Se Obio Ubọn̄ Abasi Ekemede Ndiwọrọ Nnọ Fi

JESUS CHRIST ama ekpep mme anditiene enye ndibọn̄ ntem nte: “Yak Ubọn̄ Fo edi.” (Matthew 6:10) Adan̄a ediwak ini didie ntem ke mbon oro ẹdọhọde nte idide mme anditiene Jesus ẹsitịn̄ mme ikọ ẹmi ẹnọ Abasi!

Nte ededi, Jesus ama anam se ikande edikpep mme mbet esie ndibọn̄ akam nyom Obio Ubọn̄ Abasi. Enye ama anam Obio Ubọn̄ edi akpan ibuotikọ utom ukwọrọikọ esie. Ke akpanikọ, Encyclopædia Britannica ọdọhọ ete ke Obio Ubọn̄ Abasi “edi se kpukpru owo ẹkerede nte edide akpan ibuotikọ ukpepn̄kpọ Jesus.”

Ke ini mme anditiene Christ ẹbọn̄de akam ẹyom Obio Ubọn̄, nso ke mmọ ẹnen̄ede ẹbọn̄ akam ẹyom? Nso ke Obio Ubọn̄ Abasi ekeme ndiwọrọ nnọ mmọ ye afo? Ndien didie ke Jesus ekese enye?

Ekikere Jesus Kaban̄a Obio Ubọn̄

Jesus ekesiwak ndikot idemesie “Eyen Owo.” (Matthew 10:23; 11:19; 16:28; 20:18, 28) Emi eti nnyịn aban̄a nte prọfet Daniel eketịn̄de aban̄a “eyen owo.” Kaban̄a n̄kpọntịbe emi edidade itie ke heaven ke ini iso, Daniel ọkọdọhọ ete: “N̄kụt ke n̄kukụt okoneyo, ndien, sese, owo eke ebietde eyen owo asan̄a ke obubịt enyọn̄ edi, enye osịm Andisọn̄ọ usen, ẹnyụn̄ ẹda enye edi enye ke iso. Ndien ẹnọ enye ubọn̄, ye ukpono, ye itie edidem, ẹte kpukpru mme idụt ye obio ye usem ẹnam n̄kpọ ẹnọ enye.”—Daniel 7:13, 14.

Ke etịn̄de aban̄a ini emi enye edibọde ubọn̄ emi, Jesus ama asian mme apostle esie ete: “Ke adan̄aemi Eyen Owo editiede ke ebekpo ubọn̄ Esie, mbufo, ẹmi ẹketienede Mi, ẹyenyụn̄ ẹtie ke ebekpo duopeba.” Jesus ama ọdọhọ n̄ko ete: “Ke ini Eyen Owo edidide ke ubọn̄ Esie, . . . ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; . . . Ekem mmọ [mme idiọkowo] oro ẹyedaha ẹkedụk ke nsinsi ufen [“nsinsi edisịbe mfep,” New World Translation]; edi ndinen owo ẹyedụk ke nsinsi uwem.”—Matthew 19:28; 25:31, 32, 46.

Mme editịn̄ ntụk mme ebekpo ye kpukpru idụt ke prọfesi ẹmi ẹwụt nte ke Obio Ubọn̄ edi ukara emi Jesus ye ndusụk ke otu mme anditiene enye ẹdide mme andikara ubonowo. Ukara oro eyenyene odudu ndisobo ndiọi owo mfep. Ke idak ukara Obio Ubọn̄ oro, nte ededi, mbon edinen ido oro ẹkenịmde ẹnọ edinyan̄a ẹyebọ enọ Abasi edide nsinsi uwem.

Nte an̄wan̄ade, ndien, Obio Ubọn̄ Abasi edi ukara eke heaven emi Abasi owụkde. Obio Ubọn̄ oro idịghe ufọkederi, N̄wed Abasi inyụn̄ inọhọ isọn̄ oro aban̄ade ekikere ererimbot kaban̄a enye. N̄ko-n̄ko, ukara oro Abasi ọnọde ikpekemeke ndidi sụk n̄kpọ emi odude owo ke esịt. Sia Obio Ubọn̄ Abasi edide ukara, enye ikabakede idi n̄kpọ emi odude nnyịn ke esịt ke ini nnyịn inyịmede Ido Ukpono Christ. Edi ntak emi ndusụk owo ẹkerede ẹte ke Obio Ubọn̄ edi idaha emi odude owo ke esịt-e?

Obio Ubọn̄ Odu ke Esịt Nnyịn?

Ndusụk owo ẹkere ẹte ke Obio Ubọn̄ odu ke esịt nnyịn etiene usụn̄ nte ndusụk mme akabade Bible ẹsịnde Luke 17:21. Nte ekemde ye New International Version, Jesus ọkọdọhọ do ete: “Obio ubọn̄ Abasi odu ke esịt mbufo.”

Kaban̄a emi The Interpreter’s Dictionary of the Bible ọdọhọ ete: “Okposụkedi ẹsiwakde nditịn̄ mban̄a emi nte uwụtn̄kpọ ‘ndedịbe odudu’ m̀mê ‘ukeme esịtidem’ oro Jesus enyenede, ukabade emi ọkọn̄ọ akpan akpan ke akani usụn̄ ukabade ikọ oro, ‘ke esịt mbufo,’ . . . emi ẹdiọn̄ọde ke ukwan̄ usụn̄ifiọk eyomfịn nte ‘fo’ nte se idade inọ owo kiet; ‘fo’ oro . . . ada ọnọ ediwak (Jesus etịn̄ ikọ ọnọ mme Pharisee—uf. 20) . . . Ekikere oro nte ke obio ubọn̄ Abasi edi idaha eke esịtidem owo, m̀mê ọkpọkpọ edinyan̄a, atuaha ye udọn̄ikọ ufan̄ikọ emi, n̄ko ye ofụri ofụri ekikere oro O[bufa] T[estament] ọnọde.”

Ikọ idakisọn̄ ke Luke 17:21 ke New International Version owụt ete ke ẹkeme ndisịn mme ikọ Jesus oro ke usụn̄ emi: “Obio ubọn̄ Abasi odu ke otu mbufo.” Mme akabade Bible eken ẹkot ẹte: “Obio ubọn̄ Abasi odu ke otu mbufo” m̀mê “odu ke ufọt mbufo.” (The New English Bible; The Jerusalem Bible; Revised Standard Version) Nte ekemde ye New World Translation of the Holy Scriptures, Jesus ọkọdọhọ ete: “Obio ubọn̄ Abasi odu ke ufọt mbufo.” Jesus ikọdọhọke ite ke Obio Ubọn̄ okodu ke esịt mme atan̄-idem Pharisee oro enye eketịn̄de ikọ ọnọ. Utu ke oro, nte Messiah ye Mmeknnịm-Edidem, emi ẹketiede ẹbet ke anyanini, Jesus okodu ke ata ufọt mmọ. Edi ndusụk ini eyebe mbemiso Obio Ubọn̄ Abasi edide.

Ke Ini Enye Edidide

Ẹma ẹmek san̄asan̄a ibat ke otu mme anditiene Jesus Christ nte mme nsan̄a andikara ye enye ke Obio Ubọn̄ Messiah eke heaven. Ukem nte Jesus, mmọ ẹkpan̄a ke edinam akpanikọ nnọ Abasi ẹnyụn̄ ẹnam ẹset ẹdụk uwem eke spirit ke heaven. (1 Peter 3:18) Sia ẹkpride ke ibat, mmọ ẹdidi ndidem ye mme oku 144,000 oro ẹdepde ẹsio ke otu ubonowo. (Ediyarade 14:1-4; 20:6) Mme nsan̄a andikara ye Jesus ẹsịne mme anam-akpanikọ apostle esie.—Luke 12:32.

Ke etịn̄de ikọ inikiet ọnọ mme anditiene enye, Jesus ama ọn̄wọn̄ọ ete: “Ndusụk owo ẹdu ke otu mmọemi ẹdade mi, ẹmi mîditabike n̄kpa, tutu mmọ ẹkụt Eyen Owo edide ndida ubọn̄.” (Matthew 16:28) Nte enemde, udiana ufan̄ikọ owụt nte ke un̄wọn̄ọ Jesus ama osu ke n̄kpọ nte usen ifan̄ ke ukperedem. Ekem enye ama ada owo ita ke otu mbet esie ọdọk ke akamba obot ke ebiet emi ẹkekpụhọrede mbiet esie ke iso mmọ, ndien mmọ ke ntre ẹma ẹkụt enye ke uyama Obio Ubọn̄ ke n̄kukụt. (Matthew 17:1-9) Edi owo ikowụkke kan̄a Obio Ubọn̄ ke ini oro. Ini ewe ke oro edida itie?

Kiet ke otu mme uwụtn̄kpọ Jesus owụt ete ke owo idinọhọ enye ubọn̄ nte Edidem Messiah ke ndondo oro. Ke Luke 19:11-15, nnyịn ikot ite: “Enye . . . otop n̄ke, koro Enye ekperede Jerusalem, mmọ ẹnyụn̄ ẹkere ẹte Messiah ọmọn̄ ada ubọn̄ idahaoro. Ntre ke Enye ọdọhọ ete, Ọbọn̄ kiet akaka anyan idụt, ndibọ ubọn̄ nda mfiak nnyọn̄. Ntem ke enye okot owo duop ke otu ikọt esie, onyụn̄ ọnọ mmọ okụk duop, onyụn̄ ọdọhọ mmọ ete, Ẹda emi ẹnyam urua tutu ndi. . . . Edikem ke enye ama ọkọbọ ubọn̄ oro ada, enye afiak edi, ọnọ uyo ete, ẹkot ikọt imọ oro imọ ikayakde okụk inọ mmọ, man ọfiọk udori eke mmọ ẹkekụtde ke mbubịne.”

Ke ini oro ama ekeme ndida owo anyanini ndito ke Israel nnam isan̄ n̄ka Rome, ndu ke obio oro tutu enye ọbọ odudu ubọn̄, ndien afiak ọnyọn̄ obio emana esie nte edidem. Jesus ekedi “ọbọn̄” oro. Enye ọkọbọ odudu nte Edidem oto Ete esie ke heaven edi owo ikọnọhọ enye ubọn̄ nte Edidem Messiah ke ndondo oro. Mme anditiene enye ẹma ẹnam utom ebe ke ndikaiso nnam utom edikwọrọ eti mbụk Obio Ubọn̄ ke anyanini mbemiso enye ọkọnyọn̄de edi nte Edidem.

Nte Obio Ubọn̄ Edide

Nso ke mme andima Abasi ẹsiben̄e ke ini mmọ ẹbọn̄de akam ẹte Obio Ubọn̄ esie edi? Mmọ ke akpanikọ ẹben̄e ẹte yak Obio Ubọn̄ eke heaven ọnọ akpatre ubiere ke ndisobo ndutịm ukara ubọkowo oro ẹkpude ndinam n̄kpọ ekekem ye un̄wọn̄ọ mmọ ndida emem ye mfọnọn̄kpọ ndi. Ke anyande ubọk owụt n̄kpọntịbe emi, prọfet Daniel ama ewet ete: “Ke eyo ndidem oro, Abasi enyọn̄ eyenam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye eyenuak onyụn̄ ama kpukpru mme idụt ẹmi, ndien enye eyeda ke nsinsi.” (Daniel 2:44) Ini ewe ke emi editịbe?

Jesus ama ebemiso iso etịn̄ nte ke emi edida itie ke esịt emana mbon oro ẹdikụtde anana-mbiet ndutịme ke mme ndutịm owo. Ke se iban̄ade ‘edidu’ esie, Jesus ama ọnọ ntan̄-ndian “idiọn̄ọ” ẹmi ẹsịnede mme utọ n̄kpọntịbe nte anana-mbiet ekọn̄, unyekisọn̄, akan̄, ndiọi udọn̄ọ—ih, ye edikwọrọ eti mbụk Obio Ubọn̄ Abasi ke ofụri ererimbot.—Matthew, mme ibuot 24, 25; Mark, ibuot 13; Luke, ibuot 21.

Prọfesi Jesus esịne mme n̄kpọntịbe oro ẹdade itie idahaemi—ke ọyọhọ isua ikie-20 nnyịn emi. Ntem, idibịghike mbemiso Obio Ubọn̄ Abasi adade mme akwa edidiọn̄ ọsọk ubonowo. Afo emekeme ndisịne ke otu mbon oro ẹdidarade mme ufọn ukara Obio Ubọn̄. Edi nso ke Obio Ubọn̄ Abasi ekeme ndikam n̄n̄wọrọ nnọ fi ye mbonima fo?

Mme Edidiọn̄ Ukara Obio Ubọn̄

Inemesịt eyedu ke ofụri isọn̄. Ke idak “obufa enyọn̄”—kpa Obio Ubọn̄ eke heaven—“obufa isọn̄” eyedu, kpa n̄kaowo eke ofụri ererimbot emi ẹdide mme okopitem andidu ke idak Obio Ubọn̄. Apostle John ekewet ete, “Abasi ke Idemesie eyenyụn̄ odu ye mmọ, . . . Enye eyekwọhọde kpukpru mmọn̄eyet ke enyịn mmọ efep.” Adan̄aoro ntak ndomokiet ididụhe ndikere n̄kpọ ibọhọke ndikop inemesịt, koro “eseme ye ntuan̄a ye ubiak idinyụn̄ idụhe aba.”—Ediyarade 21:1-4.

N̄kpa ididụhe aba. Omụm-owo mbọribọ ntak eseme emi idibọhọ nnyịn mme ufan ye mbonima nnyịn aba. “Akpatre usua emi Enye edisobode edi n̄kpa.” (1 Corinth 15:26) Nso idara ididu ntem ke ini ediset ke n̄kpa mbon oro ẹdude ke ekikere Abasi edidade itie edinam ubụkowo!—John 5:28, 29.

Ọyọhọ nsọn̄idem eyeda itie udọn̄ọ ye mmemidem. Mme bed ufọkibọk idiyọhọke aba ye mbon udọn̄ọ ikpọkidem ye eke ibuot. Etubom Ọkọkudọn̄ọ oro, Jesus Christ, eyeda ekọmurua uwa ufak esie “[ọ]kọk mme idụt udọn̄ọ.” (Ediyarade 22:1, 2; Matthew 20:28; 1 John 2:1, 2) Ukọkudọn̄ọ oro enye akanamde ke adan̄aemi okodude ke isọn̄ ekedi uwụtn̄kpọ kaban̄a se enye edinamde ebe ke Obio Ubọn̄.—Men Isaiah 33:24; Matthew 14:14 domo.

Udia eyedu barasuene. Nte andiwet psalm ọkọdọhọde, “uwak ibokpot eyedu ke isọn̄ ke nsom ikpọ obot.” (Psalm 72:16) Kaban̄a emi, prọfesi Isaiah adian do ete: “Ke obot emi ke Jehovah mme udịm edinam akamba udia ọnọ kpukpru mme idụt, n̄kpọ eke enyenede isek, ndia ke wine eke anade ke ntak, ke n̄kpọ eke enyenede isek, ẹnyụn̄ ẹwakde ndia, wine ke ntak eke ẹtịmde ẹdụk.” (Isaiah 25:6) Ke akpanikọ, akan̄ idinọmọke mme andidụn̄ isọn̄ ke idak ukara Obio Ubọn̄.

Ofụri isọn̄ eyekabade edi paradise. Ntem se Jesus ọkọn̄wọn̄ọde ọnọ atua-n̄kpọfiọk anamidiọk oro eyesu: “Afo eyedu ye Ami ke Paradise.” (Luke 23:43) Afo n̄ko emekeme ndidara uwem nsinsi ke isọn̄ emi, kpa isọn̄ emi ẹnamde asana ọbọhọ idiọkn̄kpọ ẹnyụn̄ ẹkpụhọrede ẹnam akabade edi inem inem, ekondo ebietde in̄wan̄.—John 17:3.

Ẹnịm mme utịbe idotenyịn ẹmi ke iso kpukpru okopitem ubonowo. Ikọ Jehovah eke odudu spirit, kpa Bible, ọnọ nti un̄wọn̄ọ ẹmi. Ndien kpukpru emi edi se Obio Ubọn̄ Abasi ekemede ndiwọrọ nnọ fi.

[Ndise ke page 7]

Nte afo omonịm se Jesus eketịn̄de aban̄a Obio Ubọn̄ Abasi ke akpanikọ?