Andinọ “Kpukpru Nti Edinọ”
“Ini kiet ọkwọrọikọ ufọkabasi Reformed ama edi ebịne mi. Enye okoyom ndifiọk nte ami n̄kamade ufọkabasi mi. Mma ndọhọ enye nte: . . . ‘Nnyịn isikpehe okụk utịtọfiọn̄ ndomokiet; n̄kpọ ndomokiet idụhe ndinam mme owo ẹtọhọ. Akananam nnyịn ibọhọ etịbe.’ Enye ama obụp ete, ‘Mbufo ẹsisan̄a didie ẹnyene okụk?’ Mma mbọrọ nte, ‘Idahaemi, Dr.——, edieke ntịn̄de ata mmemmem akpanikọ nnọ fi edisọsọn̄ afo ndinịm oro ke akpanikọ. Ke ini mme owo ẹnyenede udọn̄ ke usụn̄ emi, mmọ ikwe nte ẹnịmde usan etịbe. Edi mmọ ẹyekụt nte ke ubiatokụk odu. Mmọ ẹyedọhọ ke idemmọ ete, “Ufọkmbono emi oyom okụk. . . . Didie ke n̄keme ndinyene ekpri okụk nnọ ke utom emi?”’ Enye ama ese mi nte n̄kpọ eke enye ekekerede ete, ‘Afo ada mi ke nso—ke ọkọi?’ Mma ndọhọ, ‘Idahaemi, Dr.——, ami ntịn̄ in̄wan̄în̄wan̄ akpanikọ nnọ fi. . . . Ke ini owo ọbọde edidiọn̄ onyụn̄ enyenede n̄kpọ obụkidem, enye eyeyom ndida enye nnam n̄kpọ nnọ Ọbọn̄. Edieke enye mînyeneke ukeme, ntak emi nnyịn ifịkde enye ndinam oro?’”
—Charles T. Russell, akpa etieibuot Watch Tower Society, “Enyọn̄-Ukpeme” (Ikọmbakara), July 15, 1915.
NNYỊN inọ enọ koro Jehovah Abasi ekebemiso ọnọ enọ. Enọ esie ọkọtọn̄ọ ke ata anyanini emi ekebede ye edibotn̄kpọ—ata akpa edibotn̄kpọ esie, “ikpọn̄îkpọn̄ Eyen” esie. (John 3:16) Ke ima, enye ama ọnọ mbon en̄wen enọ uwem.
Eyen Abasi, Jesus Christ, edi akakan enọ emi Jehovah ọnọde nnyịn. Edi Eyen Abasi, ke idemesie, idịghe akpatre enọ oro Abasi ọnọde. “Akwa mfọn Abasi” edi se apostle Paul okokotde “enọ [Jehovah] . . . emi ayan̄ade edeme.” (2 Corinth 9:14, 15) Enọ emi nte an̄wan̄ade esịne kpukpru nti ido ye ima mfọnido oro owo mîdotke emi Abasi anamde atara osịm ikọt esie ebe ke Jesus. Utọ ima mfọnido oro edi ata utịbe tutu ayan̄a ukeme owo ndinam an̄wan̄a m̀mê nditịn̄. Edi, ikpehe efen osụk ododu aban̄a se Abasi ọnọde.
Ke anyanini emi ekebede, edidem kiet ke ọniọn̄ ye ke nsụhọdeidem ama onyịme nte ke nti n̄kpọ ekededi oro inọde ẹkenen̄ede ẹnyene Jehovah. Enye ọkọdọhọ ete: “Koro kpukpru n̄kpọ ke enyọn̄ ye ke isọn̄ ẹmenyene fi; O Jehovah, itie edidem edi okwo, afo onyụn̄ okon̄ nte etubom kpukpru . . . Edi ami ndi anie, ikọt mi ẹnyụn̄ ẹdi mmanie, eke nnyịn ikemede nditat ubọk ntem? N̄kọm kpukpru n̄kpọ ẹto fi nnyịn inyụn̄ inọ fi se itode fi ke ubọk.”—1 Chronicles 29:11-14.
Uwụtn̄kpọ Abasi
James, mbet Jesus Christ, ama ọfiọk ete ke Jehovah Abasi edi ebiet emi n̄kpọ ekededi oro ẹfọnde ẹma ke kpukpru idaha ẹtode. Edi enọ eke ẹfọnde ẹma ikpọn̄îkpọn̄ ẹto enye. James ekewet ete: “Kpukpru eti edinọ ye kpukpru enọ eke ẹfọnde ẹma ẹto ke enyọn̄, ẹto ke ubọk Ete mme un̄wana ẹsụhọde ẹdi; emi mîkemeke ndikpụhọde, ukpụhọde itie mînyụn̄ ikemeke ndimen enye nsịn ke mfụt.”—James 1:17.
Idem ke n̄kpọ aban̄ade edinọ enọ, James ama okụt nte Abasi okpụhọrede ye mme owo. Mme owo ẹkeme ndinọ nti enọ ẹdi isinamke ntre kpukpru ini. Mme enọ ẹmi ẹkeme ndito ibụk ibụk uduakesịt, mîdịghe ẹkeme ndida enye ke ndidomo owo anam se idiọkde. Ye Jehovah edikpụhọde ndomokiet idụhe; enye ikpụhọkede. Ntre, uduot enọ esie ikpụhọkede. Mmọ kpukpru ini ẹsidi edisana. Mmọ kpukpru ini ẹsidemede mfọnọn̄kpọ ye inemesịt ubonowo. Mmọ kpukpru ini ẹsifọn ẹnyụn̄ ẹnọ un̄wam, akananam ikamake nsobo.
Mme Uduak Ndinọ Mme Enọ
Ke eyo James, mme ọwọrọiso adaiso ido ukpono ẹkesinọ enọ n̄kukụre man mme owo ẹkụt. Mmọ ẹkesinọ ye idiọk uduak. Ke ẹnyenede ọkpọsọn̄ udọn̄ ndibọ itoro owo, mmọ ẹma ẹbiat ndinen idaha mmọ. Nte ededi, mme Christian ẹkenyene ndidi isio. Jesus ama ọnọ mmọ item ete: “Ke ini ọnọde eyen ubuene n̄kpọ, kûtan̄ ese, nte mbio mbubịk ẹnamde ke mme synagogue ye mme efak, ete owo ẹkpono mmimọ. Ke akpanikọ ke ndọhọ mbufo, Mmọ ẹma ẹbọ utịp mmọ. Edi ke ini afo ọnọde eyen ubuene n̄kpọ, kûyak ubọk ufien fo ọfiọk se ubọk nnasia fo anamde: man edinọ fo edi ke ndịbe: ndien Ete fo emi okụtde ke ndịbe eyenọ fi usiene.”—Matthew 6:2-4.
Ntak oro Christian ọnọde enọ edi man an̄wam mbon en̄wen ẹnyene se mmọ ẹyomde mîdịghe anam mmọ ẹkop inemesịt m̀mê emenede utuakibuot akpanikọ. Enye idịghe kaban̄a itoro idemowo. Enyịn Jehovah, nte ededi, ekeme ndibe ndụk nsịm ata ntotụn̄ọ isọn̄ esịt nnyịn. Enye ekeme ndikụt uduak esịtidem oro anamde nnyịn inọ mme enọ.
Mme Ntiense Jehovah ẹsidomo nditiene uwụtn̄kpọ Jehovah ye eke Eyen esie ke ndinọ enọ. Mmọ ẹsinọ ẹto se mmọ ẹnyenede. Mmọ ẹnyene eti mbụk Obio Ubọn̄, ndien mmọ ẹsinọ emi man mbon en̄wen ẹnyene edidiọn̄. Mmọ ẹfiọk se Mme N̄ke 3:9 ọdọhọde: “Kpono Jehovah ke inyene fo, ye ke akpa ubak kpukpru mbun̄wụm fo.” Ke ntak kpukpru n̄kọk itieutom, esop, ye mme owo kiet kiet esịnde ifịk ẹyom nditịp etịbe kaban̄a mfọnọn̄kpọ kpukpru owo, ofụri otu nditọete ẹsọn̄ idem ẹnyụn̄ ẹforo ke n̄kan̄ eke spirit. Uforo n̄kpọ obụkidem isidaha ikosịm uforo n̄kpọ eke spirit, edi uforo n̄kpọ eke spirit esida uforo n̄kpọ obụkidem oro ekemde ye se ẹyomde kaban̄a utom Jehovah edi.
Mme Usụn̄ Nditiene Mbuana
Ekese usụn̄ ẹdu emi kpukpru owo ẹkemede nditịp n̄kpọ nsịn ọkpọkpọ ke ndinọ eti mbụk ibetedem. Usụn̄ kiet edi ye se iban̄ade Ufọkmbono Obio Ubọn̄. Kpukpru mme andibuana ke esop ẹda Ufọkmbono Obio Ubọn̄ ẹnam n̄kpọ. Owo ọkọnọ okụk ndida mbọp enye m̀mê ndibọ enye ke ukpe okụk, ndisịn ikan̄, ndisịn n̄kpọ ndinam enye ofiop m̀mê ebịt, ye edise enye enyịn. Sia oyomde kpukpru owo ẹnọ esop ibetedem, ẹsinịm mme ekebe etịbe ke Ufọkmbono Obio Ubọn̄, ndien ẹsida mme enọ imaesịt oro ẹsibọde ndise mban̄a ubiatokụk esop. Otode ke nyọhọ nsụhọ, ẹsitịp n̄kpọ ẹnọ ẹsọk n̄kọk itieutom Watch Tower eke n̄kann̄kụk, nte ubiere esop edide.
Ẹkeme nditịp n̄kpọ nnọ ẹsọk n̄kọk itieutom N̄ka ke idemesie ndida nnọ mme isụn̄utom ye mme akpan asiakusụn̄ ukpep nnyụn̄ n̄n̄wam mmọ ke mme ikpehe ererimbot oro eti mbụk mîsịmke ofụri owo. Mme ubiatokụk eken ke ndisuan eti mbụk enyene ebuana ye utom mme esenyịn oro ẹsan̄ade-san̄a. Apostle Paul, emi okonịmde uwụtn̄kpọ ke utom oro ẹsan̄ade-san̄a ke akpa isua ikie, ama otoro esop ke Philippi ete: “Mbufo ẹkenọ n̄kpọ mfọn ẹsọk mi utịm ikaba ndin̄wam mi ke unana mi.” (Philippi 4:14-16) Ke ẹsiode ẹfep edibiat okụk ke mme ikpehe utom uyọhọ-ini emi, emi kpukpru n̄kọk itieutom ẹnyenede, edise mban̄a ufọkidụn̄ Bethel kiet kiet ye mbon oro ẹdude do ẹnam utom odu n̄ko. Ediwet ye edimịn̄ mme n̄wed oro ẹdọn̄ọde inem inem etop eti mbụk ke akpanikọ ẹdi ifet oro Abasi ọnọde, edi edisuan mme n̄wed ẹmi n̄ko edi akpan n̄kpọ, ndien enye abuana ubiatokụk. N̄ko ẹbiat okụk ẹnọ ikpọ ye n̄kpri mbono, owo itịn̄ke-tịn̄ iban̄a mme ikpe ke esop emi ẹken̄wanade man ‘ẹkpeme ẹnyụn̄ ẹsọn̄ọ ẹwụk eti mbụk nte ekemde ye ibet.’—Philippi 1:7.
Ini oro asan̄autom Jehovah kiet kiet esịnde ke ndikwọrọ eti mbụk edi ke imaesịt, kpa ntre ke edi ye okụk oro enye ọnọde. Apostle Paul ọnọ item aban̄a edisio n̄kpọ kpukpru ini nnịm man ẹda ẹn̄wam ke nditat utuakibuot akpanikọ ete: “Kaban̄a etịbe emi ẹdinọde ẹsọk ikọt Abasi . . . Ke akpa usen urua, mbufo owo kiet kiet ẹsio n̄kpọ ke udori eke ẹkụtde, ẹkpọnọde ẹnịm n̄kan̄ kiet.”—1 Corinth 16:1, 2.
Ke ini owo etịpde etịbe, enye isinen̄ekede ifiọk kpukpru ini nte edibiatde enye, edi enye eyekụt utịp ke editat ukwọrọikọ Obio Ubọn̄. Ntọt oro ẹdude ke 1993 Yearbook of Jehovah’s Witnesses ẹwụt nte ke mme asan̄autom Christian ẹmi ẹwakde ẹbe 4,500,000 ke ẹkwọrọ eti mbụk Obio Ubọn̄ ke se iwakde ikan mme idụt ye mme isuo inyan̄ibom 200. Ntọt ẹmi ẹkama idatesịt. Enọ ekededi ndien, inamke n̄kpọ m̀mê enye etie didie ke udomo, an̄wam ke ndisuan eti mbụk ke ofụri ererimbot.
Ntan̄ndian enọ oro kpukpru owo ẹnọde ke ẹda ẹse ẹban̄a utom emi ke okụk. Ndusụk owo ẹkeme ndinọ uwak uwak, emi an̄wamde utom ukwọrọikọ ke akamba udomo. Mmọ eken ẹnọ esisịt. Edi inaha mbon oro ẹtịpde n̄kpọ esisịt ẹkop bụt mîdịghe ẹkere ke udeme mmimọ ekpri akaha. Ke akpanikọ Jehovah ikereke ntre. Jesus ama anam emi otịm an̄wan̄a ke ini enye okowụtde adan̄a nte Jehovah enemde esịt ke ekpri okụk ebeakpa oro. “Enye onyụn̄ okụt ubuene ebeakpa kiet nte esịnde n̄kpri okudọk iba ke esịt. Ndien Enye ọdọhọ ete, Ke akpanikọ ke ndọhọ mbufo nte, Ebeakpa emi ama esịn okụk akan kpukpru mmọ: koro kpukpru mmọ ẹkesiode n̄kpọ ke nyọhọ nsụhọ mmọ ẹsịn ke etịbe: edi ke unana esie enye osio kpukpru se enye akpadade odu uwem ọnọ.”—Luke 21:2-4.
Inamke n̄kpọ se idaha nnyịn ke okụk ekemede ndidi, nnyịn imekeme ndinọ n̄kpọ ke usụn̄ oro Jehovah okopde inemesịt. Andiwet psalm nte odotde ama etịn̄ ibio ibio nte nnyịn ikemede ndinọ Edidem ye Ebiereikpe nnyịn ubọn̄. Enye ọdọhọ ete: “Ẹnọ Jehovah ubọn̄ enyịn̄ esie: ẹmen enọ ẹdidụk ke okụre esie.” (Psalm 96:8) Ke ntre, nnyịn ikpakam ikpebe ima ima uwụtn̄kpọ Ete nnyịn eke heaven ebe ke nnyịn ndinọ enọ ke idatesịt koro enye ekebemiso ọnọ nnyịn.
[Ekebe ke page 30]
NTE NDUSỤK OWO ẸNỌDE ETỊBE KABAN̄A UTOM UKWỌRỌIKỌ OBIO UBỌN̄
◻ MME ETỊBE ẸNỌDE KABAN̄A UTOM OFỤRI ERERIMBOT: Ediwak owo ẹsisio n̄kpọ ẹnịm mîdịghe ẹnam ndutịm ẹban̄a ibatokụk oro mmọ ẹdisịnde ke mme ekebe etịbe oro ẹdiande idiọn̄ọ: “Etịbe Kaban̄a Utom N̄ka Ofụri Ererimbot—Matthew 24:14.” Ke ọfiọn̄ kiet kiet mme esop ẹsinọ okụk emi aka edide ibuot itieutom ofụri ererimbot ke Brooklyn, New York, m̀mê ọfis n̄kọk itieutom oro ekperede akan.
◻ MME ENỌ: Ẹkeme ndinọ enọ okụk imaesịt nnennen ẹsọk Watch Tower Bible and Tract Society of Pennsylvania, 25 Columbia Heights, Brooklyn, New York 11201, m̀mê ọfis n̄kọk itieutom N̄ka ke n̄kann̄kụk. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro etịn̄de in̄wan̄în̄wan̄ nte ke ẹmi ẹdi enọ.
◻ ENỌ ẸSỊNDE KE UBIỌN̄: Ẹkeme ndinọ okụk ẹsọk Watch Tower Society man otịm onịm tutu osịm ini n̄kpa andinọ, ye ndutịm nte edieke andinyene oyomde ndida nnam mbubehe idemesie, ke ẹyefiak ẹkpọn̄ ẹnọ enye.
◻ INSURANCE: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom. Ẹkpenyene ndinam N̄ka ọfiọk aban̄a mme utọ ndutịm oro.
◻ IBATOKỤK BAN̄K: Ẹkeme ndinam ibatokụk ban̄k, n̄wed okụk oro ẹsịnde ke ban̄k ẹyom udori, m̀mê okụk ukpọn̄ utom owo ẹdu ke enyịn̄ mîdịghe ẹkpe ke ini ẹkpade ẹnọ Watch Tower Society, nte ekemde ye ndutịm ban̄k n̄kann̄kụk. Ẹkpenyene nditọt N̄ka mban̄a utọ ndutịm oro ekededi.
◻ INYENE YE MBUBEHE: Ẹkeme ndinọ Watch Tower Society inyene ye mbubehe edide ke ndinọ nte ata enọ m̀mê ke idak ndutịm anamde ẹkaiso ẹkpe udori ẹnọ andinọ.
◻ ISỌN̄ YE INYENE: Ẹkeme ndinọ Watch Tower Society isọn̄ ye ufọk oro ẹkemede ndinyam edide ke ndinọ nte ata enọ m̀mê ke ndimụm n̄kpọ akpa ke isọn̄ ye inyene n̄kama nnọ andinọ, emi ekemede ndisụk n̄kaiso ndụn̄ do ke eyo uwem esie. Owo ekpenyene nditọt N̄ka mbemiso ayakde isọn̄ ye ufọk ekededi ọnọ N̄ka.
◻ UNEN N̄KPỌ AKPA YE EBUỌT: Ẹkeme ndiyak inyene m̀mê okụk nnọ Watch Tower Bible and Tract Society of Pennsylvania ke ndinọ enye unen ndidia n̄kpọ akpa oro asan̄ade ye ibet mîdịghe ẹkeme ndiwet enyịn̄ N̄ka nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinọ ndusụk ufọn ukpe tax. Ẹkpenyene ndinọ n̄wed unen m̀mê ebuọt emi ẹsọk N̄ka.
Ke oyomde ntọt efen efen kaban̄a mme utọ n̄kpọ ntre, wet Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, m̀mê ọfis n̄kọk itieutom N̄ka oro ekperede akan.
[Mme ndise ke page 31]
Nte ẹdade etịbe fo ẹnam n̄kpọ:
1. Mbonutom unyịmesịt Bethel
2. Edibọp ọfis n̄kọk itieutom
3. Un̄wam ẹnọde ke ini afanikọn̄
4. Mme Ufọkmbono Obio Ubọn̄
5. Mme isụn̄utom