Mme Mbụme Ẹtode Mme Andikot
Nte ẹkenam Zechariah, ete John Andinịm owo baptism akabade edi inan ye imụm, nte etiede nte ke Luke 1:62 owụt ntre?
Ndusụk owo ẹma ẹbiere ẹte ke Zechariah ama akabade edi inan n̄ko. Nnyịn ikot ke mbụk Bible ite: “Mmọ ẹmọn̄ ẹdisio enye [eyen] enyịn̄ ete esie Zacharias. Edi eka esie ọbọrọ ete, Baba; enye edikere John. Ndien mmọ ẹdọhọ enye ẹte, Baba owo kiet ke orụk fo ikereke enyịn̄ oro. Edi mmọ ẹnam idiọn̄ọ ẹbụp ete esie enyịn̄ eke enye oyomde ẹsio enye. Enye ete ẹnọ imọ itiatn̄wed, onyụn̄ ewet ete, Enyịn̄ esie edi John.”—Luke 1:59-63.
Nte ededi, idụhe akpan n̄kpọ ndomokiet ke mbụk emi oro ọdọhọde ete ke Zechariah ikekemeke ndikop n̄kpọ ke ndusụk ini.
Ke mbemiso angel Gabriel ama ọnọ Zechariah ntọt aban̄a emana eyeneren emi ẹdikotde John. Zechariah oro ama ọkọsọn̄ ke emana mi ama okụt nte oro ọsọn̄de ndinịm ke akpanikọ. Angel oro ama ọbọrọ ete: “Sese, afo eyedi imụm, udunyụn̄ ukemeke nditịn̄ ikọ, tutu osịm usen eke n̄kpọ emi edisude, koro mûkonịmke ikọ mi ke akpanikọ, emi edisude ke edikem ini mmọ.” (Luke 1:13, 18-20) Angel oro ọkọdọhọ ete ke emi editụk utịn̄ikọ Zechariah, idịghe ukopikọ esie.
Mbụk oro akaiso ọdọhọ ete: “Ke adan̄aemi enye ọwọrọde [ke itie utuakibuot], ikemeke nditịn̄ ikọ nnọ mmọ: ntre ke mmọ ẹfiọk ẹte, enye ama okụt n̄kukụt ke temple: ndien enye ada ibuot anam idiọn̄ọ ọnọ mmọ, onyụn̄ etie imụm.” (Luke 1:22) Ikọ Greek oro ẹkabarede “imụm” mi ọnọ ekikere edidobi, ke nditịn̄ ikọ, ndikop ikọ, m̀mê mbiba. (Luke 7:22) Nso kaban̄a Zechariah? Ọfọn, kere ban̄a se ikadade itie ke ini ẹkekọkde enye udọn̄ọ. “Idaha oro inua ye edeme esie atara, enye onyụn̄ etịn̄ ikọ otoro Abasi.” (Luke 1:64) Oro ye eti ibuot ada osịm ekikere oro nte ke ekedi ukeme utịn̄ikọ Zechariah kpọt ke n̄kpọ akafịna.
Ntak, ndien mbon en̄wen ‘ẹkenamde idiọn̄ọ ẹbụp Zechariah enyịn̄ eke enye oyomde ẹsio [eyen oro]’? Ndusụk mme andikabade ẹkam ẹkabade emi “ke usem ẹkamade idiọn̄ọ ẹsem” m̀mê “ndida idiọn̄ọ ntịn̄ ikọ.”
Zechariah, emi ekedide imụm tọn̄ọ nte angel ọkọnọ ntọt oro, ekesiwak ndida idem ntịn̄ ikọ, kpa orụk edida idiọn̄ọ ntịn̄ ikọ, man etịn̄ ikọ esie. Ke uwụtn̄kpọ, enye ama “ada ibuot anam idiọn̄ọ” ọnọ mbon oro ẹkedude ke temple. (Luke 1:21, 22) Ke ini enye ke ukperedem ọkọdọhọde ẹnọ imọ itiatn̄wed, anaedi enye akanam ke ndida idiọn̄ọ m̀mê ndida idem ntịn̄ ikọ. (Luke 1:63) Edi mmemmem n̄kpọ, ke ntre, nte mbon oro ẹkedude ye enye ke ini enye ekedide imụm ẹtiene ẹda idem ẹtịn̄ ikọ n̄ko.
Nte ededi, odu edinam an̄wan̄a oro otịmde odot akan ke idiọn̄ọ oro ẹsiakde ke Luke 1:62. Idaha oro ke Elizabeth osụk okụre nditịn̄ ekikere esie mban̄a enyịn̄ eyen esie. Ntre, ye unana edineni ye enye, ekeme ndidi mmọ n̄kukụre ẹma ẹyom usụn̄ efen oro odotde man ẹkop ubiere ebe esie. Mmọ ẹkekeme ndinam oro ye sụk editop ibuot m̀mê idiọn̄ọ uda idem ntịn̄ ikọ. Akpanikọ oro nte ke mmọ ikewetke mbụme mmọ man Zechariah okpokot ekeme ndikam ndi uyarade nte ke enye ama okop se n̄wan esie eketịn̄de. Ntem, ikpîkpu editop ibuot m̀mê ndinam mbiet idiọn̄ọ ntre nnọ enye ọkpọkọwọrọ ete, ‘Ọfọn, kpukpru nnyịn (esịnede fi, Zechariah) imokop se enye ọdọhọde, edi nso idi akpatre ubiere fo kaban̄a enyịn̄ eyen emi?’
Ndien ndondo oro ke n̄kpọ emi ama akada itie, utịben̄kpọ efen ama otịbe, okpụhọrede idaha oro. “Idaha oro inua ye edeme esie atara, enye onyụn̄ etịn̄ ikọ otoro Abasi.” (Luke 1:64) Ufọn idụhe nditịn̄ n̄kpọ mban̄a ukopikọ esie edieke edide oro ikenyeneke mfịna.