Ẹsọn̄ Esịt!

‘Ẹsọn̄ esịt [“ẹnyene uko ẹnyụn̄,” “NW”] ẹdọhọ ẹte, Jehovah edi Andin̄wam mi, ndifeheke ndịk.’—MME HEBREW 13:6.

1. Nso uko ke mbon oro ẹkekpepde akpanikọ Abasi ke akpa isua ikie E.N. ẹkewụt?

EKEDI ke akpa isua ikie eke Eyo Nnyịn. Messiah oro ẹkebetde ke anyanini ama edisịm. Enye ama otịm ọnọ mme mbet esie ukpep onyụn̄ ọtọn̄ọ akpan utom ukwọrọikọ. Ekedi ini ọnọ mme owo ndikop eti mbụk Obio Ubọn̄ Abasi. Ntem, iren ye iban oro ẹkekpepde akpanikọ ẹma ẹtan̄a utịbe etop emi uko uko.—Matthew 28:19, 20.

2. Ntak emi Mme Ntiense Jehovah ẹyomde uko mfịn?

² Owo ikowụkke Obio Ubọn̄ ke ini oro. Edi Edidem oro Ẹmekde, Jesus Christ, ama etịn̄ prọfesi aban̄a edidu esie oro enyịn mîdikwe ke ukara Obio Ubọn̄ ke ini iso. Enye edi se mme utọ n̄kpọ nte anana-mbiet ekọn̄, akan̄, udọn̄ọ, unyekisọn̄, ye edikwọrọ eti mbụk ke ofụri ererimbot edinịmde idiọn̄ọ. (Matthew 24:3-14; Luke 21:10, 11) Nte Mme Ntiense Jehovah, nnyịn imoyom uko ndiyọ mme idaha emi ye ukọbọ oro nnyịn isobode. Ke ntem eyedi se inọde ufọn ndikere mban̄a mme mbụk Bible ẹban̄ade uko uko mme ọkwọrọ Obio Ubọn̄ eke akpa isua ikie E.N.

Uko Ndikpebe Christ

3. Anie ọnọ mfọnn̄kan uwụtn̄kpọ uko, ndien nso ke ẹketịn̄ ẹban̄a enye ke Mme Hebrew 12:1-3?

³ Jesus Christ ọnọ mfọnn̄kan uwụtn̄kpọ uko. Ke ama akasiak ‘akwa otu’ mme enyene-uko ntiense Jehovah oro ẹkedude mbemiso eyo mme Christian, apostle Paul ama owụk ntịn̄enyịn ke Jesus ke ndidọhọ: “Sia otu ntiense eke ẹwakde ntem ẹkande nnyịn ẹkụk, ẹyak nnyịn nde ikpọnọde kpukpru mbiomo inịm n̄kan̄ kiet, ye idiọkn̄kpọ eke ẹyịrede nnyịn ke kpukpru edem; ẹnyụn̄ ẹyak ifehe mbuba eke anade nnyịn ke iso ye ime, iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama; emi okobiomde [eto ndutụhọ, NW], onyụn̄ abatde bụt ke ekpri n̄kpọ, kaban̄a idatesịt eke anade Enye ke iso; okonyụn̄ osụhọrede etetie ke ubọk nnasia ebekpo Abasi. Ẹse Enyeemi okobiomde orụk idiọk ndutịn̄ oro mme idiọk owo ẹtịn̄de ẹdian Idemesie, mbak mbufo ẹdikpa mba, ẹkop mmemidem ke ukpọn̄.”—Mme Hebrew 12:1-3.

4. Didie ke Jesus okowụt uko ke ini Satan okodomode enye?

⁴ Ke baptism esie ye editie n̄kere ke usen 40, akam, ye utre udia ke wilderness okụrede, Jesus ama ọbiọn̄ọ Satan uko uko. Ke Devil odomode enye ndinam itiat ẹkabade ẹdi uyo, Jesus ama esịn koro ama akwan̄a ndinam utịben̄kpọ man oyụhọ ọkpọkpọ udọn̄. Jesus ama ọdọhọ ete: “Ẹma ẹwet ẹte, Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” Ke ini Satan ọkọdọhọde enye ete osio idem ke edikon̄ ebiet temple ọduọk ke isọn̄, Jesus ama esịn koro oro ekpekedide idiọkn̄kpọ ndisịn Abasi ke udomo ndinyan̄a enye nsio ke se ikpekedide uwotidem. Christ ama etịn̄ ete: “Ẹma ẹwet n̄ko ẹte, Kûdomo Jehovah Abasi fo.” Satan ama ọnọ enye kpukpru obio ubọn̄ ererimbot emi ke sụk “ediduọ ke isọn̄ ntuak ibuot,” edi Jesus ikọsọn̄ke ibuot inyụn̄ isọn̄ọ eneni Devil oro nte ke mme owo idinamke akpanikọ inọ Abasi ke idak idomo. Ntre Jesus ama ọdọhọ ete: “Daha Mi ke usụn̄, Satan: koro ẹma ẹwet ẹte, Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄îkpọn̄.” Ke oro, Andidomo oro ama “adaha ọkpọn̄ enye ke ekpri ini.”—Matthew 4:1-11; Luke 4:13.

5. Nso ikeme ndin̄wam nnyịn ndiyọ idomo?

⁵ Jesus ama osụk idem ọnọ Jehovah onyụn̄ an̄wana ye Satan. Edieke nnyịn ukem ntre ‘isụkde idem inọ Abasi inyụn̄ in̄wana ye Devil, enye eyefehe ọkpọn̄ nnyịn.’ (James 4:7) Nte Jesus, nnyịn imekeme ndibe idomo uko uko edieke nnyịn idade Ikọ Abasi isịn ke edinam, idem ikam ikotde ito mmọ ke ini nnyịn idude ke idomo edinam se idiọkde. Nte ekeme nditie nte ke nnyịn iyeyak idem inọ idomo ediyịp inọ edieke nnyịn ke ini oro ifiakde itịn̄ inọ idem nnyịn ibet Abasi emi ọdọhọde: “Kûyịp inọ”? Nte mme Christian iba ẹkeme ndiyak idem nnọ oburobụt ido idan̄ idem edieke kiet ke otu mmọ okotde uko uko oto mme ikọ ẹmi: “Kûsịn efịbe”?—Rome 13:8-10; Exodus 20:14, 15.

6. Didie ke Jesus ekedi uko uko andikan ererimbot?

⁶ Nte mme Christian oro ererimbot emi asuade, nnyịn imekeme ndifep edu ye ndiọi edinam esie. Jesus ama etịn̄ ọnọ mme anditiene enye ete: “Mbufo ẹyekụt ukụt ke ererimbot: edi ẹsọn̄ esịt [“ẹnyene uko,” NW]; Ami n̄kakan ererimbot.” (John 16:33) Enye ama akan ererimbot ebe ke enye nditre ndikabade ntie nte enye. Uwụtn̄kpọ esie nte andikan ye utịp edinam nsọn̄ọnda esie ekeme ndinam nnyịn inyene uko ndikpebe enye ebe ke ndida san̄asan̄a n̄kpọn̄ ererimbot emi nnyụn̄ ntre ndidi se enye asabarede.—John 17:16.

Uko Ndikaiso N̄kwọrọ Ikọ

7, 8. Nso idin̄wam nnyịn ndikaiso n̄kwọrọ ikọ kpa ye ukọbọ?

⁷ Jesus ye mme mbet esie ẹkeberi edem ke Abasi man ẹnyene uko ndikaiso n̄kwọrọ ikọ kpa ye ukọbọ. Christ ama okụre utom ukwọrọikọ esie uko uko kpa ye ukọbọ, ndien ke Pentecost 33 E.N. ebede, mme anditiene enye oro ẹkekọbọde ẹma ẹkaiso ndikwọrọ eti mbụk idem okposụkedi mme adaiso ido ukpono mme Jew ẹkedomode nditre mmọ. (Utom 4:18-20; 5:29) Mme mbet ẹma ẹbọn̄ akam ẹte: “Jehovah, se ikọ emi esịnde mmọ ndịk eke mmọ ẹtịn̄de; nyụn̄ nọ mme asan̄autom Fo odudu nditịn̄ ikọ Fo ke ofụri uko.” Ndien nso ikotịbe? Mbụk oro ọdọhọ ete, “Ke mmọ ẹma ẹkebọn̄ akam ẹma, ufọk emi mmọ ẹbonode ke esịt enyek; ndien kpukpru mmọ ẹyọhọ ye Edisana Spirit, ẹnyụn̄ ẹtịn̄ ikọ Abasi uko uko.”—Utom 4:24-31.

⁸ Sia n̄wakn̄kan ibat owo mfịn mîmaha ndikop eti mbụk, oyom uko kpukpru ini man ẹkaiso ẹkwọrọ ikọ ẹnọ mmọ. Akpan akpan ke ini ẹkọbọde, mme asan̄autom Jehovah ẹyom uko oro Abasi ọnọde man ẹkeme ndinọ ikọ ntiense ọyọhọ ọyọhọ. (Utom 2:40; 20:24) Ntem Paul, uko uko ọkwọrọikọ Obio Ubọn̄ ama ọdọhọ akparawa nsan̄autom esie, oro mîketịmke inyene ifiọk ete: “Abasi ikọnọhọ nnyịn spirit ufep, edi spirit odudu ima ye mfara idem. Mmọdo kûyak bụt anam fi ndidi ntiense nnọ Ọbọn̄ nnyịn, kûnyụn̄ uyak bụt anam fi ye ami, owo n̄kpọkọbi Esie; edi kam tiene gospel biom ukụt, adan̄a nte asan̄ade ekekem ye odudu Abasi.” (2 Timothy 1:7, 8) Edieke nnyịn ibọn̄de akam iyom uko, nnyịn iyekeme ndikaiso n̄kwọrọ ikọ, ndien idem ukọbọ idibọhọ nnyịn idatesịt oro inyenede nte mme ọkwọrọ Obio Ubọn̄.—Matthew 5:10-12.

Uko ke Ndida ke N̄kan̄ Jehovah

9, 10. (a) Nso ke mme Jew ye mme Gentile eke akpa isua ikie ẹkenam man ẹkabade ẹdi mme anditiene Christ oro ẹnade baptism? (b) Ntak emi ẹkeyomde uko man ẹkabade ẹdi mme Christian?

⁹ Ediwak mme Jew ye mme Gentile eke akpa isua ikie ẹma ẹkpọn̄ mme ido edinam oro mîkemke ye N̄wed Abasi uko uko man ẹkabade ẹdi mme anditiene Christ oro ẹnade baptism. Ibio ini ke Pentecost eke 33 E.N. ebede, “ibat mbet onyụn̄ ọtọt ke Jerusalem etieti; ediwak mme oku ẹnyụn̄ ẹsụk ibuot ẹnọ akpanikọ.” (Utom 6:7) Mme Jew oro ẹma ẹnyene uko ndisịbe mme ebuana mmọ ye ido ukpono mfep nnyụn̄ nnyịme Jesus nte Messiah.

¹⁰ Ọtọn̄ọde ke 36 E.N., ediwak mme Gentile ẹma ẹkabade ẹdi mme andinịm ke akpanikọ. Ke ini Cornelius, mbonufọk esie, ye mme Gentile eken ẹkekopde eti mbụk, mmọ ẹma ẹnyịme usọp usọp, ẹbọ edisana spirit, ẹnyụn̄ “ẹna baptism ke enyịn̄ Jesus Christ.” (Utom 10:1-48) Ke Philippi ekpeme ufọk-n̄kpọkọbi owo Gentile ye ufọk esie ẹma ẹnyịme Ido Ukpono Christ usọp usọp, ndien “idahaoro n̄ko enye ana baptism ye ofụri ufọk esie.” (Utom 16:25-34) Ama oyom uko ke ndinam mme utọ usio-ukot oro koro mme Christian ẹkedi ekpri otu oro mîkọwọrọke etop, emi ẹkekọbọde. Mmọ ke ẹsụk ededi. Edi edieke afo mûyakke idem kan̄a unọ Abasi unyụn̄ una baptism nte kiet ke otu Mme Ntiense Jehovah, nte idịghe ini edi emi ọnọ fi ndinam uko uko usio-ukot ẹmi?

Uko ke Mme Ubon Oro Ẹbaharede

11. Eunice ye Timothy ẹkenịm nso nti uwụtn̄kpọ uko?

¹¹ Eunice ye Timothy, eyen esie eren ẹma ẹnịm nti uwụtn̄kpọ mbuọtidem oro asan̄ade ye uko ke ubon oro abaharede ke ntak ido ukpono. Okposụkedi Eunice ekenyenede ebe oro ekedide okpono ndem, enye ama ekpep eyen esie eren “Edisana N̄wed Abasi” toto ke uyen. (2 Timothy 3:14-17) Ke ama akakabade edi Christian, enye ama owụt “ata mbuọtidem.” (2 Timothy 1:5) Enye n̄ko ama enyene uko ndinọ Timothy ukpepn̄kpọ Christian ke adan̄aemi owụtde ukpono ọnọ itieibuot ebe esie oro mîkonịmke ke akpanikọ. Ke akpanikọ, mbuọtidem ye uko esie ẹma ẹnyene utịp ke ini ẹkemekde eyen esie eren emi ama ọkọbọ ukpep mfọn mfọn ndisan̄a ye Paul ke mme isan̄ utom isụn̄utom. Didie ke emi ekpedi n̄kpọ nsịnudọn̄ ntem ọnọ mme ete ye eka Christian oro ẹdude ke mme ukem idaha oro!

12. Nso orụk owo ke Timothy akakabade edi, ndien mmanie idahaemi ẹbiet enye?

¹² Okposụkedi Timothy okodụn̄de ke ubon emi abaharede ke ntak ido ukpono, enye ama onyịme Ido Ukpono Christ uko uko onyụn̄ akabade edi owo eke spirit emi Paul ekekemede nditịn̄ mban̄a ete: “Mmodori enyịn ke Ọbọn̄ Jesus ndiwara ndọn̄ Timothy edi ke ọtọ mbufo [mbon Philippi], man mfiọk mban̄a mbufo, nnyụn̄ nnyene nsọn̄esịt. . . . Mbufo ẹmefiọk nte ẹdomode enye ẹse ẹte, nte eyen asan̄ade ye ete anam utom, ke enye ama asan̄a ye ami asuan gospel.” (Philippi 2:19-22) Mfịn, ediwak nditọiren ye nditọiban ke mme ufọk oro ẹbaharede ke ntak ido ukpono ke ẹnyịme ata Ido Ukpono Christ uko uko. Ukem nte Timothy mmọ ke ẹnọ uyarade ẹban̄a idemmọ, ndien nnyịn idat esịt didie ntem nte ke mmọ ẹdi ubak esop Jehovah!

Uko ke ‘Ndinyịme Ndiduọk Uwem Nnyịn’

13. Ke nso usụn̄ ke Aquila ye Priscilla ẹkewụt uko?

¹³ Aquila ye n̄wan esie, Priscilla (Prisca), ẹma ẹnịm eti uwụtn̄kpọ ebe ke ‘ndinyịme ndiduọk uwem mmọ’ uko uko kaban̄a ekemmọ andinịm ke akpanikọ. Mmọ ẹma ẹda Paul ẹsịn ke ufọk mmọ, ẹnam utom edibọp ufọkọfọn̄ ye enye, ẹnyụn̄ ẹn̄wam enye ndibọp obufa esop ke Corinth. (Utom 18:1-4) Ke itie ufan̄ isua 15 mmọ oro, mmọ ẹma ẹkam ẹsịn uwem mmọ ke itiendịk kaban̄a enye ke usụn̄ oro owo mîtịn̄ke. Mmọ ẹkedụn̄ ke Rome ke ini enye eketịn̄de ọnọ mme Christian do ete: “Ẹkọm Prisca ye Aquila, mme nsan̄autom mi ke Christ Jesus, ẹmi ẹkenyịmede ndiduọk uwem mmọ kaban̄a uwem mi: idịghe ami ikpọn̄ ndọhọ ẹkọm mmọ; edi kpukpru mme ufọkabasi ke otu mme Gentile ẹtiene ẹnọ ekọm nde.”—Rome 16:3, 4.

14. Ke ndikenyịme ndiduọk uwem mmọ kaban̄a Paul, Aquila ye Prisca ẹkenam n̄kpọ ke n̄kemuyo ye ewe ibet?

¹⁴ Ebede ke ndikenyịme ndiduọk uwem mmọ kaban̄a Paul, Aquila ye Prisca ẹma ẹnam n̄kpọ ke n̄kemuyo ye mme ikọ Jesus ẹmi: “Mmọnọ mbufo obufa ibet nte, Mbufo ẹma kiet eken; nte mbufo nde ẹma kiet eken kpa nte n̄kamade mbufo.” (John 13:34) Ibet emi ekedi “obufa” koro enye ama esịne n̄kpọ akan se Ibet Moses okoyomde ete owo ama mbọhọidụn̄ esie nte idemesie. (Leviticus 19:18) Enye okoyom ima uwaidem emi edikade anyan okosịm owo ndinọ uwem esie kaban̄a mmọ en̄wen, nte Jesus akanamde. Ewetn̄wed oro Tertullian eke ọyọhọ isua ikie iba ye ikie ita E.N. ama okot oto mme ikọ oro mbon ererimbot ẹkesitịn̄de ẹban̄a mme Christian ke ini enye ekewetde ete: “Mmọ ẹdọhọ ẹte, ‘Sese nte mmọ ẹmade kiet eken . . . n̄ko nte mmọ ẹben̄ede idem ndikpa nnọ kiet eken.’” (Apology, ibuot XXXIX, 7) Akpan akpan ke ini ukọbọ ke obiomo nnyịn ke idem ndiwụt ima nditọete ebe ke ndisịn uwem nnyịn ke itiendịk uko uko man ifep ndisio ekemmọ mme andinịm ke akpanikọ nnyan nnọ mfiomo m̀mê n̄kpa ke ubọk mme asua.—1 John 3:16.

Uko Esida Idatesịt Edi

15, 16. Nte ẹwụtde ke Utom Mme Apostle ibuot 16, didie ke uko ye idatesịt ẹkeme ndinyene ebuana?

¹⁵ Paul ye Silas ẹmenọ uyarade nte ke ndiwụt uko ke idak mme idomo esida idatesịt edi. Ke ẹtienede uyo mme ebiereikpe ke obio Philippi, ẹma ẹmia mmọ an̄wan̄wa ke ikpa ẹnyụn̄ ẹsịn mmọ ke ebuka ufọk-n̄kpọkọbi. Edi, ndịk ikanamke ẹkop mmemidem. Kpa ye mme idomo idomo idaha oro mmọ ẹkesobode, mmọ ẹkesụk ẹnyenyene uko oro Abasi ọnọde ye idatesịt oro emi esidade ọsọk mme anam-akpanikọ Christian.

¹⁶ Ke ekperede ufọt okoneyo, Paul ye Silas ke ẹkebọn̄ akam ẹnyụn̄ ẹtoro Abasi ke ikwọ. Inikiet inikiet, unyekisọn̄ ama otịbe ke ufọk-n̄kpọkọbi oro, atat n̄kpọkọbi mmọ, onyụn̄ eberede mme usụn̄. Ẹma ẹnọ ekpeme ufọk-n̄kpọkọbi oro okokopde ndịk mi ye ubon esie uko uko ikọ ntiense emi akadade okosụn̄ọ ke mmọ ndina baptism nte mme asan̄autom Jehovah. Enye ke idemesie ama “adat esịt etieti ye ofụri ufọk esie, sia mmọ ẹnịmde Abasi ke akpanikọ.” (Utom 16:6-34) Nso idara ke anaedi emi ama ada ọsọk Paul ye Silas ntem! Ke ima ikeneme iban̄a emi ye mme uwụtn̄kpọ N̄wed Abasi eken kaban̄a uko, didie ke nnyịn ikeme ndinyene uko nte mme asan̄autom Jehovah?

Ẹkaiso Ẹnyene Uko

17. Nte ẹwụtde ke Psalm 27, didie ke ndidori enyịn ke Jehovah enyene ebuana ye uko?

¹⁷ Ndidori enyịn ke Jehovah eyen̄wam nnyịn ndinyene uko. David ọkọkwọ ete: “Bet [“Dori enyịn ke,” NW] Jehovah: sọn̄ idem, ndien enye eyesọn̄ fi esịt: tịm bet Jehovah.” (Psalm 27:14) Psalm 27 owụt nte ke David ama eberi edem ke Jehovah nte ‘andisọn̄ọ’ itọn̄ uwem esie. (Ufan̄ikọ 1) Ke ama okokụt nte Abasi akanamde n̄kpọ ye mme asua David ke ini edem emi ama ọnọ enye uko. (Ufan̄ikọ 2, 3) Esịtekọm oro enye ekenyenede ọnọ iwụk ebiet utuakibuot Jehovah ekedi n̄kpọ efen. (Ufan̄ikọ 4) Ndinyene mbuọtidem ke un̄wam, ukpeme, ye edinyan̄a Jehovah n̄ko ama anam uko David ọsọn̄ idem. (Ufan̄ikọ 5-10) N̄kpọ un̄wam efen n̄ko, ekedi n̄kaiso item emi ẹdude ke mme edumbet ẹban̄ade edinen usụn̄ Jehovah. (Ufan̄ikọ 11) Akam mbuọtidem kaban̄a edinyan̄a nsio mme asua esie ke ubọk ọkọrọ ye mbuọtidem ye idotenyịn, ama an̄wam David ndinyene uko. (Ufan̄ikọ 12-14) Nnyịn imekeme ndibọp uko nnyịn ke mme ukem usụn̄ ẹmi, ntem iwụtde ite ke nnyịn inen̄ede ‘idori enyịn ke Jehovah.’

18. (a) Nso iwụt nte ke ndibuana ọtọkiet kpukpru ini ye ekemmọ mme andituak ibuot nnọ Jehovah ẹkeme ndin̄wam nnyịn ndikaiso nnyene uko? (b) Nso udeme ke mme mbonoesop Christian ẹnyene ke ndikọri uko?

¹⁸ Ndibuana kpukpru ini ye ekemmọ mme andituak ibuot nnọ Jehovah ekeme ndin̄wam nnyịn ndinyene uko. Ke ini Paul okosion̄ode ikpe ebịne Caesar okonyụn̄ anamde isan̄ aka Rome, ekemmọ mme andinịm ke akpanikọ ẹma ẹsobo ye enye ke An̄waurua Appius ye Ufọkisen Ita. “Ke ini Paul okụtde mmọ,” mbụk oro ọdọhọ ete, “enye ọkọm Abasi, onyụn̄ okop nsọn̄esịt.” (Utom 28:15) Nte nnyịn idụkde mme mbonoesop Christian kpukpru ini, nnyịn ke inam item Paul oro: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọkiet, nte edu ndusụk owo ẹdide, edi inọ kiet eken item [“isịn udọn̄ inọ kiet eken,” NW]; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Nso ke ndisịn udọn̄ nnọ kiet eken ọwọrọ? Ndisịn udọn̄ nnọ edi “ndisịn owo uko, spirit, m̀mê idotenyịn ke idem ndinam n̄kpọ.” (Webster’s Ninth New Collegiate Dictionary) Nnyịn imekeme ndinam ekese ndisịn mme Christian eken uko ke idem ndinam n̄kpọ, ndien nsịnudọn̄ mmọ ekeme n̄ko ndikọri edu emi ke idem nnyịn.

19. Didie ke N̄wed Abasi ye mme n̄wed Christian ẹnyene ebuana ye nnyịn ndikaiso nnyene uko?

¹⁹ Man ikaiso inyene uko, ana nnyịn ikpep Ikọ Abasi kpukpru ini inyụn̄ ida mme item esie isịn ke edinam ke uwem nnyịn. (Deuteronomy 31:9-12; Joshua 1:8) Ukpepn̄kpọ oro nnyịn inamde kpukpru ini ekpenyene ndisịne mme n̄wed Christian oro ẹkọn̄ọde ke N̄wed Abasi, koro nti item oro ẹnọde ẹyen̄wam nnyịn ndisobo mme idomo mbuọtidem ye uko oro Abasi ọnọde. Otode mme mbụk Bible, nnyịn imokụt nte mme asan̄autom Jehovah ẹkenyenede uko ke nsio nsio idaha. Kan̄a kemi, ekeme ndidi nnyịn idifiọkke nte utọ ntọt oro ekemede ndin̄wam nnyịn, edi Ikọ Abasi enyene odudu, ndien se nnyịn ikpepde ito enye ekeme ndinọ nnyịn ufọn kpukpru ini. (Mme Hebrew 4:12) Ke uwụtn̄kpọ, edieke ndịk owo ọkpọtọn̄ọde nditụk utom ukwọrọikọ nnyịn, nnyịn imekeme nditi nte Enoch ekenyenede uko ke ndinọ mmọemi mîkabakke Abasi etop Abasi.—Jude 14, 15.

20. Ntak ẹkemede ndidọhọ ke akam edi akpan n̄kpọ edieke anade nnyịn ikaiso inyene uko nte mme asan̄autom Jehovah?

²⁰ Man inyene uko nte mme asan̄autom Jehovah, ana nnyịn ikọbọ ke ndibọn̄ akam. (Rome 12:12) Jesus ama ọyọ mme idomo esie uko uko koro enye “ọkọbọn̄ akam onyụn̄ anam n̄kpeubọk ye ọkpọsọn̄ eseme ye mmọn̄eyet ọnọ Abasi emi ekemede ndinyan̄a Enye nsio ke n̄kpa, Abasi onyụn̄ eyere Enye, koro Enye eten̄ede Abasi.” (Mme Hebrew 5:7) Ebede ke ndisan̄a n̄kpere Abasi ke akam, nnyịn iditiehe nte mbon ufep eke ererimbot emi enyenede ndisobo “udiana n̄kpa” emi ediset mîdidụhe. (Ediyarade 21:8) Ukpeme otode Abasi ye uwem ke obufa ererimbot Abasi ana ebet mme asan̄autom oro ẹnyenede uko.

21. Ntak emi mme anam akpanikọ Ntiense Jehovah ẹkemede ndinyene uko?

²¹ Nte mme anam akpanikọ Ntiense Jehovah, inaha nnyịn ikop ndịk iban̄a mme asua, edide demon ye mme owo, koro nnyịn imenyene un̄wam Abasi ye uko uko uwụtn̄kpọ Jesus nte andikan ererimbot. Ebuana oro ọbọpde-bọp ke n̄kan̄ eke spirit ye ikọt Jehovah n̄ko an̄wam nnyịn ndinyene uko. Ndausụn̄ ye item oro otode N̄wed Abasi ye mme n̄wed Christian edi se ibọpde uko nnyịn n̄ko. Ndien mbụk Bible ẹban̄ade mme asan̄autom Abasi eke eset ẹn̄wam nnyịn ndisan̄a uko uko ke usụn̄ esie. Ntre ke ndiọkeyo emi, ẹyak nnyịn isịn ifịk ikaiso uko uko ke edisana utom. Ih, yak kpukpru ikọt Jehovah ẹnyene uko!

Didie ke Afo Ọkpọbọrọ?

◻ Didie ke uwụtn̄kpọ Jesus ekeme ndinam nnyịn inyene uko?

◻ Nso ikọnọ Jesus ye mme mbet esie uko ndikaiso n̄kwọrọ ikọ?

◻ Ntak emi mme Jew ye mme Gentile ẹkeyomde uko man ẹda ke n̄kan̄ Jehovah?

◻ Nso uwụtn̄kpọ uko ke Eunice ye Timothy ẹkenịm?

◻ Nso uyarade odu nte ke uko esida idatesịt edi idem ke ini ukọbọ?

[Ndise ke page 18]

Ukem nte Jesus, nnyịn imekeme ndiyọ idomo edieke nnyịn ikotde ito inyụn̄ idade se N̄wed Abasi ọdọhọde isịn ke edinam