“Emesiere-o! Nte Afo Ọmọfiọk Se Enyịn̄ Abasi Edide?”
KE ỌFIS n̄kọk itieutom eke Mme Ntiense Jehovah ke Brazil, ẹma ẹbọ leta emi etienede mi ẹto amana-iba nditọiban ẹmi ẹdide isua 12 ke emana ke obio Fortaleza:
“Ko ke edem ke 1990 ke ini nnyịn ikodude ke ọyọhọ ubet ukpepn̄kpọ ition, ufọkn̄wed nnyịn ama odiomi edinam ediwet mme n̄kpọ mban̄a ifiọk ntaifiọk, usọ, ye ido uwem. Nnyịn ima inam an̄wan̄a andikpep nte ke nnyịn iyom n̄kpọ oro idiwetde okpụhọde ye se nditọ ufọkn̄wed eken ẹdiomide ndinam. Sia edide enye ama okokop nte nnyịn inemede iban̄a Jehovah ye Bible mbemiso, enye ama ọnọ ekikere ete: ‘Do mbufo ẹmekeme ndiwet n̄kpọ mban̄a Abasi mbufo!’
“Nnyịn ima ikụt emi nte edide ifet ndida nnọ ikọ ntiense inyụn̄ ibiere ndiwụt mme n̄kpọ ye mme n̄wed Bible oro ẹwụkde ntịn̄enyịn ke enyịn̄ Jehovah. Nnyịn ima ision̄o mme ikọ oro ẹdude ke Psalm 83:18 iwet ke ikpọ abisi inyụn̄ idian enye ke ndise Bible oro ẹkûbọrede ẹnịm. N̄ko, nnyịn ima ibon nsio nsio edikabade Bible ẹmi ẹsịnede enyịn̄ oro Jehovah ke okpokoro. Kpa ke okpokoro oro, nnyịn ima ibon nsio nsio n̄wed ukpep Bible. Ke utịt utịt okpokoro oro, nnyịn ima inịm VCR [ọkpọ umụm ndise video] ye TV ndiwụt isenowo uwụtn̄kpọ kiet ke ebiet ẹkedade enyịn̄ Jehovah ke ata ọwọrọetop ndise senima.
“Ke ini edinam oro, owo ama edi okpokoro nnyịn, nnyịn iyedọhọ ite: ‘Emesiere-o! Nte afo ọmọfiọk se enyịn̄ Abasi edide?’ Ke ima ikọnọ esenowo oro ifet ndibọrọ, nnyịn ima ikaiso ite: ‘Se enye mi! Ediwak edikabade Bible ẹwụt ẹte ke enyịn̄ esie edi Jehovah,’ iwụtde enyịn̄ emi ke nsio nsio Bible, utọ nte eke João Ferreira de Almeida, The Jerusalem Bible, ye New World Translation. Ekem nnyịn ima iwụt ikpehe ndise oro akpan owo ke senima oro okowụtde Jehovah nte edide enyịn̄ Abasi. Ke ini mme owo ẹwụtde udọn̄, nnyịn ima inọ mmọ magazine mîdịghe tract ye ntọt efen efen.
“Kiet ke otu mme uyen oro ẹkedide okpokoro nnyịn ama obụp aban̄a n̄wed Questions Young People Ask—Answers That Work. Andikpep nnyịn ama odụn̄ọde n̄wed Ndinam Uwem Ufọk Fo Enem onyụn̄ ofiori ete: ‘Oh! Nso ediye n̄wed ke emi edi ntem!’ Ke utịt edinam emi, nnyịn ima inịm n̄wed 7, tract 18, ye magazine 67. Nnyịn ikemen ọyọhọ ita ke edinam emi. Edi ke akande kpukpru n̄kpọ, nnyịn ima inen̄ede ikop inemesịt ke ifet oro ikenyenede ndinam ẹdiọn̄ọ enyịn̄ Abasi, Jehovah.”