Nte Abasi Esikpan̄ Utọn̄ ke Ini Afo Ọbọn̄de Akam?

ETUBOM ufọkutom esibiere m̀mê enye edidọn̄ isụn̄utom ndise mban̄a n̄kpọ mîdịghe m̀mê enye edise aban̄a ke idemesie. Ukem ntre, Akakan Andikara ekondo enyene unen ndibiere udomo oro enye edisịnde idem iketre ke n̄kpọ ekededi. N̄wed Abasi ekpep ete ke Abasi emek ndisịn idem ke akam nnyịn ndien ke ntre eteme nnyịn ndinam ẹmi ẹka ẹbịne enye.—Psalm 66:19; 69:13.

Udeme Abasi ke n̄kpọ emi ayarade ọkpọkpọ udọn̄ oro enye enyenede ke akam mme asan̄autom esie ẹmi ẹdide owo. Utu ke ndikpan ikọt esie ndisan̄a n̄kpere enye ke kpukpru ekikere ye ukpeme, enye eteme mmọ ete: “Ẹkûdop akam,” “ẹkọbọ ke edibọn̄ akam,” “top mbiomo fo nọ Jehovah,” “ẹtop kpukpru ọkpọsọn̄ ekikere eke otịmerede mbufo esịt ẹduọk ẹdori [Abasi].”—1 Thessalonica 5:17; Rome 12:12; Psalm 55:22; 1 Peter 5:7.

Edieke Abasi mîkpoyomke ndikpan̄ utọn̄ ke akam mme asan̄autom esie, enye tutu amama ikpanamke ndutịm inọ utọ usụn̄ edisan̄a n̄kpere enye emi inyụn̄ isịn udọn̄ inọ edida enye nnam n̄kpọ ifụre ifụre. Kemi, ndien, Abasi emekde ndinam ikọt esie ẹkeme ndinen̄ede nsan̄a n̄kpere enye, edi ntak kiet ndinyene mbuọtidem nte ke enye ke akpanikọ esikpan̄ utọn̄. Ih, enye esikere aban̄a akam mme asan̄autom esie kiet kiet.

Se owo mîkpofụmike edi akpanikọ oro nte ke Bible etịn̄ in̄wan̄în̄wan̄ ete ke Abasi esikpan̄ utọn̄ ke akam. Apostle John, ke uwụtn̄kpọ, ewet ete: “Nnyịn imonyụn̄ ibụre ifiọk iban̄a Enye, ite, edieke nnyịn iben̄ede n̄kpọ ekededi nte ekemde ye uduak Esie, Enye ọbiọn̄ utọn̄ ke eben̄e nnyịn.” (1 John 5:14) Edidem David ama etịn̄ aban̄a Jehovah ete “Afo emi okopde akam” onyụn̄ ọsọn̄ọ etịn̄ ye mbuọtidem ete: “Enye eyekop uyo mi.”—Psalm 55:17; 65:2.

Ntre ke adan̄aemi edibọn̄ akam nte eyịghe mîdụhe enyenede mme ufọn ke idemesie, N̄wed Abasi owụt ke se ikponde ikan oro abuana ke ini edinen owo ọbọn̄de akam. Owo odu emi akpan̄de utọn̄. Andikpan̄ utọn̄ oro edi Abasi.—James 5:16-18.

Mme Akam Oro Ẹkekopde

Bible ọyọhọ ye mbụk mme owo oro Abasi, ke akpanikọ, okokopde onyụn̄ eyerede mme akam mmọ. Mme ifiọk n̄kpọntịbe mmọ ẹsọn̄ọ in̄wan̄în̄wan̄ ẹte ke mme ufọn akam ẹka anyan ẹkan edinyene usọbọ nte utịp edidụn̄ọde nnyụn̄ ntịn̄ se idude owo ke ekikere. Mmọ ẹka anyan ẹkan mme ọkpọkpọ ukeme oro owo esịnde ke n̄kemuyo ye mme akam esie.

Ke uwụtn̄kpọ, ke ini akasakde iso ese idiọk odu oro Absalom okodụkde man ọbọ itie edidem ke Israel, Edidem David ama ọbọn̄ akam ete: “O Jehovah, mbọk, nam item Ahithophel [andinọ Absalom item] akabade edi ndisịme.” Emi ikedịghe ekpri eben̄e, koro “item Ahithophel . . . e[ke]tie nte n̄kpọ eke owo obụpde uyo Abasi; ofụri item Ahithophel eketie ntem.” Ke oro ebede Absalom ama esịn ekikere oro Ahithophel ọkọnọde kaban̄a nte ẹdisan̄ade ẹdororede Edidem David ke ebekpo. Ntak-a? “Jehovah [okonịm] ete edi ntre, man enye asuan eti item Ahithophel, kpan̄ Jehovah akpanam idiọkn̄kpọ osịm Absalom.” Nte an̄wan̄ade, ẹma ẹkop akam David.—2 Samuel 15:31; 16:23; 17:14.

Ukem ntre, ke Hezekiah ama ekekpe Abasi ubọk ndinyan̄a enye nsio ke udọn̄ọ n̄kpa esie, enye ama afiak okop nsọn̄idem. Nte emi ekedi sụk ufọn ẹtode idaha ekikere Hezekiah nte utịp edibọn̄ akam? Ke akpanikọ, ikedịghe! Etop oro Jehovah ọkọnọde Hezekiah, nte prọfet Isaiah eketịn̄de, ekedi: “Mmokop n̄kpeubọk fo, mmokụt mmọn̄eyet fo; sese, nyenam udọn̄ọ okụre fi.”—2 Ndidem 20:1-6.

Angel Jehovah ama ọsọn̄ọ ọnọ Daniel, emi ẹkebọrọde akam esie ke ini oro enye okodoride enyịn ama ekebe, ete: “Koro ẹkekopde uyo fo.” Ẹma ẹbọrọ akam mmọ efen, utọ nte eke Hannah, mme mbet Jesus, ye Cornelius etubom ekọn̄, ke mme usụn̄ oro owo mîkemeke ndibat nnọ ukeme eke owo ikpọn̄. Bible, ndien, ekpep in̄wan̄în̄wan̄ ete ke Abasi esinyịme, okop, onyụn̄ ọbọrọ mme akam ẹmi ẹdude ke n̄kemuyo ye uduak Abasi.—Daniel 10:2-14; 1 Samuel 1:1-20; Utom 4:24-31; 10:1-7.

Edi didie ke Abasi esibọrọ akam mme anam-akpanikọ asan̄autom esie mfịn?

Mme Ibọrọ Akam

Ẹma ẹbọrọ mme akam oro ẹtịn̄de ẹban̄a ke enyọn̄ emi ke ndyọ ndyọ, utịbe utịbe usụn̄. Mbọk nyene ke ekikere, nte ededi, ete ke idem ke mme ini ẹkewetde Bible, owo ikekwe ata uwak ibọrọ akam ke ata ndondo oro. Emi edi koro mmọ ẹma ẹnyene ebuana ke ndinọ odudu eti ido uwem ye asian, an̄wamde mme asan̄autom Abasi ndisọn̄ọ mmụm edinen usụn̄uwem n̄kama. Akpan akpan ye mme Christian, mme ibọrọ akam ẹma ẹbuana mme n̄kpọ eke spirit akpan akpan, idịghe se ẹkemede ndikụt ke enyịn m̀mê mme utom odudu.—Colossae 1:9.

Ntem, kûbat ete ke edi edikpu edieke owo mîbọrọke akam fo kpukpru ini ke usụn̄ oro afo odoride enyịn m̀mê amade akan. Ke uwụtn̄kpọ, utu ke ndimen idomo mfep, Abasi ekeme ndimek ndinọ fi “akwa ubom odudu” man ọyọ enye. (2 Corinth 4:7; 2 Timothy 4:17) Nnyịn ikpedehede ibat ufọn utọ odudu oro ke ekpri, m̀mê nnyịn ndikpebiere nte ke Jehovah inen̄ekede iyere akam nnyịn ke baba usụn̄ kiet.

Kere ban̄a idaha oro abuanade Eyen Abasi, Jesus Christ. Ke ekerede aban̄a nte enye ekpetrede ndikpa in̄wan̄în̄wan̄ nte owo isụn̄i, Jesus ama ọbọn̄ akam ete: “Ete, edieke Afo onyịmede, men Mi cup emi fep.” Nte Abasi ama okop akam emi ye mfọn? Ih, nte ẹsọn̄ọde ke mme Hebrew 5:7. Jehovah ikanyan̄ake Eyen esie isio ke edikpa n̄kpa ke eto ndutụhọ oro ẹkeyomde. Utu ke oro, “angel [ama] oto ke heaven ọbiọn̄ọde Enye ke iso ndisọn̄ọ Enye idem.”—Luke 22:42, 43.

Ndyọ ndyọ, utịbe utịbe ibọrọ akam? Ye owo nnyịn ekededi, enye ekeme ndidi! Edi ye Jehovah Abasi, kpa ebiet emi utọ odudu oro otode, emi ikedịghe esen esen edinam. Ndien Jesus, toto ke ntọn̄ọ ntọn̄ọ uwem esie ke heaven, ama emehe ye mme idaha ke mme ini edem oro mme angel ẹkesiwụtde mme owo idem. Ntre angel ndiwọrọ n̄wụt idem ikotụkke enye ke utọ ndyọ ndyọ usụn̄ oro okpotụkde nnyịn. Edi, angel emi, emi Jesus ke idemesie nte an̄wan̄ade ama ọkọdiọn̄ọ ke ini uwem Esie mbemiso edide owo, ama an̄wam ndisọn̄ọ Enye idem nnọ idomo oro okosụk edide ke iso.

Ke ndibọrọ akam mme anam-akpanikọ asan̄autom esie mfịn, Jehovah esiwak ndinọ odudu oro ẹyomde man ẹkeme ndiyọ. Utọ un̄wam emi ekeme ndidi ke uduot eke nsịnudọn̄ otode nsan̄a mme andituak ibuot emi nnyịn ke idem nnyịn ibuanade ke otu mmọ. Nte owo nnyịn ekededi okpoyom ndisịn utọ nsịnudọn̄ oro, iso-ọfọn ibierede ite ke sia ekemmọ asan̄autom nnyịn mîsoboke idomo oro ẹbietde eke nnyịn, ke mmọ idụhe ke idaha ndisọn̄ọ nnyịn idem? Jesus ekpekenyene ukem ekikere oro aban̄a angel oro okowụtde enye idem. Utu ke oro, enye ama onyịme nsịnudọn̄ oro nte ibọrọ oro Jehovah ọnọde ke akam esie ndien ke ntre ama ekeme ndiyọhọ uduak Ete esie ke edinam akpanikọ. Nnyịn n̄ko iyeyom ndibọ odudu oro Abasi ọnọde ke ibọrọ akam nnyịn ye ekọm. Ti, n̄ko, ete ke mme utọ ini ediyọ oro ke ime esiwak ndisan̄a ye mme edidiọn̄ oro inua mîkemeke nditịn̄.—Ecclesiastes 11:6; James 5:11.

Nyene Mbuọtidem Nte ke Abasi Esikpan̄ Utọn̄

Kûdede uduọk mbuọtidem ke odudu oro akam enyenede edieke owo mîbọrọke fi ke ndondo oro. Ibọrọ ke ndusụk akam, utọ nte mbon oro ẹban̄ade edibọhọ ọkpọkpọ mfụhọ m̀mê kaban̄a ifetutom efen efen ke utom oro owo anamde ọnọ Abasi, ekeme ndiyom ẹbet ini oro Abasi ọfiọkde ke enen onyụn̄ ọfọn akan. (Luke 18:7, 8; 1 Peter 5:6) Edieke edide afo ọbọn̄ akam aban̄a ntotụn̄ọ mbubehe idemowo, wụt Abasi ebe ke edisọn̄ọ nyịre fo nte ke imọ imenyene ọkpọsọn̄ udọn̄, ke uduakesịt imọ edi edisana ye eti. Jacob ama owụt edu emi ke ini, ke ama akan̄wana ọkpọsọn̄ ọkpọsọn̄ ke ndusụk ini ye angel, enye ọkọdọhọde ete: “Nsanake fi nyak, ke mûdiọn̄ke mi.” (Genesis 32:24-32) Ana nnyịn inyene ukem mbuọtidem oro nte ke edieke nnyịn ikade iso ndiben̄e, nnyịn iyebọ edidiọn̄ ke edikem ini.—Luke 11:9.

Akpatre n̄kpọ ndikere mban̄a. Ndidi se Andikara ekondo akpan̄de utọn̄ ọnọ edi ọsọn̄urua ifet. Ke ikerede iban̄a emi, nte nnyịn imesinen̄ede ikpan̄ utọn̄ ke ini Jehovah Abasi, ebede ke Ikọ esie, etịn̄de se enye oyomde ọno nnyịn? Nte akam nnyịn anamde nnyịn itotịm isan̄a ikpere Andibot nnyịn ikan, nnyịn iyeyom ndinọ akpan ntịn̄enyịn ke kpukpru n̄kpọ oro enye enyenede nditịn̄ nnọ nnyịn.

[Ndise ke page 6]

Abasi esikpan̄ utọn̄ ke mme akam. Nte nnyịn imesikpan̄ utọn̄ inọ enye ebe ke Ikọ esie?