Erọn̄ Jehovah Ẹyom Ima Ima Ukpeme
“Mbufo ẹfiọk ẹte ke edi Jehovah edi Abasi; . . . ndien nnyịn inyene enye, ikọt esie, ye ufene emi enye ọbọkde.”—PSALM 100:3.
1. Didie ke Jehovah anam n̄kpọ ye mme asan̄autom esie?
JEHOVAH edi Akwa Ekpemerọn̄. Edieke nnyịn idide mme asan̄autom esie, enye ada nnyịn nte erọn̄ esie onyụn̄ ọnọ nnyịn ima ima ukpeme. Ete nnyịn eke heaven esinọ nnyịn ndọn̄esịt ye nduọkodudu onyụn̄ ada nnyịn usụn̄ “eti ido aban̄a enyịn̄ esie.” (Psalm 23:1-4) Eti Ekpemerọn̄, Jesus Christ, enen̄ede ama nnyịn tutu enye ayak ukpọn̄ esie ọnọ kaban̄a nnyịn.—John 10:7-15.
2. Ikọt Abasi ẹkụt idemmọ ke nso utọ idaha?
2 Nte mme andibọ ima ima ukpeme, nnyịn imekeme nditiene andiwet psalm ntịn̄ ete: “Ẹnam n̄kpọ Jehovah ye idatesịt: ẹda ikwọ ẹdi enye ke iso. Mbufo ẹfiọk ẹte ke edi Jehovah edi Abasi; edi enye akanam nnyịn, ndien nnyịn inyene enye, ikọt esie, ye ufene emi enye ọbọkde.” (Psalm 100:2, 3) Ih, nnyịn imokop idatesịt inyụn̄ idu ke ifụre. Etie nte n̄kpọ eke ẹkenyan̄ade nnyịn ẹsio ke ubọk idiọk unam ke ufọkerọn̄ emi enyenede ọkpọsọn̄ ibibene itiat.—Numbers 32:16; 1 Samuel 24:3; Zephaniah 2:6.
Mme Ekpeme Otuerọn̄ Ẹmi Ẹnọde Idem Unyịme Unyịme
3. Didie ke mbiowo Christian oro ẹmekde ẹnam n̄kpọ ye otuerọn̄ Abasi?
3 Eyịghe idụhe nnyịn ikopde idatesịt nte erọn̄ Abasi! Mbiowo oro ẹmekde ẹda usụn̄ ke otu nnyịn. Mmọ ‘idaha ubọn̄ ke otu nnyịn,’ isọn̄ke ubọk ikara nnyịn, m̀mê ndidomo ndidi mme andikara mbuọtidem nnyịn. (Numbers 16:13; Matthew 20:25-28; 2 Corinth 1:24; Mme Hebrew 13:7) Utu ke oro, mmọ ẹdi mme ima ima ekpemerọn̄ ẹmi ẹdade item apostle Peter emi ẹsịn ke edinam: “Ẹkpeme udịm-erọn̄ Abasi emi odude ke otu mbufo; ẹse ẹban̄a mmọ ke ima esịt nte Abasi oyomde, ẹkûyak etie nte ẹnyenyịk mbufo; ẹkûnam emi ẹban̄a mbukpo udori, edi ẹnam ke edinyịme esịt; ẹkûnyụn̄ ẹbre odudu ye mmọ ẹmi ẹkeyakde ẹsịn mbufo ke ubọk, edi ẹnịm idem nte uwụt-n̄kpọ ẹnọ mme erọn̄.” (1 Peter 5:2, 3) Apostle Paul ama asian ekemmọ mbiowo ete: “Ẹtịm ẹse idem mbufo, ye ofụri otu erọn̄, emi Edisana Spirit okonịmde mbufo ke mme andikpeme mmọ, ete ẹbọk mbon ufọk Abasi, emi Enye ekedepde ke iyịp [Eyen] Esie.” Ndien erọn̄ ẹkop inemesịt didie ntem nte ke irenowo oro ẹmekde ke edisana spirit mi ‘ẹnam n̄kpọ ye erọn̄ ke ima’!—Utom 20:28-30.
4. Ẹketịm ẹdiọn̄ọ Charles T. Russell ndinyene nso utọ itie ebuana ye mme erọn̄?
4 Jesus ama ọnọ esop ‘mme owo ke enọ,’ ndusụk nte “mme pastọ,” m̀mê mme ekpemerọn̄, ẹmi ẹnamde n̄kpọ ye erọn̄ Jehovah ke ima ima usụn̄. (Ephesus 4:8, 11; King James Version) Kiet ke otu mmọemi ekedi Charles T. Russell, akpa etieibuot Watch Tower Society. Ẹkekot enye Pastọ Russell ke ntak ima ima ye mbọm mbọm utom esie ke ndibọk erọn̄ ke idak Akwa Ekpemerọn̄, Jesus Christ. Mfịn, Otu Ukara eke Mme Ntiense Jehovah emek mbiowo Christian, ndien ẹwụt ukpeme man ẹkûda mme utọ ikọ nte “pastọ,” “ebiowo,” m̀mê “andikpep” nte mme udorienyịn̄. (Matthew 23:8-12) Edi, mbiowo eyomfịn ẹnam utom pastọ, m̀mê edibọk, ke ufọn erọn̄ Jehovah.
5. Ntak emi mbufa owo ẹkpediọn̄ọde mbiowo oro ẹmekde ke esop Christian?
5 Nte mme ekpemerọn̄, mbiowo ẹnyene akamba udeme ke n̄kọri eke spirit mbufa owo. Ntem, obufa n̄wed Ifiọk Oro Adade Osịm Nsinsi Uwem ọdọhọ ke page 168 ete: “Mehe ye mbiowo oro ẹmekde ke esop. Mmọ ẹnyene ekese ifiọk ke ndida ifiọk Abasi nsịn ke edinam, koro mmọ ẹma ẹsịm se inamde ẹdot nte mme esenyịn oro ẹwụtde ke Bible. (1 Timothy 3:1-7; Titus 1:5-9) Kûmen̄e ndisan̄a n̄kpere kiet ke otu mmọ edieke afo oyomde un̄wam eke spirit ndikan ido m̀mê edu oro atuahade ye se Abasi oyomde. Afo eyekụt ke mbiowo ẹtiene item Paul emi: ‘Ẹsọn̄ọ mbon iduọesịt idem, ẹkama mbon mmemidem, ẹnyene anyan ime ye kpukpru owo.’—1 Thessalonica 2:7, 8; 5:14.”
Ke Ini Mbufa Owo Ẹyomde Ndikwọrọ Ikọ
6. Nso ndutịm ke ẹtiene edieke eyen ukpepn̄kpọ Bible oyomde ndikabade ndi asuanetop Obio Ubọn̄?
6 Ke eyen ukpepn̄kpọ Bible ama ọkọbọ ifiọk onyụn̄ odụk mme mbonoesop ke ndusụk ini, enye ekeme ndiyom ndikabade ndi asuanetop Obio Ubọn̄, ọkwọrọ eti mbụk. (Mark 13:10) Ke edide ntre, Ntiense oro onịmde ukpepn̄kpọ Bible ye enye ekpenyene ndisobo ye esenyịn oro etiede ibuot, emi edinamde ndutịm man kiet ke otu mbiowo ke Kọmiti Utom Esop ye ebiowo efen ẹsobo ye eyen ukpepn̄kpọ Bible oro ye andikpep esie. Nneme oro edikọn̄ọ ke n̄wed Ẹtịm Man Inam Utom Nnyịn Ima, page 98 ye 99. Edieke mbiowo iba ẹmi ẹkụtde ẹte ke obufa owo emi onịm mme akpan ukpepn̄kpọ Bible ke akpanikọ onyụn̄ odu uwem ekekem ye mme edumbet Abasi, ẹyesian enye nte ke enye odot nditiene mbuana ke an̄wan̄wa utom ukwọrọikọ.a Ke ini enye ọtọtde utom ukwọrọikọ esie ebe ke ndinọ ibatutom an̄wautom, ẹyesịn emi ke kad Ibatutom Asuanetop Esop oro ẹwetde enyịn̄ esie. Obufa owo emi ekeme kemi ndisitọt utom unọ ikọ ntiense esie ọkọrọ ye ediwak miliọn mbon en̄wen ẹmi ‘ẹkwọrọde ikọ Abasi’ ye idatesịt. (Utom 13:5) Ẹyetọt esop nte ke enye edi asuanetop oro mînaha baptism.
7, 8. Ke mme usụn̄ ewe ke ẹkeme ndinọ asuanetop oro mînaha baptism un̄wam ke utom ukwọrọikọ?
7 Asuanetop oro mînaha baptism oyom un̄wam mbiowo ye eke mme Christian eken oro ẹkọride ẹsịm ọyọhọ idaha. Ke uwụtn̄kpọ, n̄kọri eke spirit esie edi n̄kpọ udọn̄ ọnọ ada ukpepn̄kpọ ke Ukpepn̄kpọ N̄wedesop oro enye esidụkde. Ekeme ndisọn̄ obufa asuanetop emi idem nditịn̄ ikọ uforo uforo ke utom eke ufọk ke ufọk. (Utom 20:20) Ntre eyedi enye eyeyom un̄wam, akpan akpan oto owo oro ekesinịmde ukpepn̄kpọ Bible ye enye ke n̄wed Ifiọk. Utọ eti un̄wam oro odot, koro Jesus Christ ama otịm mme mbet esie idem ọnọ utom ukwọrọikọ.—Mark 6:7-13; Luke 10:1-22.
8 Edieke anade utom ukwọrọikọ nnyịn enyene uforo, eti mbemiso ntịmidem edi akpan n̄kpọ. Ke ntre, asuanetop iba ẹmi ẹkeme ndibemiso ndu ọtọkiet man ẹdomo mme nneme oro ẹnọde ekikere ke mme nsiondi Utom Obio Ubọn̄ Nnyịn eke ọfiọn̄ ke ọfiọn̄ ẹse. Ke ini mmọ ẹtọn̄ọde utom an̄wautom mmọ, owo oro enyenede ifiọk akan ekeme ndibemiso nnyene nneme ke akpa ufọk kiet m̀mê iba. Ke ẹma ẹkekụre ntọn̄ọikọ ke ufan ufan ido, asuanetop mbiba ẹmi ẹkeme ndibuana ke ndinọ ikọ ntiense. Ndinam utom ọtọkiet ke utom ukwọrọikọ ke urua ifan̄ ekeme ndida nsịm nti mfiakn̄ka ye idem ukpepn̄kpọ Bible ke n̄wed Ifiọk Oro Adade Osịm Nsinsi Uwem. Asuanetop oro otịmde enyene ifiọk ekeme ndinịm ukpepn̄kpọ oro ke ndusụk ini ndien ekem ayak enye ọnọ obufa anditan̄a Obio Ubọn̄ emi. Asuanetop mbiba ẹmi ẹdikop inemesịt didie ntem edieke eyen ukpepn̄kpọ Bible emi owụtde esịtekọm ke ifiọk Abasi!
9. Nso ndutịm ke ẹnam ke ini asuanetop oyomde ndina baptism?
9 Nte asuanetop oro mînaha baptism ọkọride ke n̄kan̄ eke spirit, enye ekeme ndinam uyakidem nnọ Abasi ke akam onyụn̄ oyom ndina baptism. (Men Mark 1:9-11 domo.) Enye ekpenyene nditịn̄ udọn̄ esie ndina baptism nnọ esenyịn oro etiede ibuot, emi edidiomide mbiowo ndidụn̄ọde mme mbụme oro ẹdude ke Ẹtịm Man Inam Utom Nnyịn Ima ke page 175 osịm 218 ye asuanetop oro. Ke ẹkemede, nsio nsio mbiowo ita ẹkeme ndikụre ikpehe inan̄ oro ẹbaharede mme mbụme ẹmi ẹsịn ke ikpehe mbono ita. Edieke mmọ ẹkụtde ẹte ke asuanetop oro mînaha baptism mi enyene ifiọk oro ekemde ke mme ukpepn̄kpọ Bible onyụn̄ odot ke mme usụn̄ efen, mmọ ẹyesian enye nte ke enye ekeme ndina baptism. Nte utịp ediyak idem nnọ nnyụn̄ nna baptism, ‘ẹnịm enye idiọn̄ọ’ ẹnọ edinyan̄a.—Ezekiel 9:4-6.
Ndiyụhọ San̄asan̄a Udọn̄
10. Ke ama okokụre ukpepn̄kpọ esie ke n̄wed Ifiọk onyụn̄ ana baptism, didie ke owo edinam ifiọk N̄wed Abasi esie ọkọri?
10 Ke owo ama okokụre ukpepn̄kpọ Bible esie ke n̄wed Ifiọk onyụn̄ ana baptism, ekeme ndidi ufọn ididụhe ndinịm ukpepn̄kpọ Bible ye enye ke ọyọhọ n̄wed iba, utọ nte Ndidiana Kiet ke Utuakibuot Ata Abasi Kierakiet.b Nte ededi, owo oro anade baptism obufa mi eyekpep ekese n̄kpọ nte enye otịmde idem ọnọ mme mbonoesop Christian onyụn̄ odụkde mmọ kpukpru ini. Enye n̄ko eyenyene ifiọk efen efen nte udọn̄ esie kaban̄a akpanikọ onụkde enye ndikot nnyụn̄ n̄kpep mme n̄wed Christian ke idemesie nnyụn̄ nneme mme n̄kpọ N̄wed Abasi ye ekemmọ mme andinịm ke akpanikọ. Edi nso edieke san̄asan̄a udọn̄ edemerede?
11. (a) Didie ke Priscilla ye Aquila ẹken̄wam Apollos? (b) Nso un̄wam ke ẹkeme ndinọ akparawa owo emi anade baptism obufa emi ekerede ndidọ ndọ?
11 Idem Apollos, emi ‘ọkọsọn̄ọde ọfiọk N̄wed Abasi etieti’ onyụn̄ ekpepde aban̄a Jesus ke nnennen usụn̄, ama ọbọ ufọn ke ini Priscilla ye Aquila, mme Christian oro ẹtịmde ẹnyene ifiọk, ‘ẹkedade enye ẹnyọn̄ ufọk ẹnyụn̄ ẹtịm ẹyarade usụn̄ Abasi ẹnọ enye.’ (Utom 18:24-26; men Utom 19:1-7 domo.) Ke ntre, nso edieke akparawa emi anade baptism enyenede uyomima ye ndọ ke ekikere. Christian oro enyenede ifiọk akan ekeme ndin̄wam enye ndinyene ntọt ke mme ibuot nneme ẹmi ke mme n̄wed Watch Tower. Ke uwụtn̄kpọ, mme n̄kpọ oro ẹnọde ufọn ke afan̄ ẹmi ẹdu ke n̄wed Questions Young People Ask—Answers That Work, Ikpehe 7.c Asuanetop oro okonịmde ukpepn̄kpọ Bible ye enye ekeme ndineme n̄kpọ emi ye obufa owo emi, okposụkedi emi mîdibuanake edinịm ukpepn̄kpọ ofụri ini.
12. Nso un̄wam ke ẹkeme ndinọ nsan̄andọ oro ẹnade baptism obufa ẹmi ẹnyenede mme mfịna?
12 Kere ban̄a uwụtn̄kpọ efen. Ekeme ndidi mme nsan̄andọ oro ẹnade baptism obufa ẹnyene mfịna ke ndida mme edumbet Abasi nsịn ke edinam. Mmọ ẹkeme ndika mbịne ebiowo, emi edidade mbubịteyo ifan̄ ke ndineme N̄wed Abasi ye mmọ nnyụn̄ n̄wọn̄ọde ntịn̄enyịn mmọ n̄ka ntọt oro ẹdude ke mme n̄wed Watch Tower. Nte ededi, ebiowo oro idifiakke itọn̄ọ ukpepn̄kpọ Bible ofụri ini ye mme ọdọ ndọ ẹmi.
Edieke Obufa Owo Anamde Idiọkn̄kpọ
13. Ntak emi mbiowo esop ẹkpewụtde owo emi anade baptism obufa emi anamde idiọkn̄kpọ edi akabarede esịt mbọm?
13 Mbiowo ẹkpebe Jehovah, Akwa Ekpemerọn̄, emi ọdọhọde ete: “Ami nyebọk ufene mi, . . . nnyụn̄ mbọp se ibụn̄ọde, nnyụn̄ nsọn̄ se idem ememde.” (Ezekiel 34:15, 16; Ephesus 5:1) Ke n̄kemuyo ye edu oro, mbet oro Jude ama akpak ete ẹtua mme Christian oro ẹyetde aran ẹmi ẹkenyenede eyịghe m̀mê ẹkeduọde ẹdụk idiọkn̄kpọ mbọm. (Jude 22, 23) Sia nnyịn nte enende iyomde ata ekese n̄kpọ ito mme Christian oro ẹtịmde ẹnyene ifiọk, ke akpanikọ ẹkpenyene ndiwụt owo oro anade baptism obufa—ikpîkpu erọn̄—oro anamde idiọkn̄kpọ edi emi akabarede esịt mbọm. (Luke 12:48; 15:1-7) Mbiowo, ẹmi ‘ẹkpede ikpe ẹnọ Jehovah,’ ke ntre ẹnọ mme utọ erọn̄ oro ima ima ukpeme ẹnyụn̄ ẹnen̄ede mmọ ke edu ifụre ifụre ido.—2 Chronicles 19:6; Utom 20:28, 29; Galatia 6:1.d
14. Nso ke ẹkpenam ke ini asuanetop oro anade baptism ke ndondo emi anamde akwa idiọkn̄kpọ, ndien didie ke ẹkeme ndin̄wam enye?
14 Da nte ke asuanetop oro anade baptism ke ndondo emi ama esinyene mfịna un̄wọn̄ mmịn ndien ke ndudue akpa mmịn ini kiet m̀mê iba. Mîdịghe eyedi enye ama akan edu uda un̄wọn̄ oro enye ekenyenede ke anyan ini edi ayak idem ọnọ idomo edin̄wọn̄ sika ini kiet m̀mê ikaba ke ndịbe. Okposụkedi obufa eyenete nnyịn emi ama ọkọbọn̄ akam oyom edifen nnọ otode Abasi, enye ekpenyene ndiyom un̄wam ebiowo man idiọkn̄kpọ oro edikabade edi ido. (Psalm 32:1-5; James 5:14, 15) Ke ini enye etịn̄de idiọkn̄kpọ esie ọnọ kiet ke otu mbiowo, ebiowo oro ekpenyene ndidomo ndinen̄ede obufa owo oro ke usụn̄ oro owụtde mbọm. (Psalm 130:3) Ekeme ndidi item N̄wed Abasi eyekem ke ndin̄wam enye asiak afan̄ eke enende ọnọ ikpat esie ke oro ebede. (Mme Hebrew 12:12, 13) Ebiowo emi eyeneme mme idaha oro ye esenyịn oro etiede ibuot ke esop man ẹbiere m̀mê nso utọ un̄wam efen ke ẹkpenọ.
15. Ke ndusụk idaha nso ikeme ndidi se ẹyomde ke ini asuanetop oro anade baptism ke ndondo emi anamde idiọkn̄kpọ
15 Ke ndusụk idaha ekeme ndiyom se ikande oro. Edieke kpukpru owo ẹfiọkde, n̄kpọndịk odude ọnọ mme erọn̄, m̀mê ikpọ mfịna efen ẹbuanade, otu mbiowo eyemek mbiowo iba ẹte ẹdidụn̄ọde n̄kpọ oro. Edieke mbiowo ẹmi ẹkụtde ke n̄kpọ oro okpon ekem se oyomde kọmiti ukpeikpe, mmọ ẹkpenyene nditịn̄ emi nnọ otu mbiowo. Ekem otu mbiowo eyemek kọmiti ukpeikpe man ẹn̄wam owo oro anamde idiọkn̄kpọ mi. Kọmiti ukpepikpe ekpenyene ndinam n̄kpọ ye enye ke ima ima usụn̄. Mmọ ẹkpenyene ndin̄wana nda N̄wed Abasi nnen̄ede enye. Edieke enye anamde n̄kpọ aban̄a mme ukeme mfọnido oro kọmiti ukpeikpe esịnde, do mmọ ẹkeme ndibiere m̀mê ufọn ekededi eyedu nditre ndida enye nnam n̄kpọ ke mme ikpehe edinam ke mbot utịn̄ikọ ke mme mbonoesop ke Ufọkmbono Obio Ubọn̄ mîdịghe m̀mê ẹkpenyene ndiyak enye esibọrọ mbụme ke mme mbonoesop.
16. Nso ke mbiowo ẹkeme ndinam man ẹn̄wam owo oro anamde idiọkn̄kpọ?
16 Edieke owo oro anamde idiọkn̄kpọ mi anamde n̄kpọ aban̄a oro, ebiowo kiet m̀mê iba ke kọmiti ukpeikpe oro ẹkeme ndidiomi ndisika utom ubọkerọn̄ emi uduak edide ndisọn̄ọ mbuọtidem esie nnyụn̄ nnam ifiọk oro enye enyenede aban̄a ndinen idaha Abasi ọkọri. Owo mmọ kiet kiet ekeme ndisan̄a ye enye ke an̄wautom ke ini ke ini. Mmọ ẹkeme ndinyene esisịt nneme N̄wed Abasi ye enye, ndusụk ẹkamade mme ibuotikọ Enyọn̄-Ukpeme ye Awake! oro ẹdotde edi owo itọn̄ọke ukpepn̄kpọ Bible ofụri ini. Ye utọ ima ima edikere mban̄a oro, ẹkeme ndisọn̄ọ owo oro anamde idiọkn̄kpọ mi idem ndibiọn̄ọ mmeme ikpọkidem ke ini iso.
17. Nso usio-ukot ke ẹnam edieke anamidiọk oro ama akana baptism mîmaha ndikabade esịt nnyụn̄ n̄kpọn̄ idiọk usụn̄ edinam esie?
17 Nte ededi, ndina baptism ke ndondo emi idịghe isọn̄ ndikaiso nnam idiọkn̄kpọ ye unana edikabade esịt. (Mme Hebrew 10:26, 27; Jude 4) Edieke owo ekededi oro ama akana baptism mîkabakede esịt inyụn̄ ikpọn̄ idiọk edinam esie, ẹyesio enye ẹfep ke esop. (1 Corinth 5:6, 11-13; 2 Thessalonica 2:11, 12; 2 John 9-11) Ke ini edinam emi edide se ẹyomde, otu mbiowo ẹyemek kọmiti ukpeikpe. Edieke ẹsiode owo ẹfep, ẹyenọ ibio ibio ntọt emi: “Ẹma ẹsio . . . ẹfep.”e
N̄wam Mmọ ‘Ẹkọri Ẹsịm Ọyọhọ Idaha’
18. Ntak emi nnyịn inịmde ke akpanikọ ite ke mme Christian oro ẹnade baptism obufa ye mbon eken ẹyenyene ekese ndikpep kpukpru ini mban̄a Jehovah ye uduak esie?
18 Ata ediwak mme asan̄autom Abasi ẹyekaiso ẹdu ke otuerọn̄ emi. Ke inemesịt, n̄ko, kpukpru nnyịn iyetetịm ikpere Ete nnyịn eke heaven ikan koro nnyịn iyekeme ndikpep ekese mban̄a enye ye uduak esie. (Ecclesiastes 3:11; James 4:8) Ediwak tọsịn owo ẹmi ẹkenade baptism ke Pentecost ke 33 E.N. ke akpanikọ ẹma ẹnyene ekese ndikpep. (Utom 2:5, 37-41; 4:4) Kpa ntre ke ekedi ye mme Gentile, emi mîkenyeneke ifiọk N̄wed Abasi. Ke uwụtn̄kpọ, emi ekedi ntre ye mbon oro ẹkenade baptism ke Paul ama ọkọnọ utịn̄ikọ ke Areopagus ke Athens. (Utom 17:33, 34) Mfịn, n̄ko, mbon oro ẹnade baptism obufa ẹnyene ekese ndikpep ẹnyụn̄ ẹyom ini ye un̄wam ndisọn̄ọ ubiere mmọ ndikaiso nnam se inende ke enyịn Abasi.—Galatia 6:9; 2 Thessalonica 3:13.
19. Didie ke ẹkeme ndin̄wam mbon oro ẹnade baptism ‘ẹkọri ẹsịm ọyọhọ idaha’?
19 Kpukpru isua ediwak tọsịn owo ẹsina baptism ẹnyụn̄ ẹyom un̄wam man mmọ ẹkeme ‘ndikọri nsịm ọyọhọ idaha.’ (Mme Hebrew 6:1-3) Ebede ke ikọ, uwụtn̄kpọ, ye eti un̄wam ke utom ukwọrọikọ, afo emekeme ndin̄wam ndusụk owo ndimen obufa owo nsịne nnyụn̄ n̄kaiso ‘nsan̄a ke akpanikọ.’ (3 John 4; Colossae 3:9, 10) Edieke afo edide asuanetop emi enyenede ifiọk, mbiowo ẹkeme ndidọhọ fi an̄wam obufa ekemmọ andinịm ke akpanikọ ke an̄wautom mîdịghe ẹte yak eneme ndusụk akpan n̄kpọ N̄wed Abasi ye enye ke urua ifan̄ man ọsọn̄ọ mbuọtidem esie ke Abasi, esịtekọm esie kaban̄a mme mbonoesop Christian, ye ntre ntre. Itie ebuana oro odude ke ufọt mme ekpemerọn̄ ye otuerọn̄ etie nte enyeoro odude ke ufọt ete ke ndinọ item ye ke ufọt eka ke nditie sụn̄sụn̄. (1 Thessalonica 2:7, 8, 11) Edi, ibat ibat mbiowo ye mme asan̄autom unamutom ikemeke ndise mban̄a kpukpru n̄kpọ oro ẹyomde ke esop. Kpukpru nnyịn itie nte ubon emi mbonubon ẹn̄wamde kiet eken. Nnyịn owo kiet kiet imekeme ndinam n̄kpọ ndin̄wam ekemmọ mme andituak ibuot. Afo ke idemfo emekeme ndinọ nsịnudọn̄, ọsọn̄ọ mbon iduọesịt idem, an̄wam mbon mmemidem.—1 Thessalonica 5:14, 15.
20. Nso ke afo ekeme ndinam man asuan ifiọk Abasi onyụn̄ ọnọ erọn̄ emi Jehovah ọbọkde ima ima ukpeme?
20 Ubonowo oyom ifiọk Abasi, ndien nte Ntiense Jehovah, afo emekeme ndinyene idara idara ebuana ke ndisuan enye. Erọn̄ Jehovah ẹyom ima ima ukpeme, ndien afo emekeme ndinyene ima ima udeme ke ndin̄wam ndinọ emi. Jehovah akpakam ọdiọn̄ utom ukwọrọikọ fo, ndien enye akpakam ọnọ fi utịp ke ukeme ofụri esịt oro afo esịnde ndin̄wam erọn̄ ẹmi enye ọbọkde.
[Mme Ikọ idakisọn̄]
a Ke ini emi, obufa owo emi ekeme ndibọ n̄wed Ẹtịm Man Inam Utom Nnyịn Ima.
b Watchtower Bible and Tract Society of New York, Inc., emịn̄.
c Watchtower Bible and Tract Society of New York, Inc., emịn̄.
d Utọ ndutịm oro kaban̄a mme asuanetop oro mînaha baptism ama odu ke ibuotikọ oro “Ndin̄wam Mmọ En̄wen Ẹtuak Ibuot Ẹnọ Abasi,” emi okodude ke Enyọn̄-Ukpeme eke November 15, 1988, page 15-20.
e Edieke ubiere edide edisio mfep ndien ẹsion̄o ikpe, ẹyemụm ntọt ẹnịm. Se page 147-148 ke n̄wed Ẹtịm Man Inam Utom Nnyịn Ima.
Didie ke Afo Ọkpọbọrọ?
◻ Didie ke Jehovah anam n̄kpọ ye erọn̄ esie?
◻ Nso ke ẹnam ke ini mbufa owo ẹyomde ndikwọrọ ikọ?
◻ Didie ke ekemmọ mme andinịm ke akpanikọ ẹkeme ndin̄wam mbufa owo oro ẹyomde san̄asan̄a un̄wam?
◻ Nso un̄wam ke mbiowo ẹkeme ndinọ mbon oro ẹnamde idiọkn̄kpọ edi ẹmi ẹkabarede esịt?
◻ Didie ke afo ekeme ndin̄wam owo emi anade baptism obufa ‘ọkọri osịm ọyọhọ idaha’?
[Ndise ke page 16]
Ẹma ẹtịm ẹdiọn̄ọ Charles T. Russell nte ima ima ekpeme otuerọn̄
[Ndise ke page 18]
Mme ima ima ekpemerọn̄ ẹnam n̄kpọ ye otuerọn̄ Abasi ke ima