Nte Afo Emeti?
Nte afo ama okụt mme nsiondi Enyọn̄-Ukpeme eke ndondo emi nte enyenede akpan ufọn? Do ntak mûdomoke ibuot uti-n̄kpọ fo ye se itienede emi:
▫ Nso ikedi akpan uduak Jesus ke ndikọk udọn̄ọ? Mmọ ẹkenyan ubọk ẹwụt, man esịn udọn̄ ọnọ akwa otuowo mbon mbieterọn̄ mfịn, ke ẹyekọk udọn̄ọ mme andibọhọ Armageddon esisịt ini ke Armageddon ebede. (Isaiah 33:24; 35:5, 6)—12/15, page 12.
▫ Ntak nnyịn iyomde n̄kaiso n̄kpọ editi emi: “Ẹkọbọ ke edibọn̄ akam”? (Rome 12:12) Koro mfịghe uwem ye mbiomo ẹkeme ndifịk nnyịn ata akamba akamba ke ndusụk ini tutu ifre ndibọn̄ akam. Mîdịghe mfịna ẹkeme ndikan nnyịn ubọk, ẹnamde nnyịn itre ndidat esịt ke idotenyịn Obio Ubọn̄, idem itrede ndibọn̄ akam. Ntem, nnyịn imoyom n̄kpọ editi ẹmi ẹsịnde udọn̄ ẹnọ nnyịn ndibọn̄ akam ndien ke usụn̄ emi itịmde isịk ikpere Jehovah.—12/15, page 14.
▫ Nso iwụt ke Ukwọ eyo Noah ama ọkpọn̄ idiọn̄ọ oro owo mîkemeke ndisọhi ke ekpụk ubonowo? Ẹnọ ẹkikere ke ẹbụk se ibede mbụk Ukwọ 500 ke se iwakde ikan ekpụk ye idụt 250. Ẹkụt ndusụk akpan mbiet n̄kpọ ke ofụri mbụk ẹmi.—1/15, page 5.
▫ Didie ke nsunsu prọfet mfịn ẹbiet mmọ oro ẹkedude ke eyo Jeremiah? Mme nsunsu prọfet mfịn ẹdọhọ ke ida ke ibuot Abasi, edi ẹyịp ikọ Abasi ke ndikwọrọ n̄kpọ ẹwọn̄ọrede mme owo ẹkpọn̄ se Bible enen̄erede etịn̄. Emi akpan akpan edi akpanikọ ke ukpepn̄kpọ aban̄ade Obio Ubọn̄. (Jeremiah 23:30)—2/1, page 4.
▫ Nso ke ọwọrọ ke ini ẹnịmde owo baptism ke enyịn̄ edisana spirit? Emi ọwọrọ ke owo oro ẹnịmde baptism ebiere ndiberi ye spirit, inamke n̄kpọ ndibiọn̄ọ edinam esie ke otu ikọt Jehovah. Ntem, ana owo oro adiana kiet ye asan̄autom emi anamde akpanikọ onyụn̄ enyenede ọniọn̄ ye ndutịm mbiowo ke esop. (Mme Hebrew 13:7, 17; 1 Peter 5:1-4)—2/1, page 18.
▫ Ntak emi edituak ibuot nnọ mbiet ekemede ndinọ andituak ibuot unan ntre? Bible owụt ke mme mbiet ẹdi n̄kpọ mbubiam ẹnọ Jehovah Abasi inyụn̄ ikemeke ndin̄wam mme andisịn idem ke enye ndisan̄a n̄kpere Abasi n̄kan. (Deuteronomy 7:25; Psalm 115:4-8) Satan kpa Devil ‘anam ikike mme owo okịm’ man akpanikọ “edisem ọnọ mmọ.” (2 Corinth 4:4) Ntre ke ini ẹkponode mbiet, owo enen̄ede anam n̄kpọ mme demon. (1 Corinth 10:19, 20)—2/15, page 6-7.
▫ Ntak emi ẹkedade mme erọn̄ nte akpan inyene ke ini ẹkewetde Bible? Ideterọn̄ ekedi inyene oro ọkọride-kọri ndien ẹkeme ndida nnam ọfọn̄ nnọ ubon mîdịghe ẹkeme ndinyam. Ẹkesida nnụk okukịm ẹtọt Jubilee mîdịghe ẹkeme ndikama nnọ ntọt mban̄a n̄kpọntịbe m̀mê ndinọ ndutịm ekọn̄ ndausụn̄. Sia erọn̄ ẹkedide kiet ke otu ndisana unam ẹmi nditọ Israel ẹkekemede ndita, otuerọn̄ ama ọnọ idotenyịn edinyene udia, onyụn̄ ọnọ mmọn̄eba ndin̄wọn̄ m̀mê ndida nnam cheese kpukpru ini.—3/1, page 24-25.
▫ Nso ke mme andima Abasi ẹsiben̄e ke ini mmọ ẹbọn̄de akam ẹte Obio Ubọn̄ Abasi edi? (Matthew 6:10) Mmọ ẹben̄e ẹte yak Obio Ubọn̄ Abasi eke heaven ọnọ akpatre ubiere ke ndisobo ndutịm ukara ubọkowo, ẹmi ẹkpude ndinam n̄kpọ ekekem ye un̄wọn̄ọ mmọ ndida emem ye ifụre ndi. (Daniel 2:44)—3/15, page 6.
▫ Mmanie ẹkedi Mme Andida Nnọ, ndien nte mmọ ẹma ẹkpep Abasi-Ita-ke-Kiet? Mme Andida Nnọ ẹkedi mbon ufọkederi ẹmi ẹkedude uwem ke utịt utịt ubak ọyọhọ isua ikie iba. Mmọ ẹkewet n̄kpọ ndida nnọ Ido Ukpono Christ oro mmọ ẹkefiọkde man ẹbiọn̄ọ ibak ibak akwaifiọk owo ẹmi ẹkeyọhọde ke ererimbot mbon Rome. Owo mmọ ndomokiet ikekpepke Abasi-Ita-ke-Kiet.—4/1, page 24-29.
▫ Nte ẹkenam Zechariah, ete John Andinịm owo baptism, akabade inan ye imụm, nte ẹtiede nte ke Luke 1:62 owụt ntre? Gabriel ọkọdọhọ ke edi utịn̄ikọ Zechariah edinyene mfịna idịghe ukopikọ esie. (Luke 1:18-20) Luke 1:64 ọdọhọ ete: “Idaha oro inua ye edeme esie [Zechariah] atara, enye onyụn̄ etịn̄ ikọ.” Tịmfiọk, owo itịn̄ke n̄kpọ ndomokiet mi ke enye ama enyene mfịna ukopikọ ke baba usụn̄ kiet. Editịn̄ mban̄a “mme idiọn̄ọ” ke Luke 1:62 ekeme ndiwọrọ ke Zechariah ama anam ndusụk idiọn̄ọ ndiwụt ubiere esie.—4/1, page 31.