“Akanam Mbufo Ikwe Enye, Edi Ẹmama Enye”
“Akanam mbufo ikwe Enye, edi ẹmama Enye. Okposụk edi nte mbufo mîkwe Enye ke emi, mbufo ẹbuọt idem ye Enye, ẹnyụn̄ ẹsọn̄ọ ẹdara.”—1 PETER 1:8.
1. Okposụkedi akanam owo ndomokiet odude ke isọn̄ mfịn mîkwe Jesus, didie ke ndusụk mbon ido ukpono ẹdomo ndituak ibuot nnọ enye?
IDỤHE owo oro odude uwem ke isọn̄ mfịn oro akanam okụtde Jesus Christ. Kpa ye oro, ediwak miliọn owo ẹdọhọ ke mmimọ imama enye. Kpukpru isua ke January 9, ke Manila, Philippines, ẹsidụri mbiet okponde ke ataata idaha Jesus Christ emi obiomde cross ẹbe ke mme efak ke se ẹkotde uyarade ọwọrọetop edinam ido ukpono emi awakde owo onyụn̄ edide n̄wọrọnda akan ke idụt oro. Okop-nduaidem otuowo emi esinụk onyụn̄ eberi owo; mme owo ẹsikam ẹdọk kiet eken ke idat idat ukeme nditụk mbiet oro. Ido isan̄ usọrọ oro esinen̄ede odụri ediwak owo oro ẹtienede ẹsan̄a. Edi, ndusụk mmọ nte eyịghe mîdụhe ẹdi mme owo ẹmi ke ofụri esịt ẹmade Jesus. Nte uyarade oro, mmọ ẹkeme ndikọn̄ọ mbiet Christ oro ọkọn̄ọde ke cross mîdịghe ẹkeme ndika ufọkabasi kpukpru ini. Nte ededi, ndi ẹkeme ndida orụk ukpono ndem oro nte utuakibuot akpanikọ?
2, 3. (a) Mmanie ke otu mme anditiene Jesus ẹkenen̄ede ẹkụt ẹnyụn̄ ẹkop enye etịn̄de ikọ? (b) Mmanie efen ke akpa isua ikie ẹkema Jesus ẹnyụn̄ ẹbuọt idem ye enye, okposụkedi akanam mmọ mîkwe enye ọkpọkpọ?
2 Ke akpa isua ikie, ediwak tọsịn owo ẹma ẹdu ke mme mbahade obio ukara Rome eke Judea, Samaria, Perea, ye Galilee ẹmi mmọ ke idemmọ ẹkekụtde ẹnyụn̄ ẹkopde Jesus Christ etịn̄de ikọ. Mmọ ẹma ẹkpan̄ utọn̄ nte enye akanamde mme inem inem akpanikọ ẹban̄ade Obio Ubọn̄ Abasi an̄wan̄a. Mmọ ẹma ẹkụt mme utịben̄kpọ oro enye akanamde. Ndusụk ke otu mmọemi ẹma ẹkabade ẹdi mme ifịk ifịk mbet esie, ẹnịmde ke akpanikọ ẹte ke enye ekedi “Christ, Eyen Abasi uwem.” (Matthew 16:16) Nte ededi, mbon oro apostle Peter ekewetde akpa leta esie eke odudu spirit ọnọ ikesịneke ke otu mmọemi.
3 Mbon oro Peter ekewetde n̄wed ọnọ ẹkedu ke mme mbahade obio ukara Rome eke Pontus, Galatia, Cappadocia, Asia, ye Bithynia—kpukpru ẹdude ke ikpehe Turkey eyomfịn. Peter ekewet ọnọ mmọ ete: “Akanam mbufo ikwe Enye, edi ẹmama Enye. Okposụk edi nte mbufo mîkwe Enye ke emi, mbufo ẹbuọt idem ye Enye, ẹnyụn̄ ẹsọn̄ọ ẹdara ye idatesịt eke ayan̄ade owo nditịn̄ onyụn̄ ọyọhọde ye ubọn̄.” (1 Peter 1:1, 8) Mmọ ẹkesan̄a didie ẹfiọk Jesus Christ tutu esịm udomo edima enye nnyụn̄ mbuọt idem ye enye?
4, 5. Didie ke mbon oro akanam mîkwe Jesus ẹkekpep n̄kpọ nte ekemde ẹban̄a enye man ẹma enye ẹnyụn̄ ẹbuọt idem ye enye?
4 Nte an̄wan̄ade, ndusụk mmọ ẹma ẹdu ke Jerusalem ke ini apostle Peter ọkọnọde otuowo ẹmi ẹkedụkde usọrọ Pentecost ke 33 E.N. ikọ ntiense. Ke usọrọ oro ama okokụre ediwak mbet ẹma ẹsụhọ ke Jerusalem man ẹbọ n̄kaiso item ẹto mme apostle. (Utom 2:9, 41, 42; men 1 Peter 1:1 domo.) Ke mme isan̄ isụn̄utom oro akakade ndien ndien, apostle Paul n̄ko ama ọkwọrọ ikọ ifịk ifịk ọnọ mme owo oro ẹkedụn̄de ke ikpehe oro Peter ke ukperedem ọkọnọde akpa leta eke Bible oro ekerede enyịn̄ esie ẹsọk.—Utom 18:23; 19:10; Galatia 1:1, 2.
5 Ntak emi mme owo oro, ẹmi akanam mîkwe Jesus, ẹkenen̄erede ẹma enye ntre? Ke eyo nnyịn, ntak emi ediwak miliọn owo efen efen, ke ofụri ererimbot, ẹnen̄erede ẹma enye?
Mme N̄kpọ Oro Mmọ Ẹkekopde
6. (a) Edieke afo okpokokopde Peter ọnọde ikọ ntiense aban̄a Jesus ke Pentecost 33 E.N., nso ke afo ekpekekpep? (b) Didie ke emi okotụk n̄kpọ nte owo 3,000 ẹmi ẹkedude?
6 Edieke afo okpokodude ke Jerusalem ke ini Peter eketịn̄de ikọ ọnọ otu mbon usọrọ oro ke 33 E.N., nso ke afo ekpekekpep aban̄a Jesus? Nte eyịghe ndomokiet mîdụhe mme utịben̄kpọ oro enye akanamde ẹma ẹwụt ẹte ke Abasi ọkọdọn̄ enye. Nte, ke okposụkedi mme anam idiọkn̄kpọ ẹkewotde Jesus, enye ikodụhe aba ke udi edi ke ẹma ẹnam eset ndien ekem ẹmenede enye ẹdọk ke heaven ndikodu ke ubọk nnasia Abasi. Nte ke Jesus, ke akpan, ekedi Christ, kpa Messiah emi mme prọfet ẹkewetde ẹban̄a. Nte ke ebede ke Jesus Christ, ẹma ẹn̄wan̄a edisana spirit ẹduọk mme mbet esie tutu mmọ ẹkeme ndisọp nnọ mme owo ẹtode ediwak idụt ikọ ntiense mban̄a mme utịben̄kpọ oro Abasi akanamde ebe ke Eyen esie. Ama otụk esịt ediwak owo oro ẹkekopde nte Peter etịn̄de ikọ ke idaha oro, ndien n̄kpọ nte owo 3,000 ẹma ẹna baptism nte mme mbet ẹdide Christian. (Utom 2:14-42) Edieke afo okpokodude do, nte afo akpakanam utọ enyene-iwụk edinam oro?
7. (a) Edieke afo okpokodude ke Antioch ke ini apostle Paul ọkọkwọrọde ikọ do, nso ke afo ekpekekpep? (b) Ntak emi ndusụk owo ke otuowo oro ẹkekabarede ẹdi mme andinịm ke akpanikọ ẹnyụn̄ ẹbuanade eti mbụk ye mbon en̄wen?
7 Edieke afo okpokodude ke otu mbon oro ẹkedude ke ini apostle Paul ọkọnọde ukpep ke Antioch ke Galatia odude ke ikpehe obio ukara Rome, nso efen ke afo ekpekekpep aban̄a Jesus? Afo okpokokop Paul anamde an̄wan̄a nte ke mme prọfet ẹma ẹbem iso ẹtịn̄ ẹban̄a mme andikara ke Jerusalem ndibiere ikpe n̄kpa nnọ Jesus. Afo n̄ko okpokokop aban̄a uyarade mme andikokụt Jesus esetde ke n̄kpa. Afo ke akpanikọ akpakama edinam an̄wan̄a oro Paul akanamde an̄wan̄a nte ke ebede ke ndinam Jesus eset ke n̄kpa, Jehovah ama ọsọn̄ọ ete ke enyeemi ke akpanikọ ekedi Eyen Abasi. Ndien nte esịt ikpakadatke fi nte afo ekpepde ete ke edifen mme idiọkn̄kpọ oro ẹnyenede ebe ke mbuọtidem ke Jesus ekeme ndida n̄kesịm nsinsi uwem? (Utom 13:16-41, 46, 47; Rome 1:4) Ke ẹfiọkde nte se mmọ ẹkekopde edide akpan n̄kpọ, ndusụk owo ke Antioch ẹma ẹkabade ẹdi mbet, ẹbuanade eti mbụk ifịk ifịk ye mbon en̄wen, idem okposụkedi ndinam ntre ọkọwọrọde ke mmọ ẹkenyene ndisobo ọkpọsọn̄ ukọbọ.—Utom 13:42, 43, 48-52; 14:1-7, 21-23.
8. Edieke afo okpokodude ke mbonoesop eke esop Ephesus ke ini ẹkebọde leta oro Paul ekewetde ọnọ ẹsọk mmọ, nso ke afo ekpekekpep?
8 Nso edieke afo akpakabuanade ye esop Christian ke Ephesus, ke Asia odude ke ikpehe obio ukara Rome, ke ini ẹkebọde leta eke odudu spirit oro Paul ekewetde ọnọ mme mbet do? Nso ke afo ekpekekpep aban̄a udeme Jesus ke uduak Abasi? Ke leta oro Paul ama anam an̄wan̄a nte ke ebede ke Christ ke ẹyenam kpukpru n̄kpọ ke heaven ye ke isọn̄ ẹfiak ẹdidu ke emem ye Abasi, nte ke enọ Abasi ebe ke Christ ama atara esịm mme owo ke kpukpru idụt, nte ke ẹma ẹnam mme owo oro ẹkekpan̄ade ke enyịn Abasi ke ntak idiọkn̄kpọ mmọ ẹfiak ẹdidu uwem ebe ke mbuọtidem ke Christ, ye nte ke nte utịp enọ emi, mme owo ẹma ẹfiak ẹkeme ndidi ndima nditọ Abasi.—Ephesus 1:1, 5-10; 2:4, 5, 11-13.
9. (a) Nso ikeme ndin̄wam fi ọfiọk m̀mê se Paul ekewetde ọnọ mbon Ephesus an̄wan̄a fi ọkpọkpọ? (b) Didie ke se mmọ ẹkekpepde ẹban̄a Jesus okotụk nditọete ke mme mbahade obio ukara Rome oro Peter eketịn̄de aban̄a?
9 Nte esịtekọm kaban̄a kpukpru emi akpakanam ima oro afo enyenede ọnọ Eyen Abasi otụn̄ọ? Nte ima oro okpokotụk uwem fo eke usen ke usen, nte apostle Paul ekesịnde udọn̄ ọnọ ke ibuot 4 esịm 6 ke Ephesus? Nte utọ esịtekọm oro okpokonụk fi ndidụn̄ọde se idide mme ebeiso n̄kpọ inọ fi ke uwem ye ntịn̄enyịn? Ke ntak ima enyenede ọnọ Abasi ye esịtekọm kaban̄a Eyen esie, nte afo akpakanam mme edinen̄ede oro okoyomde man edinam uduak Abasi ekpenen̄ede edi ata akpan n̄kpọ ke uwem fo? (Ephesus 5:15-17) Kaban̄a usụn̄ nte se mme Christian ke Asia, Galatia, ye mme mbahade obio ukara Rome eken ẹkekpepde okotụkde mmọ, apostle Peter ekewet ọnọ mmọ ete: “Akanam mbufo ikwe [Jesus Christ], edi ẹmama Enye. . . . Mbufo ẹbuọt idem ye Enye, ẹnyụn̄ ẹsọn̄ọ ẹdara ye idatesịt eke ayan̄ade owo nditịn̄ onyụn̄ ọyọhọde ye ubọn̄.”—1 Peter 1:8.
10. (a) Nso nte eyịghe mîdụhe eketịp n̄kpọ esịn ke ima oro mme akpa Christian ẹkenyenede ẹnọ Jesus? (b) Didie ke nnyịn n̄ko ikeme ndibọ ufọn?
10 Nte eyịghe mîdụhe n̄kpọ efen ama odu oro eketịpde esịn ke ima oro mme akpa Christian oro Peter ekewetde n̄wed ọnọ ẹkenyenede ẹnọ Eyen Abasi. Nso ikedi oro? Ke ini oro Peter ekewetde akpa leta esie, ke nsụhọde n̄kaha iba ke otu Gospel—Matthew ye Luke—ẹma ẹsesịm ediwak itie. Mme Christian akpa isua ikie oro akanam mîkwe Jesus ẹma ẹkeme ndikot mme mbụk Gospel ẹmi. Nnyịn n̄ko imekeme. Mme Gospel idịghe mme mbụk oro ẹkerede-kere ẹwet; mmọ ẹnyene kpukpru idiọn̄ọ mbụk oro ẹtịmde ẹdi se ẹberide edem. Ke mme n̄wetnnịm n̄kpọ eke odudu spirit oro, nnyịn imokụt ekese oro anamde ima oro inyenede inọ Eyen Abasi otụn̄ọ.
Edu Oro Enye Okowụtde
11, 12. Nso idu ke edu oro Jesus okowụtde mbon en̄wen emi anamde fi ama enye?
11 Do ke mbụk uwem Jesus oro ẹwetde-wet ẹnịm, nnyịn imekpep iban̄a nte enye akanamde n̄kpọ ye mbon en̄wen. Edu oro enye okowụtde otụk esịt mme owo idem idahaemi, se ibede isua 1,960 ke enye ama akakpa. Mme utịp idiọkn̄kpọ ẹfịk kpukpru owo oro ẹdude uwem. Ediwak miliọn owo ẹdi mbon unọmọ ukwan̄ikpe, ẹn̄wana ye udọn̄ọ, mîdịghe ke ntak efen ẹkụt ọkpọsọn̄ edikpu. Jesus ọdọhọ kpukpru utọ mbon oro ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọk-odudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre-ifụre ido nnyụn̄ nsụhọde idem ke esịt; ndien mbufo ẹyekụt nduọk-odudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.”—Matthew 11:28-30.
12 Jesus ama enen̄ede ekere aban̄a mme ubuene, mbon ọbiọn̄, ye mbon oro ẹkopde mfụhọ. Ke ini mme idaha ẹkenamde odot, enye ama akam ọnọ akwa otuowo udia ke utịbe utịbe usụn̄. (Luke 9:12-17) Enye ama osio mmọ ke ufụn item owo. Enye n̄ko ama anam mbuọtidem mmọ ke ndutịm Abasi nditre ufịk ukaraidem ye eke ndutịm uforo ọkọri. Jesus ikefịkke mbon oro ẹma ẹkefefịk do. Ke sụn̄sụn̄ ido ye ima, enye ke usọ ama emenede mbon nsụhọdeidem. Enye ama ọnọ mbon oro ẹkebietde nyanyan̄a oro obụn̄ọde ye mbon oro ẹbietde ọfọn̄ utuenikan̄ oro ekperede ndinịme nduọkodudu. Tutu esịm emi, enyịn̄ esie ọnọ idotenyịn, idem ke esịt mbon oro akanam mîkwe enye.—Matthew 12:15-21; 15:3-10.
13. Ntak emi usụn̄ oro Jesus akanamde n̄kpọ ye mme anamidiọk odụride mme owo ada?
13 Jesus ikenyịmeke idiọkido, kpa ye oro enye ama owụt asian kaban̄a mbon oro ẹkenamde ndudue ke uwem edi ẹmi ẹkewụtde edikabade esịt ẹnyụn̄ ẹwọn̄ọrede ẹtiene enye kaban̄a un̄wam. (Luke 7:36-50) Enye ama esisụhọde etie onyụn̄ adia udia ye mme owo ẹmi ẹkesede ke ndek ke obio edieke enye ekekerede ke emi ọyọnọ imọ ifet ndin̄wam mmọ ke n̄kan̄ eke spirit. (Matthew 9:9-13) Nte utịp edu oro enye okowụtde, omonụk ediwak miliọn owo ke mme ukem idaha oro ẹmi akanam mîkwe Jesus ndidi ndifiọk enye nnyụn̄ mbuọt idem ye enye.
14. Nso idemede fi udọn̄ iban̄a usụn̄ oro Jesus akan̄wamde mme owo oro ẹkedọn̄ọde, ẹbiomode ndo, m̀mê ẹtabade owo ke n̄kpa?
14 Usụn̄ oro Jesus akanamde n̄kpọ ye mme owo oro ẹkedọn̄ọde m̀mê ẹkebiomode ndo ọnọ uyarade ufiop ye mbọm esie ọkọrọ ye ukeme esie ndinọ mmọ un̄wam. Ntem, ke ini owo udọn̄ọ emi ọyọhọde ye akpamfia akakade ebịne enye onyụn̄ ekpede ubọk oyom un̄wam, Jesus ikesịkke ifiak edem ke ntak nte owo oro eketiede. Enye ikonyụn̄ idọhọke owo oro ite, okposụkedi imọ ikopde mbọm iban̄a enye, ke udọn̄ọ oro ama aka anyan akaha ndien ke owo ikemeke ndinam n̄kpọ ndomokiet ndin̄wam. Eren oro ama eben̄e ete: “Ọbọn̄, edieke onyịmede, emekeme ndinam mi nsana.” Ye unana edimen̄e, Jesus ama anyan ubọk otụk eren akpamfia oro, ọdọhọde ete: “Mmonyịme, sana.” (Matthew 8:2, 3) Ke idaha efen n̄wan kiet ama oyom ẹkọk imọ ebe ke nditụk utọn̄ ọfọn̄ esie ke ndịbe. Jesus ama anam n̄kpọ ye enye ke edu owụtde mfọnido onyụn̄ ọnọde idotenyịn. (Luke 8:43-48) Ndien ke ini enye okosobode mme owo ẹnamde isan̄ ẹka ubụk okpo, enye ama okop mbọm aban̄a ebeakpa oro okofụhọde emi ikpọn̄îkpọn̄ eyen esie akakpade. Okposụkedi Jesus ekesịnde ndida odudu oro Abasi ọkọnọde nnam n̄kpọ ke utịbe utịbe usụn̄ ndinọ idemesie udia, enye ke mfọn ama ada enye anam eren oro akakpade eset onyụn̄ afiak ayak enye ọnọ eka esie.—Luke 4:2-4; 7:11-16.
15. Didie ke edikot mme mbụk ẹmi ẹban̄ade Jesus ye edikere mban̄a mmọ ẹtụk fi?
15 Nte nnyịn ikotde mme mbụk ẹmi inyụn̄ ikerede iban̄a edu emi Jesus okowụtde, ima oro nnyịn inyenede inọ enyeemi ọkọnọde uwem esie eke owo man nnyịn ikpekeme ndidu uwem ke nsinsi okpon. Idem okposụkedi akanam nnyịn mîkwe enye, nnyịn imesịk ikpere enye, nnyịn inyụn̄ iyom nditiene nde-ikpat esie.—1 Peter 2:21.
Nsụhọdeidem ke Ndibuọt Idem ke Abasi
16. Jesus okowụk akpan ntịn̄enyịn ke anie, ndien nso ke enye ekesịn udọn̄ ọnọ nnyịn ndinam?
16 Ke akande kpukpru n̄kpọ efen, Jesus okowụk ntịn̄enyịn esie ye eke nnyịn ke Ete esie eke heaven, Jehovah Abasi. Enye ama owụt n̄kponn̄kan ewụhọ ke Ibet, ọdọhọde ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” (Matthew 22:36, 37) Enye ama eteme mme mbet esie ete: “Ẹnyene mbuọtidem ye Abasi.” (Mark 11:22) Ke ini mmọ ẹkesobode ọkpọsọn̄ idomo mbuọtidem, enye ama akpak mmọ ete: “Ẹbọn̄ akam.”—Matthew 26:41.
17, 18. (a) Didie ke Jesus okowụt nsụhọdeidem esie ke ndibuọt idem ye Ete esie? (b) Ntak emi se enye akanamde edide akpan n̄kpọ ntre ọnọ nnyịn?
17 Jesus ke idemesie ama enịm uwụtn̄kpọ. Akam ekedi akpan ikpehe uwem esie. (Matthew 14:23; Luke 9:28; 18:1) Ke ini ama ekedi edikem enye ndimek mme apostle esie, Jesus n̄kukụre ikọbuọtke idem ke ubiere esie, okposụkedi ke akpa kpukpru mme angel ke heaven ẹkedude ke idak ndausụn̄ esie. Ke nsụhọdeidem enye ama abiat ofụri okoneyo ke ndibọn̄ akam nnọ Ete esie. (Luke 6:12, 13) Ke ini enye akasakde iso ese edimụm ye ubiak ubiak n̄kpa, Jesus ama afiak ọwọn̄ọde ebịne Ete esie, ọbọn̄de akam ke ofụri esịt. Enye ikenyeneke ekikere oro nte ke imọ imenen̄ede ifiọk Satan ndien ke imekeme ndise mban̄a se andidiọk oro edidade edi mmemmem mmemmem. Jesus ama ọfiọk adan̄a nte enye nditre ndikpu ekedide akpan n̄kpọ. Nso esuene ke edikpu ekpedi ntem ọnọ Ete esie! Ndien nso ntakurua ke ekpedi ntem ọnọ ubonowo, emi idotenyịn uwem mmọ ọkọkọn̄ọde ke uwa oro Jesus akanade awa!
18 Jesus ama ọbọn̄ akam ndien ndien—ke ini okodude ye mme apostle esie ke ubet enyọn̄ kiet ke Jerusalem onyụn̄ akam ọbọn̄ ifịk ifịk ke in̄wan̄ Gethsemane. (Matthew 26:36-44; John 17:1-26; Mme Hebrew 5:7) Ke ini ọkọbọde ndutụhọ ke eto ndutụhọ, enye ikosụn̄ike mbon oro ẹkesụn̄ide enye. Utu ke oro, enye ama ọbọn̄ akam ke ibuot mbon oro ẹkenamde n̄kpọ ke unana ifiọk ete: “Ete, dahado nọ mmọ; koro mmọ mîfiọkke se mmọ ẹnamde.” (Luke 23:34) Enye okowụk ekikere esie ke Ete esie, ‘ayakde ikọ Esie esịn ke ubọk Andikpe edinen ikpe.’ Mme akpatre ikọ oro enye eketịn̄de ke eto ndutụhọ ẹkedi akam oro enye ọkọbọn̄de ọnọ Ete esie. (1 Peter 2:23; Luke 23:46) Nnyịn iwụt esịtekọm didie ntem nte ke, ye ọyọhọ ibetedem ke Jehovah, Jesus ke edinam akpanikọ ama okụre utom oro Ete esie ọkọnọde enye! Okposụkedi akanam nnyịn mîkwe Jesus Christ, nnyịn inen̄ede ima enye didie ntem ke se enye akanamde!
Ndiwụt Ima Oro Nnyịn Imade Enye
19. Ke ndiwụt ima nnọ Jesus, nso edinam ke nnyịn idifep nte se mîdotke ofụri ofụri?
19 Didie ke nnyịn ikeme ndinọ uyarade nte ke ima oro nnyịn idọhọde nte inyenede akan ikpîkpu ikọ? Sia Ete esie, emi Jesus akamade, akakpande edinam mme mbiet ndien ekem ẹda mmọemi nte mme n̄kpọ utuakibuot, nnyịn ke akpanikọ ikpokponoke Jesus ebe ke ndikọn̄ọ utọ mbiet oro ke n̄kwa n̄kanade itọn̄ nnyịn m̀mê ndimen nsan̄a mbe ke mme efak. (Exodus 20:4, 5; John 4:24) Ikpedịghe edikpono Jesus nnyịn ndidụk mme edinam ido ukpono, idem inamde ntre ediwak ini ke urua, edieke nnyịn mîdụhe uwem ikekem ye mme ukpepn̄kpọ esie ke ofụri urua oro. Jesus ọkọdọhọ ete: “Owo eke enyenede mbet Mi, onyụn̄ onịmde mmọ, enye edi owo eke amade Mi: ndien owo eke amade Mi, Ete Mi eyema enye.”—John 14:21, 23; 15:10.
20. Nso idi ndusụk n̄kpọ oro ẹdiwụtde m̀mê nnyin imenen̄ede ima Jesus?
20 Mme ewụhọ ewe ke enye ọkọnọ nnyịn? Akakan, ndikpono ata Abasi, Jehovah, ndien enye ikpọn̄îkpọn̄. (Matthew 4:10; John 17:3) Ke ntak udeme esie ke uduak Abasi, Jesus n̄ko ama ekpep ete ke ana nnyịn iwụt mbuọtidem ke imọ nte Eyen Abasi ndien ke ana nnyịn iwụt oro ebe ke ndisịn ndiọi utom onyụn̄ ebe ke ndisan̄a ke un̄wana. (John 3:16-21) Enye ama eteme nnyịn ete ibem iso iyom Obio Ubọn̄ Abasi ye edinen ido esie, inịmde mmọemi ke ebeiso ikan edikere mban̄a mme udọn̄ n̄kpọ obụkidem. (Matthew 6:31-33) Enye ama owụk nnyịn ete ima kiet eken nte imọ ikamade nnyịn. (John 13:34; 1 Peter 1:22) Enye ama onyụn̄ owụk nnyịn ete idi mme ntiense kaban̄a mme uduak Abasi, kpa nte imọ ikedide. (Matthew 24:14; 28:19, 20; Ediyarade 3:14) Okposụkedi akanam mmọ mîkwe Jesus, ata ima omonụk n̄kpọ nte Mme Ntiense Jehovah miliọn ition mfịn ndinịm mme ewụhọ oro. Mmọ ndidi akanam ikwe Jesus ọkpọkpọ inamke ubiere mmọ ndikop uyo emem ke baba usụn̄ kiet. Mmọ ẹti se Ọbọn̄ mmọ ọkọdọhọde apostle Thomas: “Sia ama okokụt Mi, omonịm ke akpanikọ? ọfọfọn ọnọ mmọ ẹmi mîkekwe, edi ẹnịmde ke akpanikọ.”—John 20:29.
21. Didie ke nnyịn ibọ ufọn ito ndidụk Editi n̄kpa Christ, emi ẹdinịmde isua emi ke Sunday, March 23?
21 Ẹdori enyịn ẹte ke afo oyodu ke otu mbon oro ẹdisopde idem ke Ufọkmbono Obio Ubọn̄ Mme Ntiense Jehovah ke ofụri ererimbot ke utịn ama okosụhọde ke Sunday, March 23, 1997, nditi akakan ima oro Abasi okowụtde ubonowo ye ke nditi n̄kpa anam-akpanikọ Eyen esie, Jesus Christ. Se ẹtịn̄de ẹnyụn̄ ẹnamde ke edinam oro ekpenyene ndinam ima oro inyenede inọ Jehovah ye Eyen esie otụn̄ọ akan ndien ke ntre ọkọri udọn̄ ndinịm mme mbet Abasi.—1 John 5:3.
Didie ke Afo Ọkpọbọrọ?
◻ Didie ke mbon oro ẹkewetde akpa n̄wed Peter ẹnọ ẹkedi ẹdifiọk ẹnyụn̄ ẹma Jesus?
◻ Nso idi ndusụk n̄kpọ oro mme akpa Christian ẹkekopde oro afo amade?
◻ Nso idu ke edu oro Jesus okowụtde emi anamde ima oro afo enyenede ọnọ enye okpon?
◻ Ntak emi Jesus ndisụhọde idem mbuọt idem ye Abasi edide akpan n̄kpọ ntre ọnọ nnyịn?
◻ Didie ke nnyịn ikeme ndiwụt ima oro imade Jesus Christ?
[Mme ndise ke page 16, 17]
Nnyịn isịk ikpere Jesus ke ntak edu emi enye okowụtde