Mme Andikụre Ukpep Gilead Ẹkop ‘Inemesịt Ẹkan ke Ndinọnọ’
“KE SUNDAY, March 6, 1994, mbonufọk Bethel ke ibuot itieutom ofụri ererimbot eke Mme Ntiense Jehovah ye mme isenowo ẹma ẹsop idem kaban̄a edinam usọrọ—kpa edinam ukụre ukpep ọyọhọ otu 96 eke Watchtower Bible School of Gilead. Ke mme ntọn̄ọikọ esie, etieibuot okpokoro edinam oro, Karl F. Klein, emi anamde utom ke Otu Ukara eke Mme Ntiense Jehovah ke se ikperede ndisịm isua edịp, ama asian nditọ ufọkn̄wed 46 oro ete: “Jesus ọkọdọhọ ete ke inemesịt odu ke ndinọnọ akan ke ndibọbọ. Ntre ke edidi ke utom isụn̄utom mbufo—adan̄a nte mbufo ẹnọde, ntre ke mbufo ẹdikop inemesịt ẹkan.”—Utom 20:35.
Mme Item Unyọn̄
Udịm udịm utịn̄ikọ ẹnọde nditọ ufọkn̄wed ẹma ẹtiene. Leon Weaver, andibuana ke Kọmiti Itieutom Utịmutom, ama atat ibuotikọ oro, “Ediyọ Esinọ Jehovah Ubọn̄.” Kpukpru nnyịn imodori enyịn ndisobo mme idomo. (2 Corinth 6:3-5) Brọda Weaver ama ọdọhọ ete, “Ke ini nnyịn idude ke idak mfịghe, enen̄ede edi mmemmem n̄kpọ ndiberi edem ke idem nnyịn.” Nte ededi, enye ama eti nditọ ufọkn̄wed oro ete: “Idomo ekededi oro anade mbufo ẹsobo, Jehovah enyene udọn̄ aban̄a enye. Tutu amama enye idiyakke ẹdomo mbufo ẹbe se mbufo ẹkemede ndiyọ.”—1 Corinth 10:13.
“Ẹda Utom Mbufo ke Ọsọn̄urua N̄kpọ Kpukpru Ini” ekedi ibuotikọ utịn̄ikọ efen, emi Lyman Swingle eke Otu Ukara ọkọnọde. Idịghe nditọ Israel ẹkesimek itie oro mmọ ẹdidụn̄de ye se mmọ ẹdinamde kpukpru ini. Ẹkesinọnọ esien kiet kiet isọn̄, ndien ẹma ẹnọ mme Levite san̄asan̄a utom ndinam. Kpasụk ntre, ediwak owo oro ẹdude ke san̄asan̄a utom uyọhọ-ini mfịn—utọ nte mme isụn̄utom ye mbonufọk Bethel—isibiereke ebiet emi mmọ ẹdidụn̄de ye utom oro mmọ ẹdinamde ke idemmọ. Nso edieke owo enyenede etikwọ etikwọ edu aban̄a utom esie? Brọda Swingle ama ọdọhọ ete, “Edieke mbufo ẹwụkde enyịn ẹse Anditọn̄ọ mbuọtidem nnyịn, Jesus, ẹnyụn̄ ẹkerede ntotụn̄ọ ntotụn̄ọ ẹban̄a uwụtn̄kpọ esie, mbufo idikpaha mba.”—Mme Hebrew 12:2, 3.
Leonard Pearson, eke Kọmiti In̄wan̄ Enyọn̄-Ukpeme, ama adiana ye ibuot nneme oro ọkọdọhọde “Ẹkaiso Ndiwụk Enyịn Nse.” Enye ama ọdọhọ ete: “Afo emekeme ndinyene mfọnn̄kan ukwak usio ndise, ata ediye ndise ndisio, n̄kann̄kụk oro eyede, edi osụk osio ndise oro mîyehe—edieke owo mîtịmke iket n̄kpọ ke ukwak usio ndise oro.” Kpa nte ukwak usio ndise oro enyenede ntatara ukeme usio ndise, ana ekikere nnyịn owụhọ ke ukwọrọikọ ofụri ererimbot oro ẹnamde. Nnyịn ikpedehede ifre akamba ndise oro. Brọda Pearson ama ọdọhọ ete, “Mmọ oro ẹwụkde ntịn̄enyịn ke idemmọ idikopke inemesịt ke utom mmọ. Mmọ oro ẹwụkde ntin̄enyịn ke Jehovah ye utom oro enye ọnọde mmọ ndinam eyekụt unen.”
“Ekese Odu Ndiwụt Esịtekọm Mban̄a” ekedi ibuotikọ utịn̄ikọ efen, emi John E. Barr, owo efen emi abuanade ke Otu Ukara ọkọnọde. Brọda Barr ama ọnọ nditọ ufọkn̄wed oro item ete, “Ẹkûdede ẹtre ndiwụt esịtekọm nnọ Jehovah. Emi edi n̄kpọnn̄kan usụn̄ ndikop uyụhọ, inamke n̄kpọ m̀mê nso utom ke mbufo ẹnam.” Edu ediwụt esịtekọm okonụk David ndiwet: “Mme urụk ẹmeduọ ẹnọ mi ke edifọn ebiet, udeme mi emeye n̄ko-n̄ko.” (Psalm 16:6) Brọda Barr ama ọdọhọ ete, “Mbufo ẹmenyene utọ ọsọn̄urua inyene oro ke ndisịk n̄kpere Jehovah ke uwem mbufo eke usen ke usen. Tutu amama Jehovah idisịbeke itie ebuana oro ifep ye mbufo adan̄a nte mbufo ẹkade iso ndiyom enye nte n̄kpọ oro ẹnen̄erede ẹma oro mbufo ẹwụtde esịtekọm ẹban̄a.”
Jack Redford, andikpep ke Gilead, ekedi etịn̄ikọ efen, ke ibuotikọ oro ọdọhọde “Didie ke Mbufo Ẹdida Edeme Mbufo Ẹnam N̄kpọ?” Nso nsobo ke ikọ oro mîwụtke edikere mban̄a ekeme ndida ndi ntem! (Mme N̄ke 18:21) Didie ke ekeme ndikara edeme? Brọda Redford ama ọbọrọ ete, “Ana mbufo ẹbemiso ẹnọ ekikere mbufo ukpep, koro edeme owụtde se idude ke ekikere ye esịt.” (Matthew 12:34-37) Jesus ama onịm eti uwụtn̄kpọ; enye ama ada edeme esie anam n̄kpọ nditoro enyịn̄ Jehovah. Brọda Redford ama asian otu oro ete, “Mfịn akan̄ edikop ikọ Jehovah odu. Mbufo ẹmọfiọk mme ikọ oro. Mbufo ẹmenyene ‘edeme mmọ oro ẹnọde ukpep.’ Ntre ẹyak ekikere ye esịt oro ẹma ẹkeyak ẹnọ Jehovah ofụri ofụri ada edeme mbufo usụn̄ kpukpru ini.”—Isaiah 50:4.
Ẹma ẹsọn̄ọ ẹtịn̄ nte akam edide akpan n̄kpọ ke utịn̄ikọ oro, “Nte Afo ke Asan̄a Nte Odu ke Iso Jehovah?” Ulysses Glass, esịn owo enyịn̄ ke ufọkn̄wed oro ama ọdọhọ ete: “Edieke ete anamde utom ọkpọsọn̄ ndise mban̄a ubon esie edi akananam inyeneke nneme ye mmọ inyụn̄ itịn̄ke mme ikọ oro ẹwụtde ima, ubon esie ẹkeme ndibiere nte ke uduak esie ndinam utom ọkpọsọn̄ okonyụn̄ edi ke ntak utom oro mînyeneke inem idịghe ke ntak ima. Ntre ke edi ye nnyịn. Nnyịn imekeme ndisịn idem ke utom Abasi. Edi edieke nnyịn mîbọn̄ke akam, do nnyịn iyak idem inọ ndinam utom ikpọn̄îkpọn̄ utu ke ndiyak nnọ ima ima Ete eke heaven.”
Theodore Jaracz, eke Otu Ukara, ama etịn̄ ikọ ke ibuotikọ oro ọdọhọde “Ntak Emi Akwa Udịm Owo Ẹbuanade ye Ikọt Abasi.” Kpukpru isua ediwak tọsịn owo ke mme itie ikie ke ẹbụn̄ọ ẹdụk esop Jehovah. (Zechariah 8:23) Nso inam ẹdiọn̄ọ Mme Ntiense Jehovah nte ikọt Abasi? Akpa, mmọ ẹnyịme ofụri Bible nte Ikọ Abasi. (2 Timothy 3:16) Ọyọhọ iba, mmọ ẹda san̄asan̄a ẹkpọn̄ ukaraidem. (John 17:16) Ọyọhọ ita, mmọ ẹtie ntiense ẹban̄a enyịn̄ Abasi. (John 17:26) Ọyọhọ inan̄, mmọ ẹwụt ima uwa idem. (John 13:35; 15:13) Ye mme n̄kpọ anamde ẹdot ẹmi, nnyịn ye uko imekeme ‘nditan̄a mme utịbe edinam enyeemi okokotde nnyịn osio ke ekịm esịn ke utịbe un̄wana.’—1 Peter 2:9.
Ke mme edemede-owo udọn̄ utịn̄ikọ ẹmi ẹkụrede, ofụri nditọ ufọkn̄wed 46 oro ẹma ẹbọ n̄weditoro. Ẹnọ mmọ ẹka idụt 16 ke ofụri ererimbot.
Isio Isio Ndutịm Uwemeyo
Ke uwemeyo Donald Krebs eke Kọmiti Bethel ama onịm ibio ibio Ukpepn̄kpọ Enyọn̄-Ukpeme. Ekem mme andikụre ukpep ẹmi ẹma ẹnam edinam oro ẹkekotde “Eti Ibuot ke Akaiso Ofiori ke Esien.” (Mme N̄ke 1:20) Mmọ ẹma ẹfiak ẹbụk mme akama-utịp ifiọkutom oro mmọ ẹkenyenede ke ini ẹnọde ikọ ntiense efak ye ke mme itie mbubehe. Ke akpanikọ, Jehovah esidiọn̄ mbon oro ẹnyenede uko ke ndikwọrọ ikọ ke ido nneme. Andikụre ukpep kiet ọkọdọhọ ete, “Mmesima ndikere mban̄a idem nnyịn nte ikwa ukpen̄e ke ubọk mbon ukpen̄e ẹdide mme angel. Nte usọ nnyịn ọsọpde, ntre ke mme angel oro ẹkeme ndida nnyịn nnam utom oro okpon.” (Men Ediyarade 14:6 domo.) Edinam nditọ ufọkn̄wed ama esịne n̄ko ediwụt ndise oro ekemende mme andidụk aka isan̄ ubọ ukpep ke Bolivia, Malta, ye Taiwan—ita ke otu idụt oro ẹkenọde mme andikụre ukpep ke otu emi ẹka.
Ekem, ẹma ẹnam ndụn̄ọde ye Wallace ye Jane Liverance—ẹmi ẹdide mme isụn̄utom ke isua 17. Ke October 1993 ẹma ẹnọ mmọ ikot ẹdi In̄wan̄ Enyọn̄-Ukpeme, ke ebiet Brọda Leverance anamde utom idahaemi nte kiet ke otu mme andinọ ukpep ke Gilead.
Utịn̄ikọ oro ekenyenede ikpehe inan̄ ama etiene, emi ọkọdọhọde “Ndikpono Mbon Oro Ẹdotde ke Mme Isua Usọn̄ Mmọ.” Nte mme owo ẹsọn̄de, ndịk ndikabade ndi se mîdotke aba nnyụn̄ ndi se ẹkpọnọrede ẹnịm ekeme ndibiat mbuọtidem oro mmọ ẹkenyenede ke idemmọ. (Psalm 71:9) Utịn̄ikọ oro otụkde owo ke idem mi ama owụt nte kpukpru owo ke esop ẹkemede ndin̄wam mme utọ anam-akpanikọ n̄kani owo oro.
Ke ikwọ ye akam ediberi ama okokụre, ofụri owo 6,220 ẹkedụde ke Ufọkmbono Jersey City ye ke mme ufọkmbono uwụt ndise satellite ẹma ẹkop nsịnudọn̄. Nnyịn imọbọn̄ akam isịn mme andikụre ukpep ẹmi ke obufa utom mmọ. Akpakam mmọ ẹkaiso ndinyene n̄kponn̄kan inemesịt oro otode edinọnọ.
[Ekebe ke page 26]
Idaha Otu Oro
Ibat idụt oro mmọ ẹtode: 9
Ibat idụt oro ẹnọde mmọ ẹka: 16
Ibat nditọ ufọkn̄wed: 46
Ukem mbahade isua emana: 33.85
Ukem mbahade isua ke akpanikọ: 16.6
Ukem mbahade isua ke utom uyọhọ-ini: 12.4
[Ekebe ke page 27]
Ẹnọ Malta Akpan Ntịn̄enyịn
CHRISTENDOM ama okịbi akpanikọ Bible inua ke Malta ke ediwak isua. Akpatre isụn̄utom Gilead oro ẹkenọde ẹka do, Frederick Smedley ye Peter Bridle, ẹkekụre ukpep ke ọyọhọ otu itiaita ko ke 1947. Nte ededi, ẹma ẹmụm mmọ ẹnyụn̄ ẹbịn mmọ ẹsio ke Malta esisịt ini ke mmọ ẹma ẹkesịm do. 1948 Yearbook of Jehovah’s Witnesses ọtọt ete: “Isụn̄utom iba ẹmi ẹma ẹbiat ekese ini ke esop ye ke iso ikpọ owo ukara idụt oro ẹkan nte mmọ ẹbiatde ke mme utom usan̄autom mmọ, n̄kukụre ke ntak ubiọn̄ọ otode Ukara Ufịk Roman Catholic. Mme oku ẹdọhọ ke Malta enyene mbon Catholic ndien ke owo efen ekededi enyene ndiwọrọ do. “Idahaemi, n̄kpọ nte isua 45 ke ukperedem, ẹmenọ isụn̄utom inan̄ ẹtode ọyọhọ otu 96 eke Gilead ẹka Malta.
[Ekebe ke page 26]
Ọyọhọ Otu 96 Oro Ẹkụrede Ukpep ke Watchtower Bible School of Gilead
Ke udịm enyịn̄ ẹtienede mi, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet. (1) Ehlers, P; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.