Ntọt M’ọkwọrọ Obio Ubọn̄

“Nam Utom Ọkwọrọ Gospel”

NSO ke ndidi ọkwọrọ gospel ọwọrọ? Ikọ emi edi edikabade ikọ Greek oro eu·ag·ge·li·stesʹ, emi enyenede n̄kpet n̄kpet ebuana ye ikọ oro eu·ag·geʹli·on, emi ọwọrọde “eti mbụk.” Ntem, ọkwọrọ gospel edi ọkwọrọikọ, m̀mê isụn̄utom, eti mbụk.

Kpukpru ata Christian ẹdi mme ọkwọrọ gospel koro mmọ ẹkwọrọ eti mbụk aban̄ade Obio Ubọn̄ Abasi. Nte odotde, apostle Paul ama eteme Timothy ete ‘anam utom ọkwọrọ gospel.’ Timothy ekenyene ndida utom emi ke akpan n̄kpọ. Paul ama akpak enye ete ‘afara ke idem ke kpukpru n̄kpọ’ onyụn̄ ‘anam utom esie ama.’—2 Timothy 4:5.

Nte mme ọkwọrọ gospel nnyịn n̄ko imada utom ukwọrọikọ nnyịn ke akpan n̄kpọ inyụn̄ ‘ifara ke idem,’ m̀mê idu ke edidemede man ibuana eti mbụk ke kpukpru ifet. Ediwak owo ke ntem ẹmedidiọn̄ọ Jehovah ye mme un̄wọn̄ọ esie ke Mme Ntiense Jehovah ẹma ẹkesobo ye mmọ ebe ke ikọ ntiense ido nneme. Emi edi se ikotịbede inọ Seymore, eren kiet ke Barbados.

Seymore ekedi andikpep ke ufọkn̄wed ukara. Charles, andikpep ke ibio ini ke ukem ufọkn̄wed oro ye kiet ke otu Mme Ntiense Jehovah, ekedi ọkwọrọ gospel emi okodude ke edidemede. Enye ekedi asan̄autom uyọhọ ini, m̀mê asiakusụn̄, ndien ama esida kpukpru ifet oro ẹbererede ndibuana eti mbụk ye mbon en̄wen. Seymore okokop etop Obio Ubọn̄ ke akpa ini ebe ke unọ ikọ ntiense ido nneme Charles.

Ibịghike Seymore n̄ko ama ebiere ndibuana akpanikọ Bible ye ediwak mbon efen nte ekekeme. Ntre enye ama esitọn̄ọ ufan ufan nneme ye mbon itieutom esie, akpan akpan nditọ ufọkn̄wed esie. Okposụkedi nte owo mînaha ẹkpep ido ukpono ke ufọkn̄wed ukara ke ndusụk idụt, ẹkenọ eren emi ndinọ ukpep ke ido ukpono ye nti ido uwem. Edi idahaemi obufa ifiọk Bible oro Seymore ekenyenede ama ada itie n̄kani ekikere esie kaban̄a n̄kpọ emi. Ke ini nduọkodudu, enye ama esitịn̄ ọnọ nditọ ufọkn̄wed esie aban̄a obufa ererimbot oro Abasi ọn̄wọn̄ọde ye idotenyịn nsinsi uwem.

Didie ke nditọwọn̄ ẹkesinam n̄kpọ ẹban̄a? Ediwak mmọ ẹma ẹwụt ata udọn̄ ke eti mbụk Obio Ubọn̄ Jehovah. Nte ini akade, Seymore ama ọtọn̄ọ ndinịm ukpepn̄kpọ Bible ye owo 13 ke otu nditọ ufọkn̄wed esie. Udọn̄ mmọ ama okpon tutu mmọ ẹdiomi ndikpep Bible ikaba ke urua. Ekem ata ediwak mmọ ẹma ẹtọn̄ọ ndidụk mme mbonoesop ke Ufọkmbono Obio Ubọn̄ eke Mme Ntiense Jehovah n̄kann̄kụk. Kan̄a kemi owo usụkkiet ke otu mmọ ẹkabade ẹdi Mme Ntiense Jehovah oro ẹma ẹkeyak idem ẹnọ ẹnyụn̄ ẹnade baptism. Amaedi Seymore, enye idahaemi ke ọyọhọ utom esie ebe ke ndinam utom nte asiakusụn̄ ofụri ini ye nte ebiowo ke kiet ke otu esop Mme Ntiense Jehovah ke Barbados.

Emi edi uwụtn̄kpọ kiet kpọt kaban̄a nte Mme Ntiense Jehovah ke ofụri ererimbot ‘ẹnamde utom mme ọkwọrọ gospel,’ ke n̄kan̄ kiet ebe ke ndibuana ke unọ ikọ ntiense ido nneme. Mmọ ẹtiene item Bible oro odude ke N̄wed Mbon Colossae 4:5, 6, emi ọdọhọde ete: “Ẹsan̄a nte mbon eti ibuot ke mbubehe eke mbufo ẹnyenede ye mmọemi ẹdude ke esien: ẹdedep ifet. Ẹyak nneme mbufo ẹnyene inem ke esịt kpukpru ini, nte ẹsịnde inụn̄ ke esịt, kpan̄ mbufo ẹdiọn̄ọ nte mbufo ẹkpemende ikọ ẹnọ kpukpru owo ibọrọ.”