“M̀mọ̀n̄ Ke Okụk Emi Esito?”
MME andise video Watch Tower Society oro “Jehovah’s Witnesses—The Organization Behind the Name” ẹsikop inemesịt. Mmọ ẹsikụt ndiye iren ye iban ẹmi ẹtode nsio nsio orụk ye idaha ke uwem, ẹtiede imam imam ẹnyụn̄ ẹnamde utom ọtọkiet ke n̄kemuyo. Ikụreke ke ediwak tọsịn mme anamutom ẹmi ẹkopde inemesịt ndidụri ntịn̄enyịn mmọ edi ikpọ awak-n̄kukọhọ ufọkutom ke ibuot itieutom N̄ka ke Brooklyn ye ke mme in̄wan̄ mmọ ke Wallkill, New York, ama odụri ntịn̄enyịn mmọ n̄ko. Video oro owụt nte ẹkemede ndikụt ifiọk ubotn̄kpọ oro ekemde ye eke idahaemi ke esịt ufọk ẹmi—n̄kpọutom umịn̄n̄wed ye eke ubọpn̄wed oro ẹsọpde etieti ẹmi ẹsion̄ode ediwak miliọn n̄wed kpukpru ọfiọn̄, nsio nsio n̄kpọutom kọmputa, ye akpakịp itieutom ẹmi ẹnọde un̄wam.
Emi edi uyarade ekese ubiatokụk. Ndusụk owo ke ntre ẹsibụp ẹte, “M̀mọ̀n̄ ke okụk emi esito?”
Isenowo ẹmi ẹkade ẹkese ibuot itieutom N̄ka ẹsikop inemesịt kpasụk ntre. Mmọ ẹsinyanade itọn̄ ẹse obufa ufọkidụn̄ oro enyenede enyọn̄ 30, kiet ke otu ediwak ufọk oro ẹdade ẹnam itieidụn̄ ẹnọ se iwakde ikan mme asan̄autom anamutom unyịmesịt 3,000 ẹmi ẹnamde utom do. Edika n̄kese obufa Itie Unọ Ukpep Watchtower emi odude ke n̄kpọ nte kilomita 110 ke n̄kan̄ edem edere Brooklyn ẹsitụk ediwak isenowo. N̄kpọ nte owo 1,200 ẹdụn̄ do, kpa ye oro ẹsụk ẹbọpde-bọp. Ẹyenọ otu nditọ ukpepn̄kpọ isụn̄utom iba ukpep do kpukpru isua ẹnyụn̄ ẹnọ mmọ ẹka utom esenidụt mmọ. Edi ke ebiet emi n̄ko ke ẹnọ se iwakde ikan mme esop 10,000 eke Mme Ntiense Jehovah ke United States ndausụn̄. Ediwak n̄kọk itieutom ke ofụri ererimbot ẹmetat mme ufọkutom mmọ ke ndondo emi mîdịghe ẹdu ke idaha ndinam ntre. Ndinam ofụri utom ẹmi esikpa ekese okụk. Mme owo ẹsibụp ẹte, “M̀mọ̀n̄ ke okụk emi esito?”
Ibọrọ edi nte ke enye esito mme ikpîkpu owo nte owo nnyịn ekededi. Mmọ ẹdi mme owo, ke ofụri ererimbot, ẹmi ẹyomde ndinam kpukpru se mmọ ẹkemede man ẹtat akpan utom ukwọrọikọ ye unọ ukpep Christian. Utọ edu unyịmesịt oro idịghe obufa n̄kpọ.
Uwụtn̄kpọ Emi Israel Eset Okonịmde
Ke se ibede isua 3,500 ẹmi ẹkebede, udọn̄ kaban̄a edinọ mme etịbe ntatubọk ama edemerede. Jehovah ama owụk Moses ete ọbọp ataya, m̀mê “efe esop,” emi ẹdidade ke utuakibuot Esie. Ndudiọn̄ emi Abasi ọkọnọde ama oyom nsio nsio ọsọn̄urua n̄kpọ. Jehovah ama ọnọ ewụhọ ete: “Mbufo ẹda enọ mbufo ẹsọk Jehovah: yak kpukpru owo eke esịt mmọ ẹnyịmede, ẹda enye ẹdi nte enọ Jehovah.” (Exodus 35:4-9) Didie ke mme owo ẹkenam n̄kpọ? Mbụk oro asian nnyịn ete ke “kpukpru owo eke esịt mmọ ẹdemerede mmọ, ye kpukpru owo eke spirit mmọ anamde mmọ ẹnyịme, ẹdi, ẹda enọ Jehovah ẹdisọk ke edinam tent esop, ye ke ofụri utom esie, ye ke edisana edisịne-n̄kpọ.” “Enọ ima” emi sụn̄sụn̄ ama akabade awak tutu ‘ebe adan̄a nte ẹkeyomde ke utom oro Jehovah okowụkde ete ẹnam.’ (Exodus 35:21-29; 36:3-5) Nso anana-ibụk edu ntaubọk ke mme owo ẹkewụt ntem!
Ikesịmke isua 500 ke ukperedem, ikot ama afiak ọwọrọ kaban̄a nditọ Israel ndinọ enọ ntatubọk. Ama ekpere ini Solomon ndinam uduak Edidem David ete esie kaban̄a edibọp ufọk oro edibịghide ọnọ Jehovah ke Jerusalem. David ke idemesie ama obon onyụn̄ ọnọ akpan ubak ke otu se ẹdiyomde. Mmọ eken ẹma ẹdiana ke ini David ọkọdọhọde ete ẹda ‘enọ Jehovah’ ẹdi. Nso ikedi utịp? “Kpukpru owo ẹdat esịt, koro mmọ ẹtatde ubọk: koro mmọ ẹtatde ubọk ẹnọ Jehovah ke ofụri esịt: David edidem n̄ko onyụn̄ adat esịt etieti.” (1 Chronicles 22:14; 29:3-9) Silver ye gold ikpọn̄ ekpedi n̄kpọ nte biliọn $50 ke ekọmurua idahaemi!—2 Chronicles 5:1.
Nnyịn imokụt ito mme uwụtn̄kpọ ẹmi nte ke owo ikenyịke-nyịk owo ndomokiet ndinọ enọ. Enye ekenen̄ede edi ke “ima esịt” ẹkenyụn̄ ẹnọ ke “ofụri esịt.” Jehovah ikpekekopke inemesịt ke n̄kpọ ekededi emi okpokosụhọrede akan oro. Ke ukem usụn̄ oro, ke ini ifet ekebererede nditịp okụk man ẹn̄wam mme Christian ẹmi ẹkedude ke unana, apostle Paul ama ewet ete ke emi ikenyeneke ndidi “ke n̄kanubọk.” Enye ama adian ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.”—2 Corinth 9:5, 7.
Udọn̄ Odude Mfịn
Nte udọn̄ odu mfịn kaban̄a editịp mme etịbe? Ke akpanikọ odu, ndien eyekam ododu akan oro nte ini akade. Ntak-a?
Ẹmenọ mme Christian san̄asan̄a item kaban̄a utịt ini emi. Jesus ama ọnọ mbet esie ewụhọ ete: “Mbufo ẹka ẹkanam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.
Esida ekese ini ye okụk ndiyọhọ akwa utom unọ ukpep ye edikwọrọ ikọ emi nte nnyịn isan̄ade ikpere ata “utịt ererimbot” ikan. Ntak-a? Ke ntak kpukpru se ibuanade ke ndida etop Obio Ubọn̄ Abasi ‘nsịm utịt ererimbot.’ (Utom 1:8) Ata ediwak owo itịmke ifiọk N̄wed Abasi nte mme Jew eke akpa isua ikie ẹkefiọkde. Ke akpanikọ, ata ediwak ibat mme andidụn̄ isọn̄ ikam imeheke ye Bible inyụn̄ idaha enye nte Ikọ Abasi. Ẹnyene ndinọ mme ọkwọrọikọ ukpep ndien ẹnọ mmọ ẹka isenidụt. (Rome 10:13-15) Ndien kere ban̄a ibat usem oro emi abuanade! Oyom mbon ẹmi ẹkwọrọde ikọ ẹnọ ẹnyene mme Bible ye mme n̄wed ẹkọn̄ọde ke Bible man ẹkot ẹnyụn̄ ẹkpep ke usem mmọ. Oyom akwa udomo ndutịm man ẹsịm kpukpru owo ke adiana ke adiana ẹnyụn̄ ẹnam mmọ ẹkọri ẹsịm ọyọhọ idaha ke n̄kan̄ eke spirit man mmọ n̄ko ẹkeme ndin̄wam mmọ en̄wen.—2 Timothy 2:2.
Jesus ọkọdọhọ ke ẹyebemiso “ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Ntre ini edi emi ndisịn kpukpru se ikekeme man inam akpan utom oro. Idụhe usụn̄ oro ọfọnde akan ndida okụk nnyịn nnam n̄kpọ mbemiso inyene obụkidem etrede ndinyene ata ufọn.—Ezekiel 7:19; Luke 16:9.
M̀mọ̀n̄ ke Okụk Oro Esika?
Watch Tower Society emịn̄ mme n̄wed Bible ke se ibede usem 230, ọkọrọ ye n̄wed mme nnan ye mme video ke usem idiọn̄ọ ọnọ mme inan. Oro oyom otu mme akabade n̄wed ye mme andinen̄ede ndudue ke usem kiet kiet. Edikam n̄kekere mban̄a edinam kpukpru utom emi, akpan akpan magazine Enyọn̄-Ukpeme, emi ẹmịn̄de ke usem 121 kpukpru ọfiọn̄ ẹnyụn̄ ẹmịn̄de usem 101 ke otu ẹmi ke ukem ini, edi n̄kpọ ndyọ. Edi emi edi se ẹyomde man mme owo ke ofụri ererimbot ẹkeme ndinyene nnyụn̄ n̄kot ukem ntọt. Kpukpru isua ekọmurua babru ye mme n̄kpọ eken oro ẹdade ẹnam etop Obio Ubọn̄ odu ke uduot oro ẹmịn̄de-mịn̄ m̀mê eke ẹmụmde-mụm ẹsịn ke ọkpọ ukopikọ m̀mê eke video ke ọdọk. Ẹnyene ndida mme etịbe ẹtode nditọete mi nse mban̄a mme utọ ekọmurua oro.
Ẹnam utom edikwọrọ ye edikpep ke mme efakutom ẹmi ẹnyenede se ibede esop 75,000 eke Mme Ntiense Jehovah ke ofụri ererimbot. Man ẹsịn udọn̄ ẹnọ mmọ ẹnyụn̄ ẹnam mmọ ẹdiana ọtọkiet, mme esenyịn oro ẹsan̄ade-san̄a ẹmi ẹma ẹkebọ ukpep ẹsika ẹkese esop kiet kiet n̄kpọ nte ikaba kpukpru isua. Mme mbono n̄ko ẹsinyene akpan udeme ke ndinọ item. Ana ẹbọ mme ufọk ke ukpeokụk ndida nnịm ikpọ mbono, ẹmi ẹnọde nsịnudọn̄ ntre. Ẹsida mme etịbe fo n̄ko ẹnam n̄kpọ kaban̄a mme uduak ẹmi.
Ke adan̄aemi ẹsinịmde mme mbono ikata kpọt ke isua ke ofụri ofụri, mme esop n̄kann̄kụk ẹsisop idem ẹdụk mbonoesop ition kpukpru urua. (Men Exodus 34:23, 24 domo.) Mbufa owo ẹmi ẹdụkde ẹdi ẹmi ẹnamde n̄kpọ ẹban̄a eti mbụk oyom ẹtọn̄ọ mbufa esop ke mme itie tọsịn kpukpru isua. Ye un̄wam ediwak miliọn naira ẹmi N̄ka ọnọde ke ebuọt, ke ẹbọp ediwak mbufa Ufọkmbono Obio Ubọn̄ ke mme itie ikie kpukpru isua, ndien ke ẹfiak ẹdiọn̄ ẹnyụn̄ ẹtat ediwak mmọ eken. Okposụkedi emi edide okụk oro mîdopke-dop ida emi ẹdade ẹnam n̄kpọ kpukpru ini, ẹkaiso ndiyom enye etieti.
Mme idụt Edem Usiahautịn Europe ẹmi ẹkedude ke idak akani Soviet Union ẹdi ebiet kiet emi enyenede anana-mbiet n̄kọri. Mbụk n̄kọri oro ẹkenọde nte ke utom ama ọtọn̄ọ ke mme ebiet ẹmi ekedi n̄kpọ idatesịt didie ntem! Idahaemi ke ẹnọ mme isụn̄utom ẹka ediwak idụt ẹmi. Ẹmesiak mbufa n̄kọk itieutom ke ndusụk idụt, anamde ibat mme asan̄autom anamutom unyịmesịt ẹmi ẹdide mbonutom ke ubon Bethel ofụri ererimbot ẹbe 15,000. Nte ededi, ẹnyene ndidedep m̀mê ndibọbọp mme ufọkutom n̄kọk itieutom ẹmi mmọ ẹdụn̄de. Mme etịbe fo ẹn̄wam ke ndiyụhọ udọn̄ emi.
Satan ye mme demon esie ẹkụt kpukpru utom emi. Mmọ ẹsinam kpukpru se ẹkemede ndibiat ukeme mme anam-akpanikọ asan̄autom Jehovah m̀mê ndinam mmọ ẹnyene mfịna. (Ediyarade 12:17) Emi ọwọrọ ke ẹnyene n̄kaiso mbiomo aban̄ade ikpe man ẹkpeme unen emi ikọt Abasi ẹnyenede ndikwọrọ ikọ nnyụn̄ ndu uwem ke n̄kemuyo ye ndinen ibet esie. Adianade do, mme nsobo ẹmi ẹtode ekọn̄ ke editịm n̄kpọ Satan, ọkọrọ ye mme oto-obot afanikọn̄, ọwọrọ nte ke ẹsiwak ndiyom mme n̄kpọ un̄wam man ẹnọ nditọete iren ye iban nnyịn ẹmi ẹsobode afanikọn̄ emi ye mmọ eken oro ẹdude ye mmọ. Etịbe fo ẹsin̄wam ke ndinọ akpan un̄wam emi.
Jehovah Eyenọ Fi Utịp
Ndida ini ye okụk nnyịn nnam n̄kpọ ke ntatubọk ke ndimenede utom Ọbọn̄ ẹsida uwak edidiọn̄ ẹdi. Didie ke edi ntre? Koro Abasi, emi enyenede kpukpru n̄kpọ, eyenọ nnyịn utịp. Mme N̄ke 11:25 ọdọhọ ete: “Ukpọn̄ eke ọfọnde ido eyetịm oyụhọ: ndien edi andinọ mmọn̄ edikụt mmọn̄.” Jehovah ke akpanikọ esikop inemesịt ke ini inamde udeme nnyịn ke ndimenede utuakibuot esie. (Mme Hebrew 13:15, 16) Enye ama ọn̄wọn̄ọ ọnọ nditọ Israel eset ẹmi ẹdidade mme etịbe ẹkeyomde ke idak Ibet ediomi edi: “Ẹda ẹmi ẹdomo mi, Jehovah mme udịm ọdọhọ, m̀mê ami ndiberekede window heaven nnọ mbufo, nnyụn̄ n̄n̄wan̄a nti n̄kpọ nnọ mbufo, tutu akaha.” (Malachi 3:10) Uforo eke spirit oro mme asan̄autom Jehovah ẹdarade mfịn edi uyarade oro nte ke Abasi anam un̄wọn̄ọ esie.
Akwa utom editan̄a usen edinyan̄a nnọ kpukpru owo ye edin̄wam mbon esịt akpanikọ emi ẹsan̄a ke usụn̄ oro adade aka uwem idikaha iso ke nsinsi. (Matthew 7:14; 2 Corinth 6:2) Edi ẹnyene nditan̄ kpukpru mbon ẹmi ẹdide “mme erọn̄ en̄wen” eke Ọbọn̄ mbok. (John 10:16) Didie ke edi akpan n̄kpọ ntem ndikan mme n̄kpọ-ata oro mfịn! Ndien kpukpru nnyịn idikop inemesịt didie ntem, ke ndifiak nti ke obufa ererimbot edinen ido oro se ikotịbede, nnyụn̄ ndọhọ nte, ‘Mma nnyene ọyọhọ ebuana ke akpatre utom editan̄ mbok oro’!—2 Peter 3:13.
[Ekebe ke page 30, 31]
Nte Ndusụk Owo Ẹnọde Etịbe Kaban̄a Utom Ukwọrọikọ Obio Ubọn̄
MME ETỊBE ẸNỌDE KABAN̄A UTOM OFỤRI ERERIMBOT: Ediwak owo ẹsisio n̄kpọ ẹnịm mîdịghe ẹnam ndutịm ẹban̄a ibatokụk oro mmọ ẹdisịnde ke mme ekebe etịbe oro ẹdiande idiọn̄ọ: “Etịbe Kaban̄a Utom N̄ka Ofụri Ererimbot—Matthew 24:14.” Ke ọfiọn̄ kiet kiet mme esop ẹsinọ okụk emi aka edide ibuot itieutom ofụri ererimbot ke Brooklyn, New York, m̀mê ọfis n̄kọk itieutom n̄kankụk.
MME ENỌ: Ẹkeme ndinọ enọ okụk imaesịt nnennen ẹsọk Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, m̀mê ọfis N̄ka oro esede aban̄a idụt mbufo. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro etịn̄de in̄wan̄în̄wan̄ nte ke emi edi enọ.
ENỌ ẸSỊNDE KE UBIỌN̄: Ẹkeme ndinọ okụk ẹsọk Watch Tower Society man otịm onịm tutu osịm ini n̄kpa andinọ, ye ndutịm nte edieke andinyene oyomde ndida nnam mbubehe idemesie, ke ẹyefiak ẹkpọn̄ ẹnọ enye.
INSURANCE: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom. Ẹkpenyene ndinam N̄ka ọfiọk aban̄a mme utọ ndutịm oro.
IBATOKỤK BAN̄K: Ẹkeme ndinam ibatokụk ban̄k, n̄wed okụk oro ẹsịnde ke ban̄k ẹyom udori, m̀mê okụk ukpọn̄ utom owo ẹdu ke enyịn̄ mîdịghe ẹkpe ke ini ẹkpade ẹnọ Watch Tower Society, nte ekemde ye ndutịm ban̄k n̄kann̄kụk. Ẹkpenyene nditọt N̄ka mban̄a utọ ndutịm oro ekededi.
INYENE YE MBUBEHE: Ẹkeme ndinọ Watch Tower Society inyene ye mbubehe edide ke ndinọ nte ata enọ m̀mê ke idak ndutịm anamde ẹkaiso ẹkpe udori ẹnọ andinọ.
ISỌN̄ YE INYENE: Ẹkeme ndinọ Watch Tower Society isọn̄ ye inyene oro ẹkemede ndinyam edide ke ndinọ nte ata enọ m̀mê ke ndimụm n̄kpọ akpa ke isọn̄ ye inyene n̄kama nnọ andinọ, emi ekemede ndisụk n̄kaiso ndụn̄ do ke eyouwem esie. Owo ekpenyene nditọt N̄ka mbemiso ayakde isọn̄ ye inyene ekededi ọnọ N̄ka.
UNEN N̄KPỌ AKPA YE EBUỌT: Ẹkeme ndiyak inyene m̀mê okụk nnọ Watch Tower Society ke ndinọ enye unen ndidia n̄kpọ akpa oro asan̄ade ye ibet, mîdịghe ẹkeme ndiwet enyịn̄ N̄ka nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinọ ndusụk ufọn ukpe tax. Ẹkpenyene ndinọ n̄wed unen m̀mê ebuọt emi ẹsọk N̄ka.
ENỌ EMI ẸDIOMIDE-DIOMI: N̄ka otịm ediye uduot ekpri n̄wed ke Ikọmbakara emi ẹkotde “Planned Giving.” Mbon ẹmi ẹdude ke United States ẹmi ẹnamde ndutịm idahaemi ndinọ N̄ka akpan enọ m̀mê ndikpọn̄ n̄kpọ akpa nnọ ke ẹkpade ẹkeme ndikụt nte ntọt emi enyenede ufọn. Oro enen̄ede edi akpanikọ edieke mmọ ẹduakde ndiyọhọ ndusụk utịtmbuba ubon m̀mê uduak edisụhọde ekọmurua tax ke isọn̄ ye inyene ke adan̄aemi ẹdade usio urua okụk tax oro ẹsụhọde ekọmurua enọ m̀mê n̄kpọ akpa.
Ke oyomde ntọt efen efen kaban̄a ekededi ke otu mme n̄kpọ ẹdude ke enyọn̄ mi, wet Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, m̀mê ọfis N̄ka oro esede aban̄a idụt mbufo.