Urua Oro Okokpụhọrede Ererimbot

“Itoro enyene Enyeemi edide ke enyịn̄ Jehovah.”—MATTHEW 21:9.

1. Nsio nsio otu iba ewe ke mme n̄kpọntịbe eke August isua oko ẹketụk?

“ATA MFỤHỌ MFỤHỌ USEN ITA ORO ẸKENYEN̄EDE ERERIMBOT.” Ke August 1991, mme ibuotikọ n̄wedmbụk n̄kpọntịbe utọ nte enyeemi ẹma ẹsọn̄ọ akpanikọ oro nte ke ẹkeme ndisịn akwa ndutịme ke ererimbot ke n̄kpasịp usen ifan̄. Ke akpanikọ, mme utịt utịt usen August oro ikọyọhọke ye mme n̄kpọntịbe inọ ererimbot ikpọn̄îkpọn̄, edi ama ọyọhọ n̄ko ọnọ otu kiet emi Jesus eketịn̄de aban̄a ete: “Mmọ [idịghe] eke ererimbot.” Ẹdiọn̄ọ otu emi mfịn nte Mme Ntiense Jehovah.—John 17:14.

2, 3. (a) Didie ke ẹkesio ubọhọ-ufụn ẹwụt ke Zagreb kpa ye ndịk ekọn̄? (b) Didie ke ẹkenọ ọkpọsọn̄ mbuọtidem utịp ke Odessa?

² Ẹma ẹdiomi akpa mbono ofụri ererimbot eke Mme Ntiense Jehovah oro akanam ẹtịmde ẹnọ Yugoslavia ndida itie ke August 16 osịm 18. Nte n̄kpọ eketiede, enye n̄ko ekedi akpa akamba mbono ikọt Jehovah oro ẹnịmde ke idụt oro okodude ke idaha un̄wana ekọn̄ mbio obio. Mme Ntiense n̄kann̄kụk, adianade ye mbonutom unyịmesịt ẹtode mme mbọhọ idụt oro, ẹma ẹnam utom ọkpọsọn̄ ke ọfiọn̄ iba ke ndidiọn̄ an̄wa mbreikpa HAŠK Građanski ke Zagreb. Enye ekedi ata nsasana ebiet, kpa mfọnn̄kan itie ndinịm Mbono “Mme Ama Ubọhọ-Ufụn Abasi.” Ediwak tọsịn mme andidụk ẹtode ofụri ererimbot ẹma ẹdiomi ndidụk, esịnede 600 ẹtode United States ẹdi. Nte ndịk ekọn̄ mbio obio akanamde mme owo, ikọ emi ama asuana: “Tutu amama mbon America ididịghe.” Edi mmọ ẹma ẹdi, adianade ye mme odụk mbono ẹtode ediwak idụt efen ẹdi. Ẹkedori enyịn ndinyene mme andidụk ẹdide owo 10,000, edi owo 14,684 ẹkedu ke an̄wambre oro ke akpatre usen! Ẹma ẹdiọn̄ kpukpru owo uwak uwak sia mmọ ‘mîkesịnke ndisop idem ọtọkiet.’—Mme Hebrew 10:25.

³ Ke usen ita oro ẹketienede ke ẹma ẹkenịm mbono ẹkụre ke Zagreb, edinam ubọ ukara ke odudu, oro mîkekwe unen ama ada itie ke Soviet Union. Ke ini oro, mme ama ubọhọ-ufụn Abasi ke ẹkenam akpatre mben̄eidem ẹnọ mbono mmọ ke Odessa ke Ukraine. Nte ẹkeme ndinịm mbono oro? Ye ọkpọsọn̄ mbuọtidem nditọete oro ẹma ẹnam akpatre utom man ẹkụre edidiọn̄ an̄wambre oro, ndien mme odụk mbono ẹma ẹkaiso ndidi. Nte n̄kpọ eke edide utịben̄kpọ, edinam ubọ ukara oro ama etre. Ẹma ẹnịm inem inem mbono ke August 24, 25, ye owo 12,115 ẹdụkde ye owo 1,943—kpa mbahade 16 eke ikie ke otu n̄wakn̄kan ibat mme odụk mbono oro—ẹnade baptism! Mbufa Ntiense ẹmi, adianade ye mme andimụm nsọn̄ọnda n̄kama ke anyanini, ẹma ẹdat esịt ẹte ke mmimọ ima idi mbono oro ye ọyọhọ mbuọtidem ke Jehovah.—Mme N̄ke 3:5, 6.

4. Mme Ntiense ke Edem Usiahautịn Europe ẹsitiene ewe uwụtn̄kpọ oro Jesus okonịmde?

⁴ Mme anam-akpanikọ Ntiense ẹmi ẹketiene uwụtn̄kpọ oro Uwụtn̄kpọ nnyịn, Jesus Christ okonịmde. Akananam enye itreke ndidụk mme usọrọ oro Jehovah okowụkde, idem ke ini mme Jew ẹkeyomde ndiwot enye. Nte enye ọkọdọkde aka Jerusalem kaban̄a akpatre Passover esie, mmọemi ẹma ẹda ẹkanade temple ẹkụk, ẹbụpde ẹte: “Ẹse didie? Nte Enye ididịghe usọrọ?” (John 11:56) Edi enye ama edi! Emi ama ọdiọn̄ usụn̄ ọnọ urua oro okosịmde utịt ke ndikpụhọde usụn̄ unam n̄kpọ ke mbụk ubonowo. Nte nnyịn kemi ikpodụn̄ọde ndusụk akpan n̄kpọ ke urua oro—Nisan 8 osịm 14 ke n̄wed usenọfiọn̄ mme Jew?

Nisan 8

5. Nso ke Jesus ọkọdiọn̄ọ aban̄a nte enye akanamde isan̄ aka Bethany ke Nisan 8, 33 E.N.?

⁵ Ke usen emi Jesus ye mme mbet esie ẹdibehe ke Bethany. Mi, Jesus eyedan̄ okoneyo itiokiet ke ufọk edima ufan esie, Lazarus, emi enye akanamde eset ke n̄kpa ke ndondo emi. Bethany ekpere Jerusalem. Ke ndịbe, Jesus ama ọnọnọ mme mbet esie item ete: “Sese! Nnyịn imọn̄ idọk ika Jerusalem, ndien ẹyeyak Eyen owo ẹsịn ikpọ oku ye mme scribe ke ubọk, ndien mmọ ẹyebiom enye ikpe n̄kpa, ẹyenyụn̄ ẹyak enye ẹsịn mbon idụt ke ubọk man ẹsak enye nsahi ẹnyụn̄ ẹmia ẹnyụn̄ ẹkọn̄ enye ke eto, ndien ẹyenam enye eset ke n̄kpa ke ọyọhọ usen ita.” (Matthew 20:18, 19, NW) Jesus ọdiọn̄ọ ọyọhọ ọyọhọ ete ke ana imọ kemi isobo ubiak ubiak idomo. Nte ededi, nte ini n̄kponn̄kan idomo oro asan̄ade ekpere, enye esịn ofụri ukeme ndinam n̄kpọ ke ima ima usụn̄ nnọ nditọete esie. Nnyịn kpukpru ini ikpakam ‘inyene orụk esịt emi okodude ke Christ Jesus.’—Philippi 2:1-5; 1 John 3:16.

Nisan 9

6. Ke mbubịteyo eke Nisan 9, nso ke Mary akanam, ndien nso ke Jesus eketịn̄ ọnọ Judas?

⁶ Ke utịn osụhọrede, nte Nisan 9 ọtọn̄ọde, Jesus adia udia ke ufọk Simon emi ekedide owo akpamfia ke mbemiso. Edi mi ke Mary, eyeneka Lazarus ọduọk ọsọn̄urua, enemutebe aran ke ibuot ye ke ukot Jesus ndien ke nsụhọdeidem adade idet esie ọkwọhọrede Jesus ukot. Ke ini Judas ọdọhọde ke oro inenke, Jesus ọdọhọ ete: “Ẹkpon̄ enye; yak enye onịm emi eben̄e usen eke ẹdibụkde Mi.” Ke ẹkopde ẹte ke ediwak mme Jew ke ẹka Bethany ke ẹnyụn̄ ẹkọn̄ mbuọtidem ke Jesus, ikpọ oku ẹdiomi ndiwot enye ye Lazarus.—John 12:1-7.

7. Ke usenubọk eke Nisan 9, didie ke ẹkekpono enyịn̄ Jehovah, ndien nso ke Jesus ekebemiso etịn̄?

⁷ Ke tụhi tụhi usenubọk, Jesus ọtọn̄ọ isan̄ uka Jerusalem. Otuowo ẹwọrọ ẹka ndisobo ye enye, ẹfụn̄de mme ndakeyop ẹnyụn̄ ẹfioride ẹte: “Hosanna: Itoro enyene Enyeemi edide ke enyịn̄ Jehovah, kpa Edidem Israel.” Jesus ndien osu prọfesi eke Zechariah 9:9 ke ndiwat ke ass ndụk obio oro. Nte enye asan̄ade ekpere Jerusalem, enye atua aban̄a Jerusalem, ebemde iso etịn̄ ete ke mbon Rome ẹyekanarede enye ẹkụk ye eduat ẹnyụn̄ ẹsobo enye ẹfep ofụri ofụri—kpa prọfesi oro ekenyenede n̄wọrọnda edisu ke isua 37 ke ukperedem. (Emi n̄ko owụt afanikọn̄ oro edisịmde Christendom, emi ọkọsọn̄de ibuot etiene uwụtn̄kpọ Jerusalem eset.) Mme adaiso mme Jew iyomke Jesus nte edidem mmọ. Mmọ ẹfiori ke iyatesịt ẹte: “Sese, ererimbot ama adaha etiene Enye.”—John 12:13, 19.

Nisan 10

8. Ke Nisan 10, didie ke Jesus okowụt ntotụn̄ọ ukpono ọnọ ufọk akam Jehovah, ndien nso iketiene?

⁸ Jesus afiak aka temple. Nte ọyọhọ ikaba, enye ebịn ibụk ibụk mbonurua ye mme okpụhọ okụk efep. Unyamurua—kpa “ima okụk”—ikpenyeneke ndikara ke ufọk akam Jehovah! (1 Timothy 6:9, 10, NW) Ibịghike Jesus ọmọn̄ akpa. Enye amada editọ n̄kpasịp anam emi an̄wan̄a. Akpa n̄kpasịp oro akpa, edi enye etịbe man osio ekpat eto oro edin̄wụmde ekese mfri. Ukem ntre, n̄kpa Jesus eyesụn̄ọ ke nsinsi uwem ọnọ ediwak owo ẹmi ẹkọn̄de mbuọtidem ke enye. Sia ekikere n̄kpa esie oro asan̄ade ekpere mi afịnade enye, Jesus ọbọn̄ akam ete ke ẹyenọ enyịn̄ Ete imọ ubọn̄ ke ntre. Ke ibọrọ, uyo Abasi ọwọrọ ọkpọsọn̄ ọkpọsọn̄ oto heaven man kpukpru owo ẹmi ẹdude do ẹkop: “Mma n̄kọnọ enyịn̄ Mi ubọn̄, nyenyụn̄ ntọn̄ọ ntak nnọ enye ubọn̄.”—John 12:27, 28.

Nisan 11—Usen Utom

9. (a) Tụhi tụhi ke usen oro ke Nisan 11, didie ke Jesus akada uwụtn̄kpọ ke ndibiom mme Jew mbon nsọn̄ibuot ikpe? (b) Ke n̄kemuyo ye n̄ke Jesus, mmanie ẹtaba akwa ifet?

⁹ Jesus ye mme mbet esie ẹfiak ẹkpọn̄ Bethany kaban̄a ọyọhọ usen utom. Jesus akama uwụtn̄kpọ ita ndiwụt ntak emi ẹbiomde mme Jew mbon nsọn̄ibuot ikpe. Enye ama osụn̄i eto fig oro mîn̄wụmke mfri, ndien idaha ediyemede esie oro idahaemi owụt unana mbuọtidem idụt mme Jew oro mîn̄wụmke mfri. Ke odụkde temple, enye etịn̄ nte ndiọi mme ekpeme-in̄wan̄ vine eteufọk ke akpatre ẹkam ẹwotde eyen ye adiakpa eteufọk oro—adade aban̄a edibiat oro mme Jew ẹbiatde ifet oro Jehovah ọnọde mmọ, emi edisịmde utịt ke mmọ ndiwot Jesus. Enye etịn̄ aban̄a usọrọ ndọ oro edidem kiet—Jehovah, otịmde—emi isenowo ẹmi enye okokotde (kpa mme Jew) ke ibụk ẹsịnde ndidụk. Ntre, ẹnọ ikot oro ẹsọk mbonan̄wa—kpa mme Gentile—emi ndusụk mmọ ẹyerede ikot. Edi ẹtop eren kiet oro mîsịneke ọfọn̄ ndọ ẹsio ke an̄wa. Enye ada aban̄a mme abian̄a abian̄a Christian eke Christendom. Ẹma ẹnọ ediwak mme Jew ke eyo Jesus ikot, ‘edi ẹkemek ibat ibat owo’ ndisịne ke otu 144,000 oro ẹfịkde idiọn̄ọ, ẹmi ẹdade Obio Ubọn̄ heaven ẹnyene.—Matthew 22:14; Ediyarade 7:4.

10-12. (a) Ntak emi Jesus ọsọn̄de uyo asua ọkpọsọn̄ ọkpọsọn̄ ọnọ mme ọkwọrọ ederi mme Jew, ndien nso ọkpọsọn̄ ubiomikpe ke enye akan̄wan̄a ofụk mbon mbubịk oro? (b) Didie ke ẹkebiere ikpe ke akpatre ẹnọ mme Jew mbon nsọn̄ibuot?

¹⁰ Mbubịk mbubịk mme ọkwọrọ ederi mme Jew ẹyom usụn̄ ndimụm Jesus, edi enye ọbọrọ ediwak n̄kari n̄kari mbụme mmọ onyụn̄ anam bụt anam mmọ ke iso mme owo oro. Oh, nso unana mbuọtidem ke mme Jew mbon ido ukpono oro ẹwụt ntem! Jesus ọsọn̄ uyo asua ọnọ mmọ ọkpọsọn̄ ọkpọsọn̄ didie ntem! Mmọ ẹyom itie uwọrọiso, ọwọrọetop nduọ nduọ ọfọn̄, ye ikpọ udorienyịn̄, utọ nte “Andikpep” ye “Ete,” ukem nte ediwak mme ọkwọrọ ederi ke eyo nnyịn. Jesus etịn̄ edumbet emi ete: “Owo ekededi eke edimenerede idem, ẹyesụhọde enye ẹnịm; edi owo ekededi eke edisụhọrede idem, ẹyemenede enye.”—Matthew 23:12.

¹¹ Jesus asua ọkpọsọn̄ ọkpọsọn̄ ọnọ mme adaiso ido ukpono oro. Utịm ikatiaba enye ofiori ete: “Eyedọdiọk ọnọ mbufo,” okotde mmọ nnan mme adausụn̄ ye mbon mbubịk. Ndien ini kiet kiet enye ọnọ in̄wan̄în̄wan̄ ntak kaban̄a ubiomikpe emi. Mmọ ẹsesịri usụn̄ oro ẹsan̄ade ẹdụk Obio Ubọn̄ heaven. Ke ini mmọ ẹtapde owo kiet ndikpono Abasi ke ido mmọ, enye akabade edi eyen Gehenna utịm ikaba, iso-ọfọn ama ododu ke idaha edidi se ẹsobode ke ntak akwa idiọkn̄kpọ esie eke ini edem m̀mê ke ntak isio isio ido unam n̄kpọ. “Mbufo ndisịme ye nnan,” ntre ke Jesus ọdọhọ, koro mme Pharisee ẹwụkde ntịn̄enyịn ke gold temple utu ke nditịm utuakibuot akpanikọ nnịm do. Mmọ ẹfụmi unenikpe, mbọm, ye mbuọtidem nte mmọ ẹsiode ọyọhọ mbak duop ke otu ubak ikọn̄, mfri, ye n̄kpasịp oro ẹbọde ke n̄kanubọk, edi ẹtrede ndinam ikpọ n̄kpọ Ibet. Tutu amama ediyet ubọk ke ido edinam idisioho se isabarede mmọ ke esịt esịt idem ifep—sụk esịt oro ẹnamde asana ebe ke ndikọn̄ mbuọtidem ke uwa Jesus oro asan̄ade ekpere ekeme ndinam oro. Mbubịk esịtidem ye ukwan̄ido mmọ ababiat “ndom” ekededi oro ẹyetde ke n̄kan̄ enyọn̄ enyọn̄.—Matthew 23:13-29.

¹² Ih, ke akpanikọ ọdọdiọk ọnọ mme Pharisee, emi ke akpanikọ ẹkedide “nditọ mmọemi ẹkewotde mme prọfet” eset! Mmọ ẹdi urụkikọt, kpa nditọ ibọm, ẹmi ẹtiede ẹbet Gehenna, koro mmọ mîdiwotke Jesus ikpọn̄îkpọn̄, edi ẹyewot mbon oro enye osiode ọdọn̄ n̄ko. Emi edi ubiereikpe oro ẹdibierede ẹnọ “emana emi.” Ke ndisu, ẹma ẹsobo Jerusalem ofụri ofụri ke isua 37 ke ukperedem.—Matthew 23:30-36.

13. Ke mme idaha ewe mfịn ke ẹkụt utịn̄ikọ Jesus oro aban̄ade utịp etịbe ke temple?

¹³ Mbemiso ọkpọn̄de temple, Jesus otoro ubuene ebeakpa kiet emi esịnde n̄kpri okûdọk iba ke usịnetịbe—“kpukpru se enye akpadade odu uwem.” Ukpụhọde odu ke akpanikọ ye ọdiọkitọn̄ mbon inyene, ẹmi ẹsịnde sụk uke uke etịbe! Ukem nte ubuene ebeakpa oro, Mme Ntiense Jehovah mfịn ẹnyịme ndiyak ini, odudu, ye okụk ẹtak man ẹn̄wam ẹnyụn̄ ẹtat utom Obio Ubọn̄ ke ofụri ererimbot. Mmọ ẹkpụhọrede didie ntem ẹkpọn̄ mme oburobụt ọkwọrọ ederi ẹmi ẹwode mme otuerọn̄ mmọ ẹnyụn̄ ẹkọde akpakịp ọkpọkpọ inyene ẹbon!—Luke 20:45–21:4.

Nte Nisan 11 Asan̄ade Ekpere

14. Nso mfụhọ ke Jesus okowụt, ndien didie ke enye ọkọbọrọ mbụme efen efen oro mbet esie ẹkebụpde?

¹⁴ Jesus atua aban̄a Jerusalem ye ikọt esie onyụn̄ ọdọhọ ete: “Mbufo idikwe Mi aba, tutu mbufo ẹdọhọ ẹte, Itoro enyene Enyeemi edide ke enyịn̄ Jehovah.” (Matthew 23:37-39) Ke ukperedem, ke ini mmọ ẹtiede ke Obot Olive, mme n̄kpet n̄kpet mbet Jesus ẹbụp mbụme ẹban̄a emi, ndien ke ibọrọ Jesus etịn̄ aban̄a idiọn̄ọ oro edinịmde edidu esie ke ukara Obio Ubọn̄ ye utịt idiọk editịm n̄kpọ Satan idiọn̄ọ.—Matthew 24:1–25:46; Mark 13:1-37; Luke 21:5-36.

15. Nso idiọn̄ọ ke Jesus ọkọnọ aban̄a edidu oro enye odude ndibiere ikpe, ndien ọtọn̄ọde ke ini ewe ke enye osu?

¹⁵ Ke etịn̄de aban̄a ubiereikpe Jehovah oro ẹdisọpde ndibiere nnọ temple oro, Jesus owụt ete ke emi ada aban̄a mme edinam nsobo ini iso emi ke utịt ofụri editịm n̄kpọ emi. Ekọn̄ oro ẹn̄wanade ke udomo oro akanam mîdaha itie, ọkọrọ ye akan̄, unyekisọn̄, ye idiọkudọn̄ọ, adianade ye unana ima ye ukwan̄ido, ẹdinịm ini edidu esie idiọn̄ọ. Emi edi akpanikọ didie ntem aban̄a ererimbot nnyịn eke ọyọhọ isua ikie-20 emi ọtọn̄ọde ke 1914!

16, 17. Mme n̄kpọntịbe ererimbot ewe ke Jesus eketịn̄ aban̄a, ndien didie ke mme Christian ẹkpenam n̄kpọ ẹban̄a prọfesi oro?

¹⁶ Emi eyesịm utịt ke “akwa ukụt . . . orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.” Sia emi edikamade nsobo nte Ukwọ eke eyo Noah, Jesus odụri owo utọn̄ aban̄a ediduọ nnyịne ke mme mbubehe ererimbot. “Ẹkpeme ndien: koro mbufo mîfiọkke usen eke Ọbọn̄ mbufo edide.” Nnyịn ikeme ndikop inemesịt didie ntem nte ke Eteufọk oro ama emek “asan̄autom oro anamde akpanikọ, onyụn̄ enyenede ọniọn̄” emi ẹyetde aran ndinọ ntọt nnyụn̄ nnọ akpakịp udia eke spirit ke usen edidu esie emi!—Matthew 24:21, 42, 45-47.

¹⁷ Ke ọyọhọ isua ikie-20 nnyịn, nnyịn imokụt nte ‘editịmede esịt omụmde mme idụt isọn̄, ifiọkke usụn̄ ubọhọ . . . ke adan̄aemi idem eyemerede owo oto ke ndịk ye edikama enyịn nse mme n̄kpọ eke ẹdiwọrọde ẹnọ ekondo.’ Edi Jesus asian nnyịn ete: “Ke ini mme n̄kpọ ẹmi ẹtọn̄ọde ndiwọrọ, ẹmenede enyịn ke enyọn̄, ẹnyụn̄ ẹmenede ibuot mbufo ke enyọn̄, koro edifak mbufo ke asan̄a ekpere.” Ndien enye ọnọ nnyịn ntọt ete: “Ẹkpeme idem mbufo, mbak uyụhọ udia ye mmịn ye ekikere uwem emi ẹdinam esịt mbufo odobi, ndien usen oro edibuat mbufo nte ekpọ.” Ibọhọke ke ndidu ke edidemede ke nnyịn ikeme ndida nte ẹnyịmede ke iso Jesus, kpa “Eyen Owo,” ke edidu esie.—Luke 21:25-28, 34-36.

18. Nso nsịnudọn̄ ke nnyịn ikeme ndibọ nto n̄ke Jesus emi aban̄ade nditọiban duop ye enyeoro aban̄ade talent?

¹⁸ Ke ndiberi usọ usọ edibemiso nda n̄kụt mme n̄kpọntịbe eyomfịn, Jesus otop n̄ke ita. Akpa, ke n̄ke aban̄ade nditọiban duop, enye afiak ọsọn̄ọ etịn̄ ufọn ‘edikaiso ndu ke ukpeme.’ Ekem, ke n̄ke aban̄ade ifụn ye talent, enye owụt nte ẹnọde edinam ọkpọsọn̄ utom utịp ebe ke ndinọ ikot ‘ndidụk ke idara ọbọn̄.’ Mme Christian oro ẹyetde aran, oro n̄ke ẹmi ẹdade ẹban̄a, ọkọrọ ye mme erọn̄ en̄wen ẹkeme ndinyene ekese nsịnudọn̄ nto in̄wan̄în̄wan̄ ikọ oro ẹtịn̄de mi.—Matthew 25:1-30.

19, 20. Nso inem inem itie ebuana eke eyomfịn ke ẹwụt ke n̄ke Jesus oro aban̄ade erọn̄ ye ebot?

¹⁹ Ọyọhọ n̄ke ita aban̄a edidu Jesus ke ukara Obio Ubọn̄ ke enye ama ekedi nditie ke ubọn̄ ubọn̄ ebekpo esie eke heaven. Enye edi ini ndibiere ikpe nnọ mme idụt ye ini edibahade mme owo ke isọn̄ ndọn̄ ke otu iba, kiet esịnede mbon nsụhọdeidem oro ẹbietde erọn̄ ye enye eken, edide mbon nsọn̄ibuot oro ẹbietde ebot. Mme erọn̄ ẹsịn ukeme efen efen ndiwụt idemmọ nte mme andin̄wam nditọete Edidem—kpa nsụhọ oro ẹyetde aran ke isọn̄ ke utịt ini eke ererimbot emi. Ẹnọ mme erọn̄ ẹmi uwem nte utịp, ke adan̄aemi mme ebot oro mîwụtke esịtekọm ẹdahade ẹkedụk nsinsi nsobo.—Matthew 25:31-46.

²⁰ Nso akwa itie ebuana ke nnyịn ikụt ntem ke ufọt mme erọn̄ en̄wen ye nditọete Edidem ke utịt editịm n̄kpọ ẹmi! Okposụkedi nsụhọ oro ẹyetde aran ẹkebiomde ọkpọsọn̄ mbiomo ke utom oro ke ntọn̄ọ ntọn̄ọ edidu Edidem, ediwak miliọn ifịk ifịk erọn̄ en̄wen kemi ẹnam n̄kpọ nte mbahade 99.8 eke ikie ke otu mme asan̄autom Abasi ke isọn̄. (John 10:16) Ndien mmọ n̄ko ẹmenyịme ndiyọ ‘biọn̄, nsatitọn̄, iferi, udọn̄ọ, ye n̄kpọkọbi’ nte nsan̄a mbon nsọn̄ọnda oro ẹyetde aran.a

Nisan 12

21. Nso ikakaiso ke Nisan 12, ndien didie?

²¹ Odu oro ẹdụkde ndiwot Jesus ke akaiso. Judas adaha ebịne ikpọ oku ke temple, onyịmede ndida Jesus nnọ ke mbak silver 30. Ẹma ẹkam ebemiso ẹtịn̄ prọfesi ẹban̄a emi.—Zechariah 11:12.

Nisan 13

22. Nso mben̄eidem ke ẹkenam ke Nisan 13?

²² Jesus, emi osụk odude ke Bethany, ndusụk man ọbọn̄ akam onyụn̄ etie ekere n̄kpọ, osio mme mbet esie ọdọn̄ ẹka Jerusalem ẹkeyom “owo ntem.” Ke ufọk owo emi, ke akwa ubetenyọn̄, mmọ ẹtịm n̄kpọ ẹben̄e Passover. (Matthew 26:17-19) Nte utịn osopde ke Nisan 13, Jesus akadiana ye mmọ do kaban̄a ata akpan usọrọ ke ofụri mbụk. Nso ina idahaemi ibet Nisan 14? Ibuotikọ nnyịn efen eyetịn̄.

[Mme Ikọ idakisọn̄]

Didie ke Afo Ekpetịn̄ Ibio Ibio?

◻ Nso mfọnido ye edidara owo ke ndusụk owo ẹkewụt Jesus ke Nisan 8 osịm 10?

◻ Didie ke Jesus akayararede mbubịk mbubịk mme ọkwọrọ ederi ke Nisan 11?

◻ Akwa prọfesi ewe ke Jesus ọkọnọ, ndien didie ke enye osu mfịn?

◻ Didie ke mme n̄kpọntịbe ẹkesan̄a ẹkpere utịt ke Nisan 12 ye 13?

[Ndise ke page 12]

Jesus otoro ubuene ebeakpa emi ekesịnde n̄kpri okûdọk iba—kpa ofụri se enye ekenyenede