Ẹten̄e Jehovah Ẹnyụn̄ Ẹnọ Edisana Enyịn̄ Esie Ubọn̄
“Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄? Koro Afo ikpọn̄ edi edisana [“anam-akpanikọ,” NW].”—EDIYARADE 15:4.
1, 2. (a) Didie ke Jehovah ekeberede window heaven ke 1991? (b) Ewe ifiọk eyouwem akanam anam-akpanikọ isụn̄utom ọnọ item emi: “Ẹten̄e Jehovah”? (Se n̄ko 1991 Yearbook, page 187-189.)
JEHOVAH ‘ama eberede window heaven, onyụn̄ an̄wan̄a nti n̄kpọ tutu akaha.’ Ẹkeme ndida mme ikọ oro ntịn̄ mfiak ntịn̄ mban̄a Mme Ntiense Jehovah ke mme ini ndondo emi. (Malachi 3:10) Ke uwụtn̄kpọ, ke isua utom 1991, idatesịt Mme Ntiense oro ẹketode-to ẹdi ye mme odụk mbono oro ẹtode n̄kann̄kụk oro ama ọyọhọ ọduọhọ ke ebuana Christian ke san̄asan̄a mbono oro ẹkenịmde ke ofụri isọn̄—ọtọn̄ọde ke Mbono “Edisana Usem” ke Buenos Aires ke South America; ye Manila, Taipei, osịm Mbono “Mme Ama Ubọhọ-Ufụn” ke Bangkok ke N̄kan̄ Edem Usiahautịn ye Budapest, Prague, ye Zagreb (August 16-18, 1991) ke Edem Usiahautịn Europe.
2 Nso n̄kpọ idatesịt ke ekedi ntem ọnọ mme odụk mbono oro ẹketode esenidụt ẹdi mi ndisobo ye Mme Ntienese oro ẹnamde akpanikọ ke anyanini ke mme idụt oro! Ke uwụtn̄kpọ, ke Bangkok, Frank Dewar—emi ini kiet ko ekedide n̄kukụre asuanetop Obio Ubọn̄ ke Thailand—ama etịn̄ aban̄a utom isụn̄utom esie ke isua 58. Utom esie ọkọtọn̄ọ ke mme isuo Pacific osịm usụk usụk Edem Usiahautịn Asia, idem onyụn̄ osịmde China. Enye ama osobo mme n̄kpọndịk otode nsụn̄ikan̄ ndisịp, ndiọi unam ke mme akai ikọt, mme udọn̄ọ ẹtode idụt ufiopeyo, ye ibak ibak ukara mbonekọn̄ Japan. Ke ini ẹkebụpde m̀mê nso item ke enye ọkpọnọ mme odụk mbono, ibọrọ esie ekedi mmemmem: “Ẹten̄e Jehaovh!”
3. Ntak emi nnyịn ikpenyenede uten̄e Abasi?
3 “Ẹten̄e Jehovah!” Edi akpan n̄kpọ didie ntem ọnọ kpukpru nnyịn ndikọri ata uten̄e oro! “Uten̄e Jehovah edi editọn̄ọ ifiọk.” (Psalm 111:10) Uten̄e emi idịghe ndinyene ekikere oyomonsia mban̄a Jehovah. Utu ke oro, enye edi ntotụn̄ọ ukpono ẹnyenede enọ akwa uten̄e ye mme edu esie, ọkọn̄ọde ke ikike oro nnyịn inyenede ebe ke edikpep Ikọ Abasi. Ke Ediyarade 15:3, 4, ikwọ Moses ye eke Eyenerọn̄ ọdọhọ ete: “Mme utom Fo ẹkponi ẹnyụn̄ ẹnyene ndyọ, O Ọbọn̄ Abasi, Andikara kpukpru n̄kpọ; mme usụn̄ Fo ẹnen ẹnyụn̄ ẹdi akpanikọ, O Edidem mme obio. Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄? Koro Afo ikpọn̄ edi edisana [”anam-akpanikọ,” NW].” Ke ndinam akpanikọ nnọ mme andituak ibuot nnọ enye, Jehovah “ewet n̄wed editi ke iso esie [ọnọ] mme abak Jehovah ye mme ekere enyịn̄ esie.” Ẹnọ mmọ utịp uwem nsinsi. —Malachi 3:16; Ediyarade 20:12, 15.
Uten̄e Abasi Amakan
4. Ewe edinyan̄a ke ini eset ekpesịn udọn̄ ọnọ nnyịn nditen̄e Jehovah?
4 Ke ini Israel akasan̄ade ọwọrọ ke Egypt Pharaoh, Moses ama owụt in̄wan̄în̄wan̄ nte ke imọ iketen̄e Jehovah kpọt. Ikebịghike, Ididuot Inyan̄ ye ọkpọsọn̄ udịmekọn̄ nditọ Egypt ẹma ẹkan nditọ Israel ẹkụk. Nso ke mmọ ẹkpenam? “Moses ọdọhọ kpukpru owo, ete, Mbufo ẹkûfehe ndịk, ẹtuak ẹda, ẹnyụn̄ ẹkụt edinyan̄a Jehovah, emi enye edinyan̄ade mbufo mfịn emi: koro nte emi mbufo ẹkụtde nditọ Egypt mfịn emi, mbufo idikwe aba mmọ ke nsinsi. Jehovah eyen̄wana ekọn̄ ọnọ mbufo, edi mbufo ẹkam ẹdop uyo.” Ke utịbe utịbe usụn̄, Jehovah ama abahade mmọn̄ oro. Nditọ Israel ẹma ẹsan̄a ke isọn̄ inyan̄ ẹbe. Ndien mmọn̄ ama afiak ọtọ ediyọhọ. Ẹma ẹsọhi udịmekọn̄ Pharaoh ẹfep. Jehovah ama anyan̄a idụt oro eketen̄ede enye do, ke adan̄aemi ke ukem ini oro okosobode Egypt emi mîkokponoke Abasi. Ukem oro mfịn, enye eyewụt edinam akpanikọ esie ke ndinyan̄a Mme Ntiense esie oro ẹten̄ede Abasi nsio ke ererimbot Satan.—Exodus 14:13, 14; Rome 15:4.
5, 6. Mme n̄kpọntịbe ewe ke eyo Joshua ẹwụt nte ke nnyịn ikpenyene nditen̄e Jehovah utu ke owo?
5 Ke Uwọrọidụn̄ oro ke Egypt ebede, Moses ama ọdọn̄ mbon uyep 12 ẹka Isọn̄ Un̄wọn̄ọ. Owo duop ẹma ẹkop ndịk ke ẹkụtde ikpọ mme andidụn̄ obio oro ẹnyụn̄ ẹdomo ndikpan Israel ndidụk isọn̄ oro. Edi iba eken, Joshua ye Caleb, ẹma ẹtọt ẹte: “[Enye] edi ata eti isọn̄. Edieke nnyịn inemde Jehovah esịt, enye eyeda nnyịn odụk ke isọn̄ oro, onyụn̄ ada enye ọnọ nnyịn; isọn̄ emi ọfiọrọde mmọn̄eba ye aranọkwọk. Edi mbufo ẹkûtụn itụn ye Jehovah, ẹkûnyụn̄ ẹfehe nditọ isọn̄ oro: koro mmọ ẹdi udia nnyịn: ibetedem mmọ amakabade ọkpọn̄ mmọ, ndien Jehovah odu ye nnyịn; mbufo ẹkûfehe mmọ.”—Numbers 14:7-9.
6 Nte ededi, nditọ Israel oro ẹma ẹyak idem ẹnọ ndịk owo. Nte utịp, mmọ ikedehede isịm isọn̄ un̄wọn̄ọ. Edi Joshua ye Caleb, adianade ye obufa emana nditọ Israel, ẹma ẹnyene ifet ndidụk edimek isọn̄ oro nnyụn̄ ntọ in̄wan̄ vine ye in̄wan̄ olive esie. Ke akpatre ikọ oro enye eketịn̄de ọnọ esop Isreal, Joshua ama ọnọ item emi: “Mbufo ẹbak Jehovah, ndien, ẹnyụn̄ ẹnam n̄kpọ esie ke esịt kiet, ye ke akpanikọ.” Ndien Joshua ama adian do ete: “Edi amaedi ami ye ufọk mi, nnyịn iyenam n̄kpọ Jehovah.” (Joshua 24:14, 15) Nso ikọ nsịnudọn̄ ke edi ntem ọnọ mme ibuotufọk ye mmọ en̄wen nditen̄e Jehovah nte nnyịn iben̄ede idem ndibe ndụk edinen obufa ererimbot Abasi!
7. Didie ke David okodori nsọn̄uyo ke nte uten̄e Abasi edide akpan n̄kpọ?
7 Ekpri ekpemerọn̄ oro David ama onịm n̄ko uwụtn̄kpọ uten̄e Jehovah ke ini enye akan̄wanade ye Goliath ke enyịn̄ Abasi. (1 Samuel 17:45, 47) Ke nna n̄kpa esie, David ama ekeme ndidọhọ ete: “Spirit Jehovah ada mi etịn̄ ikọ, uyo esie onyụn̄ odu mi ke edeme. Abasi Israel ọdọhọ, Akwa Itiat Israel etịn̄ ọnọ mi, ete, Edinen Andikara owo eyedu, ada uten̄e Abasi akara; ndien enye eyebiet un̄wana usenubọk, ke utịn asiahade, eke uyama mîyakke mbubịt enyọn̄ odu.” (2 Samuel 23:2-4) Uten̄e Abasi emi idụhe ke otu mme andikara ererimbot, ndien utịp edi n̄kpọ mmọn̄eyet didie ntem! Edidi isio n̄kpọ didie ntem ke ini Jesus, “Eyen David,” akarade isọn̄ ke uten̄e Jehovah!—Matthew 21:9.
Ndinam N̄kpọ ke Uten̄e Jehovah
8. Ntak emi Judah okoforode ke idak ukara Jehoshaphat, owụtde nso n̄kpọ kaban̄a mfịn?
8 Ke n̄kpọ nte isua ikie ebede ke David ama akakpa, Jehoshaphat ama akabade edi edidem ke Judah. Enye n̄ko ekedi edidem oro akanamde n̄kpọ ke uten̄e Jehovah. Enye ama afiak owụk ndutịm ukara Abasi ke Judah, obon mme ebiereikpe ke ofụri idụt oro, onyụn̄ ọnọ mmọ item ẹmi: “[Idịghe] owo ke mbufo ẹkpe ẹnọ, edi ẹkpe ẹnọ Jehovah, ndien enye odu ye mbufo ke ikọ ikpe. Ẹyak ndịk Jehovah odoro mbufo, ndien; ẹkpeme idem ẹnyụn̄ ẹnam: koro baba mme ukwan̄n̄kpọ mîdụhe ye Jehovah Abasi nnyịn, baba uten̄e enyịn, edida enọ [”edibọ ubọkedem,” NW]. . . . Ntem ke mbufo ẹdinam ke uten̄e Jehovah, ye ke akpanikọ, ye ke esịt kiet.” (2 Chronicles 19:6-9) Ntem, Judah ama ọyọhọ ye uten̄e Jehovah, kpasụk nte ikọt Jehovah ẹbọde ufọn ẹto utom mme ima ima esenyịn mfịn.
9, 10. Didie ke Jehoshaphat akakan ke uten̄e Jehovah?
9 Nte ededi, Judah ama enyene mme asua. Mmọemi ẹma ẹbiere ndisọhi idụt Abasi mfep. Mbuaha udịmekọn̄ mbon Ammon, Moab, ye Obot Seir ẹma ẹdọk ẹka isọn̄ Judah ẹnyụn̄ ẹkesịn Jerusalem ndịk ke idem. Enye ekedi akwa udịmekọn̄. Jehoshaphat ama ọwọn̄ọde ebịne Jehovah ke akam “ndien ofụri Judah ada ke iso Jehovah, ye n̄kpri nditọn̄wọn̄ mmọ, ye iban mmọ, ye nditọ mmọ.” Ekem, ke ibọrọ akam oro, spirit Jehovah ama odụk Jahaziel owo Livite ke idem, emi ọkọdọhọde ete: “Ntem ke Jehovah ọdọhọ mbufo, ete, Mbufo ẹkûdịghe, nsia okûnyụn̄ oyomo mbufo ke iso akwa otuowo emi; koro mîdịghe mbufo ke ekọn̄ emi enyene, ke edi eke Abasi. Mbufo ẹsụhọde ẹbịne mmọ n̄kpọn̄: . . . Mbufo ẹkûkpa ndin̄wana.”—2 Chronicles 20:5-17.
10 Ke ndan̄nsiere, irenowo Judah ẹma ẹbabak ẹdemede. Nte mmọ ke n̄kopuyo ẹkewọrọde ẹka ndisobo ye mme asua, Jehoshaphat ama adaha ke enyọn̄ onyụn̄ ọdọhọ ete: “O Judah, ye mme andidụn̄ Jerusalem, mbufo ẹkop uyo mi: ẹberi idem mbufo ye Jehovah Abasi mbufo, ndien ẹyemụm mbufo ẹkama; ẹnịm uyo mme prọfet esie ke akpanikọ, ndien mbufo ẹyekụt unen.” Ke ẹsan̄ade ke iso mbonekọn̄ ẹmi, mbon oro ẹkwọde ikwọ ẹnọ Jehovah ẹma ẹdian uyo ẹkwọ ẹte: “Mbufo ẹtoro Jehovah; koro ima esie edide nsinsi.” Jehovah ama owụt ima-mfọnido oro ke ndisịn mme asua oro ke utọ ndutịme oro akanamde mmọ ẹwot kiet eken. Nte irenowo Judah emi ẹkedide enyọn̄-ukpeme ke wilderness, ekedi okpo mme asua kpọt ẹkedu.—2 Chronicles 20:20-24.
11. Ke se iban̄ade uten̄e, didie ke mme idụt ẹkpụhọde ye ikọt Abasi?
11 Ke ini mme idụt n̄kann̄kụk ẹkekopde ẹban̄a utịbe utịbe edinyan̄a emi, “ndịk Abasi” ama odoro mmọ. Ke n̄kan̄ eken, idụt oro okokopde uyo ke uten̄e Jehovah kemi ama enyene “nduọkodudu ke edem kpukpru.” (2 Chronicles 20:29, 30) Ukem oro n̄ko, ke ini Jehovah edibierede ikpe ke Armageddon, mme idụt ẹdidu ke “ndịk Abasi” ye Ebiereikpe Eyen esie, Jesus christ, ndien mmọ idikemeke ndida ke akwa usen iyatesịt Abasi.—Ediyarade 6:15-17.
12. Nso idi ndusụk uwụtn̄kpọ mme anam-akpanikọ oro ẹkewụtde uten̄e Jehovah?
12 Eti uten̄e oro ẹnyenede ẹnọ Jehovah ada uwak edidiọn̄ edi. Noah, “ke uten̄e Abasi, ọkọn̄ ubom ndida nnyan̄a ufọk esie.” (Mme Hebrew 11:7) Ndien amaedi mme Christian akpa isua-ikie, ẹwet ẹte, ke etienede ini ukọbọ, ufọk Abasi “okụt ifụre, onyụn̄ ọkọri ke uwem Abasi . . . ẹsan̄a ke uten̄e Jehovah ye ke ndọn̄esịt edisana spirit, ẹnyụn̄ ẹtọt etieti”—ukem nte ẹnamde ke Edem Usiahautịn Europe.—Utom 9:31.
Ẹma se Ifọnde, Ẹsua se Idiọkde
13. Didie kpọt ke nnyịn ikeme ndinyene edidiọn̄ Jehovah?
13 Jehovah ọfọn ke kpukpru usụn̄. Ntem, “uten̄e Jehovah edi ndisua idiọk.” (Mme N̄ke 8:13) Ẹwet ẹban̄a Jesus ẹte: “Afo amama se inende, onyụn̄ asua se ikwan̄ade; mmọdo Abasi, kpa Abasi Fo, adade aran idatesịt eyet Fi akan mme nsan̄a Fo.” (Mme Hebrew 1:9) Edieke nnyịn, ukem nte Jesus, iyomde edidiọn̄ Jehovah, ana nnyịn isua idiọk, oburobụt ido, afai, ye idiọkitọn̄ okohode idem ererimbot Satan. (Men Mme N̄ke 6:16-19 domo.) Ana nnyịn ima se Jehovah amade inyụn̄ isua se enye asuade. Ana nnyịn ifehe ndinam n̄kpọ ekededi oro ediyatde Jehovah esịt. “Uten̄e Jehovah onyụn̄ esịn owo akabade ọkpọn̄ idiọk.”—Mme N̄ke 16:6.
14. Didie ke Jesus ọnọ nnyịn uwụtn̄kpọ?
14 Jesus ama ọkpọn̄ uwụtn̄kpọ ọnọ nnyịn ete nnyịn ikpetiene isan̄a ke nde ikpat imọ ketket. “Ke ini owo osụn̄ide Enye, Enye isụn̄ike mmọ usiene; ke ini Enye ebede ke ndutụhọ, Enye itịn̄ke ikọ ndịghe; edi ayak ikọ Esie esịn ke ubọk Andikpe edinen ikpe.” (1 Peter 2:21-23) Ke uten̄e Jehovah, nnyịn n̄ko imekeme ndiyọ esuene, nsahi, ukọbọ, oro ererimbot Satan adade etiene nnyịn.
15. Ntak emi nnyịn ikpeten̄ede Jehovah utu ke mbon oro ẹkemede ndiwot ikpọkidem?
15 Ke Matthew 10:28, Jesus ọnọ nnyịn item ete: “Ẹkûnyụn̄ ẹfehe mmọemi ẹwotde ikpọkidem, edi mîkemeke ndiwot ukpọn̄: edi ẹkam ẹfehe Enyeemi ekemede ndisobo ukpọn̄ ye ikpọkidem ke hell [”Gehenna,” NW].” Idem edieke asua okpowotde owo emi eten̄ede Jehovah, ubiak n̄kpa oro edi n̄kukụre ke ibio ini. (Hosea 13:14) Ke ẹma ẹkenam eset, owo oro eyekeme ndidọhọ ete: “O n̄kpa, edikan fo enye? O n̄kpa, ifọt fo enye?”—1 Corinth 15:55.
16. Didie ke Jesus okowụt uten̄e Jehovah onyụn̄ ọnọ enye ubọn̄?
16 Jesus ke idemesie ama onịm ata ediye uwụtn̄kpọ ọnọ kpukpru mbon oro ẹmade edinen ido Jehovah ẹnyụn̄ ẹsuade se idiọkde. Ẹwụt uten̄e oro enye eten̄ede Jehovah ke akpatre ikọ oro enye eketịn̄de ọnọ mme mbet esie, nte ẹkụtde ke John 16:33: “Ntịn̄ mme n̄kpọ ẹmi nnọ mbufo, man mbufo ẹnyene emem ke Idemmi. Mbufo ẹyekụt ukụt ke ererimbot: edi ẹsọn̄ esịt; Ami n̄kakan ererimbot.” Mbụk John akaiso ete: “Jesus etịn̄ mme ikọ ẹmi; ndien emenede enyịn ese enyọn̄, onyụn̄ ọdọhọ ete, Ete, ini emedi; nọ Eyen Fo ubọn̄, man Eyen Fo ọnọ Fi ubọn̄ . . . Mma nyarade enyịn̄ Fo nnọ mme owo ẹmi okosiode ke ererimbot ọnọ Mi.”—John 17:1-6.
Ẹten̄e Jehovah Ẹnyụn̄ Ẹtoro Enye
17. Ke mme usụn̄ ewe ke nnyịn ikeme ndikpebe uwụtn̄kpọ Jesus?
17 Nte nnyịn mfịn imekeme ndikpebe uko uko uwụtn̄kpọ Jesus? Ke akpanikọ nnyịn imekeme ke uten̄e Jehovah! Jesus ama anam nnyịn ifiọk akwa enyịn̄ ye mme edu Jehovah. Ke nditen̄e Jehovah nte Ọbọn̄ Andikara nnyịn, nnyịn imenede enye ke enyọn̄ ikan kpukpru mme abasi eken, esịnede anana enyịn̄, ndedịbe Abasi-Ita-ke-Kiet eke Christendom. Jesus akanam n̄kpọ Jehovah ye ọsọn̄idem uten̄e, esịnde ndiyak afia uten̄e owo oro ekemede ndikpa omụm enye. “Ke mme usen emi Enye odude ke obụkidem Enye ọkọbọn̄ akam onyụn̄ anam n̄kpeubọk ye ọkpọsọn̄ eseme ye mmọn̄eyet ọnọ Abasi emi ekemede ndinyan̄a Enye nsio ke n̄kpa, Abasi onyụn̄ eyere Enye, koro Enye eten̄ede Abasi.” Ukem nte Jesus, nnyịn n̄ko ikpetiene iten̄e Jehovah nte nnyịn ikade iso ndikpep nsụkibuot ke mme n̄kpọ oro nnyịn isobode—kpukpru ini ye nsinsi edinyan̄a nte utịtmbuba nnyịn.—Mme Hebrew 5:7-9.
18. Didie ke nnyịn ikeme ndinam edisana utom ye uten̄e Abasi nnọ Abasi?
18 Ekem ke n̄wed oro enye ekewetde ọnọ ẹsọk mme Christian Hebrew, Paul ama akpak mme Christian oro ẹyetde aran ete: “Sia nnyịn inyenede Obio Ubọn̄ eke n̄kpọ mîkemeke ndinyen̄e, yak nnyịn inyene esịtekọm, inyụn̄ ida emi inọ Abasi, utom eke enemde Enye esịt ke ukpono ye uten̄e.” Mfịn, “akwa otuowo” ẹtiene ẹbuana ke edisana utom oro. Ndien nso ke enye esịne? Ke ama ekeneme aban̄a mfọnido Jehovah oro owo mîdotke ke ndinọ uwa Eyen Esie, Jesus Christ, Paul ọdọhọ ete: “Yak nnyịn iwa uwa ekọm inọ Abasi kpukpru ini ke enyịn̄ Jesus, kpa mfri n̄kpọkinua eke ẹkponode enyịn̄ Esie.” (Mme Hebrew 12:28; 13:12, 15) Ke ndiwụt esịtekọm nnọ mfọnido Jehovah oro owo mîdotke, nnyịn iyeyom ndisịn ofụri ini oro ikemede ke edisana utom esie. Nte mme anam-akpanikọ nsan̄a nsụhọ mme Christian oro ẹyetde aran, akwa otuowo mfịn ke ẹnam ata akamba ubak utom oro. Edinyan̄a mmọemi esịne Abasi ye Christ ke ubọk, nte mmọ ke ndamban̄a usụn̄ ẹdade ke iso ebekpo Abasi, “ẹnam n̄kpọ ẹnọ Enye uwemeyo ye okoneyo.”—Ediyarade 7:9, 10, 15.
Ẹnọ Jehovah Ubọn̄ ke Nsinsi
19, 20. Ewe orụk uten̄e iba ẹdiwụt idem ke “usen Jehovah”?
19 Ubọn̄ ubọn̄ usen uwụt unen Jehovah ke asan̄a ekpere usop usop! “Sese, usen oro ke edi, ke asak nte usan̄uyo: ndien kpukpru mbon iseri, ye kpukpru mme anamidiọk ẹyekabade ẹdi etak nnyanyan̄a: ndien usen eke edidide eyeta mmọ, Jehovah mme udịm ọdọhọ.” Ini nsobo oro edi “akwa ye ndịk ndịk usen Jehovah.” (Malachi 4:1, 5) Enye eyesịn “nyomonsia” ke esịt ndiọi owo, ndien mmọemi “idikwe usụn̄ ubọhọ.”—Jeremiah 8:15; 1 Thessalonica 5:3.
20 Nte ededi, isio isio orụk uten̄e onụk ikọt Jehovah. Angel oro ẹnọde “nsinsi gospel” owụk mmọ ye ọkpọsọn̄ uyo, ọdọhọde ete: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie.” (Ediyarade 14:6, 7) Nnyịn iyeda ye uten̄e ke ubiereikpe oro nte ufiop Har-Magedon amiade ererimbot Satan. Ẹyewet ata uten̄e Jehovah nte owo mîkemeke ndisọhi mfep ke esịt nnyịn. Nnyịn ikpakam ikụt mfọn adan̄aoro ndikụt idem nnyịn ke otu ‘mbon oro ẹbọhọde oro ẹsemede ẹkot enyịn̄ Jehovah’!—Joel 2:31, 32; Rome 10:13.
21. Mme edidiọn̄ ewe ke uten̄e Jehovah edida okosịm?
21 Mme utịbe utịbe edidiọn̄ ẹyetiene, esịnede nsinsi “isua uwem”! (Mme N̄ke 9:11; Psalm 37:9-11, 29) Ke ntre, edide idotenyịn nnyịn edi ndida Obio Ubọn̄ oro nnyene m̀mê ndinam utom ke idak ukara esie ke isọn̄, ẹyak nnyịn ikaiso idahaemi ndinam edisana utom nnọ Abasi ye uten̄e ye ukpono Abasi. Ẹyak nnyịn ikaiso ndinọ edisana enyịn̄ esie ubọn̄. Ndien ye nso eti utịp? Nsinsi ekọm nte ke nnyịn ima inam item editen̄e Jehovah kpukpru ini!
◻ Nso ke “uten̄e Jehovah” ọwọrọ?
◻ Didie ke uten̄e Abasi ọkọnọ ikọt esie ke eset ufọn?
◻ Nso uwụtn̄kpọ uten̄e Abasi ke Jesus ọkọkpọn̄ onịm ọnọ nnyịn?
◻ Didie ke nnyịn ikeme ndisọn̄ọ nda ke uten̄e Jehovah?
[Mme Mbụme Ndụn̄ọde]
[Ndise ke page 18]
Ke n̄wed Ediyarade, ẹkụt nditọete Jesus ẹkwọde “ikwọ Moses,” kpa ikwọ oro otorode Jehovah
[Ndise ke page 20]
Udịmekọn̄ Jehoshaphat ama akan ke uten̄e Jehovah
[Ndise ke page 23]
Nsinsi isua uwem edidi utịp mmọ oro ẹten̄ede Jehovah