Nte Afo Emeti?

Nte afo omokụt nte mme nsiondi Enyọn̄-Ukpeme eke ndondo emi ẹnyenede ata ufọn ẹnọ fi? Do ntak mûdaha mme mbụme ẹtienede mi udomo ibuot uti n̄kpọ fo use:

◻ Nso ukpepn̄kpọ ke nnyịn ikeme ndikpep nto iduọ nditọ Ammon? (Zephaniah 2:9, 10)

Jehovah ibatke edida idiọk nsio usiene mfọn esie ke ekpri n̄kpọ, ndien ke ekemini esie, enye eyefiak anam n̄kpọ, kpa nte enye akanamde ke eset. (Men Psalm 2:6-12 domo.)—12/15, page 10.

◻ Ke mme usụn̄ ewe ke mme Christian ẹnyene emem?

Akpa, mmọ ẹnyene “emem ye Abasi oto ke Ọbọn̄ [mmọ] Jesus Christ.” (Rome 5:1) Ọyọhọ iba, mmọ ẹnyene emem ke otu idemmọ ebe ke ndikọri “eti ibuot emi otode ke enyọn̄,” emi edide “edisana ke mbemiso, onyụn̄ etie emem emem.” (James 3:17)—1/1, page 11.

◻ Nso idi ndusụk n̄kpọ emi ẹmende ẹdomo ye Ikọ Abasi, ndien didie ke emi an̄wam nnyịn?

Ẹmen Ikọ Abasi ẹdomo ye mmọn̄eba oro ọnọde nsọn̄idem, ọkpọsọn̄ udia, mmọn̄ oro ọnọde nduọkodudu onyụn̄ eyetde n̄kpọ asana, ukụtiso, ye edisọp ofụt. Ndifiọk se ikọ ẹmi ẹwọrọde an̄wam asan̄autom ndikama Bible ke usọ.—1/1, page 29.

◻ Nso ke ubọ ukpep ererimbot oro adade ukem ukem akpan̄wam nnyịn ndinam?

Ndikot n̄wed udọn udọn, ndiwet n̄kpọ ọfọn, ndikọri ke ekikere ye ke ido uwem, ye ndibọ eti ukpep oro ẹyomde ke uwem eke usen ke usen ye edisana utom oro enyenede uforo.—2/1, page 10.

◻ Nso eti ukpepn̄kpọ oro aban̄ade ubọ ukpep ke nnyịn ikeme ndikpep nto Jesus?

Ukpep oro ibọde ikpedịghe ndida nnọ idem nnyịn ubọn̄, edi ndida itoro nsọk akakan Ọnọ Ukpep, Jehovah Abasi. (John 7:18)—2/1, page 10.

◻ Nso idi Obio Ubọn̄ Abasi?

Obio Ubọn̄ edi ukara eke heaven oro Abasi owụkde emi anamde ẹnam uduak Abasi oro edide edisio mme odudu idiọkn̄kpọ ye n̄kpa mfep nnyụn̄ mfiak n̄wụk ndinen idaha ke isọn̄. (Daniel 2:44; Ediyarade 11:15; 12:10)—2/1, page 16.

◻ Didie ke Bible ọnọ ukpep oro ẹyomde man ẹmen afai ẹfep ke nsinsi?

Ebede ke Ikọ esie, kpa Bible, Jehovah ekpep mme owo ndidi mme ama emem ye edinen ido. (Isaiah 48:17, 18) Ikọ Abasi enyene odudu ndisịm nnyụn̄ ntụk esịt owo, okpụhọde ekikere ye eduuwem esie. (Mme Hebrew 4:12)—2/15, page 6.

◻ Ke nso usụn̄ ke ẹkeme ndidọhọ ke prọfesi eke Isaiah ibuot 35 enyene edisu ita?

Prọfesi Isaiah ekenyene akpa edisu ke ini mme Jew ẹketode ntan̄mfep mbon Babylon ẹnyọn̄ ke 537 M.E.N. Enye enyene edisu eke spirit oro akade-ka iso mfịn toto nte ẹkesio Israel eke spirit ke ntan̄mfep Akwa Babylon. Ndien enye eyenyene ọyọhọ edisu ita ke ebuana ye un̄wọn̄ọ Bible oro aban̄ade mme ataata idaha paradise ke isọn̄. (Psalm 37:10, 11; Ediyarade 21:4, 5)—2/15, page 17.

◻ Didie ke ẹkewụt ọkpọkpọ udọn̄ oro Abasi enyenede ke idem mme owo ke mme utịben̄kpọ oro Eyen esie, Jesus, akanamde?

Sia Jesus “[mî]kemeke ndinam baba n̄kpọ ke Idem Esie, ke mîbọhọke se okụtde nte Ete anamde,” mbọm esie owụt ima ima edikere mban̄a oro Jehovah enyenede ọnọ mme asan̄autom esie kiet kiet. (John 5:19)—3/1, page 5.

◻ Nso ke ikọ Jesus oro “mme udi editi” oro ẹdade ke John 5:28, 29 (NW) ọwọrọ?

Ikọ Greek oro mne·mei’on (udi editi) oro ẹdade mi ọnọ ekikere nte ke Jehovah eti mbụk aban̄ade owo oro akpade, esịnede mme ndammana edu ye ọyọhọ ukeme uti n̄kpọ esie. Emi ọnọ ọkpọsọn̄ uyarade nte ke Abasi ekere aban̄a mme owo nte owo kiet kiet!—3/1, page 6.

◻ Ewe ntọt edidụri owo utọn̄ ke prọfesi Zephaniah edi n̄kpọ un̄wam ọnọ nnyịn?

Idahaemi idịghe ini ndiyak eyịghe ọdọn̄ n̄kam ke esịt nnyịn ndinyụn̄ nsịk edidi usen Jehovah nnịm ke ekikere nnyịn. N̄ko, nnyịn ikpenyene ndikpeme mbiọn̄ọ odudu unana udọn̄ oro akamade mmemidem. (Zephaniah 1:12, 13; 3:8)—3/1, page 17.

◻ Ntak emi edisọn̄ọ nda ye Abasi edide n̄kpọ-ata?

Koro nsọn̄ọnda atatuaha ye ibụk ibụk udọn̄ ẹmi nnyịn ikadade ito ete ye eka nnyịn. (Genesis 8:21; Rome 7:19) Ke edide akpan n̄kpọ akan, Satan ye mme demon esie ẹbiere ndinam nnyịn ikûnyene nsọn̄ọnda inọ Abasi. (Ephesus 6:12; 1 Peter 5:8)—3/15, page 10.

◻ Ke ewe ikpehe inan̄ ke ana nnyịn ikan n̄kpọ-ata eke edinyene nsọn̄ọnda, ndien nso idin̄wam nnyịn ndinam ntre?

Ikpehe inan̄ ẹdi ndinyene nsọn̄ọnda nnọ Jehovah, ndutịm esie, esop esie, ye mme nsan̄andọ nnyịn. Un̄wam kiet ke ndikan n̄kpọ-ata ẹmi edi ndidiọn̄ọ nte ke n̄kpọ-ata eke edinyene nsọn̄ọnda enyene n̄kpet n̄kpet ebuana ye ediwụt unen itie edikara Jehovah.—3/15, page 20.

◻ Nso ukpepn̄kpọ ke nnyịn ikeme ndibọ nto ifiọk n̄kpọntịbe David ke ndidomo ndimen ekebe ediomi n̄ka Jerusalem? (2 Samuel 6:2-7)

David ama ofụmi item ẹmi Jehovah ọkọnọde aban̄a edimen Ekebe oro, ndien emi ama ada afanikọn̄ edi. Ukpepn̄kpọ edi nte ke nnyịn ikpedehede iduọhọ Jehovah ke mme mfịna oro inyenede ke ini nnyịn ifụmide mme in̄wan̄în̄wan̄ item esie. (Mme N̄ke 19:3)—4/1, page 28, 29.