Nte Afo Eyenam N̄kpọ Aban̄a Ima Jesus?

“Ima Christ efefịk nnyịn.”—2 CORINTH 5:14.

1. Didie ke ẹkeme ndinam ima Jesus an̄wan̄a?

KE AKPANIKỌ, ima Jesus edi utịbe utịbe didie ntem! Ke ini ikerede iban̄a nte enye ọkọbọde ufen oro inua mîkemeke nditịn̄ nte enye ọkọnọde ufak, emi ebede ke enye ikpọn̄îkpọn̄ nnyịn ikeme ndinyene nsinsi uwem, ke akpanikọ esịt nnyịn ọyọhọ ye esịtekọm oro inyenede inọ enye! Jehovah Abasi ye Jesus ke idemesie ẹketọn̄ọ emi. Mmọ ẹma ẹbemiso ẹma nnyịn, ke adan̄aemi nnyịn isụk idide mme idiọkowo. (Rome 5:6-8; 1 John 4:9-11) Apostle Paul ekewet ete ke ndifiọk ‘ima Christ ayan̄a ifiọk.’ (Ephesus 3:19) Ke akpanikọ, ima Jesus okon̄ akan ifiọkn̄wed. Enye aka anyan akan n̄kpọ ekededi oro akanam mme owo ẹkụtde m̀mê ẹfiọkde.

2. Nso mîkemeke ndikpan Jesus ndima nnyịn?

² Ke ọnọde n̄wed ẹsọk mme Christian ke Rome, Paul ama obụp ete: “Anie edidianade nnyịn ke ima Christ? Nte ukụt edidianade, m̀mê ndutụhọ, m̀mê isịnenyịn, m̀mê akan̄, m̀mê ubuene ye unana, m̀mê n̄kpọndịk, m̀mê ofụt?” Mme utọ n̄kpọ oro ikemeke ndinam Jesus etre ndima nnyịn. Paul akaiso ete, “Mmotịm mbụre mfiọk nte, n̄kpa ye uwem, ye mme angel ye mbọn̄, ye n̄kpọ eke ẹdude kemi, ye n̄kpọ eke edidide, ye mme odudu ỵe ukon̄ ye utụn̄ọ, ye n̄kpọ efen ekededi eke ẹbotde, idikemeke ndidianade nnyịn ke ima Abasi, emi odude ke Christ Jesus Ọbọn̄ nnyịn.”—Rome 8:35-39.

3. Nso kpọt ikeme ndinam Jesus ye Ete esie ẹkpọn̄ nnyịn?

³ Ima oro Jehovah Abasi ye Jesus ẹmade fi ẹnyene odudu ntre. N̄kpọ kiet odu oro ekemede ndinam mmọ ẹtre ndima fi, ndien oro edi afo ndikokoi nsịn ima mmọ ke nditre ndinam se mmọ ẹdọhọde. Prọfet Abasi inikiet ko ama anam an̄wan̄a edidem Judah kiet ete: “Jehovah ada ye mbufo ke ini mbufo ẹdeda ye enye; ndien edieke mbufo ẹdiyomde enye, mbufo ẹyekụt enye, edi edieke mbufo ẹdikpọn̄de enye, enye eyekpọn̄ mbufo.” (2 Chronicles 15:2) Anie ke otu nnyịn ekpedede oyom ndiwọn̄ọde n̄kpọn̄ mme utọ utịbe utịbe, ufan esịtmbọm nte Jehovah Abasi ye Eyen esie, Jesus Christ?

Nnennen Edinam N̄kpọ Mban̄a Ima Jesus

4, 5. (a) Didie ke ima oro Jesus enyenede ọnọ nnyịn okpotụk itie ebuana nnyịn ye ekemmọ owo? (b) Mmanie en̄wen ke ẹkpenụk nnyịn ndima ke ntak ima oro Jesus enyenede ọnọ nnyịn?

⁴ Didie ke ima Jesus oro mînyeneke adan̄a otụk fi san̄asan̄a? Didie ke afo ekpetie? Ọfọn, Jesus ama owụt nte uwụtn̄kpọ ima esie okpotụkde itie ebuana nnyịn ye ekemmọ owo. Ke ama akanam n̄kpọ ke nsụhọdeidem ọnọ mme apostle esie ebe ke ndiyet mmọ ukot, Jesus ama ọdọhọ ete: “Mmọnọ mbufo uwụtn̄kpọ nte, mbufo nde ẹnam kpa nte Ami n̄kanamde mbufo.” Enye ama adian do ete: “mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo.” (John 13:15, 34) Mme mbet esie ẹma ẹkpep n̄kpọ, ndien esịt ama onụk mmọ ndidomo ndinam nte enye akanamde. Apostle John ekewet ete: “Nnyịn ida emi ifiọk ima, koro Enye akayakde uwem Esie ọnọ kaban̄a nnyịn: nnyịn nde ikponyụn̄ iyak uwem nnyịn inọ kaban̄a nditọete [nnyịn].”—1 John 3:16.

⁵ Edi, nnyịn ikpataba uduak uwem ye utom Jesus edieke uwụtn̄kpọ esie okponụkde nnyịn n̄kukụre ndima nnyụn̄ nnam n̄kpọ ndiyụhọ udọn̄ ekemmọ owo. Nte ima emi Jesus amade nnyịn ikponụkke nnyịn n̄ko ndima enye ke usiene ndien akpan akpan ndima Ete esie, emi ekekpepde enye kpukpru se enye ọdiọn̄ọde? Nte afo eyenam n̄kpọ aban̄a ima Christ onyụn̄ anam n̄kpọ ọnọ Ete esie nte enye akanamde?—Ephesus 5:1, 2; 1 Peter 1:8, 9.

6. Didie ke ima oro Jesus ekenyenede ọnọ apostle Paul okotụk enye?

⁶ Kere ban̄a se ikotịbede inọ Saul, emi ẹkedide ẹdidiọn̄ọ ke ukperedem nte Paul. Inikiet ko enye ama ọkọbọ Jesus, “ofụme[de] ikọ-ndịghe ye ikọ nsobo adian mbet.” (Utom 9:1-5; Matthew 25:37-40) Ke ini Paul ekenen̄erede edidiọn̄ọ Jesus, enye ama otịm owụt esịtekọm ke ndibọ edifen nnọ tutu eyedi se enye mînyịmeke ndibọ ufen kpọt ke ibuot Jesus, edi eben̄ede idem n̄ko ndikpa nnọ enye. Enye ekewet ete: “Ẹwot mi ke eto ye Christ. Idịghe aba ami ke idemmi ndu uwem. . . . Ke akpanikọ, uwem eke ami ndude idahaemi ke obụkidem ami ndu ke mbuọtidem eke nnyenede ye Eyen Abasi, emi akamade mi okonyụn̄ ayakde idemesie ọnọ kaban̄a mi.”—Galatia 2:20, NW.

7. Nso ke ima oro Jesus enyenede okponụk nnyịn ndinam?

⁷ Nso ọkpọsọn̄ odudu ke ima oro Jesus amade nnyịn ekpedi ntem ke uwem nnyịn! “Ima Christ efefịk nnyịn,” ntre ke Paul ekewet ọnọ ẹsọk mbon Corinth, ‘man ikûdu uwem aba inọ idem nnyịn, edi idu inọ Enyeemi akakpade aban̄a nnyịn, okonyụn̄ esetde.’ (2 Corinth 5:14, 15) Ke akpanikọ, esịtekọm oro inyenede iban̄a Jesus ke enye ndikọnọ uwem esie ke ibuot nnyịn ekpenyene ndinụk nnyịn ndinam sededi oro enye ọdọhọde. Ke usụn̄ emi kpọt ke nnyịn ikeme ndiwụt ke nnyịn ke akpanikọ imama enye. “Mbufo ẹma ẹma Mi, ẹyenịm mbet Mi,” Jesus ọkọdọhọ ntre. “Owo eke enyenede mbet Mi, onyụn̄ onịmde mmọ, enye edi owo eke amade Mi.”—John 14:15, 21; men 1 John 2:3-5 domo.

8. Didie ke ima oro Jesus enyenede okotụk uwem ediwak mme anamidiọk?

⁸ Ke ẹma ẹkekpep mbet Jesus, mbon use, mme esịn-efụbe, mme adan̄ ukemuduot, mme inọ, mme akpammịn, ye mme akan owo ubọk ke Corinth eset ẹma ẹnam n̄kpọ ẹban̄a ima Jesus ke ndikpọn̄ mme edinam oro. Paul ama ewet aban̄a mmọ ete: “Edi ẹma ẹyet mbufo, . . . ẹma ẹtebe mbufo ikpe ke enyịn̄ Ọbọn̄ Jesus Christ.” (1 Corinth 6:9-11) Ukem ntre, ima oro Jesus enyenede emenyịk ediwak owo mfịn ndinam akwa ukpụhọde ke uwem mmọ. Ewetmbụk oro, John Lord ekewet ete, “Ẹma ẹkụt ata edikan oro Ido Ukpono Christ akakande ke enye ndinam mbon oro ẹkenyịmede ukpepn̄kpọ esie ẹdi nti owo. Nnyịn imenyene n̄kpọ ntiense iban̄a uwem mmọ oro ananade nduduọhọ, eti ido mmọ oro mînyeneke ndo, mmọ ndidi nti nditọisọn̄, ye mfọn Christian mmọ.” Nso ukpụhọde ke mme ukpepn̄kpọ Jesus ẹda ẹdi ntem!

9. Nso ibuana ke ndikpan̄ utọn̄ nnọ Jesus?

⁹ Ke akpanikọ, idụhe ukpepn̄kpọ oro owo ekemede ndikpep mfịn, emi edide akpan n̄kpọ akan enyeoro aban̄ade uwem ye utom Jesus Christ. Apostle Paul ama akpak ete, ‘Ẹwụk enyịn ẹse Jesus. Ẹtịm ẹse enyeoro.’ (Mme Hebrew 12:2, 3) Ke ini ẹkekpụhọrede mbiet Jesus, Abasi ke idemesie ama ọnọ uyo kaban̄a Eyen esie ete: “Ẹkop uyo Esie.” (Matthew 17:5) Ẹkpenyene ndidori nsọn̄uyo, nte ededi, nte ke ndikpan̄ utọn̄ nnọ Jesus esịne se ikande ikpîkpu edikop se enye etịn̄de. Enye ọwọrọ ndinam item esie, ih, ndikpebe enye ke ndinam se enye akanamde ke usụn̄ nte enye akanamde. Nnyịn inam n̄kpọ iban̄a ima Jesus ke ndida enye nte uwụtn̄kpọ nnyịn, ke nditiene nde-ikpat esie ketket.

Se Jesus Oyomde Nnyịn Inam

10. Mmanie ke Jesus ọkọnọ ukpep ndien kaban̄a nso uduak?

¹⁰ Utom oro Jesus ọkọbọde oto Abasi ekedi ndikwọrọ Obio Ubọn̄ Ete esie, ndien enye ama ọnọ mme anditiene enye ukpep ndinam ukem utom oro. Enye ama ọdọhọ mme akpa mbet esie ete: “Ẹyak nnyịn ika ebiet en̄wen . . . man n̄kwọrọ ikọ do n̄ko; koro n̄kọwọrọ ndi ke ntak emi.” (Mark 1:38; Luke 4:43) Ke ukperedem, ke ama ọkọnọ apostle 12 ukpep ntatara ntatara, Jesus ama eteme mmọ ete: “Nte mbufo ẹkade, ẹkwọrọ ẹte, Ubọn̄ Heaven ke ekpere.” (Matthew 10:7) Ndusụk ọfiọn̄ ke ukperedem, ke ama ọkọnọ owo 70 en̄wen ukpep ama, enye ama osio mmọ ọdọn̄ ye ewụhọ emi: “Ẹsian mmọ ẹte, Ubọn̄ Abasi ama asan̄a ekpere mbufo.” (Luke 10:9) Nte an̄wan̄ade, Jesus okoyom mme anditiene enye ẹdi mme ọkwọrọikọ ye mme andikpep.

11. (a) Ke nso usụn̄ ke mme mbet Jesus ẹdinam utom oro okponde akan se enye akanamde? (b) Nso ikotịbe inọ mme mbet ke ẹma ẹkewot Jesus?

¹¹ Jesus ama akaiso ndinọ mme mbet esie ukpep kaban̄a utom emi. Ke akpatre mbubịteyo oro mbemiso enye akpade, enye ama esịn udọn̄ ọnọ mmọ ye mme ikọ ẹmi: “Owo eke ọbuọtde idem ye Ami eyenyụn̄ anam utom eke Ami nnamde; enye eyenyụn̄ anam utom eke okponde akan oro.” (John 14:12) Utom ẹmi mme anditiene enye ẹnamde eyekpon akan eke esie koro ke utom ukwọrọikọ mmọ, mmọ ẹyesịm ata ediwak owo efen efen ke ikpehe isọn̄ oro enen̄erede okpon akan ye ke ikpehe ini oro ọniọn̄de akan. Edi, ke ẹma ẹkewot Jesus, mme mbet esie ikanamke utom aba ke ntak ndịk. Mmọ ẹma ẹka ẹkedịbe ikonyụn̄ inamke utom oro enye ọkọnọde mmọ ukpep ndinam. Ndusụk mmọ ẹma ẹkam ẹfiak ẹbịne utom ukọiyak mmọ. Nte ededi, ke usụn̄ oro owo mîkemeke ndifre, enye ama esịn ke esịt owo itiaba ẹmi se enye okoyomde mmọ, ọkọrọ ye kpukpru mme anditiene enye eken, ẹnam.

12. (a) Nso utịben̄kpọ ke Jesus akanam ke Inyan̄ Galilee? (b) Nso, nte an̄wan̄ade, ke ikọ Jesus ọkọwọrọ ke ini enye okobụpde Peter m̀mê enye ama imọ “akan mmọemi”?

¹² Jesus ama emen idem eke obụk esịne onyụn̄ ọbiọn̄ọde ke Inyan̄ Galilee. Apostle itiaba oro ẹkedu ke ubom edi ikomụmke iyak ndomokiet ke ofụri okoneyo oro. Jesus ama ada ke mbenesụk ọnọ uyo ete: “Ẹduọk iyịre ke n̄kan̄ nnasia ubom, ndien mbufo ẹyekụt n̄kpọ.” Ke ini iyịre ke utịbe utịbe usụn̄ ọkọyọhọde ye iyak tutu eyedi se enye awahade, mbon oro ẹkedude ke ubom ẹma ẹdifiọk ẹte ke edi Jesus akada oro ke mbenesụk, ndien mmọ ẹma ẹsọsọp ẹwọn̄ọ ẹka ebiet oro enye akadade ebet mmọ. Ke ama ọkọnọ mmọ udia usenubọk, Jesus, iso-ọfọn owụkde enyịn ese uwak iyak oro ẹmụmde, obụp Peter ete: “Simon, eyen John, nte ama[ma] Mi akan mmọemi?” (John 21:1-15) Ikọ Jesus nte eyịghe mîdụhe ọkọwọrọ, Nte afo amama utom ukọiyak akan nte amade utom ukwọrọikọ oro n̄ketịmde fi idem man anam?

13. Didie ke Jesus ke usụn̄ enyenede odudu ekesịn ke esịt mme anditiene enye, usụn̄ nte mmọ ẹkpenamde n̄kpọ ẹban̄a ima esie?

¹³ Peter ama ọbọrọ ete: “Edi ntre, Ọbọn̄, Afo ọmọfiọk ete mmama Fi.” Jesus ete enye: “Bọk nditọ erọn̄ Mi.” Jesus obụp ọyọhọ utịm ikaba ete: “Simon eyen John, nte ama[ma] Mi?” Peter afiak ọbọrọ, nte eyịghe mîdụhe ye ọkpọsọn̄ mbuọtidem ete: “Edi ntre Ọbọn̄, Afo ọmọfiọk ete mmama Fi.” Jesus afiak ọnọ uyo ete: “Kpeme mme erọn̄ Mi.” Jesus obụp ọyọhọ utịm ikata ete: “Simon eyen John nte amama Mi?” Etisịm idahaemi Peter ama ofụhọ ata etieti. N̄kpasịp usen ifan̄ ke mbemiso, enye ama akan̄ utịm ikata ete ke imọ ifiọkke Jesus, ntre ekeme ndidi enye n̄ko ama eyịk m̀mê Jesus enyene eyịghe aban̄a edinam akpanikọ imọ. Ntre, ke ọyọhọ utịm ikata, Peter ama ọbọrọ, iso-ọfọn ye uyo n̄kpeubọk ete: “Ọbọn̄, ọmọfiọk kpukpru n̄kpọ; Afo ọmọfiọk ete mmama Fi.” N̄kukụre ibọrọ Jesus ekedi: “Bọk mme erọn̄ Mi.” (John 21:15-17) Nte eyịghe ndomokiet ekeme ndidu mban̄a se Jesus okoyomde Peter ye nsan̄a esie ẹnam? Enye ke usụn̄ oro enyenede odudu ekesịn mmọ n̄kpọ ke esịt didie ntem—ọkọrọ ye owo ekededi oro edidide mbet mfịn—nte ke edieke mmọ ẹmade imọ, mmọ ẹyebuana ke utom unam-mbet!

14. Ke mme ewe idaha efen ke Jesus okowụt usụn̄ nte mme mbet esie ẹkpenamde n̄kpọ ẹban̄a ima esie?

¹⁴ Usen ifan̄ ke ẹma ẹkenyene nneme oro ke mbenesụk, Jesus ama ọbiọn̄ọde ke obot kiet ke Galilee onyụn̄ eteme idara idara otuowo ẹmi ẹdide n̄kpọ nte mbet 500 ete: “Mbufo ẹka ẹkenam kpukpru mme idụt ẹdi mbet Mi, . . . ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20; 1 Corinth 15:6) Kere ban̄a oro! Irenowo, iban, ye nditọn̄wọn̄ kpukpru ẹma ẹbọ ukem utom oro. Kpasụk ke edem edem, mbemiso ọdọkde ke heaven, Jesus ama asian mme mbet esie ete: “Mbufo ẹyenyụn̄ ẹdi mme ntiense Mi . . . tutu osịm utịt ererimbot.” (Utom 1:8) Ke ama ọkọnọ ofụri item ẹmi okụre, eyịghe idụhe Peter, ke ediwak isua ẹma ẹkebe, ọkọdọhọde ete: “[Jesus] ama ọnọ nnyịn uyo ete ikwọrọ ikọ inọ mme owo inyụn̄ inọ ọyọhọ ọyọhọ ikọ ntiense.”—Utom 10:42, NW.

15. Nso ke eyịghe ndomokiet mîkemeke ndidu mban̄a?

¹⁵ Eyịghe ndomokiet ikemeke ndidu ke nte nnyịn ikpanamde n̄kpọ iban̄a ima Jesus. Nte enye akasiande mme apostle esie ete: “Edieke mbufo ẹnịmde mbet Mi, mbufo ẹyedụn̄ ke ima Mi . . . Mbufo ẹdi mme ufan Mi edieke mbufo ẹnamde n̄kpọ eke ntemede mbufo.” (John 15:10-14) Mbụme edi-o, Nte afo eyewụt esịtekọm aban̄a ima oro Jesus enyenede ke ndinịm mbet esie emi edide ndibuana ke utom unam-mbet? Edi akpanikọ, ekeme ndidi emi idimemke utom inọ fi ke nsio nsio ntak. Edi enye ikememke utom inọ Jesus nde. Kere ban̄a mme ukpụhọde oro okoyomde enye anam.

Tiene Uwụtn̄kpọ Jesus

16. Nso utịbe utịbe uwụtn̄kpọ ke Jesus ọkọnọ?

¹⁶ Ikpọn̄îkpọn̄ edibon Eyen Abasi ama enyene n̄kokon̄ idaha oro okokon̄de akan eke mme angel ke ubọn̄ eke heaven. Enye ama enyene n̄kpọ ke akpanikọ! Kpa ye oro enye ama onyịme ndin̄wan̄a idemesie, ndimana nte andibuana ke ubon ubuene, nnyụn̄ n̄kọri n̄wọrọ owo ke otu mbon udọn̄ọ, kpa mme n̄kpakpa owo. Enye akanam emi ke ntak nnyịn, nte apostle Paul akanamde an̄wan̄a ete: “Mbufo ẹmefiọk mfọn Ọbọn̄ nnyịn Jesus Christ, ẹte, okposụkedi nte Enye ekedide enyene n̄kpọ, ke ntak mbufo Enye akabade edi ubuene, man oto ke ubuene Esie mbufo ẹkabade ẹdi mme enyene n̄kpọ.” (2 Corinth 8:9; Philippi 2:5-8) Nso uwụtn̄kpọ ke emi edi ntem! Nso uwụtn̄kpọ ima ke emi edi ntem! Idụhe owo ndomokiet oro akayakde ekese n̄kpọ atak m̀mê ọbọde ekese ufen ntre ke ibuot mbon en̄wen. Owo ndomokiet inyụn̄ idụhe oro akanamde edi mmemmem n̄kpọ ọnọ mbon en̄wen ndinyene inyene oro okponde akan, ih, kpa nsinsi uwem ke mfọnmma idaha!

17. Nso usụn̄ unam n̄kpọ ke ẹnịm nnyịn ke iso, ndien nso ididi utịp ke nditiene enye?

¹⁷ Nnyịn imekeme nditiene uwụtn̄kpọ Jesus inyụn̄ ida mbiet ufọn oro isọk mbon en̄wen. Ndien ndien, Jesus ama akpak mme owo ndikabade ndi mme anditiene enye. (Mark 2:14; Luke 9:59; 18:22) Ke akpanikọ, Peter ekewet ete: “Ẹkekot mbufo ẹte ẹdinam oro; koro Christ ke Idemesie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.” (1 Peter 2:21) Nte afo eyenam n̄kpọ aban̄a ima Christ okosịm udomo oro ọbọde ufen man anam n̄kpọ ọnọ Ete esie nte enye akanamde? Utọ usụn̄ unam n̄kpọ oro ekeme ndida ufọn didie ntem nsọk mbon en̄wen! Ke akpanikọ, ebede ke nditiene uwụtn̄kpọ Jesus, ebede ke ndida mme ukpepn̄kpọ oro enye ọkọbọde oto Ete esie ọyọhọ ọyọhọ, “afo eyenyan̄a idemfo ye mmọemi ẹkopde uyo fo.”—1 Timothy 4:16.

18. (a) Nso uwụtn̄kpọ ke Jesus okonịm kaban̄a edu oro enye ekenyenede aban̄a mme owo? (b) Didie ke mme owo ẹkenam n̄kpọ ẹban̄a edu Jesus?

¹⁸ Man inen̄ede inọ mme owo un̄wam, ana nnyịn n̄ko ikere iban̄a mmọ nte Jesus ekekerede. Prọfesi kiet ọkọdọhọ aban̄a enye ete: “Enye eyetua eyen unana ye ubuene mbọm.” (Psalm 72:13) Mme anditiene enye ẹma ẹkeme ndifiọk nte ke Jesus ‘ama ama’ mbon oro enye eketịn̄de ikọ ọnọ ye nte ke enye ama enen̄ede oyom ndin̄wam mmọ. (Mark 1:40-42; 10:21) Bible ọdọhọ ete, “Ke adan̄aemi Enye okụtde mme otuowo, atua mmọ mbọm, koro mmọ ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” (Matthew 9:36) Idem mme anam akwa idiọkn̄kpọ ẹma ẹbọ ima esie ẹnyụn̄ ẹsan̄a ẹkpere enye. Ebede ke uyo ikọ, edu uwem, ido unọ ukpep esie, mmọ ẹma ẹdu ke ifụre. Nte utịp, idem mme ọbọ a-tax ye mme akpara oro ẹkesede ke ndek ẹma ẹyom enye ẹkụt.—Matthew 9:9-13; Luke 7:36-38; 19:1-10.

19. Didie ke Paul ekekpebe Jesus, ndien nso ididi utịp ke nnyịn inamde ntre?

¹⁹ Mme mbet Jesus eke akpa isua ikie ẹma ẹkpebe ima ima uwụtn̄kpọ esie. Paul ama ọnọ n̄wed ẹsọk ndusụk mbon oro enye akanamde n̄kpọ ọnọ ete: “Nnyịn iketie sụn̄sụn̄ ke otu mbufo, nte emi eka ọbọkde nditọ esiemmọ . . . Nte ete anamde n̄kpọ ye nditọ esiemmọ; ikọnọ mbufo item, inyụn̄ isọn̄ọ mbufo esịt, inyụn̄ isọn̄ọ inọ mbufo uyo.” (1 Thessalonica 2:7-11) Nte afo emenyene ukem ata edikere mban̄a oro mme ete ye eka ẹsikerede ẹban̄a nditọ mmọ ọnọ mbon oro ẹdude ke efakutom mbufo? Ndiwụt utọ edikere mban̄a oro ke uyo ikọ fo, nte afo onịmde iso, ye nte anamde n̄kpọ eyenam etop Obio Ubọn̄ enem mbon mbiet-erọn̄.

20, 21. Nso idi ndusụk uwụtn̄kpọ eyomfịn oro aban̄ade mme owo oro ẹketienede uwụtn̄kpọ ima Jesus?

²⁰ Ke mbịt mbịt usen kiet ke Spain, Ntiense iba ẹma ẹsobo ye akanan̄wan kiet emi akakamade eto asan̄a, oro ufọk esie ekebịtde nte ice koro ifia okokụrede. N̄wan emi eketie ebet eyeneren esie ọnyọn̄ utom edi man edisiak ifia. Mme Ntiense ẹmi ẹma ẹsiak ifia oro, ndien mmọ n̄ko ẹma ẹkpọn̄ ndusụk magazine ẹnọ enye ndikot. Ke ini eyeneren esie ọkọnyọn̄de edi, enye ama enem esịt etieti ke ima ima edikere oro Mme Ntiense ẹmi ẹkekerede ẹban̄a eka esie tutu eyedi se enye okotde n̄wed oro, ọtọn̄ọ ndikpep Bible, onyụn̄ ana baptism, ndien ibịghike enye ama odụk utom usiakusụn̄.

²¹ Ke Australia eren kiet ye n̄wan esie ẹma ẹnam an̄wan̄a Mme Ntiense oro ẹkekade ndise mmọ ẹte ke mmimọ inyeneke okụk ndida ndep udia nnọ ubon mmimọ. Ebe ye n̄wan ẹdide Ntiense mi ẹma ẹka ẹkedep udia, esịnede sweet ẹda ẹsọk nditọ oro. Ete ye eka ẹma ẹtọn̄ọ eyet, ẹdọhọde ẹte ke nnanenyịn ama osịm mmimọ tutu eyedi se mmimọ ikaduakde ndiwot idem. Mmọ mbiba ẹma ẹtọn̄ọ ndikpep Bible, ndien ndondo emi n̄wan ama ana baptism. N̄wan kiet ke United States emi akasuade-sua Mme Ntiense Jehovah ama ọtọt ke ama okosobo ye owo mmọ kiet ete: “Nnen̄ekede nti se nnyịn ikenemede iban̄a, edi se ntide edi nte n̄wan emi ọkọfọnde ido ye ami, ye nte enye akatatde ubọk onyụn̄ osụhọrede idem. Ami mma nnen̄ede nsịk n̄kpere enye nte owo. Mmama itie ufan esie tutu osịm usen mfịn emi.”

22. Ke ima ikodụn̄ọde uwem Jesus, nso idi ubiere nnyịn kaban̄a enye?

²² Ke ini nnyịn inamde n̄kpọ iban̄a ima Jesus ke ndinam utom oro enye akanamde ke usụn̄ oro enye akanamde, nso mme utịbe utịbe edidiọn̄ ke nnyịn ikeme ndinyene ntem! Akakan idaha Jesus ana in̄wan̄în̄wan̄ onyụn̄ okpon. Onụk nnyịn nditiene ntịn̄ mme ikọ oro Pontius Pilate, andikara Rome eketịn̄de ete: “Se Enye owo oro do.” Ih, ke akpanikọ, “Owo oro,” akakan owo oro akanam odude uwem.—John 19:5.

Didie ke Afo Ọkpọbọrọ?

◻ Ima Jesus okpon adan̄a didie?

◻ Mmanie ke ima Jesus akpanam nnyịn ima, ndien nso ke ima emi okponụk nnyịn ndinam?

◻ Nso utom ke Jesus oyom nnyịn inam?

◻ Didie ke Jesus ekenyene n̄kpọ, ndien ntak emi enye akakabarede edi ubuene?

◻ Didie ke nnyịn ikpekpebe Jesus ke usụn̄ nte enye akanamde n̄kpọ ọnọ mme owo?

[Ndise ke page 15]

Jesus ama onịm uwụtn̄kpọ ke ndiwụt ima

[Ndise ke page 17]

Jesus ama owụt ke usụn̄ enyenede odudu nte mme mbet esie ẹkpenyenede ima ẹnọ enye