Ime Abasi Edibịghi Adan̄a Didie?
KE N̄KPỌ nte isua 3,000 ẹmi ẹkebede, enyene-ọniọn̄ owo kiet ama ewet ete: “Owo amakara owo tutu ọnọ enye unan.” (Ecclesiastes 8:9, NW) Tọn̄ọ nte enye eketịn̄ se enye okokụtde, mme n̄kpọ ikpụhọkede. Ke ofụri mbụk, mme owo m̀mê mme otu ẹma ẹbọ ukara ẹda ke odudu, ke adiana ke adiana, ẹkarade ẹnyụn̄ ẹbụmede mme owo eken. Jehovah ke ime ọmọyọ emi.
Jehovah ememe ime ke adan̄aemi mme ukara ẹdide ntak n̄kpan̄a ediwak miliọn owo ke ekọn̄ ẹnyụn̄ ẹyakde ikpọ ukwan̄ikpe ẹdu ke ndutịm uforo. Mfịn, enye ke osụk enyene ime nte mme owo ẹsobode ikpehe ofụm ozone ẹnyụn̄ ẹsabarede ofụm ye inyan̄. Anaedi enye okop ubiak didie ntem ndikụt ẹsobode eti isọn̄ mbun̄wụm ye usọp usọp usobo akai ye unam!
Ntak Emi Abasi Emede Ime Ntre?
Mmemmem uwụtn̄kpọ ekeme ndin̄wam nnyịn ndibọrọ mbụme emi. Kere ban̄a utịp oro anamutom ndikọbọ ndika utom ke idiọkini enyenede ke mbubehe. Nso ke enyene utom akpanam? Mmemmem unenikpe ekeme ndiyom ete enye ye unana ubiatini osio anamutom oro efep. Edi enye ekeme nditi n̄ke Bible emi: “Owo eke mîsọpke iyatesịt enyene akwa asian: edi owo ifiopesịt emenede ndisịme ke enyọn̄.” (Mme N̄ke 14:29) Mbufiọk ekeme ndinam enye ebet mbemiso anamde n̄kpọ aban̄a. Enye ekeme ndibiere ndiyak ini odu man ẹnọ owo oro ẹdidade ẹkpụhọ ukpep man mbubehe okûkam odu ke ntịme akan.
Edikere mban̄a ekeme n̄ko ndinam enye ebet. Nso kaban̄a ndinọ anamutom oro mîdọn̄ke enyịn mi item man ẹse m̀mê enye eyekpụhọde edu esie? Ntak mûnyeneke nneme ye enye unyụn̄ use m̀mê edu uka n̄kpọ esie ke idiọkini oto ntak mfịna oro ẹkemede ndikọk m̀mê oto idiọk edu oro owo mîkemeke ndikọk-ọ? Ke adan̄aemi enyene mbubehe ekemede ndibiere ndime ime, ime esie, nte ededi, idinanake utịt. Anamutom oro enyene ndikpụhọde mîdịghe edi se ẹsiode ẹfep ke akpatre. Oro eyekam ọfọn ye mbubehe oro ke idemesie ye mbonutom oro ẹnịmde mbet.
Ke ukem usụn̄ oro, Jehovah Abasi enyene ime ke ini osobode ndiọi edinam man ayak ini odu ọnọ edinyene nnennen usọbọ ndusụk mfịna. N̄ko-n̄ko, ime esie ọnọ mme anamidiọk ifet ndikpụhọde mme usụn̄ mmọ nnyụn̄ nnyene nsinsi ufọn. Ntre, Bible esịn udọn̄ ọnọ nnyịn ete ikûyat esịt ye ime Abasi. Utu ke oro, enye ọdọhọ ete: “Ẹda ẹte, anyanime Ọbọn̄ nnyịn ọwọrọ edinyan̄a.”—2 Peter 3:15.
Uwụtn̄kpọ Ime Abasi
Jehovah Abasi ama eme ime mbemiso akwa Ukwọ eke eyo Noah. Ererimbot ini oro ọkọyọhọ ye afai onyụn̄ ọdiọk etieti. Nnyịn ikot ite: “Jehovah okụt idiọkn̄kpọ owo nte okponde ke isọn̄ . . . Ndien Jehovah ọdọhọ ete, Nyesọhi owo emi mbotde ke iso isọn̄ mfep.” (Genesis 6:5, 7) Ih, Jehovah ama enyene ke ekikere akpatre usọbọ ọnọ mfịna idiọkido oro okodude adan̄aoro: edisio mme idiọkowo mfep. Edi enye ikanamke n̄kpọ ndondo oro. Ntak mîkanamke?
Koro idịghe kpukpru owo ẹkediọk. Noah ye ubon esie ẹma ẹnen ke enyịn Abasi. Ntre ke ntak mmọ, Jehovah ama ebet ye ime man ayak ibat ibat ndinen owo oro ẹnam ndutịm ẹnọ edinyan̄a. N̄ko, anyanime edibet oro ama ọnọ Noah ifet ndidi “ọkwọrọ edinen ido,” ọnọde ndiọi owo oro ifet ndikpụhọde usụn̄ mmọ. Bible ọdọhọ ete: “Ke adan̄aemi anyanime Abasi etiede ebet ke eyo Noah, tutu ẹma ẹbọp ark, eke owo emi mîwakke, oro edi owo itiaita, ẹsan̄ade ke esịt ẹbe ke mmọn̄ ẹkụt edinyan̄a.”—2 Peter 2:5; 1 Peter 3:20.
Ntak Emi Abasi Emede Ime Idahaemi
Mfịn, idaha oro odude edi ukem. Ererimbot afiak ọyọhọ ye afai. Nte ke eyo Noah, Abasi ebebiere ikpe ererimbot emi, emi Bible ọdọhọde, ke “ẹnịm ẹnọ usen eke Abasi edikpede ikpe ye mmọemi mîbakke Enye, edinyụn̄ osobo mmọ.” (2 Peter 3:7) Ke ini oro otịbede, edisobo n̄kann̄kụk, edifịk mbon mmemidem, m̀mê ibụk ibụk edida odudu nnam n̄kpọ ke idiọk usụn̄ ididụhe aba.
Ntak, ndien, Abasi mîkosoboke mmọ eke mîbakke enye ke anyanini emi ekebede? Koro eneni ama odu ndibiere ye mme akpan n̄kpọ ndinam ndutụm nnọ. Ke akpanikọ, Jehovah ke anam n̄kpọ ebịne nsinsi usọbọ ke mfịna idiọkido oro abuanade ediwak n̄kpọ, esịnede edinyan̄a mme owo nti esịt nsio ke ufụn udọn̄ọ ye n̄kpa.
Ye ukperedem utịp emi ke ekikere, Jehovah ama aduak ndinọ Andinyan̄a oro edinọde ufak ke idiọkn̄kpọ nnyịn. Kaban̄a enye, Bible ọdọhọ ete: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ama ada ediwak tọsịn isua ndidiọn̄ usụn̄ man Jesus edi ediwa uwem esie ke ibuot ubonowo. Ke ofụri isua oro, Abasi ke ima ama eme ime. Edi nte utọ ndutịm oro ikodotke se ẹtiede ẹbet?
Jesus ọkọnọ ubonowo ufak ke se ikperede tọsịn isua iba ẹmi ẹkebede. Ntak, ndien, Abasi osụk emede ime? Ntak kiet edi-o, n̄kpa Jesus okowụt ntọn̄ọ ubịnikọt unọ ukpep. Akana ubonowo ẹdiọn̄ọ ẹban̄a ima ima ndutịm emi ẹnyụn̄ ẹnyene ifet ndinyịme enye m̀mê ndisịn enye. Oro eyeda ini, edi edidi ini oro ẹdade ẹnam n̄kpọ nte ọfọnde. Bible ọdọhọ ete: “Ọbọn̄ [“Jehovah,” NW] iduọnke ke edinam un̄wọn̄ọ Esie, ke ido nte ndusụk owo ẹkerede ẹte, Enye ọduọn; Enye akam enyene anyanime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.”—2 Peter 3:9.
Eneni Aban̄ade Ukara
Akpan n̄kpọ efen n̄ko eyeda ini. Ama oyom ete ẹkọk mfịna ukara ubonowo. Ke editọn̄ọ, owo okodu ke idak ukara Abasi. Edi ke in̄wan̄ Eden, akpa ete ye eka nnyịn ẹma ẹwọn̄ọde edem mmọ ẹwụt ukara oro. Mmọ ẹma ẹmek ndida ke idem n̄kpọn̄ Abasi, ẹyomde ndikara idemmọ. (Genesis 3:1-5) Ke akpanikọ, nte ededi, owo ikobotke owo ndikara idemesie. Prọfet Jeremiah ekewet ete: “O Jehovah, mmofiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.”—Jeremiah 10:23; Mme N̄ke 20:24.
Edi, tọn̄ọ nte ẹkedemede eneni aban̄ade ukara oro, Jehovah ke ime amayak ini odu man ẹbiere enye. Ke akpanikọ, enye ke ntatubọk ayak ediwak tọsịn isua odu ọnọ owo man odomo kpukpru orụk ukara nte ekekeme. Ye nso utịp? Amakabade ana in̄wan̄în̄wan̄ nte ke idụhe ukara owo ndomokiet oro ekemede ndisio ufịk, ukwan̄ikpe, m̀mê mme ntak unana inemesịt eken mfep.
Ke akpanikọ, ke ikerede iban̄a mbụk owo, nte owo ekededi ekeme ndidọhọ nte ke Abasi inenke ke ini enye ọtọtde aban̄a uduak esie ndisio kpukpru ukara owo mfep nnyụn̄ n̄kpụhọ mmọ ye eke esie? Ke akpanikọ ikemeke! Nnyịn imenen̄ede idara edisu prọfesi Bible emi: “Ke eyo ndidem oro, Abasi enyọn̄ eyenam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye eyenuak onyụn̄ ama kpukpru mme idụt ẹmi, ndien enye eyeda ke nsinsi.”—Daniel 2:44.
Edidem Obio Ubọn̄ eke heaven oro edi Jesus emi ẹnamde eset. Editịm enye idem nnọ itie oro—ọkọrọ ye edimek mme owo man ẹdi nsan̄a andikara ye enye—amada itie. Ke ofụri ini oro, Abasi ama eme ime.
Bọ Ufọn Idahaemi To Ime Abasi
Mfịn, ediwak miliọn owo ke idụt 212 ke nsụhọde n̄kaha ẹbọ ufọn ẹto ime Abasi. Mmọ ẹmekabade ẹdiana kiet ke uduak mmọ ndikop uyo Abasi nnyụn̄ nnam n̄kpọ ukara esie eke heaven. Ke ini mmọ ẹsopde idem ọtọkiet ke Ufọkmbono Obio Ubọn̄ mmọ, mmọ ẹkpep nte edida mme edumbet Bible nsịn ke edinam ke uwem mmọ ọfọnde akan. Mmọ itieneke ibuana ke ubahade eke ukaraidem ererimbot emi, okposụkedi mmọ ẹsụkde idem ẹnọ mme ukara owo adan̄a nte Abasi ke ime ayakde mmọemi ẹkaiso ẹdu.—Matthew 22:21; Rome 13:1-5.
Utọ edidianakiet oro ke otu ediwak owo ntre owụt unen oro Jehovah enyenede nte Owo emi ekemede ndinam n̄kemuyo odu ke otu mbon oro ẹnyenede ifụre uduak emi ẹkpepde ndima enye ẹnyụn̄ ẹyomde ndinam n̄kpọ esie. Eyịghe idụhe nte ke afo ama osobo ye mmọemi nte mmọ ẹkade iso ke ukem utom oro Jesus ke idemesie ọkọtọn̄ọde, kpa utom edikwọrọ eti mbụk Obio Ubọn̄ Abasi. Jesus ama ebemiso etịn̄ aban̄a utịt utom emi ke ini enye ọkọdọhọde ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
Inen̄ekede Ibịghi Aba!
Mme uyarade oro ẹkụtde ke enyịn ẹwụt nte ke ẹkpere ndikụre mme ndutịm ẹban̄ade edinen ukara Abasi ndidi ndida itie ukara eke usen-ke-usen. Ke ama eketịn̄ aban̄a ndiọi utịp edikpu eke ukara owo oro nnyịn ikụtde ke isua ikie emi, Jesus ama ọdọhọ ete: “Ke ini mbufo ẹkụtde nte mme n̄kpọ ẹmi ẹtịbede, ẹfiọk ẹte Ubọn̄ Abasi ke ekpere.”—Luke 21:10, 11, 31.
Ibịghike, Abasi eyesio ndiọi owo efep ke edinam eke isọn̄. Ikọ andiwet psalm ẹyenyene se ẹwọrọde ke ataata usụn̄: “Ẹyekpok mme idiọkowo ẹfep . . . Koro osụk esisịt idiọkowo ididụhe: ndien ke afo etịn̄de enyịn ke ebiet esie, enye ididụhe.” (Psalm 37:9, 10) Nte afo emekeme ndida n̄kụt ererimbot emi idiọkido mîdụhe? Anie edise iban̄a mme n̄kpọ adan̄aoro? Bible ọdọhọ ete: “Edidem [Jesus Christ oro ẹdoride ke ebekpo ke heaven] eyekama obio nte enende; amaedi mbọn̄ [mme anam akpanikọ mbon oro enye emekde ke isọn̄], mmọ n̄ko ẹyeda ubọn̄ ke eti ido. Ndien se edinen ido anamde edi emem; utịp eti ido onyụn̄ edi nduọkodudu ye ifụre ke nsinsi. Ndien ikọt mi ẹyedụn̄ ke ufọk emem, ye ke idụn̄ ifụre, ye ke ebiet nduọkodudu eke edide sụn̄sụn̄.”—Isaiah 32:1, 17, 18.
Ntre, ukara Abasi eke heaven eyesio ndiọi utịp otode ndiọi edinam owo efep onyụn̄ otịm mbon oro ẹdoride enyịn ke enye idem esịn ke n̄ka ubonowo oro odude ke n̄kemuyo. Ke anamde n̄kemuyo emi an̄wan̄a, Bible ọdọhọ ete: “Wolf eyedụn̄ ye eyenerọn̄, nawuri ekpe eyenyụn̄ osụhọde ana ye eyenebot: eyenenan̄, ye abak lion, ye enan̄ ubom, ẹyenyụn̄ ẹna ọtọkiet: ekpri eyenọwọn̄ eyenyụn̄ akama mmọ . . . Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah eyeyọhọ ke ererimbot, kpa nte mmọn̄ ofụkde inyan̄.”—Isaiah 11:6-9.
Nso nnyayama utịp ke emi edi ntem ke Abasi ndime ime! Ntre, utu ke ndikụni nte ke Abasi emebet ebịghi akaha, ntak mûdaha ime esie unam n̄kpọ nte ọfọnde ndisụk idemfo nnọ Obio Ubọn̄ esie? Kpep to Bible se idide mme edumbet esie nnyụn̄ du uwem ekekem ye mmọ. Buana ye mmọ oro ke n̄kemuyo ẹsụkde idem ẹnọ enye. Do, ime Abasi eyesụn̄ọ ke nsinsi edidiọn̄ ọnọ fi.