Ndikọri Mbun̄wụm Mfara ke Idem
“Mbun̄wụm spirit edi ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem; baba ibet kiet ibiọn̄ọke orụk edu emi.”—GALATIA 5:22, 23.
1. Mmanie ẹnọ nnyịn mfọnn̄kan uwụtn̄kpọ mfara ke idem, nte ẹkụtde ke mme itien̄wed ewe?
JEHOVAH ABASI ye Jesus Christ ẹmenọ nnyịn mfọnn̄kan uwụtn̄kpọ mfara ke idem. Toto ke nsọn̄ibuot owo ke in̄wan̄ Eden, Jehovah ama akaiso ndiwụt edu emi. (Men Isaiah 42:14 domo.) Ke N̄wed Abasi usem Hebrew nnyịn ikot utịm ike-usụkkiet nte ke enye “isọpke iyatesịt.” (Exodus 34:6, NW) Oro oyom mfara ke idem. Ndien ke akpanikọ Eyen Abasi ama owụt ọkpọsọn̄ mfara ke idem, koro “ke ini owo osụn̄ide Enye, Enye isụn̄ike mmọ usiene.” (1 Peter 2:23) Edi, Jesus ama ekeme ndikpeben̄e Ete esie eke heaven mbọ “se ibede legion mme angel duopeba.”—Matthew 26:53.
2. Nso nti uwụtn̄kpọ N̄wed Abasi ke nnyịn inyene iban̄a mme anana mfọnmma owo oro ẹkewụtde mfara ke idem?
2 Nnyịn n̄ko imenyene nti uwụtn̄kpọ N̄wed Abasi aban̄ade mfara ke idem emi mme anana mfọnmma owo ẹkewụtde. Ke uwụtn̄kpọ, ẹma ẹwụt edu emi ke ini ọwọrọetop n̄kpọntịbe okotịbede ke uwem Joseph, eyen ete-ekpụk Jacob. Nso mfara ke idem ke Joseph okowụt ntem ke ini n̄wan Potiphar okodomode nditap enye! (Genesis 39:7-9) Eti uwụtn̄kpọ mme uyen Hebrew inan̄ oro ẹkewụtde mfara ke idem ke ndisịn ndidia ndinem udia edidem Babylon ke ntak mme ukpan eke Ibet Moses ama odu n̄ko.—Daniel 1:8-17.
3. Mmanie ke ẹtịm ẹdiọn̄ọ kaban̄a eti edu mmọ, nte ẹkụtde ke ewe ikọ ntiense?
3 Ke se iban̄ade mme uwụtn̄kpọ mfara ke idem eyomfịn, nnyịn imekeme ndinyan ubọk n̄wụt Mme Ntiense Jehovah ke ofụri ofụri. Mmọ ẹdot ndibọ itoro oro New Catholic Encyclopedia ọnọde mmọ—nte ke mmọ ẹdi “kiet ke otu mbon oro ẹdude eti uwem ẹkan ke ererimbot.” Andikpep kiet ke unifesiti ke Philippine ọkọdọhọ ete ke “Mme Ntiense ẹnen̄ede ẹnam se mmọ ẹkpepde ẹto N̄wed Abasi.” Kaban̄a mbono Mme Ntiense ke Warsaw ke 1989, ọkọmbụk n̄kpọntịbe owo Poland kiet ekewet ete: “Owo 55,000 ikọn̄wọn̄ke ndomo sika kiet ke usen ita! . . . Ediwụt emi ẹwụtde ntụnọ oro akande eke owo mi ama otụk mi ke idem ye ima oro abuahade ye uten̄e.”
Ndibak Abasi ye Ndisua se Idiọkde
4. Nso idi kiet ke otu n̄kponn̄kan un̄wam ke ndiwụt mfara ke idem?
4 Kiet ke otu n̄kponn̄kan un̄wam ke ndikọri mfara ke idem edi mbak Abasi, kpa ntotụn̄ọ mbak oro nnyịn inyenede man idiyat ima ima Ete nnyịn eke heaven esịt. Ẹkeme ndikụt nte ukpono ukpono mbak Abasi ekpedide akpan n̄kpọ ọnọ nnyịn ke akpanikọ oro nte ke N̄wed Abasi asiak enye ediwak ini. Ke ini Abraham okoyomde ndiwa eyen esie Isaac, Abasi ọkọdọhọ ete: “Kûda ubọk fo utụk eyen oro, kûnyụn̄ unam enye baba n̄kpọ kiet: koro kemi ke mfiọk nte afo efefehe Abasi, afo unyụn̄ usịnke mi eyen fo kierakiet.” (Genesis 22:12) Mfụhọ eke ntụk nte eyịghe mîdụhe ama okpon, ntre anaedi ama oyom ọkpọsọn̄ mfara ke idem ke n̄kan̄ Abraham man akaiso ke ewụhọ Abasi okosịm idaha edimenede ikwa esie ndiwot edima eyen esie Isaac. Ih, mbak Abasi eyen̄wam nnyịn ndiwụt mfara ke idem.
5. Nso udeme ke edisua se idiọkde enyene ke nnyịn ndiwụt mfara ke idem?
5 Se inyenede n̄kpet n̄kpet ebuana ye mbak oro ẹnyenede ẹnọ Jehovah edi edisua se idiọkde. Nnyịn ikot ke Mme N̄ke 8:13 ite: “Uten̄e Jehovah edi ndisua idiọk.” Ke n̄kan̄ eken, edisua se idiọkde n̄ko esin̄wam nnyịn ndiwụt mfara ke idem. Ediwak ini, N̄wed Abasi asian nnyịn ete isua—ih, isọn—se idiọkde. (Psalm 97:10; Amos 5:14, 15; Rome 12:9) Sia se idiọkde esiwakde nditie inem inem, idomo idomo, etabi etabi, anam ana nnyịn ikam isua enye man ikeme ndisọn̄ idem nnyịn esịt n̄wana mbiọn̄ọ enye. Kpukpru utọ edisua se idiọkde oro esinyene utịp edisọn̄ọ ubiere nnyịn ndiwụt mfara ke idem ndien ke ntre anam n̄kpọ nte ukpeme ọnọ nnyịn.
Mfara ke Idem, Usụn̄ Eti Ibuot
6. Ntak edide edinam owụtde eti ibuot ndikara ibụk ibụk ntụhọ nnyịn ebe ke ndiwụt mfara ke idem?
6 Akamba un̄wam efen ke nnyịn ndiwụt mfara ke idem edi ndidiọn̄ọ eti ibuot oro odude ke ndiwụt edu emi. Jehovah ọdọhọ nnyịn iwụt mfara ke idem ke ntak ufọn nnyịn. (Men Isaiah 48:17, 18 domo.) Ikọ esie esịne ekese item emi ẹwụtde nte owụtde eti ibuot ndikara ibụk ibụk ntụhọ nnyịn ebe ke ndiwụt mfara ke idem. Nnyịn ikemeke ndibọhọ mme ibet Abasi oro mîkemeke ndikpụhọde mmemmem mmemmem. Ikọ esie asian nnyịn ete: “Se ededi owo ọtọde, oro ke enye edinyụn̄ ọdọk. Owo eke ọtọde ọnọ obụkidem eyedọk mbiara oto obụkidem; edi owo eke ọtọde ọnọ spirit, oto ke spirit ke enye eyedọk nsinsi uwem.” (Galatia 6:7, 8) In̄wan̄în̄wan̄ uwụtn̄kpọ kiet edi enyeoro aban̄ade edidia ye edin̄wọn̄ n̄kpọ. Ediwak udọn̄ọ otịbe koro mme owo ẹdiade m̀mê ẹn̄wọn̄de n̄kpọ ebe ubọk. Kpukpru utọ ediyak idem nnọ ibụk ibụk udọn̄ oro esibọ owo ukpono oro enye enyenede ọnọ idem. Ke akande oro, owo ikemeke ndiyak idem nnọ ibụk ibụk udọn̄ ye unana enye n̄ko ndibiat itie ebuana esie ye mmọ en̄wen. Ke ọdiọkde akan kpukpru n̄kpọ, unana mfara ke idem abiat itie ebuana nnyịn ye Ete nnyịn eke heaven.
7. Nso idi akpan ibuotikọ n̄wed Mme N̄ke, nte ẹwụtde ke mme itien̄wed Bible ewe?
7 Ke ntre, ana nnyịn ikaiso isian idem nnyịn nte ke ibụk edi edinọ idem unan. N̄wọrọnda ibuotikọ kiet ke Mme N̄ke, emi ọsọn̄ọde etịn̄ edinọ idem ntụnọ, edi nte ke ibụk isikam inyeneke ufọn ndien ke eti ibuot odu ke ndiwụt mfara ke idem. (Mme N̄ke 14:29; 16:32) N̄ko ana ẹtịm ẹfiọk nte ke unọ idem ntụnọ esịne ekese n̄kpọ akan ikpîkpu editre se idiọkde. Unọ idem ntụnọ, m̀mê mfara ke idem, edi n̄ko se ẹyomde man ẹnam se inende, emi ekemede ndidi ọkpọsọn̄ n̄kpọ ke ntak emi oro ọbiọn̄ọde-biọn̄ọ mme ntụhọ unam idiọk nnyịn.
8. Nso ifiọk n̄kpọntịbe inam an̄wan̄a eti ibuot oro odude ke ediwụt mfara ke idem?
8 Ndinam eti ibuot oro odude ke ediwụt mfara ke idem an̄wan̄a edi n̄kpọ aban̄ade kiet ke otu Mme Ntiense Jehovah adade ke udịm ke ban̄k ke ini eren kiet ebede enye iso. Okposụkedi Ntiense oro okokopde iyatesịt esisịt, enye ama owụt mfara ke idem. Kpa ke usen oro enye ekenyene ndika n̄kokụt ata ọbọpufọk kiet man esịn ubọk ke ndusụk n̄wed ubọpufọk Ufọkmbono Obio Ubọn̄. Ndien anie ke ata ọbọpufọk emi ekedi? Kamse, kpa owo oro ekebede enye iso ke ban̄k! Idịghe n̄kukụre ata ọbọpufọk oro nditie ata ufan ufan edi enye ama ọbọ Ntiense oro ekọmurua oro osụhọrede akan mbahade kiet ke itie duop ke ofụri ekọmurua oro ẹsibọde. Ntiense oro okokop inemesịt didie ntem nte ke imọ ima iwụt mfara ke idem mbemiso ke usen oro, iyakke idem imọ ọsọp okop iyatesịt!
9. Nso idi edinam owụtde eti ibuot ke ini nnyịn isobode ye esuene esuene edinam ke utom ukwọrọikọ?
9 Ediwak ini ke ini nnyịn isan̄ade to ke enyịnusụn̄ sịm enyịnusụn̄ ikwọrọde eti mbụk Obio Ubọn̄ Abasi m̀mê idade ke inụk efak idomode ndinam mme andisan̄a mbe ẹnyene udọn̄ ke etop nnyịn, nnyịn imesisobo esuene esuene utịn̄ikọ. Nso idi usụn̄ owụtde eti ibuot? Ẹtịn̄ ọniọn̄ ọniọn̄ ikọ emi ke Mme N̄ke 15:1 ẹte: “Sụn̄sụn̄ ibọrọ akabade ifiopesịt efep.” Ke ikọ efen, oyom nnyịn iwụt mfara ke idem. Ndien idịghe Mme Ntiense Jehovah ikpọn̄ ẹkụt nte emi edide akpanikọ edi mmọ efen n̄ko ẹtiene ẹkụt. Ukeme unam udọn̄ọ okụre oro mfara ke idem enyenede edi se ifiọk ibọkusọbọ otịmde ọdiọn̄ọ.
Ima Unana Ibụk Esin̄wam
10, 11. Ntak emi ima edide ata un̄wam ke ndiwụt mfara ke idem?
10 Nte Paul etịn̄de aban̄a ima ke 1 Corinth 13:4-8 owụt nte ke odudu esie ekeme ndin̄wam nnyịn ndiwụt mfara ke idem. “Ima enyenyene anyanime.” Oyom mfara ke idem man ẹnyene anyanime. “Ima ifụbeke ufụp, ima inamke inua, ikohokede idem.” Edu ima esin̄wam nnyịn ndikara mme ekikere ye ntụk nnyịn, ndikara ntụhọ ekededi ndifụbe ufụp, ndinam inua, m̀mê ndikohode idem. Ima esinụk nnyịn ndikam ndi se idide isio ye oro, anamde nnyịn isụhọde idem, inyene ifụre ifụre ido, nte Jesus ekenyenede.—Matthew 11:28-30.
11 Paul akaiso ndidọhọ nte ke ima “inamke ido eke mîdotke.” Enye n̄ko oyom mfara ke idem man inam n̄kpọ nte odotde kpukpru ini. Edu ima esikpan nnyịn ndidiọk itọn̄, ndisịn idem ofụri ofụri ‘ke ndiyom ufọn idem nnyịn.’ Ima “isọpke iyatesịt.” Edi mmemmem n̄kpọ didie ntem ndikop iyatesịt ke ntak se mmọ en̄wen ẹtịn̄de m̀mê ẹnamde! Edi ima eyen̄wam nnyịn ndiwụt mfara ke idem ndien itrede nditịn̄ m̀mê ndinam mme n̄kpọ oro nnyịn idituade n̄kpọfiọk ke oro ebede. Ima “ikamake udu.” Uduot owo enyene ntụhọ ukama udu m̀mê ndisịn ikọ ke esịt. Edi ima eyen̄wam nnyịn ndision̄o mme utọ ekikere oro mfep ke ekikere nnyịn. Ima “idarake se ikwan̄ade.” Esiyom mfara ke idem man ikûnem esịt ke se ikwan̄ade, utọ nte n̄wed ndise idan̄ m̀mê oburobụt ndise usuanetop n̄kpọurua TV. Ima n̄ko “ememe kpukpru n̄kpọ” onyụn̄ “ememe ime ke kpukpru n̄kpọ.” Esiyom mfara ke idem man ẹyọ mme n̄kpọ, man ẹyọ idomo m̀mê mme n̄kpọ oro ẹdobide inyụn̄ iyakke mmọ ẹnam idem emem nnyịn, ẹnam nnyịn isio usiene, m̀mê ẹnụk nnyịn itre ndinam n̄kpọ Jehovah.
12. Nso idi usụn̄ kiet ndiwụt esịtekọm oro nnyịn inyenede inọ kpukpru se Jehovah Abasi ye Jesus Christ ẹnamde ẹnọ nnyịn?
12 Edieke nnyịn inen̄erede ima Ete nnyịn eke heaven inyụn̄ iwụtde esịtekọm iban̄a mme utịbe utịbe edu esie ye kpukpru se enye anamde ọnọ nnyịn, nnyịn iyeyom ndinem enye esịt ke ndiwụt mfara ke idem kpukpru ini. N̄ko, edieke nnyịn inen̄erede ima Ọbọn̄ ye Etubom nnyịn, Jesus Christ, inyụn̄ iwụtde esịtekọm ke kpukpru se enye akanamde ọnọ nnyịn, nnyịn iyenam ewụhọ esie ke ‘ndimen eto ndutụhọ nnyịn ntiene enye kpukpru ini.’ (Mark 8:34, NW) Oro ke akpanikọ oyom ete nnyịn iwụt mfara ke idem. Ima oro nnyịn inyenede inọ nditọete Christian nnyịn iren ye iban n̄ko eyekpan nnyịn ndinọ mmọ unan ke nditiene ndusụk ibụk ibụk usụn̄uwem.
Mbuọtidem ye Nsụhọdeidem Nte N̄kpọ Un̄wam
13. Ntak emi mbuọtidem ekemede ndin̄wam nnyịn ndiwụt mfara ke idem?
13 Akamba un̄wam efen ke ndiwụt mfara ke idem edi mbuọtidem ke Abasi ye mme un̄wọn̄ọ esie. Mbuọtidem eyen̄wam nnyịn ndinyene uko ke Jehovah nnyụn̄ mbet edikem ini esie ndinen̄ede mme n̄kpọ nnịm. Apostle Paul etịn̄ ukem akpan n̄kpọ emi ke ini enye ọdọhọde ke N̄wed Mbon Rome 12:19 ete: “Ẹkûsio usiene ẹnọ idem mbufo, ndima mme ufan mi, . . . koro ẹwet ẹte, Jehovah ete, Usiene enyene Mi, Ami nyesio usiene.” Ke se iban̄ade emi, nsụhọdeidem ekeme ndin̄wam nnyịn n̄ko. Edieke nnyịn isụhọrede idem, nnyịn idisọpke ndiyat esịt mban̄a mme unan oro ikerede-kere m̀mê oro edide ataata unan. Nnyịn ke ibụmede, yak idọhọ, idibiatke ibet, edi iyewụt mfara ke idem inyụn̄ inyịme ndibet Jehovah.—Men Psalm 37:1, 8 domo.
14. Nso ifiọk n̄kpọntịbe iwụt nte ke idem mbon oro ẹnanade mfara ke idem ẹkeme ndinyene enye?
14 Nte ke nnyịn imekeme ndikpep ndiwụt mfara ke idem edi se ẹkenamde an̄wan̄a ọkpọsọn̄ ọkpọsọn̄ ke ifiọk n̄kpọntịbe aban̄ade eren kiet oro ekenyenede afai afai edu. Kamse, enye ama enyene utọ edu oro akanamde ke ini ẹkekotde borisi ẹdi ke ntak ntịme oro enye ye ete esie ẹkesịnde, enye ama amia borisi ita ekpere n̄kpa mbemiso mmọ eken ẹkekande enye ubọk! Nte ini akade, nte ededi, enye ama osobo ye Mme Ntiense Jehovah onyụn̄ ekpep ndiwụt mfara ke idem, kpa kiet ke otu mbun̄wụm spirit Abasi. (Galatia 5:22, 23) Mfịn, isua 30 ke ukperedem, eren emi ke osụk anam n̄kpọ Jehovah ke edinam akpanikọ.
Mfara ke Idem ke Ekpụk Ubon
15, 16. (a) Nso idin̄wam mme ebendọ ndiwụt mfara ke idem? (b) Ẹyom mfara ke idem akpan akpan ke nso idaha, nte ẹkụtde ke ewe ifiọk n̄kpọntịbe? (c) Ntak emi n̄wanndọ oyomde mfara ke idem?
15 Ke akpanikọ ẹyom mfara ke idem ke ekpụk ubon. Man ebe ama n̄wan esie nte enye amade idemesie oyom ete enye otịm akara mme ekikere, ikọ, ye edinam esie. (Ephesus 5:28, 29) Ih, esiyom mfara ke idem man mme ebendọ ẹnam mme ikọ apostle Peter ke 1 Peter 3:7: “Mbufo mme ebe ẹdu uwem ye iban mbufo nte mme enyene-ibuot owo.” Akpan akpan ke ini n̄wan esie mîdịghe andinịm ke akpanikọ ke ediyom ebe oro onịmde ke akpanikọ owụt mfara ke idem akan.
16 Ke ndinam emi an̄wan̄a: Ama odu ebiowo kiet emi ekenyenede ata ọdiọk-iyatesịt n̄wan emi mînịmke ke akpanikọ. Edi, enye ama owụt mfara ke idem, ndien emi ama ada ufọn ọsọk enye akamba akamba tutu dọkta esie asian enye ete: “John, anaedi afo ke obot enen̄ede edi ata owo ime mîdịghe afo emenyene okopodudu ido ukpono.” Nnyịn ke akpanikọ imenyene okopodudu ido ukpono, koro “Abasi ikọnọhọ nnyịn spirit ufep, edi spirit odudu ye ima ye mfaraidem [“eti ekikere,” NW],” an̄wamde nnyịn ndiwụt mfara ke idem. (2 Timothy 1:7) Adianade do, oyom mfara ke idem ke n̄kan̄ n̄wanndọ man osụk idem, akpan akpan ke ini ebe esie mîdịghe andinịm ke akpanikọ.—1 Peter 3:1-4.
17. Ntak emi mfara ke idem edide akpan n̄kpọ ke itie ebuana ete m̀mê eka ye eyen?
17 Mfara ke idem edi n̄ko se ẹyomde ke itie ebuana ete m̀mê eka ye eyen. Man ẹnyene nditọ ẹmi ẹfarade ke idem, mme ete ye eka ke idemmọ ana ẹbemiso ẹnịm eti uwụtn̄kpọ. Ndien ke ini oyomde ẹnọ nditọn̄wọn̄ ntụnọ kiet m̀mê eken, ẹkpenyene ndinọ enye kpukpru ini ke sụn̄sụn̄ ido ye ke ima, emi oyomde ata mfara ke idem. (Ephesus 6:4; Colossae 3:21) Ndien n̄ko, man nditọn̄wọn̄ ẹwụt ẹte ke mmimọ imenen̄ede ima mme ete ye eka mmimọ oyom n̄kopitem, ndien n̄kopitem enen̄ede oyom mfara ke idem.—Ephesus 6:1-3; men 1 John 5:3 domo.
Ndida Un̄wam Oro Abasi Ọnọde Nnam N̄kpọ
18-20. Mme ewe enọ eke spirit ita ke ana nnyịn ida inam n̄kpọ nte ọfọnde man ikọri mme edu oro edin̄wamde nnyịn ndiwụt mfara ke idem?
18 Man ikọri ke mbak Abasi, ke ima unana ibụk, ke mbuọtidem, ke ndisua se idiọkde, ye ke mfara ke idem, oyom nnyịn ida kpukpru un̄wam oro Jehovah Abasi ọnọde inam n̄kpọ nte ọfọnde. Ẹyak nnyịn idụn̄ọde ndutịm eke spirit ita oro ẹkemede ndin̄wam nnyịn ndiwụt mfara ke idem. Akpa kan̄a, ọsọn̄urua ifet ndibọn̄ akam odu. Ẹyak nnyịn ikûdede inana ini ikaha ndibọn̄ akam. Ih, ikpanaha nnyịn inyene udọn̄ ‘edidop akam,’ ‘ikpọkọbọ ke edibọn̄ akam.’ (1 Thessalonica 5:17; Rome 12:12) Ẹyak nnyịn inam edikọri mfara ke idem edi n̄kpọ oro ibọn̄de akam iyom. Edi ke ini nnyịn iduede ndiwụt mfara ke idem, ẹyak nnyịn ye esịt utua n̄kpọfiọk ikpe Ete nnyịn eke heaven ubọk iyom edifen.
19 Ọyọhọ ikpehe un̄wam iba ke ndiyom mfara ke idem edi edibọ un̄wam oro otode ke edidia nyụhọ ke Ikọ Abasi ye n̄wed oro an̄wamde nnyịn ndidiọn̄ọ nnyụn̄ nda mme Itien̄wed Abasi nsịn ke edinam. Edi ata mmemmem n̄kpọ ndifụmi ikpehe edisana utom enyeemi! Ana nnyịn iwụt mfara ke idem inyụn̄ ikaiso ndisian idem nnyịn nte ke idụhe edikot n̄wed oro edide akpan n̄kpọ akan Bible ye enyeoro “asan̄autom emi anamde akpanikọ, onyụn̄ enyenede ọniọn̄” ọnọde, ndien ke ntre ana nnyịn ida enye nte ebeiso n̄kpọ. (Matthew 24:45-47) Ẹsitịn̄ mfọn mfọn nte ke nnyịn ikemeke ndinam kpukpru n̄kpọ ke uwem eke usen ke usen, edi nnyịn inyene ndimek se nnyịn ididade ini nnyịn inam. Nte nnyịn inen̄ede idi irenowo ye iban eke spirit? Edieke nnyịn inyenede udọn̄ iban̄a n̄kpọ eke spirit nnyịn, nnyịn iyewụt mfara ke idem oro ẹyomde man ikọbi TV inyụn̄ inam ntịmidem inọ mme mbonoesop nnyịn m̀mê ikot Enyọn̄-Ukpeme oro osụk otode itie ubọn̄wed edibehe.
20 Ọyọhọ ita, odu n̄kpọ oro aban̄ade edinam unen nnọ mme mbonoesop ye n̄kpri ye ikpọ mbono. Ndi nnyịn imokụt ite ke imesidụk kpukpru utọ mbono oro? Nte nnyịn imesidi ye ntịmidem nditiene mbuana ndien ekem inam ntre nte nnyịn inyenede ifet? Adan̄a nte nnyịn inamde unen inọ mme mbonoesop nnyịn, adan̄a ntre ke nnyịn idinyene nsọn̄idem ke ubiere nnyịn ndiwụt mfara ke idem ke kpukpru idaha.
21. Nso idi ndusụk utịp oro nnyịn ikemede ndinyene ke ndikọri mbun̄wụm spirit edide mfara ke idem?
21 Nso mme utịp ke nnyịn ikeme ndidori enyịn ke ndidomo ọkpọsọn̄ ndiwụt mfara ke idem ke kpukpru ini? N̄kpọ kiet edi, nnyịn tutu amama ididọkke ndotndot mbun̄wụm ibụk. Nnyịn iyenyene ukpono inọ idem ye eti ubieresịt. Nnyịn iyesio idem nnyịn ifep ke ata ediwak mfịna iyenyụn̄ isọn̄ọ idu ke usụn̄ adade osịm uwem. N̄ko-n̄ko, nnyịn iyekeme ndinam n̄kponn̄kan eti n̄kpọ nte ikekeme inọ mmọ efen. Akande kpukpru n̄kpọ, nnyịn iyenam se Mme N̄ke 27:11 ọdọhọde ete: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” Ndien oro edi n̄kponn̄kan utịp oro nnyịn ikemede ndinyene—kpa ifet ndinam esịt ima ima Ete nnyịn eke heaven, Jehovah, adat!
Nte Afo Emeti?
◻ Didie ke mbak Abasi an̄wam nnyịn ndiwụt mfara ke idem?
◻ Ntak emi ima an̄wamde nnyịn ndiwụt mfara ke idem?
◻ Didie ke mfara ke idem an̄wam ke itie ebuana ubon?
◻ Mme enọ ewe ke ana nnyịn ida inam n̄kpọ nte ọfọnde edieke nnyịn iyomde ndikọri mfara ke idem?
[Ndise ke page 15]
Joseph ama owụt mfara ke idem ke ini ẹkedomode enye
[Ndise ke page 17]
Unọ eyen ntụnọ oro ẹnamde ke sụn̄sụn̄ ido ye ima oyom ata mfara ke idem