Nso Ufọn Ekeme Ndisụn̄ọ Nto Edineme Ido Ukpono?

MME ete ye eka ẹsibet ndikop akpa ikọ oro nsekeyen mmọ etịn̄de ye ọkpọsọn̄ udọn̄. Ke ini mmọ ẹkopde ikọ oro ẹtịn̄de ndien ndien ke otu mme ikọ oro mmọ ẹkụnide, ndusụk “Mama” mîdịghe “Papa,” esịt mmọ ẹsiyọhọ ye inemesịt. Mmọ ẹsisọp ẹbuana mbụk emi ye ufan ye mbọhọidụn̄. Ke akpanikọ akpa ikọ emi nsekeyen etịn̄de ẹsidi eti mbụk oro adade idatesịt edi.

Uyom, se ẹkụtde, ye utebe oro ukeme ifiọk ekpri eyen emi ekpepde edemede edinam. Nte ededi, mme edinam ẹsikpụhọde. Edi edieke, ke ndusụk ini ama ekebe, eyennsek okpu ndinam n̄kpọ mban̄a mme ntụk ẹmi, nte enende eyefịna mme ete ye eka nte ke ekeme ndidi mfịna odu ke n̄kọri eyen mmimọ.

Nsek nditọ ẹsinen̄ede ẹnyịme mbon oro mmọ ẹdiọn̄ọde. Ke ini eka afatde nsekeyen, esisụn̄ọ ke edituak inua imam. Edi, editụk ubọk oro iman emi edide esen otụkde ekeme ndinam nsekeyen atua eyet, idem ọsọn̄ọde esịn ndiyak enyeoro omụm enye. Ata ediwak iman oro ẹsisobode emi isikpaha mba. Nte nsekeyen ọfiọkde mmọ ọfọn akan, mmọ ẹsidat esịt nte ke ubiọn̄ọ oro okodude ke ntak unana edimehe idụhe aba, ndien ẹtọn̄ọ ndikụt inua imam nsekeyen sụn̄sụn̄.

Kpasụk ntre, ediwak ikpọ owo ẹsimen̄e ndineme an̄wan̄wa mban̄a se ido ukpono mmọ onịmde ke akpanikọ ye owo oro mmọ mîmeheke ke anyanini. Mmọ ẹkeme nditre ndifiọk ntak emi esenowo okpoyomde ndineme mban̄a mbubehe idemowo—ido ukpono. Utịp edi nte ke mmọ ẹyak ubiọn̄ọ odụk edi ke ufọt mmọ ye mbon oro ẹnemede ẹban̄a Andibot. Kamse, mmọ ẹkam ẹsịn ndineme mban̄a se idide ndammana edu owo, kpa udọn̄ ndituak ibuot.

Ke akpanikọ, ikpenyene ndinyene udọn̄ ke ndikpep n̄kpọ mban̄a Andibot nnyịn, ndien ndinyene nneme ye mbon en̄wen ekeme ndinam nnyịn idu ke idaha ndikpep n̄kpọ. Oro edi ntre koro ẹdiọn̄ọ Abasi ke anyanini nte ẹsinemede nneme an̄wan̄wa. Ẹyak nnyịn ise nte oro edide ntre.

‘Kpan̄ Utọn̄ Nyụn̄ Kpep N̄kpọ’

Akpa nneme oro Abasi ekenyenede ye owo ekedi ye Adam ke in̄wan̄ Eden. Edi, ke Adam ye Eve ẹma ẹkenam idiọkn̄kpọ, mmọ ẹma ẹmek ndidịbe ke ini Abasi okokotde mmọ, ke ini enye okoyomde ndinyene n̄kaiso nneme ye mmọ. (Genesis 3:8-13) Nte ededi, Bible ewet ke nde ke nde aban̄a iren ye iban ẹmi ẹkedarade nneme otode Abasi.

Abasi ama enyene nneme ye Noah aban̄a nsobo idiọk ererimbot emi ekekperede ke eyo esie, emi akanamde Noah akabade edi “ọkwọrọ edinen ido.” (2 Peter 2:5) Nte anditịn̄ ikọ ke ibuot Abasi nnọ emana esie, Noah ikowụtke mbuọtidem kpọt ke mme edinam Abasi ye owo edi n̄ko ama atan̄a an̄wan̄wa nte imọ idade ke n̄kan̄ Jehovah. Nso ke Noah okokụt ẹnamde? Ke mfụhọ, ata ediwak mbon eyo esie ‘ikọfiọkke tutu ukwọ edi edimen mmọ kpukpru ẹfep.’ (Matthew 24:37-39) Edi ke edide n̄kpọ inemesịt ọnọ nnyịn, owo itiaba ke ubon Noah ẹma ẹkpan̄ utọn̄, ẹkop item Abasi, ẹnyụn̄ ẹbọhọ Ukwọ ofụri ererimbot oro. Ofụri owo oro ẹdude uwem mfịn ẹto mmọ.

Ekem, Abasi ama enyene nneme ye ofụri idụt mme owo, kpa Israel eset. Ebede ke Moses, Abasi ama ọnọ mmọ Ibet Duop ye n̄kpọ nte ibet 600 efen emi okobiomode mmọ ukem ukem. Jehovah okoyom nditọ Israel ẹnịm kpukpru mmọ. Moses ama eteme ete ẹkot Ibet Abasi uyo ọwọrọ, ke kpukpru isua itiaba, ke Usọrọ Mme Ataya eke isua ke isua. “Bon kpukpru owo ọtọkiet,” ntre ke enye eketeme, “irenowo ye iban, ye nditọwọn̄, ye esenowo fo emi odude ke obio fo.” Kaban̄a nso uduak? “Man mmọ ẹkop, man mmọ ẹnyụn̄ ẹkpep, ẹnyụn̄ ẹbak Jehovah Abasi mbufo, ẹnyụn̄ ẹkpeme ndinịm kpukpru ikọ mbet ẹmi.” Kpukpru owo ẹkenyene ndikpan̄ utọn̄ nnyụn̄ n̄kpep n̄kpọ. Kere nte mmọ ẹkedarade ndineme mban̄a se mmọ ẹkekopde!—Deuteronomy 31:10-12.

Ke se ibede isua ikie ition ke ukperedem, Jehoshaphat edidem Judah ama otịm mbọn̄ ye mme Levite ke ubịnikọt ndifiak ndemede edisana utuakibuot Jehovah. Mme owo ẹmi ẹma ẹsan̄a ke ofụri obio Judah ẹkpep mme andidụn̄ ibet Jehovah. Ebede ke ndikeneme emi an̄wan̄wa, edidem ama owụt uko oro enye ekenyenede ọnọ utuakibuot akpanikọ. Kaban̄a mme andidu ke idak esie, mmọ ẹkenyene ndikpan̄ utọn̄ nnyụn̄ n̄kpep n̄kpọ.—2 Chronicles 17:1-6, 9.

Nditie Ntiense ebe ke Nneme

Abasi ama osio Jesus, Eyen esie, ọdọn̄ edi isọn̄ ndinam n̄kpọ nte Anditịn̄ ikọ ke ibuot Esie. (John 1:14) Nte mme mbet ita ẹkekụtde Jesus okpụhọrede idem ke iso mmọ, mmọ ẹma ẹkop uyo Abasi ke idemesie ọdọhọde ete: “Emi edi edima Eyen Mi, emi [nnemde esịt] ye Enye; ẹkop uyo Esie.” (Matthew 17:5) Mmọ ẹma ẹkop uyo inikiet inikiet.

Kpasụk ntre, Jesus ama anam mme apostle esie ẹtan̄a uduak Abasi ẹnọ mbon en̄wen. Edi ke ini okosụhọde n̄kpọ nte ọfiọn̄ itiokiet ndinam utom ukwọrọikọ ke isọn̄, Jesus ama anam ẹdiọn̄ọ nte ke utom edikwọrọ Obio Ubọn̄ eke heaven ama enen̄ede okpon tutu eyedi se ediyomde mme mbet efen efen. Enye ama ọnọ owo 70 ke otu mmọ ukpep nte ẹnemede Obio Ubọn̄ Abasi ye isenowo ndien ekem osio mmọ ọdọn̄ ndikasuan etop oro an̄wan̄wa. (Luke 10:1, 2, 9) Esisịt ini mbemiso afiakde etiene Ete esie ke heaven, Jesus ama akpak mme anditiene enye ẹnam usio-ukot ndinyene nneme ye mbon en̄wen mban̄a etop emi, idem ọnọde mmọ uyo ete: “Ẹka ẹkenam kpukpru mme idụt ẹdi mbet Mi, . . . ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ke ofụri ererimbot, mme ata Christian mfịn ẹnam utom oro ebe ke ndineme eti mbụk Obio Ubọn̄ Abasi ye mme mbọhọidụn̄ mmọ. Nneme ẹmi an̄wam mmọ nditie ntiense nnọ akpanikọ aban̄ade Andibot, Jehovah.—Matthew 24:14.

Emem Emem Nneme Oro Ọbọpde-Bọp

Ke ewe usụn̄ ke mme mbet Jesus ẹkenyene ndineme se mmọ ẹnịmde ke akpanikọ ye mbon en̄wen? Mmọ ikenyeneke ndinam mme andibiọn̄ọ ẹkop iyatesịt, m̀mê mmọ ndida mfan̄a ye mme andibiọn̄ọ. Utu ke oro, mmọ ẹkenyene ndidụn̄ọde nyom mbon oro ẹdarade eti mbụk ndien ekem mmọ ẹneme uyarade N̄wed Abasi ke ndisọn̄ọ oro. Nte ededi, Abasi ama okụt nte mbon oro mme mbet Eyen esie ẹkesobode ẹkenamde n̄kpọ, idem kpa nte Jesus ọkọdọhọde ete: “Owo eke onyịmede mbufo onyịme Mi, ndien owo eke onyịmede Mi onyịme Andidọn̄ Mi.” (Matthew 10:40) Nso akwa edisịn ke ekedi ntem ke ini n̄wakn̄kan ibat owo ke eyo Jesus ẹkesịnde etop esie!

Apostle Paul emi ekedide Christian ọkọnọ item ete: “Owo Ọbọn̄ inyeneke ndidi owo utọk.” Utu ke oro, enye “enyene ndinyene sụn̄sụn̄ ido ye kpukpru owo; enye enyene ndifiọk nditeme owo, nnyụn̄ mme ime ke ini ẹnamde enye idiọk: enye onyụn̄ enyene ndida ata nsụkesịt nnam mmọemi ẹbiọn̄ọde ẹnen̄ede ẹsan̄a; m̀mê eyeto do Abasi anam mmọ ẹkabade esịt ẹnyene ifiọk akpanikọ.” (2 Timothy 2:24, 25) Usụn̄ oro Paul ọkọkwọrọde eti mbụk ọnọ mbon Athens, Greece, ọnọ eti uwụtn̄kpọ. Enye ama ebuen ikọ ye mme Jew ke synagogue mmọ. Ke usen ke usen ke an̄waurua enye ama eneme ye “mmọ eke ẹsobode ye enye.” Okposụkedi ndusụk owo, nte eyịghe mîdụhe, ẹkeyomde n̄kukụre ndikpan̄ utọn̄ nnọ mbufa ekikere, Paul eketịn̄ ikọ nnennen nnennen ye ke usụn̄ mfọnido. Enye ama eneme etop Abasi ye mme andikpan̄ utọn̄ nnọ enye, emi eketemede mmọ ẹte ẹkabade esịt. Mmọ ẹkenam n̄kpọ ata ukem nte mbon eyomfịn. “Ndusụk mmọ ẹsak enye; edi mmọ eken ẹte, Nnyịn iyekop se etịn̄de aban̄a n̄kpọ emi usen en̄wen.” Paul ikosụk iyịreke ndika iso ke nneme oro. Ke ama ọkọkwọrọ etop esie, enye ama “ọwọrọ ọkpọn̄ mmọ.”—Utom 17:16-34.

Ke ukperedem, Paul ama asian mme andibuana ke esop Christian ke Ephesus ete ke imọ ‘ikefeheke ndịk ndisian se ededi oro odorode mmọ n̄kpọ, ikpepde n̄kpọ an̄wan̄wa ye ke ufọk ke ufọk.’ Enye, n̄ko, ama ‘eneme mfọn mfọn ye mme Jew ye mme Greek aban̄a edikabade esịt ntiene Abasi ye edibuọt idem ke Jesus Christ.’—Utom 20:20, 21.

Mme uwụtn̄kpọ N̄wed Abasi ẹmi ẹyarade ẹwụt nte mme anam-akpanikọ asan̄autom Abasi ke eyo Bible ẹkesinemede ẹban̄a ido ukpono. Ntre mfịn, Mme Ntiense Jehovah ke n̄kopitem ẹsineme ido ukpono ye mme mbọhọidụn̄ mmọ.

Nneme Oro Ẹnyenede Ata Uforo

‘Ẹkop Ikọ Abasi.’ ‘Ẹkpan̄ utọn̄ ke mme ewụhọ esie.’ Adan̄a ediwak ini didie ntem ke mme utọ item oro ẹdu ke Bible! Afo emekeme ndinam n̄kpọ mban̄a utọ item Bible oro ini efen oro Mme Ntiense Jehovah ẹnyenede nneme ye afo. Kpan̄ utọn̄ ke etop oro mmọ ẹdade ke Bible ẹsọk fi. Etop emi idịghe eke ukaraidem edi etịn̄ aban̄a ukara eke heaven otode Abasi, kpa Obio Ubọn̄ esie. Emi edi usụn̄ oro Abasi edidade osio kpukpru ntak en̄wan eyomfịn efep. (Daniel 2:44) Ke oro ebede ukara Abasi eke heaven emi eyenam ndutịm ọnọ ofụri isọn̄ ndikabade ndi paradise nte in̄wan̄ Eden.

Akani bodisi ndụn̄ọde ama esiwak ndisịn ndinọ n̄kpan̄utọn̄ ke ini Mme Ntiense Jehovah ẹnemede n̄kpọ ye enye ẹban̄a Bible. Edi ye n̄kọri ke ubiatibet emi enye okosobode, enye ama akabade okụt edikpu ke uwem. Ntre enye ama etịn̄ ọnọ Ntiense en̄wen oro akawahade nte ke imọ iyema ndidụn̄ọde uyarade odude kaban̄a etop Bible. Nneme ofụri ini ama ọtọn̄ọ. Okposụkedi bodisi emi okokpụhọde ebietidụn̄ esie kwa ini kwa ini, Mme Ntiense ye idatesịt ẹma ẹsiyom enye ẹkụt ke kpukpru mbufa itie oro enye odude man ẹkaiso ke nneme oro. Ke akpatre akwa owo bodisi oro ama onyịme ete: “Uyarade oro n̄koyomde odu kpa do ke Edisana N̄wed Abasi kpukpru ini. Edieke Mme Ntiense oro mîkpekesịnke ifịk ndinyene nneme ye ami, n̄kposụk ndu ko ndikere mban̄a se uwem ọwọrọde. Nte edide, mmedikpep akpanikọ, ndien nyeda nyọhọ nsụhọ ini uwem mi ndidụn̄ọde nyom mbon en̄wen oro ẹyomde Abasi ukem nte n̄koyomde.”

Mme andikop oro ẹnyenede udọn̄ ẹnen̄ede ẹyom ndifiọk n̄kpọ en̄wen en̄wen. Mmọ nte enende ẹyom ndifiọk mme ntak kaban̄a mme ukpepn̄kpọ oro ẹnọde. (1 Peter 3:15) Kpa nte ekpri eyen akahade ete ye eka esie ye mme mbụme onyụn̄ oyomde mmọ ẹnọ ibọrọ, nte enende afo omodori enyịn Mme Ntiense ndinọ fi nti ibọrọ. Afo emekeme ndinyene nsọn̄ọ nte ke mmọ ẹyedara ndifiak ndi nnyụn̄ n̄kaiso nneme etop Bible ye afo.

Eyedi afo ọmọfọfiọk esisịt aban̄a Bible. Afo emekeme ndikụt nte ke se Abasi oyomde oto fi eyesịne edinam ndusụk ukpụhọde ke usụn̄uwem fo. Kûmen̄e ndinam mme n̄kpọ koro okopde ndịk nte ke se Abasi oyomde eyetak fi ekese n̄kpọ. Mmọ n̄kukụre ẹdida ata inemesịt ẹdi. Afo eyedifiọk emi adan̄a nte afo anamde n̄kọri ke nde ke nde ke ndusụk udomo ini.

Akpa kan̄a, kere ban̄a owo emi Jehovah edide, se enye oyomde oto fi, ye se enye ọnọde. Dọhọ Mme Ntiense ẹwụt fi se Bible etịn̄de aban̄a emi. Sọn̄ọ se mmọ ẹtịn̄de ke ọkpọkpọ Bible fo. Ke ọfiọkde ete ke se Mme Ntiense ẹtịn̄de nte akpanikọ ẹban̄a ido ukpono ẹsịne ifiọk, afo nte eyịghe mîdụhe eyeyom ndidụn̄ọde ediwak nti n̄kpọ oro mmọ ẹkemede ndibuana ye afo ke N̄wed Abasi.—Mme N̄ke 27:17.

Ẹyedara afo ndidi ndise Mme Ntiense ke itie mbonoesop n̄kann̄kụk mmọ, kpa Ufọkmbono Obio Ubọn̄. Do afo eyekop nneme Ikọ Abasi oro ẹnyenede ufọn. Afo eyekụt nte mbon oro ẹdude ẹkopde idatesịt ndineme ye kiet eken mban̄a mme uduak Abasi. Yak Mme Ntiense ẹmi ẹn̄wam fi ekpep akpanikọ aban̄ade uduak Abasi kaban̄a nnyịn mfịn. Yere ikot Abasi ndineme utuakibuot akpanikọ nnyụn̄ nnyene unyịme esie, ndikam nnyene uwem nsinsi ke Paradise.—Malachi 3:16; John 17:3.

[Ndise ke page 5]

Noah ama etịn̄ an̄wan̄wa aban̄a uduak Abasi

[Mme ndise ke page 7]

Nte Paul akanamde ke Athens eset, Mme Ntiense Jehovah ẹkpep mmọ en̄wen mme akpanikọ Bible