Mme Edidiọn̄ Unọ Ukpep Ke Gilead Atara ke Ofụri Ererimbot
UKPEP n̄wed ke akani ererimbot emi enyene esisịt ufọn kpọt. Sia enye ọkọn̄ọde akpan akpan ke mme ekikere owo utu ke akpanikọ Abasi, enye ikemeke ndinọ ata uduak ke uwem. Edi Ufọkn̄wed Gilead okpụhọde. Ke ntọn̄ọikọ esie ke edinam ukụre ukpep eke ọyọhọ otu ukpepn̄kpọ 93 eke Gilead, Theodore Jaracz eke Otu Ukara ama etịn̄ nte ke ufọkn̄wed emi ọmọnọ ukpep emi enyenede ata ufọn. Nte Psalm 119:160 ọdọhọde, “ofụri ikọ [Abasi] ẹdi akpanikọ.” Ntre ekedi ye akwa nduaidem ke otuowo oro ekperede ndisịm 6,000 ẹkekpan̄ utọn̄ ẹnọ edinam ukụre ukpep ke September 13, 1992.
Akpa utịn̄ikọ usenubọk oro, emi Lon Schilling eke Kọmiti In̄wan̄ Enyọn̄-Ukpeme ọkọnọde, ekedi “Ẹkaiso Ẹkan Ererimbot ye Andikara Esie.” Brọda Schilling okowụk ntịn̄enyịn ke Ediyarade 12:11 onyụn̄ owụt nte ke ufan̄ikọ oro owụt usụn̄ ita ndikan: (1) ebe ke iyịp Eyenerọn̄, (2) ebe ke ikọ ntiense, onyụn̄ (3) ebe ke ndinyene edu n̄waidem. Enye ama eti nditọ ufọkn̄wed ete ke ediwak ikọt Jehovah ẹma ẹwụt utọ edu emi ẹnyụn̄ ẹsobo n̄kpa unyịme unyịme man ẹkpemụm edinam akpanikọ ye nsọn̄ọnda mmọ ẹkama.
“Ẹkpeme Eti N̄kpọ Oro Ẹyakde Ẹsịn Mbufo ke Ubọk” ekedi ibuotikọ oro John E. Barr eke Otu Ukara ọkọnọde. Ke ufiop ufiop ido utịn̄ikọ esie, enye ama emen n̄kpọ ubiọn̄ oro odude ke ufọt Jehovah ye ikọt esie odomo ye n̄kpọ ubiọn̄ oro odude ke eti ndọ. Ke akamade mme n̄kpọ ẹtode 2 Timothy 1:12, 13, enye ama akpak nditọ ufọkn̄wed oro ete ẹkpeme se ẹkeyakde ẹsịn mmọ ke ubọk ebe ke ndisọn̄ọ mmụm “nti ikọ” ẹmi ẹdude ke Bible n̄kama. Enye ama ọsọn̄ọ etịn̄ aban̄a edinam ukpepn̄kpọ idemowo edi akpan ubak ndutịm eke usen ke usen onyụn̄ ọnọ nditọ ufọkn̄wed item ke mfọnido ete ẹkûdede ẹyak mme ibọrọ oro mmọ ẹdọde ke mbonoesop ẹtie eto eto edi ẹnam mmọ ẹdi se inyenede ufọn kpukpru ini.
William Van De Wall eke Kọmiti Itieutom Utịmutom ọkọnọ utịn̄ikọ oro eketienede, “Wụt Ima Ima Udọn̄ nọ Mbon Mbieterọn̄.” Enye ama obụp nditọ ufọkn̄wed mme edu oro mmọ ẹkpemade dọkta emi esede aban̄a ubon mmọ enyene onyụn̄ akpak mmọ ndikọri ukem ekikere, edikere mban̄a, ye mbọm oro mmọ ẹkpemade.
Daniel Sydlik eke Otu Ukara ama etịn̄ ikọ oro edemerede owo udọn̄ ke ibuotikọ oro “Ye Abasi Kpukpru N̄kpọ Ẹdi Mmemmem.” Enye ama eti nditọ ufọkn̄wed oro nte ke Abraham ye Sarah ẹma ẹsak se iketiede nte idotenyịn edinyene eyeneren oro mîkemeke nditịbe ke ini usọn̄ mmọ. Ediwak un̄wọn̄ọ Abasi esitie nte ikemeke nditịbe ke ekikere owo; edi nte angel okobụpde Abraham, “nte n̄kpọ ọsọn̄ akan Jehovah?” (Genesis 18:14) Brọda Sydlik ama ọnọ nditọ ufọkn̄wed item ete ẹnyene mbuọtidem ke ukeme Abasi ndinam se mîkemeke nditịbe, ẹkûdede ẹyak mbuọtidem oro akpa m̀mê oyok, inamke n̄kpọ se mme idomo oro mmọ ẹdisobode.
Mme Andikpep Ẹnọ Item
Mme andikpep iba ke Gilead ẹma ẹtịn̄ ikọ. Akpa, Jack D. Redford ama eneme ibuotikọ oro “Ndinam Eti Enyịn̄ ye Abasi.” Se inamde enyịn̄ ọfọn m̀mê ọdiọk, enye ama ọnọ ekikere, edi owo oro ekerede enye. Enye ama owụt ukpụhọde oro odude ke ufọt mme utọ enyịn̄ nte Adam, Nimrod, Jezebel, Saul, ye Judas ye mme utọ enyịn̄ nte Noah, Abraham, Ruth, Paul, ye Timothy. Enyịn̄ kiet kiet asan̄a ye ediwak ekikere ye ntụk etiene usụn̄uwem owo oro ekerede enye. Enye ama obụp nditọ ufọkn̄wed se utọ enyịn̄ oro mmọ ẹdinyenede ke isua 10, 100, m̀mê idem 1,000 oro ẹdide—eke etre utom m̀mê okụni n̄kụni m̀mê eke anam-akpanikọ isụn̄utom? Enye ama ọnọ mmọ item ete ẹwụk ekikere ke mme usọbọ ye mme uduak utu ke mme mfịna.
“Afo Ekpeme Mbuọtidem Fo Ọfọn Adan̄a Didie?” ekedi edemede-owo ekikere ibuotikọ oro Ulysses V. Glass ọkọnọde. Enye ama emen ọkpọsọn̄ mbuọtidem odomo ye eti ukwak uwụt owo usụn̄ oro esiwụtde nnennen usụn̄ kpukpru ini. Ukwak uwụt owo usụn̄ emi odude ke moto ekeme ndinam n̄kpọ ntiene mme odudu efen ke osiode isọn̄ efep, ndien oyom ẹbiat mme utọ odudu oro ẹfep. Kpasụk ntre, akani ererimbot emi osion̄o ekese odudu edi oro ẹkemede ndiwọn̄ọde m̀mê ndibiat mbuọtidem nnyịn edieke nnyịn isanade mmọ iyak. Nte enye ọkọnọde otu ukpepn̄kpọ oro item ndibiọn̄ọ mme utọ odudu oro, Brọda Glass n̄ko ama otoro mmọ ke mmọ ndidiọn̄ọ mban̄a mme edu ye ntụk mbon en̄wen ye ntịn̄enyịn.
Albert D. Schroeder, owo Otu Ukara, ọkọnọ akpatre utịn̄ikọ usenubọk oro. Enye ama esịn udọn̄ ọnọ nditọ ufọkn̄wed ete “Ẹmụm Edu Isụn̄utom Ẹkama,” otorode mmọ ke ndiwụt ukem edu isụn̄utom nte emi akpa otu okowụtde ko ke edem ke 1943, ke ini imọ ikanamde utom nte esịn owo enyịn̄ ke ufọkn̄wed emi. Enye ama owụt ete ke mmọ ẹkedi mbon oro ẹnyenede udọn̄ ke idem mme owo, mme ọkwọrọikọ ke ndammana usụn̄, ẹmi ẹmade spirit Abasi ada mmọ usụn̄. Enye ama akpak ete, ẹkaiso ndikọri ukem edu oro, ẹdade New World Translation ẹnam n̄kpọ ọyọhọ ọyọhọ ke ukpepn̄kpọ idemowo. Enye ama eberi ye nneme ọkọn̄ọde ke ufan̄ikọ kiet kiet ke Psalm 24 nte uwụtn̄kpọ.
Ekem, nditọ ufọkn̄wed Gilead ẹma ẹkabade ẹdi mme andikụre ukpep ke Gilead! Ẹma ẹyak mme n̄weditoro ẹsịn mmọ ke ubọk nte ẹkekotde mme itieutom isụn̄utom mmọ uyo ọwọrọ, asan̄ade ye ukwakubọk otode otuowo.
Ke uwemeyo, Calvin Chyke eke Kọmiti Itieutom Umịn̄n̄wed ama onịm Ukpepn̄kpọ Enyọn̄-Ukpeme. Inem inem edinam nditọ ufọkn̄wed ama etiene, emi okotụkde mme ifiọkutom nditọ ufọkn̄wed ke an̄wautom ke ini ukpep ọfiọn̄ ition n̄ko okonyụn̄ owụtde mme ndise ndusụk idụt oro ẹnọde mmọ ẹka. Ke adianade do, ẹma ẹnam ndụn̄ọde ye ebe ye n̄wan oro ẹma ẹkesọn̄ ke isua emana, ndien mmọ ẹma ẹbuana ndusụk ọniọn̄ ye ifiọkutom oro mmọ ẹkenyenede ẹto ediwak isua nte mme isụn̄utom. Ẹkeda uwemeyo ẹkesịm utịt ye ekemini drama oro ẹkotde Ẹkûyak Ẹtụn Mbufo Usụn̄ m̀mê Ẹsak Abasi Nsahi.
Otuowo ẹma ẹdat esịt, ẹkop nduaidem ndikụt se unọ ukpep ke akpanikọ Abasi ekemede ndinam ẹnyụn̄ ẹkop inemesịt ndifiọk nte ke mme ufọn utọ unọ ukpep oro ẹyekaiso ndidi se ẹkụtde ke ofụri ererimbot. Nte isụn̄utom 48 ẹmi ẹkesuanade ẹka itieutom mmọ, ẹma ẹbọn̄ ediwak akam ẹban̄a mmọ, ẹwụtde idotenyịn ye mbuọtidem ofụri esịt nte ke mme anam-akpanikọ mbon ẹmi ẹyedi edidiọn̄ ẹnọ ikọt Abasi ke ọtọ ekededi oro mmọ ẹkade.
[Ekebe ke page 19]
Idaha Nditọ Ufọkn̄wed
Ibat idụt oro mmọ ẹtode: 7
Ibat idụt oro ẹnọde mmọ ẹka: 18
Ibat nditọ ufọkn̄wed: 48
Ibat mme ọdọndọ: 24
Ukem mbahade isua emana: 32.8
Ukem mbahade isua ke akpanikọ: 15.3
Ukem mbahade isua ke utom uyọhọ-ini: 10.4
[Ekebe ke page 20]
NSIONNỊM OTU GILEAD ẸKỤRE UKPEP
Ke June 21, 1992, otu kiet esịnede isụn̄utom 24 ẹma ẹkụre ukpep ẹto ọyọhọ otu inan̄ eke Nsionnịm Ufọkn̄wed Gilead ke Selters/Taunus, Germany. Otu oro, ekesịne mme ọdọndọ 11 ye nditọeka iban 2 oro mîdọhọ ndọ ẹtode idụt itiaba, ẹdude ke ukem mbahade isua 32 ke emana, isua 14 tọn̄ọ nte ẹkena baptism, ye isua 8.5 ke utom ukwọrọikọ uyọhọ-ini. Mme owo ẹwakde ẹbe 2,000 ẹkedụk edinam ukụre ukpep oro.
Brọda Jaracz ekeberede ndutịm oro ye nneme ọkọn̄ọde ke Mme N̄ke 11:24, emi ọdọhọde ete: “Enyene owo eke asuande, ndien enye ọdọdiọn̄ ọtọt.” Enye ama owụt ete ke ẹmọn̄ ẹsuan nditọ ufọkn̄wed oro ndien oro ke akpanikọ eyedemede n̄kọri.
Richard Kelsey, anam ndutịm ke Kọmiti N̄kọk Itieutom Germany; Wolfgang Gruppe eke Itieutom Utịmutom; Werner Rudtke ye Edmund Anstadt, n̄ko ẹdide mme andibuana ke Kọmiti N̄kọk Itieutom; ye mme andikpep iba, Dietrich Förster ye Lothar Kaemmer ẹma ẹnọ mme edemede-owo udọn̄ utịn̄ikọ. Albert Schroeder eke Otu Ukara ama ọnọ inem inem akpan utịn̄ikọ ọkọdọhọde “Ẹkaiso Ndidi Mme Oyom N̄kpọuto eke Spirit.” Ata inem inem ikpehe ndutịm oro ekedi edinọ mme itieutom ke idụt 11 ke Africa, Central America, ye Edem Usiahautịn Europe, ke oro ebede kiet ke otu mme andikụre ukpep ama okot leta ekọm oro otu oro ekewetde ọnọ Otu Ukara owụtde ekọm ofụri esịt.
[Ndise ke page 18]
Ọyọhọ Otu 93 Oro Ẹkụrede Ukpep ke Watchtower Bible School of Gilead
Ke udịm enyịn̄ ẹtienede mi, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L. Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.