ndutụho. (Rome 7:4-6; Colossae 2:14) Edi nnyịn iyenam ọfọn ndifiọk nte ke enye ikedịghe ndodobi ibet oro nnyịn ikpefrede. Baba, ke ata akpanikọ Ibet oro ama ọfọn. Nnyịn ke ntre imenyene ntak ndikot mme n̄wed Bible ẹmi ẹsịnede Ibet oro nnyụn̄ n̄kpep se enye okoyomde oto Israel. Ibịghike Mme Ntiense Jehovah ẹyenam oro, ke ndikot mme itien̄wed Bible mmọ eke urua ke urua.
Nte nnyịn ikotde Ibet oro, ana nnyịn ifiak ikere mme edumbet emi ẹwụtde nsio nsio ewụhọ esie ye mme ufọn oro ikọt Abasi ẹkenyenede nte mmọ ẹkedomode ndinịm nti ewụhọ oro. Nnyịn ikpenyene ndifiọk, n̄ko, nte ke nnyịn idi mme anana mfọnmma owo ndien ke ntre ikemeke nditiene eti n̄kpọ oro nnyịn ikpepde ito Ikọ Abasi ọyọhọ ọyọhọ. Edi ke adan̄aemi in̄wanade ndibiọn̄ọ ibet idiọkn̄kpọ, nnyịn imekeme ndidara mban̄a idotenyịn edidi se ẹnyan̄ade ebe ke edida uwa Christ nnam n̄kpọ ke ibuot nnyịn.